Ang Leksyon sa Liga sa Gagmayng mga Bata
“Ako adunay pamilya. Gipangga ko nila. Gusto ko silang ikauban sa kahangturan” (Songbook sa mga Bata, 98).
“Ngano nga ako kinahanglan man dinhi?” Mibagulbol si Lindsay.
“Kinahanglan nga mosuporta ka sa imong igsoon,” miingon si Mama.
“Apan makapuol kaayo,” miingon si Lindsay. “Sa kadaghanang panahon dili gani ko motan-aw niya.”
Ang manghod ni Lindsay, si Michael, miapil sa usa ka team sa baseball sa Liga sa Gagmayng mga Bata [Little League], ug dad-on ni Mama si Lindsay sa matag praktis ug sa matag dula. Gilaay gayud si Lindsay sa tibuok panahon. Samtang si Michael naningkamot nga makaigo sa bola, si Lindsay maminaw og musika, magbasa-basa og libro, ug mag-drawing alang sa iyang manghod nga babaye.
Nanghupaw si Lindsay ug mitan-aw kang Michael nga nagbarug sa outfield uban sa iyang mga ka-team. Iyang gitan-aw si Michael samtang midagan kini sa pagsalo sa bola, wala makasalo, ug dayon nasayop sa paglabay niini ngadto sa laing tawo.
“Padayon lang, Michael!” Singgit ni mama. “Maayo ang imong nahimo!”
“Apan, Ma,” si Lindsay miingon, “dili maayo ang iyang nahimo.”
“Mao kana nganong nia ta dinhi, Lindsay,” miingon si Mama. “Sa pag-abiba ni Michael, ilabi na kon dili maayo ang iyang nahimo. Kon wala ta dinhi ug mobati si Michael nga pakyas siya, tingali og mohunong siya sa pagpaningkamot. Gusto nakong kanunay siyang maningkamot. Sama nga gusto kong kanunay kang maningkamot sa imong art.”
“Walay usa nga nag-abiba kanako panahon sa klase sa art,” miingon si Lindsay. “Si Michael wala mokuyog ug mosinggit nga, ‘Nindot kana!’ kon makahimo ko og nindot nga kolor.”
“Wala, apan kanunay siyang modayeg sa imong art kon ipakita na nimo kini kanamo,” miingon si Mama.
Gihunahuna kini ni Lindsay. Nahinumduman niya nga gihatod siya ni Mama ngadto sa mga pagklase sa art ug si Michael usahay mosakay sa sakyanan, bisan kon gusto siyang makigdula sa iyang mga higala. Gitan-aw niya si Michael sa playground. Ang batter sa kontra bag-o lang nakaigo sa bola. Padulong gayud kini kang Michael!
“Dali, Michael!” Miabiba si Lindsay. “Masalo nimo kana!”
Midagan si Michael padulong sa bola ug mikawhat. Iyang nasalo ang bola!
Si Lindsay ug si Mama namarug ug miabiba. “Maayo, Michael! Ikaw ang paborito nakong igsoon!” Misinggit si Lindsay.
“Ako ra man ang imong igsoon!” Misinggit og balik si Michael nga may dakong pahiyom sa iyang nawong.
Milingkod og balik si Lindsay, dako kaayo ang pahiyom.
“Tingali kinahanglan kong mohatag og pagtagad ug moabiaba kang Michael,” naghunahuna siya. “Ang pagtan-aw kaniyang makasalo sa bola maoy pinakanindot nga butang nga nahitabo sa tibuok adlaw. Ug daw giganahan gayud siya nga nagtan-aw ko. Mapasigarbuhon kaayo ko kaniya.”
“Ma, nagtuo kong husto ka,” miingon si Lindsay. “Kinahanglan nga suportahan nato si Michael.”
Mipahiyum si Mama. “Nalipay kong nausab ang imong hunahuna.”
“Moabiba pa ta!” Miingon si Lindsay.
“Padayon, Michael!” abiba ni Lindsay ug ni Mama. “Mahimo nimo kana!”
Paghulagway pinaagi ni Shawna J. C. Tenney