Pagserbisyo diha sa Simbahan
Ang Potensyal sa Serbisyo nga Gidumala sa Kabatan-onan
Ang mga Nigerian ganahang mosulti nga sila nagpuyo ubos sa “tumang kainit sa adlaw sa Africa.” Ang temperatura duol sa equator molahi lang og gamay sa bisan unsa nga panahon. Mao nga sa dihang nagpahigayon kami sa among all-Africa service project niadtong Agosto, nagsugod kami sa alas-7 sa buntag aron daghan kami og mabuhat kutob sa among mahimo sa mas bugnaw nga panahon sa mga oras sa buntag.
Gamit ang mga pala, rake, ug sundang, gihawanan namo ang mga sagbut ug gipanghakot namo ang mga basura sa bakanteng luna duol sa among building sa Yaba Ward sa Lagos Nigeria Stake. Human sa pagtrabaho og tulo ka oras, kami nakalimpyo og mga tulo ka acres (1.2 ha) sa upat ka acre (1.6 ha) nga luna.
“Hain may maayo og tiwason na lang kining gamay nga bahin ug mag-eskedyul og laing adlaw aron humanon ang pagpanglimpyo sa luna? nangutana ang bishop.
Pagkadungog sa bishop, si Emmanuel, ang presidente sa teachers korum, mipahayag og kasagmuyo.
“Kon dili nato humanon kini nga bahin, ang mga batan-on dili mobati nga daghan sila og nahimo karon,” siya miingon. “Palihug, humanon nato kini.”
Tungod kay ang sagbut mga unom ka pye (1.8 m) ang gitas-on sa kasagarang dapit, kini nakabalda sa panan-aw ug lisud mahibaloan unsa kadaghan ang nabilin.
“Brother Hill, sutaon nato unsa kita kadugay makahawan og pig-ot nga agianan, tingali mga duha ka pye ang gilapdon,” miingon si Emmanuel. “Kon paspas nato kining mabuhat, ang uban makakita nga posibleng mas dali kining mahuman kay sa ilang gihunahua.”
Ang batan-ong mga lalaki, natunga sa duha ka grupo, nagtrabaho sa isigka kilid sa luna sa tibuok adlaw. Wala pay nakalabang sa daghang mga sagbut lahos ngadto sa pikas tumoy. Nagsakit ang likod, miluhod ko aron mahupay og gamay samtang padayon nga namutol sa mga sagbut gamit ang sundang. Nabalaka, pipila sa mga batan-on miduol aron sutaon kon sila makatabang ug dayon miapil sa dihang ilang nakita nga si Emmanuel ug ako nagkaduol na. Sulod sa pipila ka minuto nakalahos mi ngadto sa usag-usa, ug nanghugyaw sila. Nakakita sa kanindot sa among gibuhat, ang uban misugod sa pagtrabaho nga nagparis nga nagsunod sa among gibuhat.
Wala kaabut og usa ka oras, kami nahuman. Mapahiyumon tungod sa katagbawan, nagpahalipay kami sa usag usa—ilabi na si Emmanuel, kinsa nakahunahuna og paagi aron sundon sa uban.
Ang bishop ug ako nagtuo nga kami, sa among edad ug kaalam, nasayud kon unsa lang ang mabuhat niining mga batan-ong mga lalaki. Nakita lang namo ang nainitan, gipangkapoy nga mga batan-ong lalaki, apan si Emmanuel nakakita og oportunidad alang sa iyang mga higala nga makaangkon og dignidad ug pasalig. Siya nasayud nga ang paghimo og dugang paningkamot makahatag og mas dakong katagbawan alang kanila kay sa unya na lang tapuson ang buluhaton. Siya nagpahinumdom kanato sa kalig-on sa mga batan-on sa Simbahan ug sa unsang paagi kita makabenipisyo kon sila motampo ug modumala.
Nakaamgo ko nga dili nato kinahanglang paabuton nga ang atong mga batan-on mahamtong—sila makahimo og kalainan karon kon ato silang tugutan.
Paghulagway pinaagi ni Brian Call