Fakataha Fika Ono
Ko Hono Ikunaʻi ʻo e ʻItá
Ngaahi Taumuʻa ʻo e Fakatahá
Lolotonga e fakataha ko ʻení, tokoni ki he mātuʻá:
-
Ke ʻiloʻi e ngaahi ola fakamamahi ʻo e taʻemapuleʻi e ʻita he kau mēmipa ʻo e fāmilí.
-
Ke mahino ʻa e founga ʻoku nau ʻita aí mo e fie maʻu ke nau fatongiaʻaki e ngaahi palopalema ʻo e ʻitá.
-
Ke ako e ngaahi founga ke mapuleʻi mo ikunaʻi ai e ʻitá.
-
Ke faʻu ha palani ke fakaʻehiʻehi mei he toe ʻitá koeʻuhí ke ʻoua naʻa toe hoko e ngaahi palopalema ʻo e ʻitá.
Ko e Palopalema ʻo e ʻItá
Naʻe ako ʻaki ʻe Palesiteni Kōtoni B. Hingikelī, “Ko e ʻitá ko ha meʻa fulikivanu mo fakatupu ʻauha he ʻokú ne tamateʻi e ongó mo toʻo e ʻofá.”1 ʻOku fekumi ʻa Sētane ke ne ueʻi hake e ʻitá mo fakatupu e fakakikihí ʻi he fāmilí (vakai, 2 Nīfai 28:20; 3 Nīfai 11:29; Molonai 9:3).
Siaki
Naʻe loto lili ʻa Siaki he ʻitá ʻi heʻene sio ki hono foha ko Pātí, taʻu 15, ʻokú ne laka fakaʻita atu ki he lokí ʻo sisina ʻa Sitivi, taʻu 11, ʻi hono kiá, ʻo tekeʻi ia mei he sea ʻi muʻa he televīsoné. Naʻá ne lea fakamanamana ange, “ʻOkú ke heka ʻi hoku seá, fakasesele.” Naʻe mata mamahi ʻa Sitivi peá ne tali leʻo vaivai ange, “ʻOku ʻikai ko ho sea.” Naʻe hapoʻi ʻe Paati e tafaʻaki e ʻulu ʻo Sitiví ʻaki hono tuʻa nimá ʻi heʻene fakalaka aí. Naʻe tangutu hifo ʻa Paati ki he seá ʻo ne toʻo e limoutí (remote), ʻo liliu e sēnoló (channel) ki he siteisoni (station) tā fasi ulokí (rock) peá ne tuku hake ʻo leʻo lahi. Ne langaki hake e ʻita ne nofo he loto ʻo Siakí he ngaahi māhina lahi. Ne ʻasi e pupuha hono laʻé. Ne kamata ke mamio mo tete hono nimá. Naʻá ne fakakaukau, he ʻikai ke u lava ʻo matuʻuaki ʻeni. Ne ʻikai ngata pē heʻene taʻefakaʻapaʻapaʻi e niʻihi kehé, ka naʻá ne fakataumuʻa pē ke fakahalaiaʻi au. ʻOkú ne ʻiloʻi he ʻikai ke u matuʻuaki e faʻahinga ʻulungaanga ko iá. Naʻe laka fakaʻita atu ʻa Siaki kia Paati, sisina mo mioʻi hono umá pea kaila: “ʻOkú ke fakakaukaú ko hai koe? ʻOku ʻikai ke ke fakaʻapaʻapaʻi ha taha. Ko hoʻo fakakaukaú ko koe pē.” Naʻe fusiʻi ʻe Siaki ʻa Paati mei he seá peá ne kaila: “ʻAlu ki ho lokí. ʻOku ʻikai ke u fie sio kiate koe.” Naʻe tupeʻi ʻe Paati hono nimá ʻo homo peá ne lue ʻita ʻo hū he matapā ʻi muʻá, ʻo haʻaki mai e matapaá.
Hili ha ngaahi ʻaho siʻi, naʻe fakahā ʻe Siaki mo hono malí ʻa e meʻa ne hokó ki ha tokotaha fai faleʻi ʻi he Tafaʻaki Tokoni ʻa e Siasí ki he Fāmilí. “Ne u fuʻu ʻita lahi ki he tamasiʻí pea ʻikai ke u lava ʻo sio hangatonu ki ai. ʻOku ʻikai ke u lava ʻo talanoa kiate ia ʻi ha anga fakasivilaise. Taimi ʻe niʻihi ʻoku ou lea ʻaki ha ngaahi meʻa peá u toki fakameʻapangoʻia ai kimui. ʻOku toe kovi ange ai e palopalemá.”
ʻOku ʻi ai e mātuʻa tokolahi ʻoku nau ʻita ki heʻenau fānaú he taimi ki he taimi. ʻOku lava ʻe he ongoʻi ʻitá ʻo fakahoko ha taumuʻa, fakatokanga ki he mātuʻá ʻoku ʻi ai e meʻa ʻoku fehalaaki pea ʻoku fie maʻu ke fai ha ngāue ki ai; ko e mātuʻa fakapotopotó te nau fai ha ngāue totonu ke taʻofi ʻaki e tupulaki ʻa e fanga kiʻi palopalema īkí. Taimi ʻe niʻihi ʻoku fihi pea tōtuʻa e ngaahi palopalemá ʻi ha kiʻi fakalelei faingofua. ʻOku lava ke angatuʻu mo anga taʻefakaʻapaʻapa e fānaú pea fakatupu ai ha toutou ongoʻi ʻita ʻenau mātuʻá. Kuo pau ke ʻoua naʻa fakavaivai e mātuʻá ki he ngaahi ongo ʻitá pea nau feinga ke sāuni ʻi ha ngaahi founga te ne fakatupulaki e fepakipakí.
Naʻe fakamatalaʻi ʻe ʻEletā Lini G. Lopini ʻo e Kau Fitungofulú ʻa e ʻitá “ko ha angahala ia ʻi he fakakaukaú ʻoku fakatau atu ki he ongoʻi tāufehiʻá mo e ʻitá. Ko e tupuʻanga ia ʻo e ʻita he hala puleʻangá, mo e kē ʻi he ngaahi malaʻe sipotí, pea mo e kē ʻi he ngaahi ʻapí.”2 Naʻe fakatokanga mai ʻa Palesiteni Kōtoni B. Hingikelī kau ki he ngaahi nunuʻa fakamamahi ʻo e ʻitá, ʻo kole mai, “Ko hai te ne lava ʻo fakafuofuaʻi e ngaahi kafo kuo fakahokó, hono loloto mo e mamahí, ʻaki e ngaahi lea fefeka mo kovi kuo lea ʻaki he taimi ʻitá?”3 ʻI he māmaní kotoa ʻoku tauteaʻi ʻe he mātuʻa ʻitá ʻenau fānaú ʻaki e leá, tāʻí, mo e anga fakasekisualé. ʻI he taʻu takitaha, ʻoku lauimiliona e ngaahi lipooti ʻoku nau lāungaʻi e ngaohikovia e fānaú ki he kau fakafofonga fakapuleʻanga.
Kuo fakamatalaʻi e ʻitá “ko e ongo ʻoku angamaheni ʻaki e moʻulaloa lahi taha ki ai e kakaí.”4 Ko kinautolu ʻoku ʻitá ʻoku nau meimei tui maʻu pē ʻoku nau tonuhia ʻi heʻenau ʻitá. ʻOku pehē ʻe he kakai ʻe niʻihi ko e fakahaaʻi ko ia ʻenau ʻitá ʻoku fakafiemālie mo fakafiefia. ʻOku nau ongoʻi mālohi mo māʻolunga ʻi he taimi ʻoku nau fakamanamanaʻi ai e niʻihi kehé. Neongo ia, ʻoku lava ke maʻunimā kita ʻe he ʻitá; ʻokú ne maumauʻi ʻa kinautolu ʻoku nau fiefia ʻi he mālohi ʻo e ʻitá.
ʻOku fakahoko taʻetotonu e ʻitá ʻi he ngaahi founga ʻe tolu—ʻi he houtamaki, kukuta, mo e ʻulungaanga heliaki.
Houtamaki. ʻOku fakahaaʻi e ʻitá ʻi he taaʻi ʻo e sinó (ko hono taaʻi, ʻakahi, paaʻi, hapoʻi, fusi e ʻulú mo e telingá); ngaohikovia fakaeloto mo e lea (kaikaila, ui ʻaki ha hingoa, kapekape, fakamanamana, tukuakiʻi, manukiʻi, kākaaʻi, tukuhifoʻi); ngaohikovia fakasekisuale (hia fakamalaʻia, fakamālohiʻi, fakamālohi fakasekisuale); mo e puleʻi mo e fakaaoao.
Ko e Kukuta e ʻItá. ʻOku fakahangatonu e ʻitá kiate kita, ʻo fakaiku ki hono fakasiʻisisʻi kitá, mole e ʻamanakí, pe fai e ngaahi tōʻonga ʻokú ne maumauʻi pē kitá (inu kava mālohí, fakaʻaongaʻi ʻo e faitoʻo konatapú, feinga tāonakita, fakamamahiʻi pe fakalaveaʻi fakasino pē kita).
ʻUlungaanga heliaki ʻo e ʻitá. ʻOku fakahaaʻi e ʻitá ʻi he ngaahi tōʻonga heliaki (tōʻohi, taʻefalalaʻanga, loto-fefeka, fakaʻaluma, taʻefaitotonu, ʻiteʻita, taʻefiemālie, fakaanga, fakatoloi).
ʻE ala fakamanavaheeʻi ʻe he mātuʻa ʻiteʻitá e fānaú ke talangofua, ka ko e ola ʻo e ngaahi liliu ʻi he ʻulungāngá ʻoku faʻa fakataimi pē. Ko e fānau ʻoku nau talangofua ʻi hono fakamālohiʻí ʻoku lahi ange ʻenau angatuʻu kimui angé.
Ko e Nunuʻa ʻo e ʻItá
ʻOku siʻisiʻi ange ke tali ʻita ʻe ha mātuʻa ki ha tamasiʻi ʻi he taimi ʻoku hā ngali mahuʻinga lahi ai e nunuʻa ʻo e ʻitá. Meʻapango, ʻoku ʻita e mātuʻa tokolahi ʻi heʻenau fānaú koeʻuhí ko ʻenau ʻiloʻi ʻoku fuʻu taʻemahuʻingaʻia [e fānaú] ʻi heʻenau ʻitá. ʻOku meimei ke tō honau ʻitá ki heʻenau fānaú kae ʻikai ke fakahangatonu ʻenau ʻitá ki ha kaungāmeʻa, pule ngāue, ʻōfisa polisi, pe ko ha taki fakalotu ʻoku fakaʻapaʻapaʻi. Neongo ia, ko e nunuʻa taimi lōloa ʻo hono fakapū e ʻitá ki heʻete fānaú ʻoku mālohi ange ia ʻi he ngaahi lelei ʻoku malava ke hokó. ʻOku kau e ngaahi meʻa ko ʻení he nunuʻá:
-
Mole e Laumālié.
-
Mole e fakaʻapaʻapá (kiate kita pea mei he kau mēmipa ʻo e fāmilí).
-
Mole e kaungāmeʻá mo e ngāue fakatahá.
-
Mole e falala kiate kitá.
-
Halaiá mo e tuenoá.
-
Ngaahi Vā Fetuʻutaki Kuo Kulukiá
-
Maumau kiate kita mo e niʻihi kehé.
-
Ko e fānau ʻoku lahi ange ʻenau ilifiá ʻi heʻenau ʻofa heʻenau mātuʻá.
-
Ko e fānau ʻoku angatuʻu, moʻua ʻi he ʻulungaanga fai hiá, pea mavahe mei ʻapi ʻoku kei taʻu siʻí.
-
Ko e fānau ʻoku tō he akó.
-
Fakautuutu e fakatuʻutāmakí he ngaahi palopalema hangē ko e siva e ʻamanakí, mahamahaki, ʻulungaanga maʻunimā, mo e ngaahi hohaʻa fekauʻaki mo e ngāue maʻuʻanga moʻuí.
Ngaahi Tupuʻanga ʻo e ʻItá
ʻOku ngāue ʻaki ʻe he mātuʻa ʻe niʻihi e ʻitá ke fakamanamanaʻi mo mapuleʻi ʻaki ʻenau fānaú, ke nau ongoʻi māʻolunga ange ai, pea ke fakaʻehiʻehi mei he fefaʻuhi mo e ngaahi palopalemá. ʻOku tupu ʻa e ʻitá mei he hīkisiá mo e siokitá, hangē ko e taimi ʻoku ʻikai ke lava ai e meʻa ʻoku loto ki ai ha tahá, pe ko e ʻikai ke angamaluú (faʻa kātaki ʻi he fehangahangai mo e fakatupu ʻitá). ʻOku ʻita e fakafoʻituitui ʻe niʻihi he taimi ʻoku nau loto-foʻi, mamahi, pe taʻefiemālie aí.
ʻOku faʻa hoko e ʻitá he taimi ʻoku fakakaukau ai ha taha ki ha fakamanamana, fakamaau taʻetotonu, pe ko e ngaohikovia pē ʻe ia iá pe niʻihi kehé. ʻE ala hoko ha fakamanamana fakaesino pe fakaeloto. Hangē ko ʻení, mahalo ʻe manavahē ʻa e tokotahá ki ha fakamamahi fakaesino, fakamaaʻi, pe mole ʻene fakaʻapaʻapaʻi pē ʻe ia iá pe niʻihi kehé. ʻI he sīpinga naʻe kamata ʻakí, naʻe ongoʻi ʻe Siaki ha fakamanamana ki hono tuʻunga ko e tamai ke fakaʻapaʻapaʻí ʻa ia ʻokú ne mapuleʻi e ʻulungaanga ʻo ʻene fānaú. Naʻá ne hohaʻa naʻa fakamāuʻi ia ʻe he niʻihi kehé ko ha tauhi fānau ʻoku fakavaivai mo ʻikai lelei.
Ngaahi Fakakaukau Taʻemahino
ʻOku faʻa taʻemahino e ngaahi fakakaukau ʻoku fakatuʻutāmakí. ʻOku faʻa toutou hoko e ʻitá he taimi ʻoku fakamāuʻi hala ai ʻe ha taha ʻa e taumuʻa ʻa e niʻihi kehé: “ʻOku feinga ia ke ne fakamamahiʻi au”; “ʻOkú ne taʻofi au mei he meʻa ʻoku ou fie maʻú”; “ʻOku ʻikai ke ne tokanga ki heʻeku ngaahi ongó”; “ʻOkú ne fakaʻaongaʻi pē au.”
ʻOku faʻa meimei ʻita taʻefakakaukau ʻa e fakafoʻituitui ʻe niʻihi. ʻOku faʻa faingataʻa ke mapuleʻi e faʻahinga ʻita ko ʻení koeʻuhí ʻoku fuʻu vave ʻene hokó. ʻI he ngaahi tuʻunga kehé, ʻoku langaki māmālie e ʻitá ʻi he fakakaukau ʻa e fakafoʻituituí ki he hokohoko atu e ngaahi fakamanamaná, fakamaau taʻetotonú, pe ngaohikoviá. ʻOku langaki foki e ʻitá he taimi ʻoku nofo taha ai e fakakaukau ʻa e fakafoʻituituí ʻi he tuʻunga ʻo ha meʻa, femoʻuekina he ngaahi fakakaukau ʻoku faʻa taʻemahino lahi mo ʻafaʻí.
ʻI he taimi ʻoku fakakaukau ai e fakafoʻituituí ki ha fakamanamana peá ne tali ʻaki e ʻitá ki ha taha, ʻoku mateuteu hona sinó ki ha fepaki. ʻOku māʻolunga hona totó, fefeka hona uouá, vave ʻena mānavá, pea ʻoku tukutaha ʻena fakakaukaú ki ha tali ki he fakamanamaná pe ngaohikoviá. Ko e tuʻunga ko ʻeni ʻo e mateuteú ʻe ala fakahaaʻi ia ʻi ha lea fefeka pe tali fakatuʻasino ki he fakamanamaná. Pe ko ʻene tupulaki māmālie ʻi ha taimi ʻi he aʻusia ʻe he fakafoʻituituí ha ngaahi meʻa hokohoko ʻoku fakatupu ʻitá. ʻOku tupulaki e ngaahi fakakaukau fakatupu ʻitá kae ʻoua kuo fakahaaʻi ia ʻe ha tokotaha ʻi ha faʻahinga tūkunga, taimi ʻe niʻihi ko ha kiʻi meʻa siʻisiʻi pē ʻoku angamaheni ʻaki hono ʻikai ke fakatokangaʻí.
ʻOku fokotuʻu mai ʻe he ngaahi liliu fakatuʻasino ko ʻení ha ngaahi kī mahuʻinga ki hono mapuleʻi ʻo e ʻitá. Ko e taimi lelei taha ki ha mātuʻa ke fai ha meʻá ko hono ʻuluaki fakatokangaʻi pē ʻo e fakautuutu ʻo e lotomoʻuá. ʻOku lava ke fekumi e mātuʻá ki ha toe fakamatala lahi ange ʻo kau ki he fakamanamana naʻe fai ki ai e fakakaukaú, ʻo feinga ke toe mahino lelei ange ia. ʻE ala fakasiʻisiʻi ʻe ha mahino ʻoku lelei angé ʻa e fakakaukau ki he fakatuʻutāmakí, ʻo ne holoki ʻa e malava ke fai ha ʻitá. ʻOku lava ke fetongi e ngaahi fakakaukau kovi mo fakatupu ʻitá ʻaki e ngaahi fakakaukau lelei ange mo mokomoko ʻi hono vakaiʻi lelei ange ʻe he tokotahá ʻa e tuʻunga ʻoku fai ai e lotomoʻuá. ʻOku lava e mātuʻá ʻo fakakaukauʻi ha ngaahi founga ʻoku ola lelei angé ke tali ʻaki e fakamanamaná pe fakamaau taʻetotonú, ko ha tali te ne fakaleleiʻi e palopalemá kae ʻikai ke fakatupunga ai haʻane lahi.
ʻOku lava ʻe ha mātuʻa lotomoʻua ʻo fakaʻehiʻehi mei he ngaahi tuʻunga ʻoku hangehangē te ne fakatupunga ha lotomoʻua lahi angé kae ʻoua kuó ne fiemālie mo mapuleʻi ia. Pea ʻe toki lava ʻe he mātuʻá ʻo fai ha ngāue ke fakaleleiʻi ʻa e tuʻunga ko iá ʻo ʻikai ke ʻita.
Ko Hono Ikunaʻi e ʻItá
ʻOku lava e ngaahi tefitoʻi moʻoni ko ʻení ʻo tokoni ki he mātuʻá ke nau ikunaʻi e ngaahi palopalema ʻoku fekauʻaki mo e ʻitá. ʻI hoʻo faiakó, kole ange ki he mātuʻá ke nau kumi pea fakaʻaongaʻi e ngaahi tefitoʻi moʻoni ʻoku ʻaonga taha kiate kinautolú.
Lotú
ʻOku totonu ke lotua ʻe he mātuʻá ha taumuʻa moʻoni ke maʻu ha tokoni ki hono ikunaʻi e ngaahi ongo ʻitá. Naʻe akoʻi mai ʻe he Sāmé ʻe fakatauʻatāinaʻi ʻe he ʻEikí ʻa e tokotaha ʻoku lotu tāumaʻú mei he ngaahi matangi ʻo e moʻuí: “ʻOku nau toki tangi kia Sihova ʻi heʻenau tuʻutāmakí, pea ʻokú ne ʻomi ʻa kinautolu mei heʻenau ngaahi mamahí. ʻOkú ne ngaohi ʻa e afaá ke tofukī, ko ia ʻoku ʻikai ngāue ai hono peaú. Pea ʻoku nau toki fiefia koeʻuhí ʻoku nau fiemālie ai; pea ʻokú ne ʻomi ʻa kinautolu ki he taulanga kuo nau holi ki aí”(Saame 107:28–30). ʻOku tokoni foki ʻa e ʻaukaí mo e ngaahi tāpuaki ʻo e lakanga fakataulaʻeikí ki hono ikunaʻi ʻo e ngaahi ongo ʻitá. ʻOku totonu ke ngāue fakataha e ngaahi tāpuaki ʻo e lakanga fakataulaʻeikí, lotú, mo e ʻaukaí mo e feinga fakafoʻituitui ke liliú.
Fakaleleiʻi e Ngaahi Palopalema Tefitó
ʻOku totonu ke talanoa e mātuʻá mo ʻenau fānaú pea fai ha meʻa ki he ngaahi palopalema ʻoku nau fakatupu ʻenau ʻitá. ʻOku lava ke fakaleleiʻi ʻi he melino e ngaahi palopalema lahi. Ki ha tokoni, ʻoku lava e mātuʻá ʻo toe vakai ki he fakataha fika 3 (“Ko e Fetuʻutaki ʻi he ʻOfá”), fakataha fika 7 (“Ko Hono Fakaleleiʻi ʻo e Fepakipakí”), mo e fakataha fika 9 (“ʻKo Hono Fakahoko e Ngaahi Tauteá”). ʻI hono fakahaaʻi e ngaahi palopalemá, ʻoku totonu ke lea e mātuʻá ki heʻenau fānaú ʻaki e fakaʻapaʻapa tatau ʻoku totonu ke nau fakahā ki ha tokotaha pule ngāue, kaungāmeʻa, pea ko ha taki he Siasí.
Fatongia ʻaki hoʻo ʻItá
Kuo pau ke fakahā ʻe he mātuʻa ʻoku ʻi ai haʻanau palopalema ʻitá ʻoku ʻi ai ʻenau palopalema pea nau ngāue ki ai kimuʻa ke nau lava ʻo ikunaʻi iá. ʻE ala fakaʻitaʻi ʻe he fānaú ʻenau mātuʻá, ka ʻoku fatongia ʻaki ʻe he mātuʻá e founga ke nau tali ʻakí. ʻOku lava ke nau ako ke mapuleʻi ʻenau ʻitá pea tali ʻaki ha ngaahi founga ʻoku lelei angé.
ʻOku tulitonuhia ha niʻihi fakafoʻituitui ki heʻenau ʻitá, ʻo pehē ko e konga pē ia honau tukufakaholo fakafonuá. Hangē ko ʻení, ʻoku tautea taaʻi ʻe he mātuʻa ʻe niʻihi ʻenau fānaú, ʻo nau fakatonuhiaʻi pē kinautolu koeʻuhí ʻoku ngāue ʻaki lahi ia ʻi honau matakalí. ʻOku ʻikai tali e ngaahi tōʻonga ko iá ʻe he Tamai Hēvaní. Naʻe akonaki ʻaki ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku muʻomuʻa ʻete hoko ko e mēmipasipi ʻi he fāmili ʻo e ʻOtuá ʻi hoto tuʻunga fakafonuá:
“Ne vaheʻi koe ʻe hoʻo Tamai Hēvaní ke fanauʻi mai ʻi ha hako pau ke maʻu ai ho tofiʻa fakamatakalí, anga fakafonuá, pea mo ho tala tukufakaholó. ʻOku ʻoatu ʻe he laine ʻo e hako ko iá ha tala tukufakaholo lelei mo ha ʻuhinga maʻongoʻonga ke ke fiefia ai. Neongo ia, ko ho fatongiá ke ke kei fakafuofuaʻi pe ʻoku ʻi ai ha konga ʻo e tukufakaholo ko iá kuo pau ke siʻaki he ʻokú ne fakafeʻātungiaʻi e palani ʻo e fiefia ʻa e ʻEikí . …
“… He ʻikai tuʻuloa ha fāmili ia ʻoku manavahē pe fakamālohiʻi; he ʻe iku ia ki he fekainakí mo e fakafetaú. Ko e ʻofá ko e fakavaʻe ia ʻo e fāmili fiefiá.5
ʻI he taimi pē kuo fakatokangaʻi mo ʻiloʻi ai ʻe he fakafoʻituituí ha palopalemá, ʻe lava ke nau fakatomala pea kamata ke ikunaʻi e palopalemá.
ʻAi ke ʻIloʻi e Siakale ʻo e ʻItá
Kapau ʻoku ʻita maʻu pē ha mātuʻa, ta ʻokú ne maʻu ʻe ia e ʻulungaanga ʻoku toutou hoko ʻa ia ʻoku konga ʻe fā. Kuo ʻai ʻe he kau saienisi ʻo e ʻulungāngá e ngaahi hingoa kehekehe ki he ngaahi konga ʻo e siakale ʻo e ʻitá, ka ʻoku tatau pē ʻa e ngaahi fakavaʻe mahuʻingá. ʻOku ʻoatu ʻi lalo ha fakamatala nounou ʻo e siakale ne fakamatalaʻi ʻe he ongo mataotao pule-ʻitá ko Malei Kaleni mo Lōpeti E. Filīmeni-Longo.6 ʻOku ola lelei taha hono mapuleʻi ʻo e itá ʻe he kakaí lolotonga e ngaahi konga ʻuluaki ʻi he siakalé, kimuʻa ke hoko ha ngaahi liliu fakaesinó.
Konga ʻo e fakangalingali ʻoku lelei peé. ʻOku lele lelei e moʻuí, ka ʻoku nofo pē ʻitá ʻi loto neongo ʻoku ʻikai ke fakatokangaʻi, ʻo ne uesia e founga ʻo e moʻui mo e fakakaukau ʻa ha tahá. Ko e ngaahi meʻa ʻoku hokó pe ngaahi tūkungá ʻoku mahino ʻene fakatupu e ngaahi sīpinga fakakaukau angamaheni mo fakakeheʻí. ʻOku kumi ʻuhinga ʻa e tokotahá pea tulitonuhia ki he ngaahi fehalaaki ko ʻení.
Konga langaki-haké. ʻI he tokanga taha ʻa e tokotahá ki he fakakaukau ʻoku fakakeheʻí, ʻoku kamata ke ne ongoʻi manavahē pe fakatuʻutāmaki pea kamata ke ne fai fakaʻita ha ngaahi tōʻonga. ʻOku toe haʻu ki he fakakaukau ʻa e tokotahá ha ngaahi kaveinga angamaheni hangē ko e “ʻOku ʻikai ke tokanga ia ki he meʻa ʻoku ou lea ʻaki,” pe “ʻOku ou fai e ngāue kotoa ʻi hení; ʻoku ʻikai pē ke teitei tokoni mai ia.” ʻOku fakahaaʻi ʻe he ngaahi fakaʻilonga fakatuʻasinó ʻoku kamata ke ʻita e tokotahá (hohaʻa, fakafefeka, tā vave e mafú, vave e mānavá, taʻefiemālie e keté, pe ongoʻi vela pe mafana). ʻOku fakakaukau loto mo palani e tokotahá ke fakahaaʻi ʻene ʻitá pea ʻe ala ʻefihia ʻi ha ʻulungaanga maʻunimā ʻokú ne tafunaki e ʻitá (ngaohikovia ʻe he faitoʻo konatapú mo e ʻolokaholó, tōtuʻa e kaí mo e ngāué).
Konga ki hono fakahāʻí. ʻOku fakahangatonu e ʻitá ki ha niʻihi kehe ʻaki hono kailaʻi, tukuhifoʻi, mo ngaohikovia fakatuʻasino pe fakasekisuale kinautolu. Pe mahalo ʻe mafuli ia kiate kita ʻo te fakasiʻisiʻiʻi pē kita, feinga tāonakita, pe ngāue kovi ʻaki e ʻolokaholó pe faitoʻo konatapú.
Holo ʻa e ʻitá. ʻOku ongoʻi halaia mo mā ʻa e tokotahá. ʻAsi hake leva mo e tulitonuhiá, pea ʻoku feinga e tokotahá ke ne fufuuʻi ʻene ʻitá ʻaki hono fai ha meʻa ʻoku leleí ke fakamoʻoniʻi ko e tokotaha lelei ia. ʻOkú ne fakapapau leva ke ne mapuleʻi ʻene ʻitá. ʻI he ʻikai ke tauhi ʻa e fakapapaú, ʻoku toe foki e tokotahá ki he konga fakangalingali ʻoku lelei peé.
Tauhi ha Lekooti ʻo Hoʻo ʻItá
ʻE fakautuutu e tokanga ʻa ha mātuʻa ki heʻene siakale ʻitá ʻi heʻene tauhi ha lekooti ʻo ʻene ʻitá. 7 ʻOku lava e mātuʻá ʻo ako ke taʻofi vave e ʻitá, ʻi hono ngāue ʻaki e ngaahi tefitoʻi moʻoni ʻi he fakataha ko ʻení.
Fakaleleiʻi e Ngaahi Fakakaukau Fakatupu ʻItá
ʻOku totonu ke fekumi e mātuʻá ki he ngaahi fakamatala ke fetongi e ʻulungaanga ʻa ia ʻoku nau ʻita aí. Hangē ko ʻení, ko ha tamasiʻi ʻoku angakovi kiate kinaua mahalo ko e ʻaho kovi ia ki he tamasiʻí he akó. ʻE ongoʻi ʻe ha tamasiʻi talangataʻa ʻoku tali pē ia ʻe hono toʻumeʻa ʻoku nau maʻu e ʻulungaanga ʻoku ʻikai ke talí. ʻOku totonu ke fakakaukau e mātuʻá ki he ngaahi tūkunga ʻokú ne fakahohaʻasi kinautolú ko ha palopalema ʻoku fie maʻu ke fakaleleiʻi mo e ngaahi faingamālie ke toe ofi ange ai ki heʻenau fānaú, ʻo ʻikai ko e ngaahi meʻa fakamanamana ʻoku fuʻu fie maʻu ki ai ha tali fakafokifā mo ʻitá.
ʻI hono fakafepakiʻi ʻe he mātuʻá e ngaahi fakakaukau ʻitá, ʻoku mahuʻinga e taimí. ʻI he taimi ʻoku aʻu ai ha taha ki he tuʻunga māʻolunga ʻo e ʻitá, ʻoku taʻeʻuhinga. ʻI he taimi ʻoku fakaofi ai e ngaahi ongó ki he tuʻunga ko ʻení, ʻoku totonu ke mavahe e tamasiʻí mei he tuʻunga ko iá pea ʻoange ha taimi ke ne mokomoko ai. .
ʻOku lava e mātuʻá ʻo teuteuʻi kinautolu ke nau tali totonu ʻi he taimi ʻoku nau ʻi ha tuʻunga fakatupu ʻita aí ʻo hangē ko e teuteu ʻa e kau sipotí mo e kau hivá ʻi he ngaahi houa lahi ʻo akoako ke fakahoko totonu ia ʻi he ngaahi tuʻunga pau. Naʻe fokotuʻu mai ʻe Leimoni Novako ʻo e ʻUnivēsiti ʻo Kalefōniá ʻi ʻAiviné ʻoku ako e fakafoʻituituí ke fakatokangaʻi ʻa e kamataʻanga ʻo ha tali ʻita mo hono fetongi ʻo e ngaahi fakakaukau ʻoku fakakeheʻí ʻaki e ngaahi fakamatala te ne tokoniʻi koe ke ke ikunaʻi hoʻo ʻitá ʻa ia ʻokú ne fakatupulaki ha fakakaukau tonu ange ʻo e tūkungá.8 ʻI he ngaahi momeniti ʻo e nongá, te nau lava ʻo fakakaukau loto ki he ngaahi fakamatala hangē ko ʻení: “Te u lava fēfē nai ʻo fakaleleiʻi e palopalemá ni? ʻOku ou loto mamahi ka ʻoku ou ʻilo e founga ke fai ki aí. Te u lava ʻo matuʻuaki e tuʻunga ko ʻení. ʻOku ou ʻilo e founga ke fakatonutonu ʻaki ʻeku ʻitá. ʻOku ou lava ʻo fakakata.”
ʻI he taimi ʻoku kamata ke hoko ai ha fakalanga-ʻitá, ʻe lava ke fakaʻaongaʻi ʻe ha taha e ngaahi fakamatala ʻe tokoni ke ikunaʻi e ʻitá mo e niʻihi kehe pē: “Ko e hā e meʻa ʻoku ou fie maʻu mei he fengāueʻaki ko ʻení? He ʻikai ke u maʻu ha meʻa mei he loto mamahí. Kapau te u ʻita, te u mamahi he ngaahi nunuʻa ʻoku ʻikai ke u fie maʻu. ʻOku fie maʻu ke u fekumi ki he ngaahi meʻa leleí. ʻOku ʻikai ke u lava ʻo fakakaukau ki he kovi tahá pe vave ki he aofangatukú. Ko ʻeku ʻitá ko ha fakaʻilonga ia kuo taimi ke u fakahinohinoʻi pē au. ʻOku ou lava ʻo fakaʻuhingaʻi ʻeni. ʻOku ou lava ʻo fakaʻapaʻapa ki he tokotaha ko ʻení.”
Mavahe mei he Tūkungá
Ko e taimi lelei taha ki he mātuʻá ke fai ha meʻá ʻa e taimi ʻoku nau fakatokangaʻi ʻoku fakautuutu ai e loto-hohaʻá. Te nau lava ʻo ako ke vakaiʻi ʻenau ʻitá. Ko e founga ʻe taha ke vakaiʻi ʻaki ʻenau ʻitá ko ha fakakaukauloto ki ha meʻafua mofi ʻokú ne fua e tuʻunga ʻoku ʻi ai ʻenau ʻitá. Kapau ʻoku ʻikai ke nau lava ʻo mapuleʻi ʻi he tikilī ʻe 80, ʻoku totonu ke nau mavahe leva mei he tuʻunga ko iá teʻeki ke fuʻu velá. ʻOku totonu ke nau talaange ki he tamasiʻí, “ʻOku ou ʻita. ʻOku ou fie maʻu ha taimi ke u mokomoko ai.” ʻOku ʻikai ke tokoni ʻa hono tukuakiʻi e tamasiʻí ʻaki haʻo lea pehē, “ʻOkú ke fakaʻitaʻi au.”
Ko Hono ʻIloʻi e Ngaahi ʻEkitivitī Fakafiemālié
Ko e ngaahi ʻekitivitī ki he fakafiemālié ʻe ala kau ai e fakalaulaulotó, ngāué, lelé, kakaú, fanongo ki he ngaahi fasí, pe lau ha tohi. Kuo pau ke ʻoua naʻa feinga e mātuʻá ke nau fiemālie ʻaki hano fakahaaʻi ʻenau ʻitá pe fuʻu fakakaukau lahi ki he meʻa ne hoko fakataha mo iá. Kapau te nau fuʻu fakakaukau lahi ki ai pe fakahaaʻi, ʻe fakautuutu ange ʻenau ʻitá. ʻI heʻenau toutou fakakaukau ki he meʻa ne hokó, ʻe ngalingali ke nau fakalahiʻi e tūkungá. ʻI heʻenau fakahāʻí, ʻoku nau fai e meʻa tatau, ko hono fakatonuhiaʻi ʻi honau ʻatamaí ʻa e fakahaaʻiʻanga fītaʻa ʻo ʻenau ʻitá.
ʻOku tokoni ki he mātuʻá ke fakafiemālieʻi ʻenau ʻitá ʻaki ʻenau ongoʻi houngaʻia mo ha feinga ke fekumi ki he lelei ʻoku ʻi heʻenau fānaú. Ko ha founga ʻe taha ki hono fakafiemālieʻí ko e muimui ki he faleʻi ʻa Palesiteni Poiti K. Peeka ʻo e Kōlomu ʻo e Toko Hongofulu Mā Uá, ʻa ia naʻá ne fokotuʻu mai ko e ngaahi fakakaukau taʻefeʻungá ʻoku totonu ke fetongi ʻaki e fasi toputapú: “ʻI he kamata pē ʻa e fasí pea ʻi he kamata pē ke nofo e leá ʻi hoʻo fakakaukaú, ʻe mole atu e ngaahi [fakakaukau] taʻemahuʻingá. Te ne liliu e meʻa kotoa ʻi hoʻo fakakaukaú. Koeʻuhí ʻoku langaki moʻui mo maʻa e [fasí] ʻe puli atu e ngaahi ʻuluaki fakakaukaú.”9
Vahevahe e Ngaahi Ongo Tefitó
ʻOku faʻa fakahaaʻi e ʻitá ʻi he ongoʻi loto mamahí, manavasiʻí, maá, pe fakafisingaʻí. ʻOku momou e fakafoʻituitui ʻe niʻihi ke vahevahe e ngaahi ongo ko ʻení, ko ʻenau manavasiʻi ʻe hā ai ʻenau vaivaí pe laveangofuá.
ʻI he taimi ʻoku vahevahe fiemālie ai ʻe he fakafoʻituituí e ngaahi ongo tefito ko ʻení, ʻoku kamata ke nau talanoa kau ki he ngaahi meʻa ʻokú ne fakahohaʻasi moʻoni kinautolú, kae ʻikai ko haʻanau loto-tāufehiʻa. ʻI he taimi ʻoku aleaʻi ai e ngaahi meʻa moʻoní, ʻoku lava ke fakaleleiʻi ange ai ʻa e ngaahi fepakipakí.
ʻOku faʻa fie maʻu lahi ange e loto-toʻa ke faitotonú ʻi he ʻitá. ʻI he taimi ʻoku vahevahe ai ʻe he mātuʻá e ngaahi ongo tefitó, ʻoku nau faʻa ʻilo ai ʻa e siʻisiʻi ange e tulitonuhia ʻa e fānaú pea nau loto fiemālie ange ke fakaleleiʻi e ngaahi palopalemá. ʻOku tupulaki ai e vā fetuʻutaki ʻo e kau mēmipa ʻo e fāmilí.
ʻOku faingataʻaʻia e fakafoʻituitui ʻe niʻihi ʻi hono ʻiloʻi mo fakahaaʻi e ngaahi ongo ʻoku fekauʻaki mo ʻenau ʻitá. Mahalo ʻe tokoni kiate kinautolu ke nau fekumi mo honau malí ki he ʻuhinga ʻoku nau ongoʻi ʻita aí, vakai ki he ngaahi ʻuhinga ʻoku mahulu atu ʻi he ʻulungaanga talangataʻa mahino ʻo e tamasiʻí, hangē ko e hohaʻa ʻoku ʻikai ke ola lelei ha mātuʻá, pe ko e manavasiʻi he ʻikai ke lavameʻa e tamasiʻí. ʻI he taimi pē ʻoku fakatokangaʻi mo ʻiloʻi ai ʻe he mātuʻá e ngaahi ongo tefitó, te ne lava ʻo talanoa kau ki ai mo hono malí pe tamasiʻí kae ʻikai ko hano fakahoko ha ʻita.
Peti
Ko e taimi pē ʻoku ʻalu ai ʻa Peti ki he ngaahi ʻekitivitī he ʻosi ʻa e akó, ʻokú ne ilifia maʻu pē ki he tali ʻita ʻene Fineʻeikí. Hili hano toʻo ʻe he Fineʻeikí ha kalasi ki he tauhi fānaú, naʻá ne kamata ke vahevahe e ngaahi ongo ʻoku fekauʻaki mo ʻene ʻitá. Naʻá ne vahevahe ʻi he loto falala, “ʻOku ou manavasiʻi naʻa faifai peá ke tō ki ha faingataʻa, hangē ko ia ne hoko ki heʻeku faʻeé ʻi he taimi naʻá ne kei finemui aí. Naʻá ne feitama pea ko au ʻene tamá. ʻOku ʻikai ke u teitei fie maʻu ke hoko ia kiate koe.” Naʻe tali ʻe Peti ʻaki ʻene fakapapauʻi ange ki he Fineʻeikí ʻene tukupā kakato ki he fono ʻo e angamaʻá. Naʻe ongoʻi fiemālie e Fineʻeikí pea toe mahino ange pea mateuteu ki he ngaahi ʻekitivitī ʻa Peti he kahaʻú.
Fekumi ki ha Liliu Fakalaumālié
ʻOku kau he founga ʻo e haʻu kia Kalaisí ha liliu fakalaumālie ʻoku iku ki he ʻulungaanga melino mo ʻofa. Hangē ko hono fakamatalaʻi ʻe ʻEletā Māvini J. ʻEsitoni ʻo e Kōlomu ʻo e Toko Hongofulu Mā Uá, ko e taimi ʻoku tau ului moʻoni aí “ʻoku hoko e founga ʻoku tau tauhi ai ki he niʻihi kehé ke tupulaki ʻene fonu ʻi he faʻa kātakí, manavaʻofá, tali leleí, mo ha holi ke fai ha fatongia lelei ʻi heʻenau moʻuí.”10 ʻOku siʻisiʻi ange e hoko ʻa e ʻitá ko ha palopalemá.
ʻOku fakamatalaʻi ʻe he Tohi ʻa Molomoná ha “fuʻu liliu lahi” ʻo e lotó ʻa ia ʻoku fakafou mai he uluí mo e anga fakaākonga—ko ha ʻulungaanga “ke fai lelei maʻu ai pē” (Mōsaia 5:2). Naʻe tohi ʻe Paula ko e ngaahi fua ʻo e Laumālié ko e “ʻofa, fiefia, melino, kātaki fuoloa, angavaivai, angalelei, tui, angamalū, taʻekonā” (Kalētia 5:22–23). Naʻe ʻomi ʻe Molomona e faleʻi ko ʻení, ʻa ia ʻoku lava ke fakaʻaongaʻi kiate kinautolu ʻoku nau fāifeinga ke liliu honau ʻulungaanga ʻitá: “Lotu ki he Tamaí ʻaki ʻa e ivi kotoa ʻo e lotó, koeʻuhí ke fakafonu ʻaki ʻa e ʻofá ni, ʻa ia kuó ne foaki kiate kinautolu kotoa pē ʻoku muimui moʻoni ʻi Hono ‘Alo ko Sīsū Kalaisí; koeʻuhí ke mou hoko ko e ngaahi foha ʻo e ʻOtuá; koeʻuhí ka hoko ʻa e taimi te ne hā mai aí, te tau tatau mo ia, he te tau mamata kiate ia ʻi hono anga totonú” (Molonai 7:48).
ʻI he liliu fakalaumālie ʻa e fakafoʻituituí, ʻoku kamata ke nau ongoʻi ʻoku siʻisiʻi ange e ʻitá mo maʻu e loto falala te nau lava ʻo mapuleʻi lelei ange e ngaahi ongo ʻitá. Ke tokoniʻi ʻa e liliu ko ʻení ke kamatá mo tokoniʻi ke hokohoko atú, ʻoku lava ke nau:
-
Lau fakaʻaho e folofolá pea moʻui ʻaki e ngaahi akonakí.
-
Lotua fakaʻaho ha tokoni ʻi he tafaʻaki kotoa ʻo e moʻuí, kau ai e ngaahi palopalema ʻo e ʻitá.
-
Fakatomala mo fekumi ha totonu ke ngāue ʻaki e mālohi faifakamoʻui ʻo e Fakaleleí.
-
Fekumi ki ha faleʻi mei he pīsopé ʻo ka fie maʻu.
-
Fokotuʻu ha ngaahi taumuʻa fakatāutaha ke ikunaʻi e ngaahi palopalema ʻo e loto ʻitá, ngāue ʻi he palopalema ʻe taha kae ʻoua kuo nau ikunaʻi ia pea toki kamata leva ʻi ha meʻa ʻe taha.
-
Lotua ke nau lava ʻo ʻiloʻi kinautolu ʻoku nau feohí ʻo hangē ko e ʻafioʻi kinautolu ʻe he ʻEikí.
-
Fakafoʻou e ngaahi fuakavá pea mōihū ʻi he temipalé mo e ngaahi fakataha ʻa e Siasí.
Fakaʻehiʻehi mei hono Toe Fakahokó
Ko e fakaʻehiʻehi mei hono toe fakahokó ko e founga ia ʻo hono maumauʻi e siakale ʻo e ʻitá ʻaki hono liliu e ngaahi fakakaukaú mo e ʻulungāngá mo hono fakaʻaongaʻi e ngaahi founga fakafepaki kehe ʻa ia ʻoku fakatupulaki ʻe he tokotahá. ʻOku ʻomi ʻe he ngaahi founga fakaleleí ha ngaahi meʻa kehe ke fai mei ai e filí kae ʻikai fakatupulaki e ʻitá. ʻE lava ke kau ʻi he ngaahi founga fakaʻehiʻehi mo hono taʻofí ʻa e tokoni mei he fāmilí, kaungāmeʻá, kaungāngāué, ha pīsope, pe ko ha faiako. ʻOku faʻa hoko ʻa hono taʻofi ʻene toe hokó lolotonga e konga ʻuluaki ʻe ua ʻo e siakale ʻo e ʻitá: ʻa e fakangalingali ko ia ʻoku lelei e meʻa kotoá pea mo e konga ʻo e fakatupulakí. ʻOku ako ʻa e tokotahá ke ʻiloʻi pea tali ʻa e ngaahi tūkunga ʻe tuʻu fakatuʻutāmakí (ngaahi meʻa ʻe hoko pe meʻa fakaeloto te ne kamata ʻa e ʻitá) ʻi ha ngaahi founga te ne motuhia pe taofi haʻane toe hoko. Ko ha ngaahi sīpinga ʻeni ʻo e founga ʻe lava ke taʻofi ai ʻe ha taha haʻane toe hoko.
Konga ʻo e fakangalingali ʻoku lelei peé. ʻOku ʻilo ʻe he tokotahá ha palopalema ʻo e ʻitá ka ʻokú ne fakaleleiʻi ʻi he founga ʻoku lelei. ʻOkú ne ʻilo e ngaahi meʻa ʻokú ne fakatupu ʻenau ʻitá pea ʻokú ne fakaʻaongaʻi e ngaahi founga ke matuʻuaki ʻakí, hangē ko e fakaʻehiʻehi mei he ngaahi tūkunga ʻoku ngali fuʻu fakatuʻutāmakí, fakafiemālieʻi, mo kiʻi mavahe mei he tūkunga ko iá. ʻOku ngāue longomoʻui e tokotahá ke fakaleleiʻi e ngaahi fepakipakí mo e ngaahi palopalema ʻoku fakaiku ki he ʻitá.11
Konga ki he langaki haké. ʻOku ngāue ʻaki ʻe he tokotahá e ngaahi founga foʻou ki hono matuʻuakí ke fakangatangata e tuʻunga ʻo e ʻitá mo hono mālohí. ʻOkú ne fakatonutonu mo fetongi e ngaahi fakakaukau ʻoku koví ʻaki e ngaahi lea ʻoku leleí (“Te u lava ʻo fakaleleiʻi ʻeni” pe “Te u lava ʻo maʻu ha ngaahi fakalelei kehe ki he palopalema ko ʻení”). ʻOkú ne ʻilo ʻa e ngaahi ongo fakamamahi ʻoku hoko ʻi he ʻitá mo fakatokangaʻi ʻoku angamaheni pē ʻa e ngaahi ongo ʻoku ʻikai ʻita ko ʻení. ʻOku taʻofi ʻe he tokotahá e ngaahi ʻulungaanga ʻoku nau maʻunimā iá, kau ai e fakaʻānaua ki hono fakahoko e ʻulungāngá mo hono palani ke fakahaaʻi e ngaahi ongo ʻitá. ʻOkú ne talanoaʻi e ngaahi palopalemá pe, kapau ʻoku ʻikai ke lava ʻo liliu e tūkungá, tohi ʻo kau ki ai. ʻOku tukuange ʻe he tokotahá hono iví ʻi he ngaahi ʻekitivitī fakatuʻasinó mo langaki hake ʻene loto-falala pē kiate iá ʻaki hono fai ha meʻa ʻokú ne manako ai.12 ʻOku fāifeinga foki e tokotahá ki he fanauʻi foʻou fakalaumālié.
Ko e Melino ʻa e ʻOtuá
Naʻe fakamamafaʻi ʻe Palesiteni Siosefa F. Sāmita ʻa e mahuʻinga ʻo e manavaʻofa ki he fānaú kae ʻikai ko e ʻitá: “ʻI he taimi ʻokú ke lea pe talanoa ai kiate kinautolú, ʻoua ʻe fai ia ʻi he ʻita, ʻoua ʻe fai ia ʻi he taʻeʻofa, mo ha laumālie valoki. Lea kiate kinautolu ʻi he manavaʻofa; … tangi mo kinautolu kapau ʻoku fie maʻu. … Fakamolū honau lotó; ʻai ke nau ongoʻi ʻofa kiate koe. ʻOua naʻa ngāue ʻaki ha maea pea ʻoua ʻe fakamālohi, ka … lea kiate kinautolu ʻaki e ʻuhinga, mo ha ivi tākiekina mo ha ʻofa ʻoku moʻoni.”13
Ko e fakafoʻituitui ʻoku nau fakaʻaongaʻi e ngaahi tefitoʻi moʻoni mo e ngaahi fokotuʻu ʻi he fakataha ko ʻení ʻoku nau lava ʻo ako ke ikunaʻi ʻenau ʻitá kae ʻikai ke puleʻi kinautolu ʻe he ʻitá. Ko e sīpinga ʻeni ʻo e anga hono ikunaʻi ʻe he tokotaha ʻene ʻitá:
“Ne u anga ʻaki ʻeku ongoʻi maʻu pē hangē ne u fie maʻu ke u fakamamahiʻi e taha kotoa pē ne u sio ki aí. Ne puleʻi ʻe he ʻitá ʻeku moʻuí. Ne ʻikai pē ke u lava ʻo talanoa mo hoku malí mo ʻeku fānaú taʻeʻita lahi. Ne taʻofi au ʻe he kakaí. Ne u fehiʻa ʻiate au, peá u fehiʻa ʻiate kinautolu. Ne u faʻa ongoʻi hangē ne u fie maʻu ke u taaʻi—ha tahá. Naʻe lava pē ke u fuʻu ʻita lahi au ʻi hano fakatupu ʻe he kiʻi meʻa siʻisiʻi tahá. Ne fāifai peá u fekumi ki ha tokoni. Naʻe fakafou ʻi hono faleʻi aú ʻeku talanoa kau ki he ngaahi meʻa lahi naʻá ne fakahohaʻasi au he taimi lōloa—ko e ngaahi palopalema fekauʻaki mo ʻeku ʻitá. Ne u ako ke fulihi ʻeku fakakaukaú pea ke vakai ki he niʻihi kehé ʻi ha founga ʻoku lelei angé. Ne u fakaʻaongaʻi foki e ngaahi tefitoʻi moʻoni ʻo e ongoongoleleí ki heʻeku palopalemá—ke lotu, ako folofola, faʻa fakamolemole. Ne kamata ke u ongoʻi lelei ange kau kiate au. Ne mole ʻeku ʻitá he ʻalu ʻa e taimí, pea ne u ongoʻi ne u lava ʻo toe mapuleʻi ʻeku moʻuí. ʻOku ou lava ʻo ngāue fakataha mo hoku fāmilí he taimí ni. ʻOku ou fiefia he feohi mo e niʻihi kehé. ʻOku ou ongoʻi hangē ʻoku ou toe moʻuí.”
Naʻe pehē ʻe he ʻAposetolo ko Paulá, “Pea ko e melino ʻo e ʻOtuá … ʻoku lahi hake ʻaupito ʻi he faʻa ʻiloá” (Filipai 4:7). ʻOku ʻilo ʻe kinautolu kuo nau fefaʻuhi mo e ʻitá ʻa e fiemālie ʻo e ongoʻi melino mo e tauʻatāina mei he ongo ko iá. ʻOku lava ke tauʻatāina e mātuʻa ko ia kuo nau ongoʻi pōpula ki he ʻitá mei he palopalema ko ʻení pea aʻusia ha fiemālie ʻi honau ʻatamaí.
ʻOku totonu ke ʻoua naʻa ngalo ʻi he mātuʻá pe fakafuofua halaʻi e mālohi ʻo e ivi tākiekina ʻo e Laumālie Māʻoniʻoní. ʻI heʻenau fekumi ki ha tokoni mei he ʻEikí, ʻe hanga ʻe he Laumālie Māʻoniʻoní ʻo fakafiemālieʻi, poupouʻi, mo fakahinohino kinautolu ki hono mapuleʻi mo ikunaʻi e ngaahi ongo ʻitá (vakai, Sione 14:26–27; T&F 8:2–3).
“Ko hai te ne lava ʻo fakafuofuaʻi e ngaahi kafo ne fakahokó, honau lolotó mo e mamahí, ʻaki e ngahi lea fefeka mo kovi ne lea ʻaki he taimi ʻitá?”
Palesiteni Gordon B. Hinckley
ʻAi ke ʻIloʻi Hoku Siakale ʻItá
Fakamatalaʻi e ngaahi tūkunga angamaheni ʻoku nau fakatupu hoʻo ʻitá (hangē ko ʻení, ko e fakafekiki ʻa e malí mo aú; tōtuʻa hono toho e tohi pangikeé; taʻemaau e falé):
Fakamatalaʻi e ngaahi fakakaukau pe ngaahi ʻuhinga lelei ʻoku nau tafunaki hoʻo ʻitá (hangē ko ʻení, ʻoku ʻikai ke tokanga hoku malí ki ha taha ka ko ia pē; ʻoku taʻefalalaʻanga hoku husepānití):
Fakamatalaʻi e ngaahi ongo ʻoku fakatefito ai hoʻo ʻitá (hangē ko ʻení, taʻefakaʻapaʻapa, ngāue ʻaki pē, taʻetokangaʻi):
Fakamatalaʻi e ngaahi fakaʻilonga ʻokú ne fakahaaʻi ai ʻokú ke ʻitá (hangē ko ʻení, pupuhaʻia e ʻaofinimá, vave e tā ʻo e mafú, lotomoʻua, ʻitangofua):
Fakamatalaʻi ko e hā e meʻa ʻokú ke fai ke tafunaki ai hoʻo ʻitá (hangē ko ʻení, fakakaukau maʻu pē ki he fehalākí, fakafisi ke talanoa kau ki ai, inu kava mālohi tapu):
Fakamatalaʻi ʻa e anga hoʻo fakafōtunga hoʻo ʻitá (fakakau ki ai ho ʻulungaanga kovi tahá):
Fakamatalaʻi hoʻo ngaahi fakakaukaú, ongó, mo e ngaahi ʻulungaanga hili hoʻo fakafōtunga hoʻo ʻitá (hangē ko ʻení, fiemālie, ongoʻi halaia, ongoʻi mamahi, fakameʻapangoʻia):
Ko e Sīpinga Lekooti ʻo e ʻItá
|
Fakamatala ne Kolé |
Tūkunga A |
Tūkunga E | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
|
ʻAho mo e meʻa pe tokotaha naʻá ne fakalangá: |
10/19 Fakafekiki mo e husepānití. |
10/20 Pauʻu e Tamaikí. | ||||||||||||||||||
|
Mālohi ʻo ʻeku ʻitá: |
Vaivai |
Mālohi |
Vaivai |
Mālohi | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ko e ngaahi fakakaukau ʻoku nau tafunaki ʻeku ʻitá: |
ʻOku angakovi ia. ʻOku ʻikai ke tokanga ia kiate au. |
ʻOku ʻikai pē fanongo e tamaikí. ʻIkai ke nau fakaʻapaʻapaʻi au. | ||||||||||||||||||
|
Ko e ngaahi ongo ʻoku fakatefito ai ʻeku ʻitá: |
ʻIkai ke ʻofaʻi, taʻetokangaʻi, ʻikai ke fakahoungaʻi. |
Ngāue ʻaki pē, taʻetokangaʻi. | ||||||||||||||||||
|
Ko e anga ʻeku fakahaaʻi ʻeku ʻitá: |
Kailaʻi ia. Ui ia ko e fakasesele. |
Tala fakalelei kiate kinautolu ke nau ō ki honau lokí kae ʻoua kuo nau angalelei. | ||||||||||||||||||
|
Talanoa pē kiate kita fekauʻaki mo e ʻitá: |
ʻOku totonu ke tauteaʻi ia. Naʻá ne fakamamahiʻi au. Ko ʻeku sāuni pē ia ʻaʻaku. |
Ko e fānau pē kinautolu. Naʻe ʻikai ke nau feinga ke angatuʻu mai kiate au. | ||||||||||||||||||
|
Ko e ola lelei ʻi hono mapuleʻi ʻo ʻeku ʻitá: |
Halaʻatā |
Lahi |
Halaʻatā |
Lahi | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ko e hā e meʻa ne ngalingali ke tokoní: |
Naʻe ʻikai ke tokoni ha meʻa ne u fai. Ne toe kovi ange ia ko e meʻa ne u faí. |
Mavahe mei he tūkunga ko iá. ʻAlu ʻo ʻeveʻeva, pea toki talanoa mo e fānaú. | ||||||||||||||||||
|
Lōmia, fakahaaʻi, pe fakapapauʻi e ʻitá: |
Lōmia ʻeku ngaahi ongó hili ʻeku fuʻu ʻita lahí. |
Talanoaʻi ʻeku loto-foʻí. | ||||||||||||||||||
|
Ko e meʻa te u fai ʻo lelei ange ʻamui: |
ʻIkai ha tali. Ongoʻi nonga kimuʻa peá u talanoá. |
Hala ha meʻa. Ne u fai lelei he taimi ko ʻení. | ||||||||||||||||||
Toʻo mei he Murray Cullen and Robert E. Freeman-Longo, Men and Anger: Understanding and Managing Your Anger (Holyoke, Massachusetts: NEARI Press, 2004), 33–34. ISBN# 1-929657-12-9.
Lekooti ʻo e ʻItá
|
Ko e Fakamatala ne Kolé |
Tūkunga A |
Tūkunga E | ||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
|
ʻAho mo e meʻa pe tokotaha naʻe tupu ai e [ʻitá]: | ||||||||||||||||||||
|
Mālohi ʻo ʻeku ʻitá: |
Vaivai |
Mālohi |
Vaivai |
Mālohi | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ngaahi fakakaukau ʻoku nau tafunaki ʻeku ʻitá: | ||||||||||||||||||||
|
Ngaahi ongo tefito ʻo ʻeku ʻitá: | ||||||||||||||||||||
|
Ko e anga ʻeku fekuki mo ʻeku ʻitá: | ||||||||||||||||||||
|
Talanoa pē kiate kita ʻi he fekuki mo e ʻitá: | ||||||||||||||||||||
|
Ko e ola lelei ʻo ʻeku mapuleʻi ʻeku ʻitá: |
Halaʻatā |
Lahi |
Halaʻatā |
Lahi | ||||||||||||||||
|
1 |
2 |
3 |
4 |
5 |
6 |
7 |
8 |
9 |
10 |
1 |
2 |
3 |
4 |
5 |
6 |
7 |
8 |
9 |
10 | |
|
Ko e hā e meʻa ne ngalingali ke tokoní: | ||||||||||||||||||||
|
Lōmia, fakahaaʻi, pe fakapapauʻi e ʻitá: | ||||||||||||||||||||
|
Ko e meʻa te u fai ke lelei ange ʻi he kahaʻú : | ||||||||||||||||||||
Toʻo mei he Murray Cullen and Robert E. Freeman-Longo, Men and Anger: Understanding and Managing Your Anger (Holyoke, Massachusetts: NEARI Press, 2004), 33–34, 117. ISBN# 1-929657-12-9.
Ko ʻEku Palani Fakaʻehiʻehi mei he Toe Fakahoko e Meʻa Tataú
Konga Angamahení
Ngaahi Meʻa Fakatupu ʻItá:
Ngaahi Founga ki Hono Matuʻuakí pe Haó
Ngaahi Ngāue ke Fakaleleiʻi e Ngaahi Palopalema ʻoku Fakaiku ki he ʻItá:
Konga ki Hono Langaki Haké pe Ngāue ʻAki ha Meʻa ke Fakalelei
Ngaahi Meʻa Fakatupu ʻItá:
Ngaahi Founga ki Hono Matuʻuakí pe Haó: