Asa Ako Dad-a sa Akong mga Pagpili?
Mausab ba ni Karina ang iyang direksyon pinaagi sa pag-usab sa iyang mga desisyon?
Nahanaw ang pahiyum ni Karina. Gipaningot siya—ug dili tungod kay lahi ang kainiton nianang semanaha. Milibut siya sa pagtan-aw aron mangayo og tabang. Apan bisan sa kadaghang tawo didto sa open house, ingon og walay bisan usa nga nakabantay kaniyang nag-inusara atubang sa usa ka reporter ug sa tanan niyang mga pangutana.
Hangtud nianang higayona, ang 17 anyos nga si Karina nalingaw sa iyang pagboluntrayo sa open house sa Templo sa Kyiv Ukraine. Karon, uban sa reporter sa newspaper nga mahinamong nagpaabut, ingon og migahi ang iyang dila.
Nahadlok si Karina nga tungod sa mga nangagi niyang sayop nga gipaningkamutan niyang mabuntog, ang Dios dili motabang kaniya.
Asa Padulong ang Pagsunod sa Katawhan
Sa iyang pagtubo sa Simbahan, si Karina nangandoy og usa ka kaminyoon sa templo. Apan sama sa ubang mga batan-on, pangandoy niya ang madawat sa uban.
Gusto niyang mahimong matahum ug inila sama sa magulang niya nga babaye. Nangandoy siyang makita ug madayeg, apan mahadlok siya nga magpakita nga lahi ug mabugal-bugalan. Ang kagustuhan nga mosulod sa police academy sama sa iyang amahan midugang lang sa problema. Sa 2,000 ka mga estudyante 70 ra ang babaye. Nalingaw siya sa mga pagtagad ug usab nahadlok niini.
Sa iyang tinguha nga madawat sa uban, mihimo siya og dili kaayo maayong mga pagpili. “Kusog ang pagbira sa kalibutan,” miingon si Karina. “Ang mga tawo sa akong palibut moinom ug manigarilyo. Gihaylo nila ako, ug ako nagpadala ra. Nalingaw ko nga nahimong kabahin sa usa ka pundok nga daw walay libog.”
Nahibalo siya nga sayop ang iyang gibuhat, apan wala siya maghunahuna kon asa siya dad-a sa iyang mga pagpili samtang minunot siya sa kadaghanan palayo sa Dios (tan-awa sa Mateo 7:13–14).
Ang Pagpili nga Mag-usab Nagpasabut sa Pag-usab sa Inyong mga Pagpili
Usa ka adlaw ang batan-ong lalaki nga nagustuhan ni Karina miingon nga girespeto niya ang mga gituohan sa simbahan ni Karina.
Naulaw tungod sa dili maayo niya nga pagsunod sa iyang gituohan, sa katapusan mihunong si Karina aron sa paghunahuna sa dalan nga iyang gisubay (tan-awa sa Hageo 1:5–7). Naamgohan niya nga ang iyang mga desisyon nagdala kaniya palayo sa Dios, sa pakig-uban sa Espiritu Santo, ug sa iyang pangandoy sa usa ka mahangturong pamilya.
Ang bugtong paagi sa pag-usab sa iyang direksyon mao ang pag-usab sa mga desisyon nga ginahimo niya sa matag adlaw.1 Apan naghunahuna siya kon napalayo na ba kaha pag-ayo ang iyang pagsubay sa sayop nga dalan. Ulahi na ba kaayo ang pag-usab?
Gisugdan ni Karina ang pag-usab pinaagi sa pag-ampo ug pagbasa matag adlaw sa mga kasulatan. Nagsugod siya sa pagsulat sa iyang journal, nga nakatabang kaniyang makamatikod sa matag adlaw nga tabang sa Langitnong Amahan. Usabon niya ang mga hilisgutan kon ang panag-istoryahanay moabut na sa dili maayo.
Ang pinakalisud niya nga desisyon mao ang pagpili nga walay higala kay sa pagpili og mga higala nga negatibo ang impluwensya. Gisugdan niya ang pagpangita og mga higala nga may mas taas nga mga sumbanan.
Ang Kaimportante sa Paglaum
Sa misunod nga mga bulan, ang kaatbang mihapos ngadto kaniya og mga pagbati sa pagduha-duha ug kahadlok sa matag pagdesisyon. Usahay maghunahuna siya kon ang paningkamot sa pagsunod sa Manluluwas igo ba sa iyang gibuhat. Ang pagkatawo nga gusto niyang maangkon ingon og dili niya makab-ut.
Apan sa iyang pagtan-aw kon giunsa sa pagpakabuhi sa iyang mga ginikanan ug sa uban nga may lig-ong pagpamatuod, iyang nakat-unan nga dunay mas gamhanan pa kay sa pagduha-duha ug kahadlok—nahibaloan niya nga tungod sa paghinulsol, anaa ang paglaum.
“Akong nakita nga mahimo ra ang pagpakabuhi sa matarung nga paagi,” miingon siya. “Wala kita ipanghimaraut tungod sa atong mga sayop. Gihatagan kita og higayon sa Langitnong Amahan nga makahinulsol ug makausab sa direksyon.”
Ang pag-usab gikan sa daan niyang mga pagpili ug paningkamot nga makasunod sa Manluluwas matag adlaw nakatudlo kaniya nga ang Langitnong Amahan mapailubon. “Mihatag Siya kanako og usa pa ka higayon human sa lain aron mag-usab ug mamahimong mas maayo nga tawo,” miingon siya. “Gitabangan Niya ako latas sa malisud nga mga panahon.”
Anaa ang Tabang Kon Pilion Nato ang Pagsunod
Gilig-on ni Karina ang iyang kaugalingon ug giatubang ang reporter. Misanag ang iyang pahiyum. Daghan na kaayo og nabuhat ang Langitnong Amahan kaniya diin nasayud siya nga Siya motabang kaniya karon.
Human makapangutana ang reporter, mipahiyom ug miwara-wara si Karina. Mibalos sa pagpahiyom ang reporter ug milakaw. Dili kaayo mahinumduman ni Karina kon unsay iyang gisulti, apan mahinumduman niya sa dugayng panahon kon unsay iyang gibati, nahibalo nga ang Langitnong Amahan kanunay nga anaa sa duol alang niadtong mopili sa pagsunod Kaniya.
Gilitratohan ni Adam C. Olson