Fakataha Fika Nimá
Ko Hono Fakamālohia e Loto-falalá
Ngaahi Taumuʻa ʻo e Fakatahá
Lolotonga e fakataha ko ʻení, tokoni ki he mātuʻá:
-
Ke mahino e ʻuhinga ʻoku mahuʻinga ai ki he fānaú ke nau maʻu e loto-falalá.
-
Ke mahino e founga ʻoku fakatupulaki ai ʻe he fānaú e loto-falalá.
-
Ke ʻiloʻi e founga te nau lava ʻo tokoni ai ki heʻenau fānaú ke fakatupulaki ha loto-falala ʻoku lahi angé.
Ko e Fie Maʻu ki Hono Fakahūhū e Loto-falalá
ʻOku lelei ange ʻa e moʻui ʻa e fānau ʻoku nau maʻu e loto falalá. ʻOku nau moʻui lelei ange, vilitaki ange, fiemālie ange ʻi he moʻui fakasōsialé, pea ongoʻi malu fakaeloto ange ʻi he fānau ʻoku ʻikai ke nau maʻu e loto-falalá. Ko e fānau ʻoku ʻikai ke nau maʻu e loto-falalá ʻoku nau fakahehema ke loto-hohaʻa ange, taʻefiemālie, mā he feohi fakasōsialé, loto-foʻi, manavahē, mo fakahehema ai pē ki he ʻikai ke lavameʻá.
Ko ha kiʻi taʻahine ngāue taʻu 24 naʻe lehilehiʻi hake ʻi ha ʻapi angaʻofa ʻe ha ongomātuʻa naʻá na fakatokangaʻi ʻene ngaahi lavameʻá mo ʻene ngaahi taukeí. Naʻe lelei ʻene akó, lahi hono ngaahi kaungāmeʻá, peá ne kau he ngaahi ʻekitivitī lahi ʻa e akó mo e siasí. Naʻá ne pehē ʻi heʻene vakai ki heʻene moʻui he kuohilí: “Naʻe ʻikai ke u manavahē ke u ʻahiʻahiʻi ha ngaahi meʻa foʻou koeʻuhí he naʻá ku ʻiloʻi hoku mahuʻinga ki he ʻOtuá, ʻeku ongomātuʻá, mo hoku ngaahi kaungāmeʻa fafalé. Naʻa nau poupouʻi kotoa au ke u fai hoku lelei tahá. Ko e lāngilangi ne u maʻu ʻi ʻapí naʻe fuʻu mahuʻiga ia ʻi he taimi ne u kei siʻi aí, ka kuo ʻikai ke kei mahuʻinga ia ʻi heʻeku hoko ʻo motuʻa angé koeʻuhí he ʻoku ou ʻilo ʻoku ʻafioʻi mo ʻofaʻi au ʻe he ʻOtuá. ʻOku ou ʻilo kapau te u moʻui angatonu, ʻo fakatatau ki Heʻene palaní, ʻe hoko e ngaahi meʻa mahuʻinga tahá ʻo ʻaonga kiate au.”
ʻOku saiʻia e mātuʻa tokolahi ke fakatupulaki ʻe heʻenau fānaú ha loto-falala ʻoku ʻi ha tuʻunga māʻolungá, ʻo hangē ko ia ne fiefia ai e finemui ko ʻení. ʻOku angamaheni ʻaki ke maʻu ʻe he fānaú ha loto-falala ʻi he ngaahi tafaʻaki ʻe niʻihi kae ʻikai ke nau maʻu ha loto-falala ʻi he niʻihi. ʻE fuʻu lelei ʻaupito ha ngāue fakaako ʻa ha tamasiʻi ka ne ongoʻi ʻoku ʻikai ke fuʻu malu fakasōsiale pe fakatuʻasino. ʻE fuʻu lelei ʻaupito ha tamasiʻi ʻe taha ʻi he sipotí kae ʻikai ke sai ʻene ngaahi ʻilo fakaakó. ʻOku fie maʻu ke tokoni e mātuʻá ki he fānaú ke nau maʻu ha loto-falala ʻi he ngaahi tafaʻaki ʻoku mahuʻinga ki he tuʻunga lelei ʻa e fānaú. ʻOku totonu ke fakatokangaʻi mo fakaʻapaʻapaʻi ʻe he mātuʻá ʻa e ngaahi meʻa ʻoku saiʻia ai e fānaú, ngaahi talēnití, mo e ngaahi meʻa ʻoku nau malavá.
Ko Hono Tokoniʻi e Fānaú ke Fakatupulaki e Loto-falalá
ʻOku fakahoko ʻe he mātuʻá ha ngaahi meʻa lahi ke tokoni ki heʻenau fānaú ke nau maʻu e loto-falalá. ʻOku lava ke nau ʻohake ʻenau fānaú ʻaki e ʻofá mo e fakaʻapaʻapá. ʻOku lava ke nau tokoniʻi kinautolu ke nau tui ki he ʻOtuá pea fakatupulaki e angatonu fakatāutahá. ʻOku nau lava ʻo tokoni kiate kinautolu ke fakatupulaki ʻenau lavameʻá ʻi he ngaahi tafaʻaki ʻoku mahuʻinga ki honau tuʻunga leleí. ʻOku nau lava ʻo fakakau kinautolu ʻi hono tokoniʻi e niʻihi kehé.
Tokangaʻi e Fānaú ʻaki e ʻOfá mo e Fakaʻapaʻapá
ʻOku faʻa fakakaukau e fānaú kiate kinautolu ʻo fakatatau ki he anga hono tokangaʻi kinautolu ʻe he niʻihi kehé tautautefito ki he mātuʻá mo e ngaahi tokouá. ʻI he taimi ʻoku ʻofaʻi mo tali ai kinautolú, ʻoku nau fakahehema ke nau ongoʻi ʻoku ʻofeina mo tali lelei kinautolu. Kapau ʻoku ʻofaʻi pē kinautolu ʻi ha ngaahi tuʻunga pe ʻuhinga, ʻoku nau faʻa ongoʻi ʻoku nau mahuʻinga pē ʻi he taimi ʻoku nau fakafiemālieʻi ai e niʻihi kehé. Kapau ʻoku ngaohikoviʻi kinautolu, ʻoku nau fakahehema ke nau ongoʻi ʻoku ʻikai ke nau malu mo taʻemahuʻinga.
Taimi ʻe niʻihi ʻoku toʻo maʻamaʻa pē ʻe he mātuʻá e ola ʻo ʻenau ngaahi tōʻonga ki heʻenau fānaú. ʻOku ʻi ai ha ngaahi mātuʻa ʻofa ʻe niʻihi ʻoku nau fai ha ngaahi lea taʻefakakaukau ʻo ne maumauʻi e ongoʻi loto-falala mo e mahuʻingaʻia ʻa e fānaú ʻiate kinautolú. Naʻe pehē ʻe ha faʻē ʻe taha ne fakahehema ke fakaangaʻi hono foha ne kei ako he ako tokamuʻá, “Ko e moʻoni ʻoku hā fakaoli ho ihú.” Hili ha taʻu ʻe nimangofulu mei ai, naʻe fakahā ʻe he fohá ki hono ngaahi tokouá ʻi haʻanau fakataha fakafāmili naʻá ne ongoʻi mā ʻi hono ihú ʻi he kotoa ʻo ʻene moʻuí koeʻuhí ko e lea ko iá. Naʻe ʻohovale hono ngaahi tokouá, he naʻe ʻikai ha meʻa fakaoli pe ngalikehe ʻi hono fōtungá.
Naʻe fakapapauʻi ʻe ʻEletā H. Peeki Pitasoni ʻo e Kau Fitungofulú ʻa e mālohi ʻo e ʻofá ʻi hono liliu e moʻui ʻa e fakafoʻituituí: “Kuo lava ʻe he niʻihi ʻoku nau loto falala koeʻuhí ko hono ʻofaʻi kinautolú ʻo kaka ʻi ha ngaahi moʻunga faingataʻa. ʻOku fonu e ngaahi pilīsoné mo e ngaahi ngāueʻangá pea aʻu pē ki he ngaahi ʻapi ʻe niʻihi ʻi ha kakai ʻoku nau fie maʻu ʻa e ʻofá.”1
Taimi ʻe niʻihi ʻoku faingataʻa ke ʻofaʻi e fānau ʻoku taʻe fakaʻapaʻapá. ʻOku nau fakahehema ke lea ʻaki mo fai e ngaahi meʻa ʻoku nau fakatupu e ʻita ʻenau mātuʻá mo e ngaahi ʻongo ʻo e taʻelavameʻá. ʻI hono tali ʻe he mātuʻá, ʻoku nau faʻa lea ʻaki mo fai e ngaahi meʻa ʻoku nau fakaloloto e ongoʻi ʻe he tamasiʻí ʻoku ʻikai hano mahuʻingá mo e holi ke angatuʻú.
Naʻe ola lelei hono tākiekina ʻe Sīsū Kalaisi e niʻihi kehé koeʻuhí he naʻá Ne fili fakapotopoto ʻEne tali kiate kinautolú (vakai, Sione 8:11). ʻOku faʻa lava e kau taki ʻo e Siasí mo e kau taukeí ʻo tokoni ki he niʻihi fakafoʻituitui ʻoku faingataʻaʻiá ʻaki ʻenau fakafanongo kae ʻikai ke ʻomi leva ha tali, fai ha fakahinohino kae ʻikai ke malanga, pea ʻofaʻi mo poupouʻi kae ʻikai ke fakafisingaʻi. ʻOku lava foki ke ʻofaʻi mo fakaʻapaʻapaʻi ʻe he mātuʻá ʻa e fānaú, ʻo tatau ai pē mo e taimi ʻoku nau talangataʻa aí. ʻOku nau lava ke tokangaʻi ha kiʻi tamasiʻi anga taʻefakaʻapaʻapa ʻaki e manavaʻofá, fakanonga e lotó mo tokoni kiate ia ke ne maʻu e melinó mo e loto-falalá ʻi ha māmani ʻoku fonu faingataʻa.
ʻOku lava ke fakaleleiʻi e ngaahi vā fetuʻutaki ʻoku ʻikai leleí ʻi he taimi ʻoku loto fiemālie ai ha taha ke ne motuhi e siakalé pea fetongi e ʻitá ʻaki e manavaʻofá pea mo ha tali ʻoku fakapotopotó. Ko e ngaahi fokotuʻu ʻeni ki he mātuʻá.
ʻIloʻi ha ngaahi founga ke fakahaaʻi ai e ʻofá mo e fakaʻapaʻapá. ʻOku totonu ke ʻiloʻi ʻe he mātuʻá ha ngaahi founga ke fakahaaʻi ai e ʻofá mo e fakaʻapaʻapá ki heʻenau fānaú, ʻo tatau ai pē mo e taimi ʻoku anga taʻefakaʻapaʻapa mo talangataʻa ai e fānaú. ʻOku lava ʻe he mātuʻá ʻo fai ʻeni ʻo ʻikai fakamolemoleʻi e ʻulungaanga taʻefeʻungá. Ko hono moʻoní, ko e taimi ʻoku ʻofaʻi ai ʻe he mātuʻá ʻenau fānaú, ʻoku ʻi ai ʻenau kaunga he taimi ʻoku talangataʻa ai e fānaú. ʻOku tokanga taha e ngaahi fakataha kehé ki he ngaahi founga ʻoku lava ai e mātuʻá ke ʻofa mo fakatonutonu ʻenau fānaú—ʻaki ʻenau fakafanongo mo talanoa mo kinautolu, lehilehiʻi kinautolu, tokoni kiate kinautolu ke fakaleleiʻi e ngaahi palopalemá, fevahevaheʻaki e ngaahi meʻa ʻokú na ʻamanaki ki aí, ʻoange ha ngaahi fili ke nau fai, mo fakahaaʻi e ngaahi ola fakanatula mo fakaeʻuhingá. ʻOku totonu ke fai e ngaahi meʻa kotoa ko ʻení ʻi he ʻofa, ʻo ʻikai ko e ʻita. Ko e ʻofá ko e tefitoʻi moʻoni pule ia ʻoku totonu ke ne poupouʻi mo tataki e fengāueʻaki ʻa e mātuʻá mo e fānaú. ʻOku lava ʻe he mātuʻá ʻo fakahaaʻi e ʻofá mo e fakaʻapaʻapá ki ha tamasiʻi talangataʻa ʻi he ngaahi founga lahi.
-
Te na lava ʻo siofi ha taimi ʻe anga lelei ai e tamasiʻí pea fakahīkihikiʻi ia—”ʻOku ou houngaʻia moʻoni ʻi he taimi ʻokú ke hū mai ai ʻo tokoni ʻi heʻetau ngaahi ngāue fakaʻapí”; “ʻOku ou laukau ʻaki koe ʻi hoʻo tokoni ki ho kiʻi tuofefine siʻisiʻí.” ʻOku totonu ke tokanga e mātuʻá ke ʻoua ʻe fuʻu tōtuʻa ʻenau fakahīkihikí he ʻe ongo fakavaʻivaʻinga pea mōlia e lelei ʻo e fakahīkihikí.
-
Te na lava ʻo fakahaaʻi e ʻofá—”Sipeni, ʻoku ou loto ke ke ʻilo ʻoku ou ʻofa ʻiate koe pea ʻoku ou fiefia he ko e taha koe hotau fāmilí.”
-
Te na lava ʻo fakahaaʻi ha ʻofa fakatuʻasino. Taimi ʻe niʻihi ko ha kiʻi ala pē he umá pe ko e nimá, fakataha mo ha ngaahi lea ʻofa, hangē ko e “ʻOku lelei ʻeta feʻiloakí– ʻoku lava ke tokoni ia. ʻOku ʻikai totonu ke loto mamahi e mātuʻá pe fai ha meʻa ʻoku ʻikai ke lelei kapau ʻoku ngalingali matalili e fānaú ʻi hono fakahaaʻi ko ʻeni ʻo e ʻofá. Ko e alá mo hono fakahāʻí ʻe ʻuhingamālie lahi ange ia ki he tamasiʻí ʻi haʻane loto fiemālie ke tali ia.
ʻOua ʻe teitei lea ʻaki ha meʻa ʻoku ʻikai ke lelei kau ki he fānaú. Kapau kuo lea ʻaki ʻe he ongomātuʻá ha ngaahi meʻa ʻoku ʻikai lelei kau ki heʻena fānaú, ʻoku totonu ke taʻofi leva pea fakatukupaaʻi kinaua ke ʻoua naʻá na toe fai ia, tatau ai pē pe ʻoku anga fēfē ʻena ʻitá pe ko ʻena ʻongoʻi ʻokú na tonuhiá. Ko e taimi ʻoku fie maʻu ai ha valokí, ʻe lava ʻe he mātuʻá ʻo tauteaʻi kae ʻoua ʻe fakaʻaongaʻi ha ngaahi lea fakamā. Ko e ngaahi lea ʻoku ʻikai ke lelei ʻoku lea ʻaki ʻe he mātuʻá ʻe tō loloto ia ʻi he manatu ʻenau fānaú, ʻo ne uesia ai e anga ʻenau sio kiate kinautolú mo e anga ʻenau tōʻongá. Ko e ngaahi lea taʻefakakaukaú ʻoku ʻi ai hono ngaahi ola tuʻuloa hangē ko e “ʻOku ʻikai koā te ke lava ʻo fai ha meʻa ke tonu? pe “ʻOkú ke fuʻu vale ʻaupito,” Naʻa mo e ngaahi ʻuhinga lelei pē kae ʻikai ke lelei hono lea ʻakí, ʻoku lava ke ne fai ha maumau, hangē ko e “ʻOku feinga mālohi ʻa Taniela, ka ʻoku ʻikai ke talenitiʻia hangē ko Henelií.”
Kolotoni
Ko e taimi naʻe aʻu ai ʻa Kolotoni ki he ako māʻolungá, naʻe meimei tō kotoa ʻene ngaahi kalasí. Naʻá ne faʻa nofo he akó (naʻe ngāue fakatouʻosi ʻene ongomātuʻá peá na ʻalu he lolotonga e ʻahó), kamata ke ne kau ʻi he ifi tapaká mo hono fakaʻaongaʻi e faitoʻo konatapú, pea naʻe puke ia ko e kaihaʻa. Kuo ʻikai ke toe ʻalu ia ki he lotú lolotonga hono taʻu ʻuluaki ʻi he ako lotolotó. Naʻe faʻa fakafekiki mo ʻene tamaí, ʻo aʻu ki he tuʻunga ne fakamanamana ʻaki e taá.
Ne aʻu kia Kolotoni e tokoni ʻene pīsopé ʻi he ʻofa mo e anga fakakaumeʻa, ʻo fakalotolahiʻi ia ke ne siʻaki e faitoʻo konatapú mo liliu ʻene moʻuí. Ne kamata ke tali lelei ʻe Kolotoni. Naʻá ne taʻofi ʻene ifi tapaká, tuku ʻene fakafekiki mo ʻene ongomātuʻá, pea kamata ke haʻu ki he houalotu sākalamēnití. ʻI he ʻaho ʻe taha, naʻe lea ʻita ange ʻene tamaí ʻa ia naʻa ne lolotonga fefaʻuhi mo ʻene palopalema pē ʻaʻana, “Ko e hā ʻoku ʻikai te ke taʻofi ai e ʻulungaanga fakavaʻivaʻinga ko ʻení pea tuku hoʻo fakangalingalí?” Neongo naʻe ʻikai ke lea ʻa Kolotoni, ka naʻá ne ongoʻi lōmekina. Talu mei he momeniti ko iá, naʻá ne toe foki ki hono ʻulungaanga kimuʻá. Naʻe ʻikai ke toe lava ʻe he pīsopé ʻo fakalotoa ia ke ne toe foki ʻo ʻaʻahi ange.
Fokotuʻu ha sīpinga lelei maʻá e fānaú. ʻOku totonu ke feinga e mātuʻá ke nau fiefia. ʻOku totonu ke nau feinga ke nau saiʻia ʻiate kinautolu pea ʻoua ʻe polepole pe hīkisia, lea fakaʻapaʻapa kau ki heʻenau ngaahi lavameʻá mo honau ngaahi ʻulungaanga fakatāutahá. Kapau ʻoku ʻi ai ha palopalema ʻa e mātuʻá ʻoku faingataʻa ai ke nau fai ʻení, ʻoku fie maʻu ke nau fai ha ngāue ki ai ke ʻoua ʻe toe hoko atu e ngaahi palopalema ko ʻení ki heʻenau fānaú. ʻOku totonu ke nau kumi tokoni ʻo ka fie maʻu. Naʻe manatu ha kiʻi finemui loto-mamahi ʻo aʻu ki he ngataʻanga ʻo ʻene manatú, naʻe lea fakahāhā ʻene faʻeé ʻo kau ki heʻene tōnounoú mo ʻene fehiʻa ʻiate ia peé. “Ne u fakaʻosi ʻaki kapau naʻe ʻikai lelei feʻunga e Faʻeé, he ʻikai lava ke u lelei ange, koeʻuhí ko hoku konga ia.” Taimi ʻe niʻihi ko e fānau ʻoku nau fehiʻa taha heʻenau ongomātuʻá ʻoku nau iku ʻo hangē tofu pē ko ʻenau ongomātuʻá. ʻE tākiekina lahi ʻe he sīpinga ʻa e ongomātuʻá ʻena fānaú, naʻa mo e taimi ʻoku ngali ke fakafisingaʻi ai ʻe he fānaú ʻenau mātuʻá.
Fakahaaʻi ʻoku nau mahuʻingaʻia ʻi he fānaú mo tokanga kiate kinautolu. ʻE ala faingataʻaʻia foki e mātuʻá hono fakahaaʻi ʻenau mahuʻingaʻia mo e tokangá kapau ʻoku talangataʻa mo fakaʻikaiʻi kinautolu ʻe heʻenau fānaú. Ka ʻoku mahuʻinga e feingá. Naʻe fakatau mai ʻe ha tamai ʻe taha naʻe ʻikai loko lahi ʻene maʻuʻanga paʻangá ha ngaahi tikite ki he vaʻinga hoki he ʻaisí ke ʻalu mo hono fohá, ko ha taha naʻe nofo teʻeki ʻosi e akó pea naʻá ne ngāue ʻaki foki e faitoʻo konatapú naʻe saiʻia he vaʻingá pea ʻe fie ʻalu foki mo ia. Naʻe toki fakaʻatā mai ʻa e fohá mei ha taukei ki he faitoʻo konatapú pea naʻe faingataʻa ke ne mavahe mei he faitoʻo konatapú. Naʻe tokoni e aʻusia ko ʻení ke fakatupulaki hona vā fetuʻutakí, ʻo lava ai ke fepōtalanoaʻaki e tamaí mo e fohá kau ki ha meʻa ʻokú na fakatou saiʻia ai pea fakatupulaki ʻena feongoʻaki lelei kiate kinaua.
Ko Hono Tokoniʻi e Fānaú ke Nau Maʻu ha Tui ki he ʻOtuá
ʻOku maʻu ʻe he fānaú ha loto-falala ʻoku lahi ʻi he taimi ʻoku nau ongoʻi malu ai ʻi honau vā fetuʻutaki mo e Tamai Hēvaní mo ʻenau malava ke maʻu e ngaahi tāpuaki fakalaumālié, ngaahi talaʻofá, mo e fakahinohino ki heʻenau moʻuí. Naʻe ako ʻaki ʻe Sīsū Kalaisi, “ʻOku faʻa fai ʻa e ngaahi meʻa kotoa pē kiate ia ʻoku tuí” (Maʻake 9:23). ʻE ʻikai maʻu ʻe ha taha e loto-falalá kapau ʻe ʻikai ha tui. ʻOku haʻu foki e loto-falalá mei ha moʻui ʻoku maʻa mo angatonu.
Naʻe pehē ʻe Palesiteni Kōtoni B. Hingikelī ko e angamaʻá ko e “founga pē ia ʻe taha ke tauʻatāina ai mei he fakameʻapangoʻiá. ʻOku maʻu mei ai ʻa e nonga ʻo e konisēnisí ʻa ia ko e melino fakatāutaha ia ʻoku ʻikai ke loí.” Naʻá ne pehē foki:
“ʻOku lea mai ʻaki ʻe he leʻo ʻo e fakahā fakaonopōní ha talaʻofa—ko ha talaʻofa ʻoku ʻikai hano tatau ʻa ia ʻoku muimui mai ai ha fekau faingofua:
“Ko e fekaú ʻeni: ‘ … tuku ke ngaohi ke fakaʻofoʻofa maʻu ai pē ʻe he angamaʻá ʻa hoʻo ngaahi fakakaukaú.’ Pea ko e talaʻofá ʻeni ‘ … Pea ʻe ʻāsili mālohi ʻa hoʻo falalá ʻi he ʻao ʻo e ʻOtuá. …
“‘ʻE hoko ʻa e Laumālie Māʻoniʻoní ko ho takaua maʻu ai pē, … pea ko hoʻo pulé ʻe hoko ia ko e pule taʻengata, pea ʻe tafe mai ia kiate koe taʻe ʻi ai ha fakamālohiʻi ʻo taʻengata pea taʻengata.’ T&F 121:45–46.) …
“Ko ha monū ia moʻoku ʻi he ngaahi meʻa lahi kuo hokó ke fepōtalanoaʻaki mo e kau Palesiteni ʻo e ʻIunaiteti Siteití mo e kau tangata mahuʻinga ʻo e ngaahi puleʻanga kehé. ʻI he fakaʻosinga ʻo e ngaahi meʻa pehē ne hokó kuó u fakakaukau loto ki he aʻusia fakaʻofoʻofa ʻo e tuʻu mo e loto-falala ʻi he lotolotonga ʻo ha taki ʻiloa. Pea ne u toki fakakaukau, he toki meʻa fakaofo moʻoni, he toki meʻa fakaʻulia moʻoni ke tuʻu mo e loto-falala—taʻemanavahē mo taʻemā mo taʻemomou—ʻi he ʻao ʻo e ʻOtuá. Ko e talaʻofa ʻeni ʻoku ʻoatu ki he tangata mo e fefine angamaʻa kotoa pē.”2
ʻE tupulaki e fānaú ki he faʻahinga loto-falala pehē ʻi heʻenau ako ke moʻui faivelenga mo angamaʻá. Ke tokoniʻi e fānaú ke fakatupulaki e loto-falala ki he ʻEikí, ʻoku totonu ke fāifeinga e mātuʻá ke nau moʻui faivelenga mo angamaʻa, ko hono fakahaaʻi ia ʻenau tuí. ʻOku ako lelei taha pē e fānaú ʻi he taimi ʻoku hoko ai ʻenau mātuʻá ko e faʻifaʻitakiʻangá. ʻOku totonu ke “akonakiʻi hake [ʻe he mātuʻá ʻenau] fānaú ʻi he māmá mo e moʻoní” (T&F 93:40), ʻo ʻai e ngaahi ʻekitivitī fakalaumālié ko e konga ʻo ʻenau moʻui fakaʻahó (lotu fakafāmilí, ako e folofolá, fealeaʻaki ʻi he ongoongoleleí, mo kau ki he meʻa ʻa e Siasí).
Tokoniʻi e Fānaú ke Fakatupulaki e Angatonu Fakatāutahá
Kuo foaki ki he fānaú ʻa e Maama ʻo Kalaisí (vakai, Sione 1:9; Molonai 7:16; T&F 93:2) pea, ko ʻenau aʻu pē ki he taʻu motuʻa ʻo e ʻekea meiate kinautolu e meʻa ʻoku nau fai pe taʻefaí, ʻoku nau lava ke fakafaikehekeheʻi e meʻa ʻoku tonú mei he meʻa ʻoku halá. ʻI he fakafanongo ʻa e fānaú ki honau konisēnisí mo muimui ki heʻenau fakaʻutoʻuta lelei tahá, ʻoku siʻisiʻi ange leva ʻenau fakafalala ki he niʻihi kehé kae lahi ange ʻenau maʻu e loto-falala kiate kinautolu peé pea mo e malava ke nau fai ha ngaahi fili ʻoku leleí. Lolotonga ʻa e pau ko ia ke akoʻi e fānaú ke nau tokanga ki he faleʻi fakapotopoto ʻa e mātuʻá mo e kau taki ʻo e Siasí, kuo pau foki ke nau ako ke fakakaukau maʻanautolu pē pea fakatupulaki ha loto-falala ke nau malava ke fakalele ʻenau moʻuí. ʻOku tupulaki e malava ko ʻeni ke fai ha meʻá ʻi he matuʻotuʻa ʻa e fānaú pea nau ako ke tokanga ki he ngaahi ueʻi mei lotó. ʻE lava e mātuʻá ʻo poupou ki he tupulakí ʻaki ʻenau tokoni ki heʻenau fānaú ke nau fakafanongo ki heʻenau ngaahi fakakaukau ki hono fakafuofuaʻi pē kinautolú pea moʻui ʻo fakatatau mo e Maama ʻa Kalaisi ʻoku ʻiate kinautolú.
ʻI ha meʻa ʻe taha naʻe hoko, naʻe ʻomai ʻe he kau tangata tohí mo e kau Fālesí ha fefine naʻe tono tangata kia Sīsū, ʻo nau fehuʻi ange pe ʻoku totonu ke tolomakaʻi ia ʻo hangē ko hono fakamahino ʻe he fonó. Naʻe fakamahino ange ʻe Sīsū ʻenau loto fakamāú: “Ko ia ia ʻiate kimoutolu ʻoku taʻeangahalá, ke lī ʻe ia ʻa e fuofua maká ki ai” (Sione 8:7). ʻI he taimi ne fakafuofuaʻi ai ʻe he kau tangata tohí mo e kau Fālesí honau ʻulungāngá, naʻe ʻikai ke nau toe lava ʻo lea, pea “valokia ʻa kinautolu ʻe honau ʻatamaí” ʻo nau “taki taha” mavahe (v. 9).
ʻI he taimi ʻoku maʻu ai ʻe ha taha ha ʻulungaanga ʻokú ne fakakaukau ʻoku talí, ʻoku lelei pē ʻene ngaahi fakakaukau kiate iá, ʻo iku ki heʻene fiemālie kiate ia pē mo maʻu e loto-falalá. ʻI he taimi ʻoku maʻu ai ʻe ha taha ha ʻulungaanga ʻoku ʻikai ke talí, ko hono olá ʻoku angamaheni ʻaki ke ne taʻefiemālie pē ia kiate ia pea mole ʻa e fakaʻapaʻapaʻi pē ʻo kitá.
ʻOku fakatātaʻi ʻe he ngaahi sīpinga ko ʻení ʻa e founga hono fakafuofuaʻi kitá:
Loni, Lepeka, Mo Kālosi
ʻOku veteki ʻe Loni ha palopalema fakafika faingataʻa. ʻOku lelei pē ʻene fakafuofuaʻi iá: ʻOku ou lava ʻo fai ʻeni. Te u maʻu ha maaka lelei ʻi he kalasi ko ʻení.” ʻOku tupulaki ʻene loto-falalá.
ʻOku tala ʻe Lepeka ha meʻa loi. ʻOkú ne hā ngali lelei ki hono ngaahi kaungāmeʻá, ʻo aʻu ki heʻenau fāʻofua kiate ia. Naʻá ne ongoʻi fiefia ʻi ha kiʻi momeniti ka naʻá ne loto-lavea he naʻá ne ongoʻi halaia ʻi hono konisēnisí. ʻOku ʻikai ke lelei ʻene ngaahi fakakaukau ne fakafuofuaʻi ʻaki iá: “Ne u loi. Ko e meʻa hala ia ke fai. ʻOkú ne ʻai au ke u hā lelei, ka ko e loi kotoa ia.” ʻOku holo hono loto-falalá mo ʻene fakaʻapaʻapaʻi iá.
ʻOku fakafisi ʻa Kālosi ke kau mo hono ngaahi kaungāmeʻá ʻi hono fakakataʻaki ʻo Tomú, ko ha kaungāako ʻoku palopalema fakaesino. ʻOku kamata ke fakamavaheʻi ʻa Kālosi ʻe hono ngaahi kaungāmeʻá mei heʻenau kulupú. ʻOku ongoʻi loto mamahi ʻa Kālosi, ka ʻokú ne ʻilo foki kuó ne fai ʻa e meʻa totonú. ʻOku lelei ʻene ngaahi fakakaukau ki hono fakafuofuaʻi ia.
ʻI he taimi ʻoku fakahā ai ʻe ha tamasiʻi ha palopalema ki he mātuʻá, ʻoku totonu ke poupouʻi ia ʻe he mātuʻá, ʻi ha faʻahinga tuʻunga ʻoku mahino ki he tamasiʻí, ke fakakaukauʻi ʻene tui pau fakatāutahá mo e ngaahi ueʻi fakalaumālié. ʻOku lava ʻe he mātuʻá ke fai ha ngaahi fehuʻi ʻoku feʻungá, hangē ko e “ʻOku anga fēfē hoʻo ongoʻi kau ki he meʻa ko iá?” “ʻOkú ke fiemālie ki he founga kuó ke fai ki he palopalemá?” “Kuó ke talamai kiate au ʻa e meʻa ʻoku fakakaukau ho ngaahi kaungāmeʻá ʻoku tonú, ka ʻoku ou fie maʻu ke u ʻilo ʻa e meʻa ʻokú ke fakakaukau ki aí.” “Ko e hā e meʻa totonu ke faí?”
ʻI he taimi ʻoku kole ai e mātuʻá ki heʻena tamá ke ne fakafuofuaʻi hono ʻulungāngá, ʻoku totonu ke nau fai ia ʻi ha founga mokomoko, ʻoua ʻe tukuakiʻi, ʻoua ʻe fakahalaiaʻi.
ʻI he sīpinga fakatotolo ko ʻení, naʻe tokoniʻi ʻe ha faʻē haʻane tama fefine ke ne fakakaukau ki he ngaahi meʻa ʻoku tui pau fakatāutaha ki aí ko ha fakahinohino ia ki he ʻulungaanga ʻene tama fefiné.
Sinisā
Naʻe kamata ke fakaʻehiʻehi ʻa Sinisā, taʻu 14, mo hono kaungāmeʻa ko Sení meia ʻAlisoni mo feinga ke ʻoua te ne kau ʻi heʻenau ngaahi meʻa fakafeituʻú mo e ngaahi ʻekitivitī fakaakó. Naʻe ongoʻi loto mamahi mo tuenoa ʻa ʻAlisoni. Naʻe ʻilo ʻe he faʻē ʻa Sinisaá e meʻa ne hokó peá ne lea hangatonu ki heʻene tama fefiné.
|
Faʻē: |
ʻOku ou hohaʻa kiate koe mo ʻAlisoni. Ko e hā e meʻa ʻoku hokó? |
|
Sinisā: |
ʻOkú ne fakakaukau ko Misi Manakoa ia. ʻOkú ma tuku ia ko hono tuʻunga totonú. |
|
Faʻē: |
Pea ʻoku anga fēfē hoʻomo fai iá? |
|
Sinisā: |
ʻOkú ma fakamamaʻo mo Seni mei ai. Kapau ʻe haʻu, ʻoku ʻikai ke ma lea ki ai. Ko ia pē. |
|
Faʻē: |
Kuó ne fakaloto-mamahiʻi nai kimoua? |
|
Sinisā: |
ʻIkai. ʻOku ʻikai pē ke ma saiʻia ai. Te ne lava pē ʻo Misi Anga-hiki ʻi ʻapiako kae ʻikai ʻi he feituʻú ni. |
|
Faʻē: |
ʻOku ou fie ʻilo, Sinisā. ʻOkú ke ongoʻi fēfē kiate koe he taimi ʻokú ke peheʻi ai iá? |
|
Sinisā: |
(Tulitonuhia.) ʻOi, ʻoku taau pē mo ia. ʻOku fie maʻu ke tuku ia ʻe ha taha ki hono tuʻungá. |
|
Faʻē: |
Ka naʻá ke talamai ʻoku ʻikai ke ne fai ha meʻa ke fakamamahiʻi ai koe. ʻOku ou fie ʻilo e anga hoʻo ongó kau ki hoʻo ngaohikoviʻi ha taha koeʻuhí pē he ʻoku ʻikai ke ke saiʻia ai. |
|
Sinisā: |
ʻOku ou ongoʻi lelei pē, pea ko e tahá, ʻoku ʻikai ke u fie talanoa kau ki ai. |
|
Faʻē: |
Sai, kapau ko hoʻo fakaʻamú ia. ʻOku ou ʻamanaki pē te ke fakakaukau lahi ange kau ki ai. ʻOku ou ʻofa lahi ʻiate koe, ka ʻoku ou faingataʻaʻia he meʻa ʻokú ke lea ʻakí. |
|
ʻI he efiafi hono hokó. Naʻe fekumi ʻa Sinisā ki heʻene faʻeé. | |
|
Sinisā: |
ʻOkú ke moʻoni. ʻOku ʻikai ke u ongoʻi lelei kau ki he founga kuó u faí. Naʻá ke tokoniʻi au ke u sio kiate au, pea naʻe ʻikai ke u saiʻia he meʻa ne u sio ki aí. Ko hono moʻoní, ʻoku ou meheka ʻia ʻAlisoni. ʻOku tokolahi hono ngaahi kaungāmeʻa he akó. ʻOku ou fakaʻamu ke u maʻu ha vaeua. ʻOku ou ʻilo ʻoku ʻikai ko ha ʻuhinga ia ke u angakovi ai kiate ia. Ne u ʻalu ʻo kole fakamolemole ki ai. ʻOku ou ongoʻi lelei ange. Fakamālō atu hoʻo tokoniʻi aú. |
Neongo he ʻikai ke fuʻu tali kotoa ʻe he fānaú ʻeni, ka ʻoku lava ke hoko ʻa e kole ange ke nau fakafuofuaʻi honau ʻulungāngá ko ha founga mālohi ia ke tokoniʻi ai kinautolu ke nau moʻui ʻo fakatatau mo e ngaahi tui mo e ngaahi ʻamanaki fakatāutahá. ʻOku faʻa ola lelei ange hono tokoniʻi kinautolu ke nau fakamāuʻi honau ʻulungaanga pē ʻonautolú koeʻuhí he ʻoku ʻikai ke fai ʻe he mātuʻá e fakamāú.
ʻI he taimi ʻoku fakahaaʻi ai ʻe he mātuʻá e fakafuofuaʻi pē ʻe kitá ʻi ha founga taʻeʻofa, fakamaau, mo fakahalaiaʻí, ʻe ala mole mei he tamasiʻí ʻene tokanga ki heʻene faihala fakatāutahá kae tokanga taha ia ki he ʻulungaanga tō ki tuʻa mo taʻefeʻunga ʻa e mātuʻá. Pea ʻe ala tali ʻe he tamasiʻí ʻaki ha ngaahi ongo halaia taʻeʻuhinga ʻaupito mo e fakahalaiaʻi pē ʻe ia iá.
ʻOku totonu ke ngāue ʻaki ʻe he mātuʻá e tokangá ʻi hono fakaʻaiʻai e fānau ʻoku nau fakahehema ke nau ʻita ʻi heʻenau fakafuofuaʻi pē kinautolú. ʻE fie maʻu e mātuʻá ke nau fakahinohino fakalelei e fānau ko ʻení ʻi heʻenau fakafuofuaʻi pē kinautolú. ʻOku fie maʻu ke tonu hono fakafuofuaʻi pē kitá, kae ʻikai ko ha ola ʻo e fakakaukau taʻemahino ʻa e tamasiʻí ʻoku maʻu mei ha ola ʻo e loto-mamahí pe ngaahi aʻusia ʻo e moʻui ʻoku ʻikai ke leleí.
Tokoniʻi e Fānaú ke Nau Fakatupulaki e Lavameʻá
ʻI he taimi ʻoku māʻolunga kae moʻoni ai e ʻamanaki ʻa e mātuʻá, ʻoku fakahehema ʻenau fānaú ke fakatupulaki ha loto-falala te nau lava ʻo fai ha ngaahi meʻa ke ola lelei. ʻOku tautautefito e hoko mai ʻa e loto-falala ko ʻení ʻi he taimi ʻoku fakafaingamālieʻi ai ʻe he mātuʻá ha ʻātakai ʻofa mo faitokonia ʻa ia ʻe lava e fānaú ʻo ako ai e ʻahiʻahí mo e fehalākí taʻe fakasiʻisiʻiʻi pe fakahalaiaʻi ki he taʻe lavameʻá. ʻOku loto fiefia e fānaú ke nau ako mei he ngaahi meʻa ne ʻikai ke nau fai leleiʻí ʻi he taimi ʻoku ʻofaʻi, poupouʻi, mo fakaʻaiʻai ai kinautolu ke nau toe feingá. ʻOku fie maʻu foki e fānaú ke nau ʻilo ʻoku ʻofa e Tamai Hēvaní ʻiate kinautolu naʻa mo e taimi ʻoku nau fai ai ha ngaahi fehalākí.
ʻOku fie maʻu e mātuʻá ke nau tokoni ki heʻenau fānaú ke nau fakatupulaki ʻenau lavameʻá ʻi he ngaahi tafaʻaki ʻoku mahuʻinga ki honau kahaʻú. Kuo pau ke ako e fānaú ke ngāue, ako, lavaʻi ha ngaahi taumuʻa, talangofua ki he ngaahi laó, pea feohi lelei mo e niʻihi kehé. ʻI heʻenau malava e ngaahi tafaʻaki ko ʻení, ʻoku tupulaki ai ʻenau loto-falalá. ʻOku totonu ke akoʻi kinautolu ʻe he mātuʻá ke ngāue ʻaki ʻenau ngāue fakataha mo kinautolu, tautautefito ki he taimi ʻoku nau kei iiki aí. ʻOku totonu ke angalelei mo faʻa kātaki e mātuʻá pea nau feinga ke fakalata e ngāué ki he fānaú. ʻOku totonu ke nau poupouʻi ʻenau fānaú ʻi he ngaahi ʻekitivitī ʻa ia ʻe lavameʻa ai e fānaú pea tokoniʻi kinautolu ke fakatupulaki honau ngaahi talēnití mo e ngaahi meʻa te nau malava ʻi he angamahení. Kuo pau ke ʻoua naʻa ʻai ʻe he mātuʻá ʻenau fānaú ke nau tulitaupaua e ngaahi ʻekitivitií koeʻuhí pē ke fakahoko e ngaahi fakaʻānaua ʻa e mātuʻá ki heʻenau fānaú, tautautefito ki he taimi ʻoku ʻikai ke mahuʻinga ai e ngaahi ʻekitivitií ki he tuʻunga lelei ʻo ʻenau fānaú. ʻE fakatou loto-foʻi e mātuʻá mo e fānaú.
ʻOku totonu ke fakatokangaʻi ʻe he mātuʻá ʻa e ngaahi lavameʻa ʻenau fānaú, fakamālōʻiaʻi kinautolu ʻi he taimi ʻoku nau fai ai ha meʻa leleí mo fie maʻu ke fakatokangaʻi.
Ko e ngaahi fakahinohino ʻeni ki he fai ʻo e fakamāloó. ʻOku totonu ke fakahoko ʻeni ʻe he mātuʻá:
-
Ke fakamātoato. ʻE fakatokangaʻi mo ʻikai ke tali ʻe ha tamasiʻi e ngaahi lea lelei loí.
-
Ke tokanga taha ki he ʻulungāngá mo e founga te ne uesia ai e mātuʻá. Hangē ko ʻení, “ʻOku ou fuʻu saiʻia he taimi ʻokú ke ʻi heni ai mo kimautolú pea ʻoku tau lava ʻo talanoa melino ʻo ʻikai fakakikihi. ʻOku fuʻu mahuʻinga ia kiate au.” ʻOku totonu ke fakaʻehiʻehi e mātuʻá mei he tokanga taha ki he tamasiʻí ʻaki hono lea ʻaki ha ngaahi meʻa peheni, “Ko ha tamasiʻi (pe taʻahine) lelei koe.” ʻE ala ongoʻi ʻe he tamasiʻí ʻoku ʻikai ko ha tokotaha lelei ia pea te ne fakakaukau ki he lea lelei ko ʻení ko e loi mo e kākā.
-
Feinga ke nounou. ʻOku lelei ange e lea nounoú ʻi he lea lōloá. ʻE fakamaaʻi ʻe he mātuʻa ʻoku lea lōloá ʻa e tamasiʻí pea liliu ai ha ngāue lelei lahi ki ha ngāue ʻoku kovi.
-
Fakahoko tavale ia. ʻE ala fakasiʻisiʻiʻi e mahuʻinga ʻo e lea ʻa e mātuʻá ʻi hono fakamālooʻi e foʻi ngāue kotoa pē ʻa e tamasiʻí. Ko e halaʻatā ha fakamāloó te ne ʻai e tamasiʻí ke ne mātuʻaki fie maʻu ha ʻofa lahi. ʻOku ola lelei taha pē hono foaki tavale e fakamāloó. ʻOku totonu ke fakapapauʻi ʻe he mātuʻá ʻoku nau fakatokangaʻi ʻa e ngaahi meʻa mahuʻinga ʻoku fai ʻe heʻenau fānaú.
Fakakau e Fānaú ʻi Hono Tokoniʻi e Niʻihi Kehé
ʻOku ako mai ʻe he ngaahi ngāue tokoní ʻa e taʻesiokitá mo e tokoni ki he fānaú ke nau fakakaukau ki he tuʻunga lelei ʻo e niʻihi kehé. Naʻe ako ʻaki ʻe Palesiteni Sipenisā W. Kimipolo ʻa e mahuʻinga ʻo e ngāue tokoní:
“ʻI he lotolotonga e mana ʻo e ngāue tokoní, ʻoku ʻi ai e talaʻofa ʻa Kalaisí, ʻi heʻetau molé, te tau maʻu!
“ʻE ʻikai ngata pē ʻi heʻetau ʻmaʻu’ kitautolú ʻi he tuʻunga ʻo hono fakahaaʻi e tataki ʻi heʻetau moʻuí, ka ko e lahi ange ʻetau tokoniʻi hotau ngaahi tokouá ʻi he ngaahi founga totonú, ko e lahi ange ia e koloa ʻoku ʻi hotau laumālié. ʻOku tau hoko ko e kakai mahuʻinga ange ʻi heʻetau tokoniʻi e niʻihi kehé. ʻOku tau hoko ʻo moʻoni ange ʻi heʻetau tokoniʻi e niʻihi kehé—foki, ʻoku faingofua ange ke ʻiloʻi kitautolu koeʻuhí he ʻoku tokolahi ange hatau niʻihi ke ʻiloʻi.”3
Maʻu ha Loto Falala ki he ʻEikí
ʻE maʻu ʻe he fānaú ha loto-falala ʻi heʻenau fakatupulaki e tuí, angamaʻá, mo e angatonú. ʻE lava foki ʻe he mātuʻá ʻo fakatō e loto-falalá ʻi heʻenau fānaú ʻaki hono ʻofaʻi mo fakaʻapaʻapaʻi kinautolu, ʻaki hono tokoniʻi kinautolu ke fakatupulaki e lavameʻá, pea ʻaki hono ʻoange kiate kinautolu ha ngaahi faingamālie ke ngāue tokoni ki he niʻihi kehé.
Fekauʻaki mo e tui ki he ʻEikí, naʻe pehē ʻe Palesiteni ʻEselā Tafu Penisoni: “Ko ʻeku pōpoakí mo ʻeku fakamoʻoní ʻení: Ko Sīsū Kalaisi pē ʻoku feʻunga makehe ke Ne foaki e ʻamanaki lelei ko iá, ʻa e loto falala ko iá, mo e mālohi ko ia ke ikunaʻi ʻa e māmaní mo mavahe hake mei he ngaahi taʻemalava ʻa e tangatá. Ke fai iá, kuo pau ke tau fokotuʻu maʻu ʻetau tuí ʻiate Ia pea moʻui ʻaki ʻEne fonó mo e ngaahi akonakí.”4
ʻOku fakakaukau e fānaú kiate kinautolu ʻaki e anga hono tauhi kinautolu ʻe he niʻihi kehé, tautautefito ki he mātuʻá mo e ngaahi tokouá. ʻI he taimi ʻoku ʻofaʻi mo tali ai kinautolú, ʻoku nau fakahehema ke ongoʻi ʻofa mo tali [e niʻihi kehé].