Te u kamata fēfē nai ha fetalanoaʻaki mo ha taha ʻoku ou hohaʻa ki ai?

Kumi ha taimi mo ha feitu‘u ʻe lava ke mo fakatou ongo‘i malu ke talanoa ai. Talaange ki ho kaungāme‘á ʻokú ke tokanga mo‘oni kiate kinautolu. Fakamatala‘i ange ʻa e meʻa kuó ke fakatokangaʻi kimuí ni maí, hangē ko e, “Hangē ʻokú ke ngali fuʻu loto mamahi kimuí ni maí.” Tuku ange ha taimi ke nau fakamatalaʻi ʻenau ongó. Fakahaaʻi ‘okú ke tokanga ʻaki haʻo fakafanongo ki he meʻa ‘oku nau lea ʻakí. Fakaʻapaʻapaʻi ʻenau ngaahi ongó ʻaki haʻo lea ʻaki ha meʻa hangē ko e, “Fakamolemole ko e mamahi lahi ʻokú ke ʻi aí” pe “Naʻe ‘ikai te u ʻilo hono faingataʻa ‘o e ngaahi meʻa ko iá kiate koe.”

‘I he taimi ʻoku ngali taimi tonu aí, fehuʻi hangatonu ange kiate kinautolu pe ʻoku nau fakakaukau fekauʻaki mo e taonakitá. Mahalo te ke lea ʻaki ha meʻa hangē ko e, “ʻOkú ke fakakaukau nai ke toʻo hoʻo moʻuí?” Kapau ʻoku nau pehē atu ‘oku nau fakakaukau fekauʻaki mo e taonakitá, ʻeke ange pe ʻoku ʻi ai haʻanau palani. Mahalo te ke fehuʻi ange, “ʻOku ʻi ai nai haʻo palani ke fakalaveaʻi koe?” Kapau ‘oku ʻi ai haʻanau palani, telefoni leva ki ha kautaha tokoni fakavavevavé pe laine tokoni ki he faingataʻaʻiá ʻi homou feituʻú.

Kapau ‘oku ʻikai ke ʻi ai haʻanau palani, fakahaaʻi hoʻo loto tokangá ʻaki hoʻo fakafanongo ki he meʻa ʻoku nau lea ʻakí. Pea toki poupouʻi kinautolu ke tala ki ha taha te ne lava ʻo fai ha tokoni ʻoku lahi angé. Vakai, “Founga ke Tokoniʻi ha Taha ʻoku Faingataʻaʻia” ʻi he uepisaiti ko ʻení ki ha toe ngaahi fakakaukau.

Ngaahi Maʻuʻanga Tokoni ʻa e Siasí mo e Koló

(Ko e niʻihi ʻo e ngaahi maʻuʻanga tokoni ʻoku hiki atu ʻi laló ʻoku ʻikai faʻu, tauhi, pe puleʻi ia ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ‘Oku fakataumuʻa ‘a e ngaahi naunau ko ʻení ke hoko ko ha toe ngaahi maʻuʻanga tokoni ʻaonga ‘i hoʻo ako ‘a e tefito ko ʻení. ʻOku ʻikai poupouʻi ʻe he Siasí ha faʻahinga meʻa ʻoku ʻikai fenāpasi mo hono ngaahi tokāteliné mo e ngaahi akonakí.)

• “God Knows You,” Dieter F. Uchtdorf, Youth Videos, ChurchofJesusChrist.org.

• “ ʻI ha Palani Fakalangi,” Ronald A. Rasband, Liahona, Nōv. 2017, 55–57.

• “Fakaʻehiʻehi mei he Taonakitá,” Carol F. McConkie (vitiō, suicide.ChurchofJesusChrist.org).