“Gisalikway Nato ang Pagkadili Matinud-anon,” Suporta nga Giya: Tabang alang sa mga Kapikas ug Pamilya sa mga Nagpaayo (2014).
“Gisalikway Nato ang Pagkadili Matinud-anon,” Suporta nga Giya: Tabang alang sa mga Kapikas ug Pamilya sa mga Nagpaayo.
Baruganan 9
Gisalikway Nato ang Pagkadili Matinud-anon
“Ug gisalikway [namo] ang mga paagi nga makauulaw ug sinuwitik; nagadumili kami sa pagbuhat sa lipatlipat o sa paghambog sa pulong sa Dios, hinonoa, pinaagi sa dayag nga pagsulti sa kamatuoran, kami nagapaila sa among kaugalingon ngadto sa kaisipan sa tanang tawo diha sa atubangan sa Dios” (2 Mga Taga-Corinto 4:2).
Pagpasiugda og Pagsalig
Ang dili maayong mga pagpili nga gihimo sa tago, ug ang panglimbong maoy magpabuhi niini. Ang lisud nga panahon para sa atong mga minahal mahitabo kon ilang maamguhan kon unsay mahimo sa pagsekreto ug pagpanglimbong aron mahimo ang dili maayo nilang mga pagpili. Kon ang atong mga minahal mamakak o molimbong kanato ug mobaliwala sa bati nilang binuhatan , mawala ang atong pagsalig kanila. Kon wala ang pagsalig, lisud buntugon ang atong kahadlok ug kabalaka kon unsa kaha ang buhaton sa atong mga minahal kon wala kita. Sama pananglit, kon moingon sila nato nga moadto sila sa tindahan, maghunahuna kita basin namakak ra sila ug motuyo nga moapil sa dili maayong mga buhat. Kini nga kawalay pagsalig magmugna og mga babag sa atong komunikasyon ug sa atong relasyon. Posibling kanunay kitang mabalaka kon unsay gibuhat sa atong mga minahal ug tingali mohimog mga lakang sa pagbantay pag-ayo sa ilang kinaiya.
Apan samtang dili kita hingpit nga makasalig sa atong mga minahal, makasalig kita sa Ginoo ug sa Iyang proteksyon. Motabang Siya aron sa epektibong paagi maatubang nato ang daghang kabalaka ug kahadlok nga atong masugatan. Mohatag Siya kanato og mga kasiguroan pinaagi sa Iyang Espiritu nga makatabang kanato aron makakaplag ug kalinaw ug paglaum. Mipahayag si Nephi, “O Ginoo, ako misalig kanimo, ug ako mosalig kanimo sa kahangturan” (2 Nephi 4:34; tan-awa usab sa Alma 58:11).
-
Sa unsang paagi ang pagsalig sa Ginoo makatabang kanimo kon nanglimbasug ka sa pagsalig sa imong minahal?
Pagdasig sa Pagkamatinud-anon sa Atong mga Minahal
Kadaghanan kanato, ang pagdiskubre sa dili maayong mga pagpili sa atong mga minahal makapakurat ug makapaalarma. Natural lang, daghan kitag mga pangutana kabahin sa ilang mga buhat ug mga kinaiya. Sa unsang paagiha kita nalingla? Unsa pa ang wala nato mahibaloi? Ganahan kaayo kitang makadawat og tubag ug makahibalo sa kamatuoran. Sa kasagaran, molimud ang atong mga minahal o mobati og grabeng kaulaw hinungdan nga ginagmay ra ang ilang itug-an sa matag higayon. Samtang importante kaayo nga magmatinud-anon sila ug manubag sa ilang nahimo, ang pagtug-an sa tanan sa kasagaran usa ka proseso nga magkinahanglan og panahon, ilabi na kon ang mga pamaagi sa pagtago ug ang paglimbong naandan na sulod sa dugayng panahon.
Lisud hibaloan ang tanang tinago ug sakit nga mga butang nga nahimo sa atong mga minahal. Posibling dili kita gustong masayud, o dili kita andam nga makadungog sa tanan—posibling sakit ug makadaot kanato ang pagkadungog sa pipila ka pihong mga detalye. Samtang importante nga madunggan nato ang mga tinuod nga hitabo, ang tanang butang kinahanglang buhaton “sa kaalam ug kahusay” (Mosiah 4:27). Ang matag usa nga kahimtang magkalahi kon unsa kadaghang detalye ang makatagbaw sa gikinahanglan nga kamatuoran. Ang usa ka bishop, higala, magtatambag—ug labaw sa tanan, ang Espiritu—makatabang sa paggiya kanato sa pagbalanse kon unsay angay natong mahibaloan ug kon unsa ang lagmit dugang nga makadaot kanato. Bisan kon mobati kita og kapungot o kasakit sa unsay gibutyag sa atong mga minahal, importante nga dili masuko o mopakaulaw sa atong mga minahal. Hinumdumi nga ang pagtug-an usa ka bahin aron maulian ug mamaayo ug nga ang atong mga minahal posibling nagsinati na og pagkaulaw ug mibati na og kalagot sa kaugalingon—mga pagbati nga kinahanglang mabuntog samtang mag-uswag sila padulong sa pagkaayo.
-
Unsa kaha nga gidaghanon sa detalye ang imong gikinahanglan aron makatukod og pundasyon sa pagsalig?
-
Unsaon nimo sa paghukom kon unsay importanting mahibaloan ug dili angayang isulti?
Pagmentinar og Kanunay nga Komunikasyon
Ang atong mga minahal posibling magpanuko o dili andam nga makigsulti nato mahitungod sa ilang mga panglimbasug o mga hagit. Sa samang paagi, posibling dili kita komportable nga mopaambit sa atong mga pagbati kanila. Bisan tingali og lisud, makakita kita og mga paagi aron mahimong bukas ug matinud-anon ngadto sa atong mga minahal. Kita ug ang atong mga minahal makabenepisyo pinaagi sa kanunay nga pagpakigsulti sa usag usa kabahin sa atong panaw ngadto sa pagkahibalik sa kanhing kahimtang ug pagkaayo. Naglakip kini sa paghisgot sa mga panahon o mga kahimtang diin ang atong mga minahal natintal o nakasinati og dugang kaluya sa dihang nagpaayo na unta. Miingon si Elder Richard G. Scott, “Ang [kapikas o sakop sa pamilya] kinahanglang walay pribado, tinago nga plano nga i-sekreto gikan sa [iyang minahal]. Ang pagpaambit sa tanan mahitungod sa usag-usa ka personal nga kinabuhi usa ka gamhanang espirituhanong kasiguroan” (“The Sanctity of Womanhood,” Ensign, Mayo 2000, 37).
Posibling lisud ang pagkahibalo kon kanus-a, kapila, ug unsa nga matang sa mga butang ang angay natong ihangyo nga ipaambit ngari nato sa atong mga minahal. Ang pamaagi ug ang kamakanunayon sa atong komunikasyon mahimong magkalahi depende sa atong tahas isip kapikas, isip ginikanan sa minor de edad nga anak, o isip ginikanan sa hingkod na nga anak. Usab, ang usa ka bishop, higala, o magtatambag makatabang nga atong makaplagan ang eksakto nga balanse. Ang bukas ug matinud-anong komunikasyon maoy sinugdanan aron maugmad og balik ang pagsalig. Samtang mapailubon kitang makigsulti sa atong mga minahal, kon motugot sila, ang Espiritu mogiya ug mosuporta kanato.
-
Sa unsang paagi ang regular, bukas, ug matinuorong komunikasyon mipanalangin sa imong relasyon sa imong minahal?
-
Sa unsang piho nga mga paagi ikaw ug ang imong minahal makapalambo sa inyong komunikasyon?
Pagtukod og balik sa Pagsalig
Posibling nagkinahanglang makakat-on ang atong mga minahal kon unsaon nga magmatinud-anon ug masaligan pag-usab. Samtang tingali isulti nila ang tanang eksakto nga butang, tingali mas importante ang pagpaniid sa ilang mga buhat. Makatabang kini nga atong masabtan ang kasinsero sa ilang mga paningkamot nga mamaayo. Posibling dili pa sila andam nga mohimo sa unsay gikinahanglan aron makaplagan ang pagkaayo o posibling mahimong maluya pag-usab. Sa maong mga kahimtang, pweding pilion nato ang pagpailub ug paghigugma kanila nga dili lang usa mohatag sa atong hingpit nga pagsalig kanila.
Posibling magkadugang ang atong pagsalig kon mamatikdan nato nga nagpaduol sa Ginoo ang atong mga minahal ug makugihong naghimo og mga pag-uswag padulong sa pagkaayo. Samtang magmatinud-anon sila kanato mahitungod sa mga panahon sa ilang kalisud, makasugod usab kita nga motuo nga nagmatinud-anon sila mahitungod sa ilang maayo nga mga panahon. Motabang kanato ang Espiritu sa pagsabut kon kanus-a na usab kita magsugod sa pagsalig. Kini nga proseso posibling anam-anam nga mahitabo.
Sa ubang sitwasyon, posibling mobati kita nga dili na gyud kita makasalig pa tungod kay grabe na kaayo kita nga napasakitan. Bisan og ang atong mga minahal matinuoron ug kasaligan, ang kaugalingon natong kahadlok o kapungot posibling mopugong kanato sa paghatag sa atong pagsalig. Lain na usab kini nga palas-anon nga atong ikahatag sa Ginoo. Ang Iyang paghupay ug suporta moayo sa atong kasingkasing ug maghimong posible nga sa makausa pa mosalig na usab sa atong mga minahal, sa panahon nga maangkon nila kana nga pagsalig.
-
Sa unsang paagi ang Manluluwas makatabang nga atong matukod og balik ang pagsalig?
-
Unsa ang ubang sunod nga mga lakang nga imong buhaton sa proseso aron matukod og balik ang pagsalig?
Bisan kon mobati kita og kapungot o kasakit sa unsay gibutyag sa atong mga minahal, importante nga dili masuko o mopakaulaw sa atong mga minahal. Hinumdumi nga ang pagtug-an may kalabutan sa pagkaayo ug hinay-hinay nga pagkaayo.