Ang Kalipay sa Pagbalaan sa Igpapahulay nga Adlaw
Ako mopamatuod nga ang kalipay ug mga panalangin moabut tungod sa pagsimba sa Dios sa Iyang balaan nga adlaw—lakip sa mga panalangin nga dili nato makita.
Nagtubo isip Santos sa Ulahing Adlaw sa usa ka dili LDS nga palibut mao ang usa sa makalingaw nga mga kasinatian sa bata pa ako. Ang akong nahinumduman pag-ayo mao ang panagpundok kauban ang pamilya ug mga higala panahon sa mga adlaw nga natawhan, walay trabaho, mga dula sa football, ug usahay churrasco (barbecue) sa pamilya. Laing paborito nga handumanan mao ang pag-adto sa simbahan isip pamilya sa Dominggo.
Ang pagbalaan sa Igpapahulay nga Adlaw ug pagsimba sa atong Amahan sa Langit ug sa Iyang Anak, nga si Jesukristo, mao ang sukaranan ug natural sa among pamilya. Isip usa ka batan-on sa Simbahan, kanunay akong maghandom sa pagdula og football sa mga Martes sa gabii, apan maghandom usab ako sa pagtambong sa mga miting sa sakrament, Sunday School, ug priesthood sa mga Dominggo. Nindot kaayo ang akong pamati nga ikauban ang atong mga kaigsoonan diha sa ebanghelyo nga dili dayon manguli pagkahuman.
Hangtud nga ako naminyo ug adunay akong kaugalingong pamilya wala gayud nako mahatagi og bili ang maayong ehemplo nga gipakita sa akong mga ginikanan panahon sa akong pagkabata. Isip amahan sa usa ka pamilya, akong nasabtan pag-ayo kon unsa ka importante nga “moadto sa balay sa alampoanan ug mohalad sa [atong] sakramento diha sa balaan nga adlaw [sa Ginoo]” (D&P 59:9). Mas nakasabut ako sa mga panalangin nga Iyang gisaad niadtong motuman niini nga sugo.
Klaro nakong nahinumduman kon unsa kamalipayon ang akong mga higala ug ako isip mga batan-on kon kami makasulti sa usag usa nga wala kami makapalta og usa ka miting sa Simbahan sa tibuok tuig. Tingali wala kami makahibalo sa hingpit kon unsay nahitabo namo isip resulta sa among matinud-anong pagtambong, apan giampingan namo ang among kaugalingon nga walay buling gikan sa kalibutan. Dugang pa, kamaya sa among mga kasingkasing, malipayon among panagway , ug ang among kalipay tinud-anay nga puno (tan-awa sa D&P 59:9, 13–15).
Tradisyon sa Igpapahulay nga Adlaw
Sulod sa daghang mga tuig ang akong asawa ug mga anak ug ako adunay tradisyon sa paggahin sa among bakasyon sa summer sa usa ka gamay nga baybayon duol sa among balay sa habagatang Brazil. Usahay mabalhin kami tungod sa trabaho, apan bisan unsa pa kami ka layo gikan nianang gamay nga baybayon, kada tuig mobiyahe kami kanunay uban sa dakong kahinam ug kalipay. Ingon man usab, ang mga kabanay ug mga higala mobiyahe og layo aron kami magkapundok kausa sa usa ka tuig. Ang tanan moabut og sayo kutob sa ilang mahimo ug magpabilin kutob sa mahimo.
Nianang gamay nga baybayon ang among pamilya adunay daghang mga oportunidad alang sa espirituhanong pagtubo ug pagtudlo sa ebanghelyo. Kadaghanan sa among mga kabanay dili mga miyembro sa Ang Simbahan ni Jesukristo sa mga Santos sa Ulahing mga Adlaw ug wala motuo sa among relihiyoso nga mga tinuohan. Alang kanila ang adlaw sa Ginoo usa lang ka laing adlaw aron magdula ug maglingaw-lingaw. Tungod kay kadaghanan sa pamilya anaa sa baybayon sa ulahing bahin sa semana kay sa ubang mga adlaw sa semana, ang among pagtambong ug pag-apil sa mga kalihokan sa Dominggo wala lamang gipaabut apan kanunay nga gihangyo—lakip ang among mga anak.
Ang among mga anak gagmay pa ug bag-o lang nakat-on sa paggamit sa mga kamatuoran sa ebanghelyo. Alang kanila ang tintasyon sa pag-apil sa mga kalihokan uban sa ilang mga ig-agaw ug mga higala sa mga Dominggo nindot kaayo. Ang paggahin og panahon uban sa pamilya usa ka importante nga bahin sa ebanghelyo, ug ang pagsupak sa Igpapahulay sayon ra unta nga buhaton. Ilabi na nga, ang labing duol nga unit sa Simbahan nianang higayona labaw sa 60 ka mga milya (96 km) ang gilay-on gikan sa baybayon. Ang among mga higala ug mga silingan sa among kongregasyon atua sa layo, ug walay usa nila ang makahibalo kon kami ba nagpabilin sa baybayon imbis moadto sa chapel ug motambong sa among mga miting sa Dominggo. Nagsimba kami sa tibuok tuig, ug ang among kabanay magkapundok lang og pipila ka semana sa usa ka tuig.
Bisan pa, wala gayud kami makapalta sa pag-adto sa Simbahan sa mga Dominggo— bisan kausa! Gihinumduman namo ang mga pagtulun-an sa Ginoo:
“Ug nga kamo mahimo unta nga labaw nga moamping sa inyong mga kaugalingon nga walay buling gikan sa kalibutan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw;
“Kay sa pagkatinuod kini mao ang adlaw nga gitudlo nganha kaninyo sa pagpahulay gikan sa inyong mga kahago, ug mohatag og mga paghalad sa inyong mga pag-ampo ngadto sa Labing Halangdon; …
“Apan hinumdumi nga dinhi niini, nga adlaw sa Ginoo, kamo mohalad sa inyong mga halad ug sa inyong mga sakramento ngadto sa Labing Halangdon. …
“Ug niini nga adlaw kamo dili mobuhat og bisan unsa nga butang, itugot lamang nga ang inyong mga pagkaon andamon uban sa usa ka katuyoan sa kasingkasing aron ang inyong pagpuasa mahimo nga hingpit, o, sa lain nga mga pulong, nga ang inyong kalipay mapuno” (D&P 59:9–13).
Mipili kami sa pagtuman niini nga sugo ug among gitudloan ang among mga anak nga sila kinahanglang motuman usab. Sa wala madugay sila nakasabut nga mas importante ang pagsimba sa Dios sa Iyang balaan nga adlaw kay sa pagpahimuot sa pamilya ug mga higala o sa pagtagbaw sa ilang kaugalingong mga tinguha.
Gipanalanginan tungod sa Pagkamasulundon
Sa mga Dominggo didto sa baybayon, momata mi og sayo, mag-ilis alang sa pagsimba sa Dominggo, ug mobiyahe ngadto sa labing duol nga simbahan. Panahon sa among pagbiyahe ug sa tibuok adlaw, matagamtam namo ang kalinaw ug kalipay nga gisaad sa Ginoo niadtong motuman sa Iyang mga sugo. Among nakat-unan nga kini nga pagbati sa kalinaw ug kalipay wala magagikan sa kalibutan.
Human sa daghang mga tuig nga ingon ani, dunay nindot nga nahitabo. Ang among mga anak mihunong sa pagpangutana sa kaimportante sa pagsimba sa Dios sa Iyang balaan nga adlaw, ug daghang mga ig-agaw sa among mga anak nagsugod sa paghangyo kon makakuyog ba sila sa pag-adto sa simbahan uban namo! Wala diay mi makahibalo nga ang pagbati sa kalinaw ug kalipay nga among gibati mao usab ang gibati sa among mga pag-umangkon sa among pagpauli gikan sa among mga miting. Sa katapusan dako nga panalangin ang miresulta. Pagkatin-edyer na niadtong mga bataa, duha kanila gikan sa usa ka pamilya misulti sa ilang mga ginikanan, “Gusto kami nga mahimong mga Santos sa Ulahing mga Adlaw.” Sa wala madugay ang tibuok pamilya nabunyagan. Karong bag-o, usa sa mga anak, usa na ka returned missionary, naminyo sa templo.
Mangadto gihapon mi sa baybayon kada tuig, apan ang tanan nasayud nga sa Dominggo ang among pamilya dili moapil sa pagdula. Hinoon, mangadto kami sa simbahan ug mosimba sa Dios uban sa mga miyembro sa pamilya nga miapil namo— ang grupo nga nagkadaghan ug nagkadaghan kada tuig!
Kon among hinumduman kadtong mga katuigan ug maghunahuna sa among pagpili nga gihimo, nagpasalamat kami sa Ginoo sa pagtabang namo nga makabaton og kaisug sa pagbuhat unsay matarung ug sa pagtudlo sa among mga anak sa pagbuhat sa ingon. Kami walay bisan gamay nga pagduda nga ang desisyon nakapalig-on sa among mga anak ingon man usab sa among kabanay. Nakahatag kini namo sa kalinaw nga gisaad sa Ginoo, nahimong importanting bahin sa pagkakabig sa mga miyembro sa pamilya, ug nakapanalangin namo og katagbawan nga dili makita sa mga kalihokan sa Dominggo nga dili makapuno sa kalag.
Ako mopamatuod nga ang kalipay ug mga panalangin moabut tungod sa pagsimba sa Dios sa Iyang balaan nga adlaw—lakip sa mga panalangin nga dili nato makita karon. Ug ako mopamatuod nga “malipayon ang katawhan kansang Dios mao si Jehova” (Salmo 144:15).
Detalye gikan sa Ang Katapusang Panihapon, ni Simon Dewey; sa luyo © Getty Images; ang ubang mga litrato gihatag sa pamilyang Aidukaitis