Atong mga Panimalay, Atong mga Pamilya
PAGTINAMBAGAY SA USAG USA DIHA SA Kaminyoon
Isip usa ka therapist sa kaminyoon ug pamilya sa Victoria, Canada, gitambagan nako ang magtiayong Bob ug Mary (mga pangalan giusab), kinsa kanunay maglalis kon silang duha mohimo og mga desisyon. Atol sa usa ka miting si Bob miingon kanako, “Naningkamot ko sa pagdumala ug paghimo sa mga butang, apan kon makahunahuna ko og mga ideya kon unsa ang angay namo nga buhaton, dili siya mosuporta sa priesthood!”
Gikan sa iyang komentaryo makasulti ko nga siya wala makasabut kon unsa ang gipasabut sa pagdumala. Kon ang magtiayon magminyo, sila moporma og patas nga pagpakig-uban diin silang duha maningkamot sa paghimo og mga desisyon diha sa diwa sa panaghiusa.
Mipakigbahin ko niining magtiayon sa pipila ka mga baruganan kabahin sa pagtinambagay sa usag usa nga akong nakat-unan gikan sa panig-ingnan sa konseho sa priesthood. Bisan tuod ang konseho sa balay molihok nga dili gayud susama sa mga konseho diha sa Simbahan, daghang susama nga mga baruganan ang magamit. Samtang kita naningkamot sa pagbuhat niining mga baruganan diha sa atong panimalay, kini makatabang kanato sa paglig-on sa atong kaminyoon sa paagi nga makapahimuot sa Ginoo.
Baruganan 1: Inuyunan sa Tanan sa Paghimo og Desisyon
Sa Konseho sa Priesthood
Mga kapangulohan, konseho ug bishopric nagtrabaho sumala sa mga baruganan nga inuyunan sa tanan. Si Elder M. Russell Ballard mipasabut nga ang Korum sa Napuog Duha ka mga Apostoles kinahanglang maghiusa ang desisyon sa dili pa molihok sa bisan unsa nga isyu: “Kami maghisgot og daghan klase nga mga isyu, gikan sa administrasyon sa Simbahan ngadto sa mga panghitabo sa kalibutan, ug amo kining gibuhat nga prangka ug dayag. Usahay ang mga isyu hisgutan sulod sa daghang mga semana, bulan, ug usahay gani mga tuig sa dili pa mahimo ang desisyon.”1 Ang panaghiusa importante kaayo nga dili nila buhaton ang usa ka desisyon kon wala pa makab-ut ang panaghiusa.
Ang Ginoo mitudlo sa samang baruganan sa panaghiusa diha sa mga konseho ngadto ni Joseph Smith: “Ug sa matag hukom nga mahimo sa bisan hain niini nga mga korum kinahanglan gayud nga buhaton pinaagi sa nagkauyon nga tingog sa mao; nga mao, nga ang matag sakop diha sa tagsa-tagsa ka korum kinahanglan gayud nga mouyon sa ilang mga paghukom, aron sa paghimo sa ilang hukom nga sama og gahum o kalig-on sa usag usa.” (D&P 107:27).
Si Elder David A. Bednar sa Korum sa Napulog Duha ka nga Apostoles mihatag og gibug-aton niining baruganan sa dihang siya mitudlo, “Dili kita makadawat og pagpadayag kon kita wala magkahiusa.”2 Kon kita nagkahiusa sa katuyoan ug pag-ampo, kita nagdapit sa giya ug inspirasyon gikan sa Espiritu Santo.
Diha sa Panimalay
Ang baruganan sa panaghiusa magamit sa mga konseho sa priesthood, ug magamit usab sa kaminyoon. Ang Kaigsoonan mitudlo nga ang konseho sa pamilya mao ang nag-una nga konseho sa Simbahan.3 Bantayi nga wala sila magtudlo nga ang bana mao ang labing nag-una nga konseho o ang asawa mao ang labing nag-una nga konseho. Kini nga konseho naglangkob nilang duha.
Komon sa magtiayon nga maglisud sa paghimo og desisyon nga inuyunan sa tanan, ilabi na kon ang isyu mahinungdanon kaayo. Dugang pa, kon ang magtiayon mas gusto nga siya ang ensakto kaysa makakab-ut og pag-uyon sa tanan, ang “komunikasyon sa Langitnong Amahan mawala, [ug] ang komunikasyon tali sa magtiayon mawala usab. Ug ang Langitnong Amahan dili manginlabut. Sa kasagaran Siya dili moapil kon Siya wala gi-imbitar.”4 Ang yawe mao ang tinuoray nga pagdapit—kay sa dili paapilon—ang atong Langitnong Amahan sa atong mga diskusyon. Kon kita mapainubsanon nga magtinabangay ug maminaw sa usag usa, kita makaangkon sa mahinungdanong panalangin sa giya sa Ginoo.
Importante nga mohimo og nahiusa nga desisyon uban sa giya sa Espiritu—ilabi na kon ang desisyon ingon og dili ang labing maayo. Si Presidente George Q. Cannon (1827–1901), Unang Magtatambag sa Unang Kapangulohan, mipasabut nga ang Ginoo mosuporta sa desisyon sa nagkahiusa nga mga lider ug Iyang palamboon ang ilang dili hingpit nga plano ug “modugang niini pinaagi sa Iyang kaalam ug gahum ug mohimo niini nga epektibo”5 Kini nga saad gitanyag sa tanang konseho, lakip na sa magtiayon.
Hinoon, ang paghimo og desisyon dili sa kanunay mahimo sa pormal nga proseso. Si Elder Ballard mitudlo nga “kon ang bana ug asawa mag-istoryahanay sa usag usa, sila naghimo og konseho sa pamilya.”6
Dugang pa, sama nga ang Ginoo dili mosugo kanato sa tanang butang, ang managtiayon dili kinahanglan nga maghimo og konseho alang sa matag desisyon. Ang managtiayon kinahanglang mosalig sa usag usa sa pagdesisyon matag adlaw nga gamay lang ang sangputanan sa kahangturan. Manag-uban, lakip ang giya gikan sa Ginoo, sa kasulatan, ug mga pulong sa propeta, sila modeterminar niadtong mga desisyon nga nagkinahanglan og diskusyon sa usag usa.
Baruganan 2: Hingpit nga Partisipasyon
Sa Konseho sa Priesthood
Sa tibuok kalibutan nga miting sa pagbansay sa pagpangulo niadtong Nobyembre 2010, si Julie B. Beck, kinatibuk-ang presidente sa Relief Society, mipakigbahin sa mosunod nga kasulatan: “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigayunan” (D&P 88:122). Gisundan ni Elder Walter F. González sa Kapangulohan sa Seventy ang iyang komentorya uban sa obserbasyon nga ang pag-apil makadala og inspirasyon.7 Kon ang tanan adunay susama nga kahigayunan sa pagtampo, ang hiniusang mga ideya sa matag indibidwal malig-on.
Diha sa Panimalay
Ang baruganan sa partisipasyon nagtudlo kanato sa kaimportante nga ang managtiayon motampo sa proseso sa pagdesisyon. Dili paigo nga ang usa mohimo sa tanang desisyon ug ang usa mouyon lang. Ang managtiayon mas magmalampuson kon silang duha magtinguha og inspirasyon ug dayon maminaw sa hunahuna ug pagbati sa usag usa.
Si Presidente Howard W. Hunter (1907–95) miingon: “Ang usa ka lalaki kinsa naghupot sa priesthood modawat sa iyang asawa isip kaparis sa pagpangulo sa panimalay ug pamilya uban sa hingpit nga kahibalo ug partisipasyon sa tanang desisyon kabahin niana. … Giandam sa Ginoo nga ang asawa mahimong helpmeet [kaabag] sa lalaki (meet nagpasabut nga patas)—buot pasabut, usa ka patas nga kompanyon ug kinahanglanon sa hingpit nga panagparis.”8 Kita gihimo aron sa pagtabang sa usag usa. Kon kita modapit ug modawat sa partisipasyon sa atong kaparis, kita makatagamtan sa usa sa labing nindot nga kaayohan sa kaminyoon.
Baruganan 3: Pagdumala sa Matarung nga Paagi
Sa Konseho sa Priesthood
Ang pagsabut sa saktong kahulugan sa pagdumala mahinungdanon aron epektibo nga mapahigayon ang konseho sa priesthood. Kadtong nagdumala “nagbantay sa ibabaw sa simbahan” (Alma 6:1) ug responsable sa pagsigurado nga ang panaghiusa, patas nga partisipasyon, ug ubang mga baruganan sa pagtambag gisunod. Si Elder Ballard nagpahinumdon kanato nga “kadtong naghupot sa priesthood dili gayud malimot nga sila walay katungod sa pagkontrolar sa tawo pinaagi sa paghadlok. … Ang priesthood gamiton sa pagserbisyo, dili sa pagpang-ulipon; kalooy, dili sa pagpamugos; pagpangga, dili sa pagkontrolar. Kinsa kadtong sukwahi ang panghunahuna niini naglihok gawas sa awtoridad sa priesthood.”9
Diha sa Panimalay
Ang buluhaton sa bana isip patriyarka mao ang modumala sa panimalay dili mao ang momando sa uban apan sa pagsiguro nga ang kaminyoon ug ang pamilya molambo. Si Presidente David O. McKay (1873–1970) mipasabut nga moabut ang panahon nga ang matag tawo adunay personal priesthood interbyu uban sa Manluluwas: “Una, Siya mohangyo og report sa pagkamay tulubagon kabahin sa inyong relasyon sa inyong asawa. Aktibo ka ba sa paglipay niya ug sa pagsiguro nga ang iyang mga panginahanglan isip indibidwal natubag?”10
Ang bana may tulubagon sa kalamboan ug kalipay sa iyang kaminyoon, apan kining pagkamay tulubagon wala maghatag kaniya og awtoridad ibabaw sa iyang asawa. Silang duha mao ang responsable sa kaminyoon. Sa matarung nga konseho sa kaminyoon ang managtiayon mopakigbahin og mga hiyas nga kon gamiton makatabang kanila nga ma-focus sa usag usa.
Atong matun-an ang pipila niini nga mga hiyas diha sa Doktrina ug mga Pakigsaad 121:41: “Walay gahum o impluwensya nga makahimo o angay gayud nga magpadayon pinaagi sa hiyas sa pagkapari, gawas lamang sa pagdani, sa pagkamainantuson, sa kalumo ug kaaghup, ug sa tiunay nga paghigugma.”
Dili kita makagamit sa priesthood sa pagpakita og gahum ug impluwensya. Mao nga, dili kita makagamit sa dili matarung nga mga pamaagi aron mamahimong dominante sa kaminyoon. Ang tinuod nga gahum moabut lamang kon kita magtinabangay diha sa pagkamatarung ug mahimong angay sa mga panalangin gikan sa Ginoo.
Pagtukod og Mahangturong Kaminyoon
Ang mga magtiayon nga nanlimbasug sa mga problema sa pagkontrolar o dili pagsinabtanay sa pagdumala sa panahon, kwarta, mga anak, mga ugangan, o bisan unsa pa kinahanglang mokonsiderar sa paghunahuna og maayo sa sukaranang mga baruganan nga ilang gipili nga sundon sa ilang kaminyoon. Ila bang mapalambo ang ilang kaminyoon pinaagi sa pag-establisar og sumbanan diin sila magtinambagay uban sa tiunay nga paghigugma?
Ang mga baruganan sa panaghiusa, partisipasyon, ug pagdumala diha sa pagkamatarung makatugot kanato nga mahitabo ang saktong pag-uyon sa atong kapikas ug modapit sa Espiritu sa atong kinabuhi. Ang paggamit sa hiyas sa gugma ug pagkamabination makapahumok sa daghang argumento, makapahimo nga mas kontento sa kaminyoon, ug makatukod og relasyon nga molungtad hangtud sa kahangturan.
Sama nga ang konseho sa priesthood naningkamot sa panaghiusa sa ilang mga desisyon, ang panaghiusa sa kaminyoon mahinungdanon.
Sa matarung nga konseho sa kaminyoon, ang managtiayon maningkamot—pinaagi sa pagtahud, pagkamabination, ug hingpit nga partisipasyon—sa pagtukod sa relasyon ug pagtinguha og panaghiusa.
Mga paghulagway sa litrato pinaagi ni Robert Casey, gawas kon gipahibalo; sa tuo: paghulagway sa litrato pinaagi ni Craig Dimond