Pagdala sa Primary ngadto sa Panimalay

Ako Mipili sa Matarung pinaagi sa Pagsunod sa mga Baruganan sa Ebanghelyo

Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Gipakagay ni Ramón ang mga sinsilyo sa iyang bulsa dihang nahuman siya og pamaligya sa mga itlog sa manok sa merkado sa balangay. Iyang gihunahuna ang sudlanan nga tua sa balay nga gisudlan sa mga sinsilyo sa iyang ikapulo. Inig ka Dominggo iya nang ihatag ang mga sinsilyo ngadto sa bishop. Kainit ang gibati ni Ramón. Nalipay siya nga makabayad og ikapulo.

Ang mga tindahan sa merkado puno sa mga butang nga igbabaligya. Nakakita si Ramón og dekolor nga kamisin nga may logo sa paborito niyang team sa football. Gihunahuna niya ang iyang kaugalingon nga nagsul-ob sa sinina, nagdagan paubos sa dulaanan ug nakapuntos sa para daog nga goal. Gitan-aw ni Ramón ang tag sa presyo. Mapalit niya ang sinina kon gamiton niya ang tanang halin sa itlog apil na ang iyang mga sinsilyo alang sa ikapulo.

Namatikdan ni Ramón nga nawala ang init nga pagbati. Gusto kaayo niya ang sinina, apan nahibalo siya nga dili gusto ang Langitnong Amahan nga gamiton niya ang iyang mga sinsilyo nga gitigum alang sa iyang ikapulo. Misugod si Ramón sa paglakaw pauli. Mihukom siya nga unahon sa pagbayad ang ikapulo. Dayon mokita siya og dugang nga kwarta sa pagpamaligya og itlog hangtud nga makapalit siya sa sinina ug makabayad sa iyang ikapulo nga mao ang gusto sa Dios nga iyang buhaton.

Ikaw Lang

Kon mobayad kita sa atong ikapulo, mosulat kita sa tithing slip. Atong isulod ang kwarta ug ang slip sa usa ka sobre ug ihatag kini ngadto sa sakop sa bishopric o kapangulohan sa branch. Makakat-on ka unsaon sa pagsulat sa kaugalingon nimong tithing slip pinaagi sa pagtan-aw sa litrato sa ubos.

Petsa

Imong pangalan

Ngalan sa imong ward o branch

Imong address

Pila ang ikapulo nga imong ihatag

Ang total nga kantidad sa kwarta (ikapulo pun-an sa uban pang mga donasyon)

Ang kantidad kon unsa nga matang sa kwarta ang inyong ihatag (papel nga kwarta o sinsilyo)

Gawas sa pagsulat sa imong ikapulo, unsa pa ang imong ikasulat sa tithing slip? Pangutan-a ang usa ka ginikanan kon unsa pay uban nga paagi nga ikaw makadonar sa Simbahan.

Kalihokan sa CTR: Mga Panalangin sa Ikapulo

Si Malachi usa ka propeta sa Daang Tugon kinsa nagtudlo nga kon kita mobayad sa ikapulo, ang mga bintana sa langit pagaablihan ug ang mga panalangin igabu-bu ngari kanato (tan-awa sa Malaquias 3:10). Sa tibuok pamilya, hisguti kon unsa nga mga panalangin ang inyong nadawat gumikan sa pagtuman sa balaod sa ikapulo. Pagbutang og liso, butones, o gamayng bato sa bintana nga nagrepresentar sa mga panalangin nga inyong natagamtam.

Dugang hugot nga pagtuo

Mas lig-on nga pagpamatuod

Salig sa Ginoo

Kalipay sa ebanghelyo

Igo nga pagkaon

Mga paghulagway pinaagi ni Thomas S. Child