Nagtanom Ko og mga Liso
Abel Chaves, Germany
Sa akong klase sa business ethics alang sa akong master’s program sa Schiller International University sa Heidelberg, Germany, ang matag estudyante gihangyo sa pagbuhat og 20 minuto nga oral presentation inig tapos sa semester. Ang profesor nangutana kanako ko kon maghisgot ba ko kabahin sa ethics gikan sa panglantaw sa usa ka Santos sa Ulahing mga Adlaw.
Nabunyagan ko sa edad nga 18 ug gitawag sa pagserbisyo og misyon sa Brazil paglabay sa usa ka tuig. Sukad niadto padayon kong nakigbahin sa ebanghelyo ngadto sa kadaghanan.
Nasayud ko nga usa ka hagit ang maghisgut og mga isyu sa relihiyon diha sa unibersidad, apan akong gidawat ang hagit. Mihukom ko sa pag-andam og presentasyon sa impormasyon gikan sa Mormon.org.
Ang unibersidad asa ko nagtungha adunay mga estudyante gikan sa bisan asa nga dapit sa kalibutan. Ang akong klase sa ethics nagpakita nianang pagkamanaglahi [diversity], uban sa 18 ka mga estudyante gikan sa lain-laing mga nasud.
Ang presentasyon sa ethics gisugdan sa duha ka estudyante gikan sa India nga gisundan sa lain nga estudyante gikan sa Myanmar. Ako ang katapusan nga mopresentar. Naghisgot ko kabahin sa “Ang Pamilya: Usa ka Pamahayag ngadto sa Kalibutan,” ang Mga Artikulo sa Hugot nga Pagtuo, ug uban pang mga hilisgutan sa ebanghelyo. Alang sa kadaghanan sa mga estudyante, mao kadto ang unang higayon nga ilang nasayran ang Simbahan.
Gitapos nako pinaagi sa akong pagpamatuod sa ebanghelyo ug sa kaimportante sa pagbuhat sa eksakto bisan pa sa mga pagpamugos nga naglibut kanato. Sa katapusan gihatagan nako ang tanan og kopya sa Basahon ni Mormon sa ilang pinulongan. Human sa akong presentasyon gipangutana ko nila pag-ayo og daghang matang sa pangutana. Ang akong 20 minutos nga presentasyon miabut og usa ka oras.
Sa sunod adlaw sa eskwela, usa ka higala gikan sa India miingon kanako nga siya giganahan kaayo sa akong presentasyon ug nakabasa na og gamay sa Basahon ni Mormon. Ang iya higala, gikan usab sa India, nangayo usab og kopya. Sa wala madugay usa ka higala gikan sa Myanmar miingon kanako nga siya nalipay sa pagkadungog kabahin sa Simbahan, ilabi na sa mga pagtulun-an kabahin sa pamilya ug sa balaod sa kaputli tungod kay nagtuo siya niadtong mga baruganan. Misaad siya sa pagbasa sa Basahon ni Mormon.
Ang akong mga higala gikan sa Ghana nagpasalamat kanako sa paghisgut kanila kabahin sa Pagpahiuli, nagsaad nga maningkamot silang motan-aw sa templo sa Accra. Ang akong higala gikan sa Liberia miingon kanako nga ang akong mensahe usa ka inspirasyon ngadto kaniya ug naghatag kaniya og paglaum sa umaabot.
Nalipay ko nga ang Espiritu sa Ginoo mimatuod sa akong mensahe. Dili kanunay natong masaksihan ang epekto sa atong mga pulong, apan nasayud ko nga ang akong presentasyon sa klase mamunga sa umaabot. Manghinaut ko nga ang pipila niadtong mga tawo sa klasrom modawat sa ebanghelyo sa umaabot ug mahimong himan sa kamot sa Ginoo sa pagpakatap sa mensahe sa Pagpahiuli ngadto sa tanang kanasuran, kaliwatan, pinulongan, ug katawhan (tan-awa sa D&P 133:37).