Usa ka Mas Maayo nga Ehemplo
Unta naminaw mi sa mga instruksyon gikan sa among mga lider, apan wala kami magtuo nga kini among magamit.
Mihukom ang among mga lider sa Young Women nga ang tibuok gabii nga kalihokan usa ka maayong paagi nga maghimo kanamong andam alang sa kamping. Gipili nila ang daplin sa Suba sa San Pedro sa habagatan sa Arizona, USA, aron among praktisanan nga kamping.
Human mapahimutang ang among mga sleeping bag, ang ubang mga babaye ug ako gustong mosusi ug mangadto sa tubig. Ang mga lider naghunahuna nga ang pipila ka paghisgot kabahin sa kasiguroan ug sa first aid angay nga mag-una. Mao nga nanglingkod mi sa may landong duol sa suba alang sa leksyon.
Ang pagpaminaw dili sayon samtang among makita ang suba nga misanag sa adlaw. Ang hangin mihuyohoy ngadto sa mga kahoy samtang si Sister Brown (mga ngalan giilisan) nagsulti. Nadungog na namo kini nga leksyon kaniadto, ug wala lang ko kasabut nganong gikinahanglan namo kini karon. Kahibalo na kami mahitungod sa pagpugong aron mohunong ang pagdugo sa samad, apan gisultian na usab niya kami.
Sa wala pa kami nila tuguting manglakaw, gibalik-balik pagsulti ngari kanamo sa mga lider ang dili pag-adto sa suba nga dili magsapatos. “Wala gayud kamo mahibalo unsay tua didto, ug kinahanglang protektahan ninyo ang inyong mga tiil.”
Samtang miabut ko sa may kilid sa suba, pipila sa ubang mga babaye nagtimpasaw na sa tubig. Brown na og kolor ang tubig tungod sa lapok. Wala kaabut og usa ka pye ang giladmon hangtud sa pagtabok, ug dili ko makatuo nga peligro kini.
Mihukom ko nga huboon ang akong sapatos. Usa ra ka parisan ang akong dala, ug akong gibati nga dili maayong mabasa kini ug magsul-ob og basa sa tibuok adlaw. Ang duha nako ka suod nga higala, sila si Martha ug Elizabeth, mipahinumdom kanako unsay giingon sa mga lider. Gihubo gihapon nako ang akong sapatos ug mipasabut sa mga hinungdan. Gihubo usab ni Martha ang iyang sapatos. Si Elizabeth ang nagpanuko. Miubog ko sa tubig ug dala ang mabugal-bugalon nga tuno miingon, “Pagsul-ob kon ganahan ka.”
Milingkod siya, gihubo ang iyang sapatos, ug midagan ngadto sa tubig. Human sa mga lima ka lakang mihunong siya, nangluspad, ug kalmang miingon, “Oy, pastilan.” Dihang gihaw-as niya ang iyang tiil sa tubig. Nakita nako ang dugo nga misirit gikan sa usa ka samad. Natumban niya ang buak nga botelya.
Nawala ang akong hunahuna sa akong pagkakita sa dugo. Bisan og bag-o pa lang nakong nadungog ang leksyon kabahin sa first aid, wala akoy ideya unsay buhaton. Mihukom ko nga magdali sa pagpangayo og tabang. Duha ang mitabang kaniya nga makahaw-as sa tubig.
Akong nakit-an si Sister Brown ug gisultihan siya sa nahitabo. Nagtuo siya nga nagkomedya ko. Apan dihang nakita niya si Elizabeth nga naglingkod sa agianan nga nag-agas ang dugo sa iyang tiil, midagan siya nga nagsinggit, “Pugngi ang samad!”
Ang leksyon nga gihatag mga 10 minutos ang milabay nahinumduman. Ang mga babaye, kinsa nanagbarug libut ni Elizabeth ug nagtan-aw niya nga naagasan og dugo, mipataas sa iyang tiil ug mipugong sa samad.
Gidala si Elizabeth sa ospital, diin gisultihan siya nga hapit matunga og kapikas ang iyang lapa-lapa. Nagkinahanglan kini og daghang tahi ug dugay nga pagpaayo. Sa sunod nakong pagkakita niya naggamit na siya og crutches.
Wala gayud ko magtuo nga akong mahimo o makombinser ang suod nakong higala sa paghimo og butang nga makapasakit gayud kaniya. Wala gayud nako makita ang akong kaugalingon nga ingon ka bati nga ehemplo kaniadto.
Karon naningkamot kong mahimo nga mas maayong ehemplo sa akong mga higala, ug mas andam na kong maminaw sa akong mga lider. Nahibalo sila kon unsay ilang gipanulti.
Paghulagway pinaagi ni Dilleen Marsh