Ang mga Panalangin sa Tinuoray nga Pagtrabaho
“Kita magmalipayon sa pagbuhat sa tanan nga mga butang nga ubos sa atong gahum” (D&P 123:17).
Sa gamay pa ko didto sa Sweden, ang akong papa nagserbiyo isip counselor sa daghang mga presidente sa misyon. Kini nga calling nagkinahanglan nga mobiyahe siya og daghan sa mga katapusan sa semana. Usa siya ka ehemplo sa akong mga igsoon ug kanako sa kaimportante sa pagserbisyo sa Ginoo, bisan kon gikinahanglan nga magsakripsisyo kita.
Nakakat-on usab ako sa bili sa pisikal nga pagtrabaho sa sayo sa akong kinabuhi. Panahon sa mga ting-init magbisiklita ko ngadto sa umahan sa strawberry mga milya ang gilay-on. Mamu-pu ko og strawberry sulod sa daghang oras matag adlaw aron makakwarta.
Dunay pang-summer cottage sa umahan ang among pamilya. Wala kini kuryente o mga tubo sa tubig, mao nga kinahanglan kaming magbugha og kahoy ug maghakot og tubig gikan sa atabay. Ang mag-uuma nga nanag-iya sa umahan misalig kanako sa pagdala sa mga baka ngadto sa kamalig mga pipila ka buntag aron makuhaan og gatas ug sa pagpagawas og balik niini. Among giani ug gikarga ang mga dagami ug migamit og mga kabayo sa paghakot sa mga dagami ngadto sa kamalig.
Ang akong kasinatian sa pisikal nga pagtrabaho ug sa ehemplo sa akong amahan sa pagpahinungod sa iyang kaugalingon sa buhat sa Ginoo nakatabang kanako sa una nakong pagmisyon. Sa 16 anyos pa lang ako, gitawag ko isip bricklayer sa mga building sa Simbahan sa Sweden, Finland, Germany, ug sa Netherland. Nakadawat ako og daghang espirituhanong mga pag-aghat atol sa akong pagserbisyo. Akong nakat-unan nga ang matinuoron nga pisikal nga trabaho mao ang usa ka paagi sa paghimo sa unsay matarung, ug sa ingon, mahiuyon sa Dios.
Usa ka dungog ang makadawat og buluhaton ug moreport nga inyong gihatag ang inyong pinakamaayo sa pagbuhat niini. Kon modawat kita og mga buluhaton ug gamiton ang atong panahon ug mga talento sa pagtukod sa gingharian sa Ginoo, atong masinati ug makita ang mga panalangin nga giandam sa Langitnong Amahan alang kanato.
Paghulagway pinaagi ni Dan Burr