Time-Out para sa Pagmisyon

Ni Elyse Alexandria Holmes

Talikdan ba ninyo ang tsansa nga makapadayon sa inyong tibuok kinabuhi nga pangandoy aron sa pagserbisyo og misyon?

Samtang ang singot nagdagayday sa iyang nawong, ang Australian rugby star nga si William Hopoate wala gayud mopaling sa iyang panan-aw sa bola. Ang team niya nga, the Blues, nga nagrepresentar sa New South Wales, nag-atubang sa ilang kontra nga, the Maroons gikan sa Queensland, sa pinakadako nga dula sa tuig. Human sa unang 20 ka minutos, ang team ni Will nalabwan ug kinahanglan nga makagukod dayon. Gustong ipakita ni Will kon unsa siya ka maayong modula tungod kay kini ang una niyang pakigdula sa team. Siya sab ang pinakabata nga magdudula sa iyang team ug ikaduha nga pinakabatang magdudula nga nakadula sa State of Origin nga kompetisyon.

Nagbantay si Will samtang gipasa ang bola ngadto sa iyang kauban ug dayon gilabay ngadto kaniya. Milukso siya sa pagsalo niini. Nasalo! Samtang naggunit sa bola, midagan si Will padulong sa goal. Bisan ang depensa duol kaayo nga naggukod niya, mibulhot siya og dagan. Pipila na lamang ka yarda. Duol na gayud sa dag-anan, aron maka-goal ug dili molapas sa linya, si Will hapit na mahutdi sa oras. Mihunat siya paabante, milukso padulong sa goal uban sa hugot nga pagtuo, ug gihapos ang bola sa yuta. Ang tanan mihunong sa makadiyot. Milampos ba siya? Dayon nakabati siya nga nanghugyaw ang mga nanan-aw!

Nagtubo sa Dula nga Rugby

Sa 4 anyos pa si Will, gi-enrol siya sa iyang mga ginikanan sa lokal nga rugby club. Ingon og bata pa kaayo, apan bisan pa niana si Will ganahan og “footy” (slang nga pagkasulti sa “rugby”). Dihang 12 na si Will, ang rugby nahimo nang sobra pa kay sa dula alang kaniya ug napili siyang modula sa team sa junior league. Sa edad nga 16 midula na siya sa usa ka team sa junior professional league.

Sa Australia, kon ang magdudula mag-edad na og 20, igo na ang iyang kahamtong nga modula nga propesyonal sa adult league. Bisan og si Will 18 anyos pa, nagpusot-pusot ang mga tanyag. Siya ang unang gustong i-recruit. Ang usa ka team mitanyag kaniya og kontrata nga nagkantidad og 1.5 milyon nga Australian dollars—usa ka tanyag nga dili sagad itanyag sa magdudula nga sama niya og edad. Apan dili kana maoy nakita ni Will sa pinakaduol niyang kaugmaon. Nakahukom si Will nga moserbisyo og misyon.

Ang Paghimo sa Desisyon nga Magmisyon

Dihang mopahibalo na si Will kon moserbisyo ba siya og misyon o dawaton ang kontrata sa usa ka rugby league, ang pagdesisyon dali ra alang kaniya. “Gipahiluna na nako sa akong hunahuna ug kasingkasing ang pagmisyon samtang batan-on pa ako, ug misaad ko sa akong kaugalingon nga dili nako tugutan ang kalibutanong mga tinguha nga mopatigbabaw kanako,” miingon siya.

Ang kalibutan tingali mangutana, Unsaon na man lang ang kwarta? ang kontrata? ang pagka-propesyonal nga magdudula sa rugby—ang iyang tibuok kinabuhi nga pangandoy? Unsa kaha ang kalainan sa iyang kinabuhi kon gidawat pa niya ang usa ka propesyonal nga kontrata? “Makatabang unta kini sa panalapi sa akong pamilya. Makapahiluna sab unta kini sa akong kaugmaon alang sa sunod nga pipila ka tuig,” giangkon niya.

Unya nganong wala man niya dawata ang tanyag? “Ang pagmisyon usa ka butang nga gikinahanglan sa Ginoo ngari kanako, sa batan-ong mga lalaki sa Simbahan,” miingon siya. “Usa kini ka pamaagi sa pagpasalamat sa Ginoo sa tanan nga gihimo Niya kanako sa akong 19 ka tuig dinhi sa kalibutan. Ug human nahimo ang desisyon, wala ko magtuo nga malipayon ako kon wala ko magmisyon. Gipili nakong moserbisyo og misyon tungod kay ang rugby kanunay man nga anaa.”

Ang pagpahibalo ni Will nakapalibug ug nakapakurat sa kadaghanan. Sa paghisgot kabahin sa mga higala niya nga dili miyembro, miingon siya, “Wala sila makasabut sa tinuoray nga rason nganong mobiya ko; nakita lamang nila nga mibiya ko sa pagdula sulod sa duha ka tuig.” Giingnan sila ni Will, “Manudlo ko sa mga tawo mahitungod ni Kristo ug magserbisyo sa uban. Butang kini nga gusto nakong buhaton.” Human madungog ang pagpasabut ni Will, mas misuporta ang iyang mga higala.

Pagpangandam sa Pagserbisyo

Namatikdan ni Will nga ang gana lamang nga magmisyon dili igo. Nahibalo siya nga importante ang pagpangandam. Usa ka butang nga iyang gihimo mao ang pagkuyog sa mga misyonaryo sa pag-adto sa mga tudloanan. “Dihang ang mga misyonaryo mihangyo kanako sa pagtubag sa mga pangutana, ang mga pulong daw nangabut nga wala nako mahibaloi nga naghatag kini og dugang panabut sa investigator,” miingon siya. “Ug ang uban nga mga investigator nga ilang gitudloan—kinsa akong natabangan sa pagtudlo—nabunyagan bag-ohay lang. Panalangin kini alang kanako nga makakita niana.”

Si Will nagserbisyo karon sa Australia Brisbane Mission, apan wala niya talikdi sa hingpit ang dula nga rugby. Bisan og dili siya makadula, nagserbisyo siya isip usa ka misyonaryo uban sa sama nga kaikag sa dula nga rugby. Sa wala pa ang iyang misyon miingon siya, “Ang sama nga kahinam ug kadasig anaa sa pagdula og rugby ug sa pagserbisyo sa Ginoo. Sa sport kinahanglan nga molihok gayud ikaw aron makita ang kalampusan. Mahimo nimo kining ikatandi sa misyonaryo nga buhat tungod kay naningkamot gayud ako sa pagpangita og mga tawo kinsa gusto nga maminaw sa ebanghelyo.”

Pagpauli nga may Dungog

Sa matag higayon nga ang usa ka sikat sa sport mobiya sa dula sa bisan unsa nga gidugayon, ug ilabi na sulod sa duha ka tuig, ang mga tawo maghunahuna, unsa kahay mahitabo kon mobalik na siya? Nahibalo si Will nga sa pagsersbiyo og misyon, daghan siya og nabiyaan, apan nahibalo usab siya nga mibiya siya niini alang sa butang nga mas maayo. “Sa akong pagtuo usa kini ka dakong sakripisyo, apan kini ang usa ka sakripisyo nga gusto nakong himoon,” miingon siya. “Ang bisan unsa posibleng mahitabo, ug ang duha ka tuig igo-igo gayud nga pagpahulay gikan sa sport. Sa kaugalingon, gusto kong mobalik ug magdula og rugby.”

Bisan og ang pagkapropesyonal nga magdudula og rugby mao ang tibuok kinabuhi niya nga pangandoy, nakita ni Will ang mahangturong mga panalangin nga moabut pinaagi sa pagserbisyo og misyon. “Sa liga sa rugby, kanunay nga ikalipay ang pagdaog ug ang pagpamuntos, apan kana nga kalipay molungtad lamang og pipila ka semana og pipila ka adlaw. Mga paghandom lang ang magdugay niini,” mipasabut siya. “Apan ang usa ka higala o mga investigator nga magpamiyembro sa Simbahan ug nakita nga ang ebanghelyo makapanalangin sa ilang kinabuhi makapahiyom hangtud sa hangtud.”

Gilitratohan ni Bryan Rowland