Maayo ang Pagbati Niini

Jeffery Stockett, Utah, USA

Ang Espiritu modasig sa daghan kaayong mga pamaagi. Nakasinati ko og mga higayon sa kalinaw, mga pagbati sa paghupay, ug kaklaro sa paghunahuna. Ang pipila sa akong kusog kaayo nga impresyon yano nga miabut isip pagbati sa kamatuoran o pagka-eksakto. Ang pagbati lisud nga ihulagway, apan anaa kini kon yano ninyong mahibaloan nga ang usa ka butang tinuod o nga kinahanglan ka nga molihok.

Usa sa labing gamhanan nako nga kasinatian nga anaa kining pagbati mao kadtong pagpangita og usa ka balay nga paliton. Dili pa ko minyo ug sa daghang mga tuig naghunahuna ko sa pagpalit og balay. Giingnan nako ang akong realtor unsa ang akong gusto, ug maayo kaayo siyang nangita og mga balay nga mohaum sa akong gihulagway. Iya kong gipakita og mga balay, apan gibalibaran ko kini tungod kay dili maayo ang pamati. Siya nagsugod sa pagpangutana kanako kon unsa ang wala nako maganahi sa matag usa aron iyang mas mapakita kanako ang mga balay nga mohaum sa akong panginahanglan. Apan, dili gyud ko kaayo makapasabut kaniya unsa ang kulang.

Sa katapusan, usa ka hapon kami mitan-aw sa usa ka balay nga dili kaayo nindot sama sa uban nga among nakita. Mas mahal kini kaysa sa uban. Kini mihaum sa hulagway nga akong gisulti nga mao ang akong gusto apan dili kini ingon kanindot sama sa uban nga among nakita. Bisan pa niana, human sa pagtan-aw niini, miingon ko sa akong realtor nga gusto kong mopalit niini. Ingon og natingala siya sa akong kaandam sa pagpalit dayon niini. Nagkonsiderar sa akong pagduha-duha sa milabay nga mga bulan, siya angay alang nga masurprisa. Apan hilabihan ang pagbati nga dinhi ko angay nga mopuyo. Wala ko mobati nga mohunong ug hunahunaon usa kini.

Mitanyag ko sa kantidad sa pagpalit, ug gidawat kini sa mga nagbaligya, bisan pa nga dili kini ang pinaka taas nga tanyag nga ilang nadawat. Giingnan nako ang akong pamilya nga nasayud ko nga angay gyud ko nga mopuyo niadto nga balay, bisan tuod wala ko masayud kon ngano.

Nakaplagan nako ang rason nganong kinahanglan nga mobalhin ko didto dayon. Nakaila-ila ko og usa ka babaye sa singles ward sulod sa usa ka bulan sukad sa akong balhin. Mga sobra lang og gamay sa usa ka tuig, miluhod kami sa altar sa templo, diin kami na-sealed isip bana ug asawa.

Ang Ginoo sa tinuoray naglihok sa misteryusong mga pamaagi. Wala koy ideya nga Siya mogiya kanako ngadto sa mahangturong kaminyoon sa dihang Iya kong gitabangan sa pagpili og balay. Ang nahibaloan lang nako kay gigiyahan ko niini nga lakang, ug karon akong nakita nga ang paggiya nagagikan sa Iyang Espiritu.