Panagpundok ubos sa Kahiusahan sa Hugot nga Pagtuo
Ang mga center alang sa mga young adult nagtanyag og mga oportunidad sa pagkat-on sa ebanghelyo, sosyal nga mga kalihokan, misyonaryo nga buhat, ug mga paningkamot sa pagpaaktibo.
Si Barbara Matovu Taga-Uganda. Sam Basnet Taga-Nepal. Ug Elisabeth Olsen Taga-Norway. Tulo ka managlahi nga tawo, tulo ka managlahi nga nasud. Bisan pa sila si Barbara, Sam, ug Elisabeth nagpundok sa usa ka dapit, sa center alang sa mga young adult sa Oslo, Norway, ubos sa usa ka kamatuoran: ang gipahiuli nga simbahan ni Jesukristo.
Silang tulo mipasakop sa Simbahan didto sa Oslo, natudloan sa mga leksyon sa misyonaryo didto sa center alang sa mga young adult. Ang mga pasilidad sama sa usa nga naa sa Oslo gipahinungod alang sa pagsangkap og usa ka dapit aron magkauban-uban panahon sa mga kalihokan, magkat-on diha sa mga klase sa institute, malingaw sa computer ug makagamit sa Internet, magtuon alang sa eskwelahan, ug gani makapangluto og pagkaon.
Si Barbara mibalhin gikan sa Uganda ngadto sa Norway niadtong 1998, sa nag-edad pa siya og siyam. Paglabay sa napulo ka tuig, samtang nagpuyo sa Oslo, duha ka misyonaryo ang midapit kaniya sa pagtuon mahitungod sa gipahiuli nga ebanghelyo, nag-ingon kaniya nga mahimo silang magkita didto sa center alang sa mga young adult. Nagpanuko kaayo si Barbara sa sinugdanan.
“Naghunahuna ko, ‘Lain na usab nga center sa kabatan-onan,’” miingon siya. “Nakaadto na ko og daghang dapit sama niana kaniadto, ug sa pagkatinuod wala gayud ko mobati og kakomportable sa bisan usa niining mga dapita.”
Apan kini nga center nagpakita nga lahi. “Nakalitan ko sa una nako nga pagsulod,” nahinumdom si Barbara. “Mihunong ko sa makadiyot, gisulayan sa paghulagway ang akong gibati. Akong gibati ang kainit ug gugma. Gibati nako ang kasiguroan nga anaa ko sa eksakto nga dapit, uban sa husto nga mga tawo, alang sa husto nga katuyoan.”
Panagpundok ngadto sa mga Center alang sa mga Young Adult
Ang inisyatibo nga magtukod og mga center alang sa mga young adult nagsugod niadtong 2003. Ang mga center nagpalapad sa nahimo sa institute pinaagi sa pagtanyag og daghan pa kay sa mga klase lang sa pangrelihiyuso nga edukasyon; ang mga young single adult usab adunay mga oportunidad sa pagserbisyo sa usa ka council alang sa mga kalihokan sa center, motrabaho kauban sa full-time nga mga misyonaryo sa pagtabang og tudlo ug pagpaaktibo sa ilang mga higala, ug makig-uban sa senior nga mga magtiayon kinsa maoy nagdumala sa tibuok nga buluhaton. Ang lokal nga mga pangulo sa priesthood, ubos sa pagdumala sa mga Area Seventy, modeterminar sa pagtukod og mga center sa kaugalingon nilang mga dapit.
Ang unang upat ka mga center naa sa Copenhagen, Denmark, ug Berlin, Hamburg, ug Leipzig, sa Germany. Ang 4 ka mga center sa sinugdanan miabut na og 141 pagka 2011, sa nagkalain-lain nga mga dapit sama sa Sweden ug Cyprus. Daghan pa ang anaa sa managlahi nga ang-ang sa kalamboan sa ubang mga bahin sa kalibutan, lakip sa Estados Unidos ug Africa.
Sila si Gerald ug Nancy Sorensen miserbisyo sa center alang sa mga young adult sa Trondheim, Norway. Didto nahimamat nila ang mga young adult gikan sa mga nasud sa tibuok kalibutan, lakip ang Afghanistan, China, Ghana, Iran, Iraq, Mozambique, ang Netherlands, Nigeria, Russia, Turkey, ug Ukraine.
“Adunay daghang pinulongan, kustombre, ug pang-edukasyon ug relihiyuso nga mga sirkumstanya,” nakabantay si Brother Sorensen, “apan tanan kini nga mga young adult dunay komon nga bugkos nga mao ang tinguha nga mas masayud mahitungod sa ilang Langitnong Amahan ug sa Iyang Anak, si Jesukristo. Samtang sila ug ang kaugalingon nilang mga pangandoy ug hagit among nailhan, dali ra ang pagtan-aw sa usag-usa isip anak sa Dios. Dayag tan-awon nga ang Dios mitubag sa ilang mga pag-ampo ug migiya sa ilang mga lakang, nagpakita sa dako Niya nga gugma alang kanila.”
Si Presidente Armand Johansen sa Norway Oslo Mission mibati nga ang mga young adult gigiyahan ngadto sa center alang sa usa ka katuyoan, lakip ang pagkabansay alang sa umaabut nga mga responsibilidad. Ang pagkadaiya sa mga katawhan sa Simbahan didto sa Norway mamahimong mag-anam kadako, miingon siya. “Ang mga center makatabang sa mga young adult nga masayud unsaon sa pag-atubang niana, sa pag-ila kon unsa ka importante ang Simbahan isip komon nga tinguha sa tanang kultura ug katawhan,” miingon si Presidente Johansen. “Akong nakita ang mga center isip talagsaong tighiusa, mga dapit diin makita ninyo ang pagkunhod sa mga babag sa sosyal nga pagpakig-uban ug mga pagpihig.”
Kahiusahan diha ni Kristo
Nahinumduman ni Barbara Matovu ang unang higayon nga ang mga misyonaryo midala kaniya ngadto sa center alang sa usa ka kalihokan nga makahimamat sa ubang mga young single adult. Abi niya og nahibalo na siya unsay mahitabo.
“Sa tibuok kong kinabuhi kanunay ako nga nahisakop og usa ka grupo,” mipasabut si Barbara. “Ug ang mga grupo may timailhan kanunay nga—kamo ang grupo nga maayo sa sports o kamo ang grupo nga internasyonal o uban pa nga grupo. Mao nga dihang nagsugod ang mga tawo sa pag-adto sa center, makatingala kaayo tungod kay walay bisan usa nga daw aduna nianang kinaiya sa paghunahuna nga ‘ako sakop sa usa ka inila nga grupo, mao nga dili ko makig-istorya kaninyo.’
“Sa una, naghunahuna ko, ‘Nag-akting lang ba sila? Pagpaka aron-ingnon lang ba kini?’ Apan sa pagkataud-taod akong naamgohan nga dili gayud diay igsapayan kon si kinsa kita o kon diin kita gikan o kon unsa ang atong pinulongan. Ang gugma sa atong Langitnong Amahan alang sa tanan. Sa kasagaran dili dayon ko makapili sa akong grupo, apan niining higayona akong gibati nga wala ko magkinahanglan og grupo. Ako lang gayud si Barbara, ug mamahimo nga Barbara alang sa tanan.”
Miingon si Elisabeth Olsen nga mapaubsanon siya nga makita ang iyang dapit sa langitnon niyang pamilya. “Kon makahimamat kamo og mga tawo gikan sa lahi nga kultura o katilingban, dali ra kaayo ang pagtimaan kanila. Nakakat-on ko sa pagbuka og dako sa akong mga mata ug motan-aw sa mga tawo pinaagi sa mga mata ni Kristo,” miingon siya. “Sa center tanan kita adunay managlahi nga kultural nga kinaiya, apan kitang tanan adunay usa ka komon nga butang: gusto kitang makig-uban pag-usab kang Jesukristo ug sa Dios.”
Pagkahiusa apan Dili Magkapareha
Ang uban tingali magpanuko sa ideya sa paghiusa tungod kay nagtuo sila nga aron mahitabo kini gikinahanglan nga masakripisyo ang pagka-indibidwal “Daghang tawo ang mahadlok sa relihiyon tungod kay nagtuo sila nga naghimo kini natong magkaparehas ang tanan, tungod kay nagsunod kita sa sama ra nga mga sugo,” mipasabut si Elisabeth. “Apan dili gayud ingon niana. Hinimo kitang tanan sa Dios isip mga indibidwal. Tingali susama ang atong mga gituohan, apan managlahi ang atong mga kalidad ug mga gasa, ug mao kana ang nakahimo kanato nga mga indibidwal. Gusto sa Dios nga tanan kita magkalahi tungod kay kitang tanan managlahi man og misyon.”
Si Sam Basnet mitubag usab sa mga kabalaka gikan sa mga higala kinsa nagtuo nga may pagka-istrikto ang relihiyusong mga lagda. “Usa ka higala misulti kanako, ‘Kon moadto ka sa simbahan, kinahanglan nga imong sundon ang mga lagda sa uban,’” miingon siya. Apan gisunod ni Sam ang mga sumbanan sa Simbahan tungod kay mainampoon niya nga gitinguha ang personal nga pagpadayag aron pamatud-an ang iyang mga gibuhat.
Ug pinaagi sa tinagsa nga pagpakigsulti ngadto sa Iyang mga anak nga ang Dios naghiusa kanila, mipasabut si Sam. “Ang Dios miingon nga ang tanang nasud ug tanang pinulongan mosimba Kaniya” (tan-awa sa Mosiah 27:31), miingon siya. “Pinaagi sa pakighimamat sa lain-laing mga tawo, nakakat-on ko sa pagdayeg sa lain-laing mga kultura. Apan ang pagsinati sa ingon nga pagkadaiya sa katawhan naghimo kanakong mobati nga, oo, ang Dios dunay talagsaong plano sa paghiusa kanamo diha sa kalinaw.”
Pag-abut diha sa Katapusang Pundukanan
Bisan kon kini nga mga young adult nakadayeg sa gahum sa panagpundok ngadto sa usa ka center alang sa mga young adult, kining umaabut nga mga lider sa Simbahan nakasabut nga sinugdanan pa lamang kini. Sumala sa gitudlo ni Elder David A. Bednar sa Korum sa Napulog Duha ka mga Apostoles, ang usa sa pinakaimportante nga mga dapit nga pundukanan mao ang templo.1
Si Sam nag-andam sa pagsulod sa balay sa Ginoo pinaagi sa pagpalibut sa iyang kaugalingon og maayong mga higala diha sa center. “Pinaagi sa pagkaila og mga tawo gikan sa daghan kaayong lahi nga mga dapit, nakatabang kini kanako nga mobati og maayo mahitungod sa kalibutan,” miingon siya. “Gusto kong mahimo nga maayong ehemplo alang sa akong mga higala, ug naghimo kini kanakong mas angayan para sa Dios ug mas angayan nga mosulod sa Iyang templo.”
Usa ka bulan human sa iyang bunyag, nagsugod na si Barbara sa paghuna-huna mahitungod sa pagsulod sa templo samtang mitambong siya sa leksyon sa usa ka family home evening didto sa center. Pagkahuman sa leksyon, nagsugod siya sa pagpangutana.
“Kay anaa ang mga higala nga nahibalo unsay buot ipasabut sa templo alang kanila ila kong gitabangan nga makasabut kon unsa ang kahulugan sa templo para kanako. Dihang ila kong gipasabut mahitungod sa templo, akong gibati ang Balaang Espiritu,” miingon si Barbara. “Akong naamguhan nga ang tanang dapit nga akong gihunahuna kon ako magminyo—sa nindot nga simbahan o sa beach—dili gani ikakumpara sa templo. Sugod nianang higayuna ang templo dili na lamang kay usa ra ka building. Butang kini nga gusto nakong maadtoan ug usa ka dapit nga sa umaabut nga adlaw makasulod kuyog sa akong umaabut nga bana.”
Si Elisabeth milakip usab sa templo isip usa sa pinakaimportante niya nga mga tumong. “Sa matag higayon nga makaadto ko sa templo, mopahiyom lamang ako sama nga nakadaog ko og usa ka milyon ka dolyares,” miingon siya. “Nahibalo ko nga gusto sa Dios nga ang tanan moadto didto ug modawat sa tanang panalangin ug mga gasa nga Iyang gitagana alang kanato. Ang pag-adto sa templo ug ang pagkatakus alang sa templo mao ang matuod nga kalampusan. Makasulod ako sa templo ug mamahimong pinakasuod sa Dios—pinakasuod sa panimalay—nga akong mahimo niining kalibutana.”
Ang celestial nga gingharian, dayag lang, mao ang katapusang pundukanan, usa ka dapit diin dili gusto ni Barbara nga adunay bakanting mga lingkuranan. “Miingon si Kristo nga pinaagi lamang Kaniya nga kita makaadto sa Langitnong Amahan, apan Siya miingon usab nga ang usa sa pinakadakong butang nga atong mahimo sa kinabuhi mao ang pagserbisyo sa usag usa [tan-awa sa Juan 21:15–17]. Ug ang pagserbisyo sa usag usa mao ang pagtabang sa usa ka tawo nga makabalik ngadto sa Langitnong Amahan, tungod kay dili kamo gustong moadto nga mag-inusara.”
Sa ibabaw, gikan sa taas: Barbara Matovu, Sam Basnet, Elisabeth Olsen.
Ang mga young adult adunay mga oportunidad sa pagserbisyo sa usa ka council alang sa mga kalihokan sa center, motrabaho kauban sa full-time nga mga misyonaryo sa pagtabang og tudlo ug pagpaaktibo sa ilang mga higala, ug makig-uban sa senior nga magtiayon.
Ang una nga 4 ka mga center miabut na og 141 nga may daghan pang giplano alang sa ubang bahin sa kalibutan.
Sa tuo ug sa sunod nga pahina: mga litrato pinaagi ni Simon Jones (Coventry, England); Jerry Garns (San Diego, California, USA); Henrik Als (Copenhagen, Denmark); Glenda Stonehocker (Soweto, South Africa)