Te u fakahoko fēfē nai ha fealēleaʻaki fekauʻaki mo e taonakitá ʻi hoku uōtí pe fāmilí?

He ʻikai hanga ʻe he talanoa fekauʻaki mo e taonakitá ʻo fakaʻaiʻai ha taha ke ngalingali feinga taonakita. Ko hono moʻoní, ko e talanoa tauʻatāina fekauʻaki mo e taonakitá ko ha founga lelei ia ke tokoni ke fakaʻehiʻehi mei he taonakitá. ʻOku totonu ke tokoni ha taumuʻa pē ʻo ha faʻahinga fealēleaʻaki fekauʻaki mo e taonakitá ki he kau takí mo e kāingalotú ke nau ngāue fakaetauhi lelei ange kiate kinautolu kuo uesia ʻe he taonakitá.

ʻE ala fie maʻu ʻe he kau takí mo e mātuʻá ke fakahoko ha ngaahi fealēleaʻaki fekauʻaki mo e fakaʻehiʻehi mei he taonakitá, fefaʻuhi mo e faingataʻa ʻo e mole mei he taonakitá, mo e ngāue fakaetauhi kiate kinautolu ʻoku nau faingataʻaʻiá. Ko e ngaahi fealēleaʻaki ko ʻení ʻoku totonu ke ongoʻingofua mo tokangaʻi lelei, kau ki ai ʻa kinautolu kuo taʻu motuʻa totonú, pea fenāpasi lelei mo e ngaahi akonaki ʻa e Siasí. Mātuʻaki tokanga ʻi he taimi ʻoku fakahoko ai ha fealēleaʻaki ke fakaʻehiʻehi mei ha lea fakafonua te ne fakatupu ha mamahi lahi ʻa ha taha.

Lolotonga e fealēleaʻaki hili ha mole ʻi he taonakitá, ʻoua naʻa mou talanoa fekauʻaki mo e founga na‘e toʻo ai ʻe ha taha ʻene moʻuí. ʻE ala taʻeʻamanekina hono fakaʻaiʻai ʻeni ha taha ʻi he kulupú ke fakatatau ki he ʻulungaanga kuo fakamatalaʻí. Kapau ‘oku kamata ke vahevahe ʻe ha taha ʻa e ngaahi fakaikiiki ko ʻení ʻi ha kulupu, toe fulihi ʻa e fetalanoaʻakí ʻi ha founga lelei ange.

Ngaahi Maʻuʻanga Tokoni ʻa e Siasí mo e Koló

(Ko e niʻihi ʻo e ngaahi maʻuʻanga tokoni ʻoku hiki atu ʻi laló ʻoku ʻikai faʻu, tauhi, pe puleʻi ia ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ‘Oku fakataumuʻa ‘a e ngaahi naunau ko ʻení ke hoko ko ha toe ngaahi maʻuʻanga tokoni ʻaonga ‘i hoʻo ako ‘a e tefito ko ʻení. ʻOku ʻikai poupouʻi ʻe he Siasí ha faʻahinga meʻa ʻoku ʻikai fenāpasi mo hono ngaahi tokāteliné mo e ngaahi akonakí.)

• “Fakafanongo ke Ako,” Russell M. Nelson, Liahona, July 1991, 22–25.

• Tuku ha Taimi ke Talanoa Ai mo Fakafanongo,” Rosemary M. Wixom, Liahona, ʻEpe. 2012, 34–37.

• Tataki ha Ngaahi Fealēleaʻaki Fakalaumālie,” Faiako ʻi he Founga ʻa e Fakamoʻuí (2015), 33.

• “Fakaʻehiʻehi mei he Taonakitá: How to Start a Survivors’ Group,” World Health Organization.