ʻE hanga nai ʻe he talanoa fekauʻaki mo e taonakitá ʻo fakaʻaiʻai ha taha ke feinga taonakita?

He ʻikai hanga ʻe he talanoa fekauʻaki mo e taonakitá ʻo fakaʻaiʻai ha taha ke ngalingali feinga taonakita. Ko hono moʻoní, ko e talanoa tauʻatāina fekauʻaki mo e taonakitá ko ha founga lelei ia ke tokoni ke fakaʻehiʻehi mei he taonakitá. Ko e fehuʻi fakahangatonu ki ha tokotaha pe ‘oku nau fakakaukau fekauʻaki mo e taonakitá ʻokú ne ʻoange kiate kinautolu ha faingamālie ke fakahaaʻi ʻenau ngaahi fakakaukaú mo e ngaahi ongó ʻo ʻikai ha hohaʻa koeʻuhí ʻe fakamāuʻi kinautolu. ʻE lava ke ke fehuʻi ange, “ʻOkú ke fakakaukau nai fekauʻaki mo hano toʻo hoʻo moʻuí?” Kapau ʻoku nau pehē ‘oku nau fakakaukau fekauʻaki mo e taonakitá, fehuʻi ange kiate kinautolu pe ʻoku ʻi ai haʻanau palani. Mahalo te ke fehuʻi ange, “ʻOku ʻi ai nai haʻo palani ke fakamamahiʻi kimoutolu?” Kapau ‘oku ʻi ai haʻanau palani, telefoni leva ki ha kautaha tokoni fakavavevave pe laine tokoni ki he faingataʻaʻiá ʻi homou feituʻú.

Kapau ‘oku ʻikai ke ʻi ai haʻanau palani, fakahaaʻi hoʻo loto tokangá ʻaki hoʻo fakafanongo ki he meʻa ʻoku nau lea ʻakí. Pea toki poupouʻi kinautolu ke tala ki ha taha te ne lava ʻo fai ha tokoni ʻoku lahi angé. Vakai, “Founga ke Tokoniʻi ha Taha ʻoku Faingataʻaʻia” ʻi he uepisaiti ko ʻení ki ha toe ngaahi fakakaukau.

Ngaahi Maʻuʻanga Tokoni ʻa e Siasí mo e Koló

(Ko e niʻihi ʻo e ngaahi maʻuʻanga tokoni ʻoku hiki atu ʻi laló ʻoku ʻikai faʻu, tauhi, pe puleʻi ia ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ‘Oku fakataumuʻa ‘a e ngaahi naunau ko ʻení ke hoko ko ha toe ngaahi maʻuʻanga tokoni ʻaonga ‘i hoʻo ako ‘a e tefito ko ʻení. ʻOku ʻikai poupouʻi ʻe he Siasí ha faʻahinga meʻa ʻoku ʻikai fenāpasi mo hono ngaahi tokāteliné mo e ngaahi akonakí.)

• Molonai 7:45–47.

• Tuku ha Taimi ke Talanoa Ai mo Fakafanongo,” Rosemary M. Wixom, Liahona, ʻEpe. 2012, 34–37.

• “News Room: Suicide,” World Health Organization.

• “Preventing Suicide (Ko e Fakaʻehiʻehi mei he Taonakitá),” Carol F. McConkie (vitiō, suicide.ChurchofJesusChrist.org).