Kamo Igo nga Nasayud
Gikan sa pakigpulong nga gihatag atol sa Oktubre 2008 nga kinatibuk-ang komperensya.
Ang atong pagkakabig moabut sa hinayhinay, pagtulun-an human sa usa ka pagtulun-an. Kita unang nagtukod og usa ka pundasyon sa hugot nga pagtuo diha kang Ginoong Jesukristo.
Kapin sa 40 ka tuig ang milabay samtang namalandong ko sa hagit sa misyon, ako mibati sa pagkadili andam ug pagkadili angayan. Akong nahinumduman nga nag-ampo, “Langitnong Amahan, unsaon man nako sa pagserbisyo sa misyon nga ang akong nahibaloan gamay ra man kaayo?” Ako mituo sa Simbahan, apan akong gibati nga ang akong espirituhanong kahibalo limitado kaayo. Samtang ako nag-ampo, ang pagbati miabut: “Ikaw wala masayud sa tanan, apan ikaw igo nga nasayud!” Kana nga kasigurohan mihatag kanako og kadasig sa paghimo sa sunod nga lakang ngadto sa natad sa misyon.
Ang atong espirituhanong panaw mao ang proseso sa tibuok kinabuhi. Kita wala masayud sa tanang mga butang sa sinugdan o bisan diha sa giagian. Ang atong pagkakabig moabut sa hinayhinay, pagtulun-an human sa usa ka pagtulun-an. Kita unang nagtukod og usa ka pundasyon sa hugot nga pagtuo diha kang Ginoong Jesukristo. Atong gibahandi ang mga baruganan sa paghinulsol, bunyag, ug pagdawat sa gasa sa Espiritu Santo. Atong gilakip ang nagpadayon nga pasalig ngadto sa pag-ampo, pagkaandam nga mahimong masulundon, ug padayon nga pagsaksi sa Basahon ni Mormon.
Dayon kita nagpabilin nga makanunayon ug mapailubon samtang nag-uswag kita agi sa mortalidad. Usahay, ang tubag sa Ginoo mao, “Kamo wala masayud sa tanan, apan kamo igo nga nasayud”—igo aron sa pagsunod sa mga sugo ug sa pagbuhat sa unsay matarung. Hinumdumi ang mga pulong ni Nephi: “Ako nasayud nga siya nahigugma sa iyang mga anak; bisan pa niana, ako wala masayud sa kahulugan sa tanan nga mga butang” (1 Nephi 11:17).
Ang matag usa kanato adunay mga panahon sa espirituhanong gahum, mga gutlo sa pagdasig ug pagpadayag. Kinahanglan kitang mobutang niini ngadto sa kinahiladman sa atong mga kalag. Sa atong pagbuhat, kita nag-andam sa atong espirituhanong punduhanan alang sa personal nga kalisud. Si Jesus miingon, “Ibutang kini sa sulod sa inyong mga kasingkasing, nga kamo mobuhat sa mga butang nga akong itudlo, ug isugo kaninyo” (Hubad ni Joseph Smith, Lucas 14:28 [sa Lucas 14:27, footnote b]).
Pipila na ka tuig ang milabay usa nako ka higala adunay usa ka batan-ong anak nga babaye nga namatay sa makalilisang nga aksidente. Ang mga paglaum ug mga pangandoy nawala. Ang akong higala mibati og dili maantus nga kaguol. Siya misugod sa pagpangutana unsay gitudlo ngadto kaniya ug unsay iyang gipangtudlo isip usa ka misyonaryo. Ang inahan sa akong higala misulat kanako ug mihangyo kon makahatag ba ako kaniya og usa ka panalangin. Samtang akong gipatong ang akong mga kamot sa iyang ulo, mibati ako nga mosulti kaniya og usa ka butang nga wala pa gayud nako mahunahunai sa samang paagi kaniadto. Ang pagbati nga miabut kanako mao kini: Ang hugot nga pagtuo dili lamang usa ka pagbati, kini usa ka desisyon. Siya kinahanglan nga mopili sa hugot nga pagtuo.
Ang akong higala wala masayud sa tanan, apan siya igo nga nasayud. Siya mipili sa dalan sa hugot nga pagtuo ug pagkamasulundon. Siya miluhod. Ang iyang pagkaespirituhanon mibalik.
Pipila ka tuig human nako panalangini ang akong higala, nakadawat ako og sulat gikan sa iyang anak nga lalaki nga nagmisyon. Puno kini sa konbiksyon ug pagpamatuod. Samtang akong gibasa ang iyang nindot nga sulat, akong nakita kon sa unsang paagi nga ang usa ka pagpili sa amahan sa hugot nga pagtuo diha sa lisud kaayo nga panahon hilabihan nga mipanalangin sa sunod nga henerasyon.
Ang mga hagit, mga kalisdanan, mga pangutana,mga pagduhaduha—kini mga kabahin sa atong mortalidad. Apan kita wala mag-inusara. Isip mga disipulo ni Ginoong Jesukristo, kita adunay dako kaayo nga espirituhanong punduhanan sa kahayag og kamatuoran nga atong magamit. Ang kahadlok ug ang hugot nga pagtuo dili mag-uban sa atong mga kasingkasing sa samang panahon. Sa atong mga adlaw sa kalisud, kita mopili sa dalan sa hugot nga pagtuo. Si Jesus miingon, “Ayaw kahadlok, sumalig ka lamang” (Marcos 5:36).
Sa tibuok nga mga katuigan kita balik-balik nga naghimo niining mahinungdanon nga espirituhanong mga lakang. Nagsugod kita sa pagkakita nga, “siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (D&P 50:24). Ang atong mga pangutana ug mga pagduhaduha masulbad o mahimong dili na angayang kabalak-an alang kanato. Ang atong hugot nga pagtuo mahimong yano ug putli. Kita masayud sa unsay atong nasayran nang daan.
Paghulagway pinaagi ni Annie Henrie