Pagkaadik
Baruganan 10

“Ipataas ang mga Kamot sa Nawad-an og Paglaum,” Suporta nga Giya: Tabang alang sa mga Kapikas ug Pamilya sa mga Nagpaayo (2014).

“Ipataas ang mga Kamot sa Nawad-an og Paglaum,” Suporta nga Giya: Tabang alang sa mga Kapikas ug Pamilya sa mga Nagpaayo.

duha ka babaye nag-istoryahanay

Baruganan 10

Ipataas ang mga Kamot sa Nawad-an og Paglaum

“Busa, pagmatinud-anon; barug diha sa buhatan nga Ako mitudlo nganha kanimo; tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang” (D&P 81:5).

Pagsuporta diha sa Katarung

Mosuporta kita sa atong mga minahal diha sa katarung pinaagi sa paglig-on sa ilang paningkamot sa pagduol kang Kristo ug maulian gikan sa dili maayo nilang mga pagpili. Kon makahimo og dili maayong mga pagpili ang atong mga minahal nga moresulta sa grabing mga sangputanan, natural lang ang kagustuhan sa pagpanalipud kanila gikan niana nga mga sangputanan. Tingali maningkamot kita nga maoy moayo mismo sa nangaguba ug mohimo og pagpahiuli niini alang kanila. Sa ubang mga sitwasyon ang atong tabang makaayo kaayo ug gani makaluwas sa kinabuhi; hinoon, kinahanglan kitang mag-amping nga dili nato masuportahan ang dili maayo nilang mga pagpili o tugotan sila nga makasala. Kon mahulog kita sa lit-ag sa padayon nga pagluwas kanila, posibling mababagan nato ang ilang pagkaayo ug malangan ang ilang pagpaduol sa Ginoo alang sa tabang.

Importanting mahinumduman nga “ang Ginoo dili makatan-aw diha sa sala uban sa labing gamay nga matang sa pagtugot” (D&P 1:31). Ang pagsinati sa negatibong mga sangputanan sa ilang mga binuhatan makatabang sa atong mga minahal nga mahimong determinado nga mag-usab (tan-awa sa Lucas 15:17). Mitambag si propeta Alma sa iyang anak “Ako dili mopadayon sa paghisgot sa imong mga sala, aron sa paghasol sa imong kalag, kon kini dili alang sa imong kaayohan” (Alma 39:7). Tanan kita may tulubagon sa kaugalingon natong mga pulong, mga binuhatan, ug mga hunahuna (tan-awa saMosiah 4:30); dili nato mahimong wagtangon ang tulubagon sa atong mga minahal sa ilang mga binuhatan. Pinaagi lamang sa paghinulsol ug pagkamasulundon sa mga sugo nga mamaayo ang atong mga minahal, makadawat og kapasayloan sa ilang mga sayop, ug makabarug nga matarung atubangan sa Ginoo.

  • Nganong importante nga ang imong minahal manubag sa iyang mga binuhatan?

  • Unsaon nimo sa pagtino kon nagsuporta ka ba gayud sa imong minahal sa pagpaayo, kay sa motugot sa sayop niyang kinaiya?

Paghatag sa Atong Suporta ug Pagdasig

Magsagubang og daghang mga pagsulay ang atong mga minahal sa ilang mga paningkamot nga mamaayo. Tingali mobati sila nga nadaot, depektuso ug dili takus sa gugma sa Dios ug sa atong gugma. Posibling mawad-an sila og paglaum nga dili na gayud sila malimpyo pag-usab. Aron mausab, ilang gikinahanglan ang paglaum sa umaabut ug kasigurohan nga takus sila sa gikinahanglan nga paningkamot. Ang atong tahas dili ang pagpaayo nila apan ang pagdasig ug paghigugma kanila samtang maningkamot sila nga mamaayo. Ang pagpahayag sa atong pagtuo sa Manluluwas ug pagsuporta sa atong mga minahal sa matinuoron nilang mga paningkamot nga mausab makatabang nga mouswag sila ngadto sa pagkaayo.

Ang Manluluwas maoy hingpit nga ehemplo sa suporta ug pagdasig. Siya “puno sa kapuangod [kalooy]” sa nanaglibut kaniya (tan-awa sa 3 Nephi 17:6; Mateo 9:36; 14:14). Si Sister Barbara Thompson, kanhi magtatambag sa kinatibuk-ang kapangulohan sa Relief Society, mipasabut: “Ang kalooy nagpasabut sa pagbati og paghigugma ug kalooy ngadto sa laing tawo. Kini nagpasabut nga magbaton og simpatiya ug tinguha sa paghupay sa pag-antus sa uban. Kini nagpasabut sa pagpakita og kamabination ug kalumo ngadto sa uban” (“Ug sa Uban Pagbaton og Kalooy, Maghimo og Kalainan,” Liahona, Nob. 2010, 119). Kon magmanggiloy-on kita, maningkamot kita sa pagsabut sa kaulaw o kasagmuyo nga posibling gibati sa atong mga minahal ug mokonsiderar sa tanang paningkamot nga ilang gihimo. Kita “[m]agtambayayong sa usag usa nga mga alantuson, … [m]agbangutan uban niadto nga nagbangutan; … ug [m]aghupay niadtong nagkinahanglan sa kahupayan” (Mosiah 18:8–9). Ang pagkalooy wala magpasabut sa pagsuporta sa dili maayo nilang mga pagpili o ibaliwala ang ilang kinaiya. Hinuon, itunol nato ang mapinanggaon natong kamot ug mohatag og pagdasig.

  • Nganong importante man ang pagpakita og kalooy samtang nagsuporta sa imong minahal?

  • Unsaon nimo sa pagpahayag ang imong kalooy?

Ang Pagpadayon sa Pagpangalagad

Ang atong mga minahal maoy responsable sa ilang pagkaayo, ug posibling dili pa sila andam sa atong suporta. Sa ubang sitwasyon, posible ganing balibaran o supakon nila ang atong mga paningkamot sa pagtabang. Tingali mobati kita nga mawad-an sa kadasig ug mawad-an og gahum samtang magtan-aw kanila nga magpadayon sa dili nila maayo nga mga pagpili. Apan makapadayon gihapon kita sa paghigugma ug pag-ampo alang kanila. Sa paghisgot bahin niadtong nakigbisog sa espiritwal nga paagi, mitambag ang Ginoo nga dili kita “mosalikway [kanila]” apan “magpadayon sa pag-alagad; kay kamo wala masayud kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila; ug kamo mao ang hinungdan sa pagdala og kaluwasan ngadto kanila” (3 Nephi 18:32). Ang mapailubong paghulat posibling maoy pinakamaayong buhaton alang sa ubang mga sirkumstansya.

Sa pagkakaron, pwede kitang mag-ampo alang sa atong mga minahal ug suportahan sila sa tukmang mga paagi. Ang Ginoo mogamit sa atong mga pag-ampo ug pagtuo sa pagpanalangin sa atong mga minahal. Miingon si Elder Robert D. Hales nga ang “pagtuo, mga pag-ampo, ug mga paningkamot sa usa ka sakop sa pamilya, ipahinungod gyud alang sa kaayohan sa ilang [minahal]” (“Inubanan sa Tanan nga Pagbati sa Usa ka Malumo nga Ginikanan,” Liahona, Mayo 2004, 88). Ang atong mga minahal posibling dili sa kanunay mopili nga mag-usab sa makadaot nilang kinaiya, apan nahibalo kita nga ang atong mga pag-ampo alang kanila gipaminaw sa mapinanggaon nga Langitnong Amahan.

  • Unsaon nimo sa pagsanong sa usa ka minahal kinsa makita nga daw dili andam nga modawat sa imong suporta?

Pagserbisyo sa Uban

Kon ang atong mga hagit daw bug-at ra kaayo o ang atong sitwasyon daw wala nay paglaum, makakaplag kita og espirituhanong pagbag-o pinaagi sa pagserbisyo sa uban. Ang pagserbisyo makahatag og oportunidad aron makalantaw kita lapas sa atong personal nga mga kalisdanan o mga hagit. Siyempre, dili nato maserbisyuhan ang tanan, ug kinahanglang mag-amping nga dili kita modagan nga labaw kay sa atong kusog (tan-awa sa Mosiah 4:27). Hinoon, bisan ang pinakayano nga buhat makapanalangin ug makadasig sa uban—ug makabayaw sa kaugalingon natong espiritu. Ang pagtabang sa uban usa usab ka paagi nga atong makapakita ang atong gugma ug pagpasalamat sa atong Langitnong Amahan ug sa Manluluwas. Nahibalo kita nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Si Elder M. Russell Ballard nagtudlo nga ang Espiritu mahimo nga atong giya sa ingon niana nga mga paningkamot: “Sa tanan natong pagserbisyo, kinahanglan mahimo kitang sensitibo sa mga pag-aghat sa Espiritu Santo. Ang ligdong, hinay nga tingog mopahibalo kanato kinsa ang nagkinahanglan sa atong tabang ug unsa ang atong mahimo aron matabangan sila” (“Pagkaplag og Kalipay pinaagi sa Mahigugmaong Pagserbisyo,” Liahona, Mayo 2011, 48).

  • Sa unsang paagi ang pagserbisyo sa uban makatabang sa imong pagpas-an sa kaugalingon nimong mga hagit ug panglimbasug?

  • Unsa ang anaa kanimo nga mga oportunidad sa pagserbisyo?

  • Sa unsang paagi mogiya kanimo ang Espiritu sa imong mga paningkamot sa pagserbisyo?

magtiayon nga nagkuyog og lakaw

Aron mausab, ilang gikinahanglan ang paglaum sa umaabut ug kasigurohan nga takus sila sa gikinahanglan nga paningkamot. Ang atong tahas dili ang pagpaayo nila apan ang pagdasig ug paghigugma kanila samtang maningkamot sila nga mamaayo.