Usa ka Playground alang kang Carly
Si Carly W. nga Taga-Rexburg, Idaho, USA, usa ka busy nga katabang. Sa balay si Carly motabang sa pag-atiman sa mga iring, iro, ug mga manok sa pamilya. Tungod kay si Carly usa man sa pinakamaayong mga estudyante sa klase sa eskwelahan, motabang siya sa ubang mga bata sa math ug sa pagbasa. Sa Primary, ang pagkanta ni Carly nakatabang sa ubang mga bata nga mobati sa Espiritu.
Tungod kay si Carly nakahimo og ingon ka maayo nga buhat sa pagtabang sa uban, ang uban niyang mga higala nakahukom nga motabang usab kaniya.
Si Carly natawo nga may sakit nga gitawag og spina bifida. Kini nga sakit nagpalisud kang Carly sa paggamit sa tanan niyang kusog. Ang paghimo og mga butang sama sa paglakaw sa dili patag nga yuta ug ang pagsaka sa hagdan lisud alang kaniya. Sa eskwelahan, si Carly dili makadula sa playground tungod kay ang mga ekipo sa playground lisud niyang gamiton. May ubang mga bata usab nga dili makagamit sa ekipo sa playground.
“Usahay bation nakong mawad-an sa kadasig tungod kay dili ko makadula sa playground,” miingon si Carly.
Usa sa mga higala ni Carly, si Halli Jo, ug ang mama ni Halli Jo nakahukom nga makapundo og kwarta aron makahimo og playground nga magamit ni Carly ug sa ubang mga estudyante sa eskwelahan.
Si Halli Jo, iyang mama, ug daghang mga tawo milihok aron makatigom og kwarta alang sa bag-ong playground. Dako kini nga buluhaton, apan nakatigom ra gayud sila og igong ikatukod og bag-ong playground nga ang tanang estudyante makadula.
“Dako kaayo kadto nga buluhaton,” miingon si Halli Jo. “Apan ang trabaho wala gayud maghatag og kasubo kanako—nagdugang hinoon kini sa akong gugma kang Carly.”
Nalipay si Carly nga makadula sa playground uban sa iyang mga higala. Miingon siya, “Gusto kong molakaw pataas sa mga rampa ug magpadailos sa mga dailusanan. Ako ug ang akong mga higala nangalingaw.”
Ganahan si Carly og musika. Apil siya sa usa ka singing group ug nagkat-on sa pagtukar og piano.
Usa ka butang nga nakatabang kang Carly nga nakakat-on sa pagbalanse mao ang pagsakay og kabayo.
Usa sa paboritong butang nga buhaton ni Carly sa playground mao ang scavenger hunts uban sa iyang mga higala.
Ang guma nga salog sa playground nakapasayon sa paglakaw ni Carly.
Si Carly ug Halli Jo (sa tuo) ganahan nga magdula og mga monyeka, maglakaw-lakaw sa gawas, ug magkolor.
Mga Litrato pinaagi ni Christina Smith