Te u poupouʻi fēfē nai ha taha kuo mole hano ʻofaʻanga ʻi he taonakitá?

ʻE lava ke hoko ʻa e ngaahi kaungāmeʻá mo e kāingalotu ʻo e Siasí ko ha poupou lahi ki he ngaahi fāmili kuo mole hanau ʻofaʻanga ʻi he taonakitá. Ko e taonakitá ko ha meʻa ia ʻoku faʻa hoko fakafokifā mo fakamamahi pea lava ke ne fakalahi ʻa e mamahi ʻo kinautolu naʻe kaunga ki aí. [Feinga] ke mahino ʻoku fie maʻu ha taimi ke fakaakeake ai mei he mamahí.

Ko e tokanga lelei taha te tau lava ʻo fakahokó ko hono tokoniʻi ha taha ke ne aʻusia ʻa e ngaahi tāpuaki ʻo e ʻofa ʻa e Tamai Hēvaní pea mo e manavaʻofa mo e ʻaloʻofa ʻa e Fakamoʻuí. ʻI he taimi kuo mole ai ha ʻofaʻanga ʻo ha taha pe fāmili ʻi he taonakitá, vakaiʻi ʻi he faʻa lotu ʻenau ngaahi fiemaʻú pea feinga ke tokoniʻi kinautolu. ʻOku faʻa kamata ʻetau tokanga ki ha taha pe fāmilí ʻaki ʻetau fakafanongo ʻi he ʻofa mo e angaʻofa. Fakatokangaʻi ange ʻe ala mātuʻaki faingataʻa ʻa e ngaahi ʻaho mālōloó mo e ngaahi ʻaho fakamanatu fakataʻú.

Kuo faleʻi kitautolu ʻe Palesiteni M. Lāsolo Pālati: “Tokanga ki he meʻa ʻokú ke lea ʻaki fekauʻaki mo e taonakitá pea fakatokangaʻi ange ʻoku ʻikai ke tau ʻilo ʻa e tūkunga kakato ʻokú ne ʻākilotoa ʻa e taonakita takitaha. Ko e ʻEikí toko taha pē ʻokú Ne maʻu kotoa ʻa e ngaahi meʻa moʻoní, pea ko Ia pē ʻokú Ne afioʻi ʻa e taumuʻa ʻo e loto ʻo e tokotahá. ʻOku totonu ke ʻoua te tau fakamāuʻi ʻa kinautolu ʻoku nau toʻo ʻenau moʻuí, pea ʻoku totonu ke tau tokoniʻi mo fakafiemālieʻi ʻa kinautolu ʻoku moʻuí hili ha faʻahinga mate pehē ʻo ha ʻofaʻanga” (“Questions and Answers” [Brigham Young University devotional, Nov. 14, 2017], 3, speeches.byu.edu).

Kapau ʻokú ke kau ki he fakataha alēlea ʻo ha uooti, poupouʻi ʻa e fakataha alēleá ke aleaʻi ʻa e founga ʻe lava ke fakahoko ai ʻe he kāingalotu ʻo e uōtí e tokoni totonu ki he tokotahá pe fāmilí. Poupouʻi e kau mēmipa ʻo e fakataha alēleá ke lipooti mai ʻa e tokoni naʻe faí. ʻOku kau ʻeni he ngaahi fehuʻi ʻe niʻihi ke aleaʻí:

• Ko e hā e meʻa kuo ʻilo ʻe he kāinga ngāue fakaetauhí, pea ko e hā e tokoni kuo nau fakahokó?

• Ko e hā ha tokoni fakaeloto mo fakalaumālie ʻe fie maʻu ʻe he tokotahá pe fāmilí ke hokohoko atu pē? Ko hai ʻoku mateuteu lelei taha ke fakahoko ʻa e tokoni ko ʻení?

• Ko e hā ʻenau fiemaʻu fakatuʻasinó— fefonongaʻaki, meʻatokoni, mo e alā meʻa peheé?

• ʻE tokoniʻi fēfē ʻa e fānau mo e toʻu tupu ʻoku uesiá ʻe he kau taki ʻo e ngaahi houalotu ʻo e uōtí, kau ai ʻa e kau taki ʻo e Palaimelí pe toʻu tupú?

Ngaahi Maʻuʻanga Tokoni ʻa e Siasí mo e Koló

(Ko e niʻihi ʻo e ngaahi maʻuʻanga tokoni ʻoku hiki atu ʻi laló ʻoku ʻikai faʻu, tauhi, pe puleʻi ia ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ‘Oku fakataumuʻa ‘a e ngaahi naunau ko ʻení ke hoko ko ha toe maʻuʻanga tokoni ʻaonga ‘i hoʻo ako ‘a e tefito ko ʻení. ʻOku ʻikai poupouʻi ʻe he Siasí ha faʻahinga meʻa ʻoku ʻikai fenāpasi mo hono ngaahi tokāteliné mo e ngaahi akonakí.)

• “Tomuʻa Sio, Pea Tokoni,” Linda K. Burton, Liahona, Nōv. 2012, 78–80.

• “Fakahaofi Hili e Taonakita Hoku ʻOfefiné,” Le Etta Thorpe, Liahona, Sep. 2017, 35–37.

• “19 Suicide Survivors Share What They Needed after Their Loss,” Sarah Schuster, TheMighty.

• “Bereaved by Suicide,” Befrienders Worldwide.