Namulong Karong Adlawa
Si Elder Nelson Nakighimamat sa mga Santos sa Central America
Niadtong Enero, samtang gihatagan og assignment sa Unang Kapangulohan, si Elder Russell M. Nelson sa Korum sa Napulog Duha ka mga Apostoles mibiyahe ngadto sa Central America aron sa pagbansay sa mga lider sa priesthood ug pagtudlo sa lokal nga mga miyembro.
El Salvador
Pagka-Sabado, Enero 14, si Elder Nelson nakighimamat sa mga lider sa priesthood gikan sa tibuok El Salvador sa usa ka meetinghouse sa nataran sa San Salvador El Salvador Temple. Gikuyogan siya nila ni Elder L. Whitney Clayton sa Kapangulohan sa Seventy; Elder Enrique R. Falabella sa Seventy, Presidente sa Central America Area; Elder Carlos Rivas, Area Seventy; Walter Ray Petersen, temple president; ug David L. Glazier, presidente sa El Salvador San Salvador Mission.
Si Elder Nelson mitudlo sa mga lider kabahin sa pagpangalagad ug sa kaimportante sa pagkahimong mga magbalantay sa Israel. Iyang gipasabut og maayo ang pagtuon sa mga kasulatan ug paggamit sa Espiritu Santo isip kanunay nga giya. Namulong usab siya kabahin sa mga panalangin sa bag-ong LDS nga edisyon sa Biblia sa Spanish.
Pagkasunod adlaw, si Elder Nelson, kuyog sa iyang asawa, si Wendy, ug ni Elder Rivas, midumala sa komperensya sa San Salvador El Salvador La Libertad Stake.
Sa iyang mga pakigpulong, si Elder Nelson mihatag og apostolikanhong panalangin ngadto sa mga miyembro ug mga lider sa El Salvador kinsa nagsunod sa ebanghelyo ug nagmatinud-anon sa ilang mga pakigsaad.
Nicaragua
Dayon, pagka-Enero 18, 2012, si Elder Nelson nakighimamat sa mga miyembro sa Nicaragua, kuyog nila ni Elder Enrique R. Falabella ug Elder James B. Martino, parehong anaa sa Seventy.
Siya miawhag sa mga miyembro sa paglambo sa pagkabalaan ug sa pagpadayon sa pagtrabaho sa ilang mga rekord sa family history. “Ako mosaad kaninyo nga kon kamo andam, ang Ginoo mohimo sa Iyang bahin aron kamo makabaton og templo,” siya miingon.
Kita kinahanglang mag-ugmad sa atong kaugalingon og mga kinaiya sa Manluluwas, miingon si Elder Nelson, nga magsugod sa gugma.
“Makakat-on kita sa paghigugma pinaagi sa pagserbisyo,” miingon siya. “Ang laing kinaiya mao ang paghatag og pagtagad sa mga ordinansa: bunyag ug sakrament. May kalabutan kini sa Paglansang sa Krus sa Manluluwas.”
Ang uban nga mga kinaiya nga giingon ni Elder Nelson nga kinahanglang ugmaron sa mga miyembro mao ang pag-ampo sama sa pag-ampo sa Manluluwas ug pagbaton og kahibalo pinaagi sa pagtuon sa kasulatan. “Basaha ang mga kasulatan ngadto sa inyong mga anak, palamboa ang gugma alang [sa mga kasulatan], ug ako mopaniguro kaninyo, mabati ninyo ang kalipay kon inyong gamiton [unsay inyong nakat-unan] sa inyong kinabuhi,” siya miingon.
Sa katapusan si Elder Nelson miingon, “Pag-ugmad og pagkamalahutayon; molahutay hangtud sa katapusan. Si Jesukristo nag-antus labaw pa ni bisan kinsa ug wala gayud mohunong. Misalig Siya sa Iyang Amahan hangtud sa katapusan. Hinumdumi kini kon kamo mag-atubang og mga hagit sa kinabuhi.”
Sa pagtapos, si Elder Nelson mipasalamat sa hugot nga pagtuo, pagkamaunungon, ug sa mga ikapulo ug mga halad sa mga miyembro sa Nicaragua, ug mipamatuod siya kalabut sa Pag-ula.
“Ang Pagkabanhaw sa atong Ginoo naghatag kanato og kasiguroan ug nag-abli sa pultahan sa kinabuhing dayon pinaagi sa hugot nga pagtuo ug paghinulsol, kon kita molahutay hangtud sa katapusan,” miingon siya.
Samtang mibisita sa mga miyembro sa El Salvador ug Nicaragua, si Elder Russell M. Nelson midayeg niadtong nagsunod sa ebanghelyo ug nagmatinud-anon sa ilang mga pakigsaad.