Usa ka Tingog sa Dugdog, usa ka Tingog sa Kahilum

Ni Kristin Boyce

Sa unsang paagi mabatyagan sa uban ang linog nga ako wala man gyud kamatikod niini? Ang tubag nagtudlo kanako og mas labaw pa kay sa seismology.

Miabut ko sa akong misyon pipila pa lamang ka semana dihang nakamata ko tungang gabii sa nagdahunog nga tingog. Nagsugod kini sa layo ug nagkakusog samtang nagkaduol. Wala madugay ang tibuok namong balay nauyog. Diha dayon ang pagtay-og nahunong, ug ang nagdahunog nga tingog nawala. Maayo na lang ang akong kompanyon mipahimangno kanako nga ang mga linog komon ra. Tungod kay ingon og maayo ra ang tanan, mibalik ko’g higda ug natulog.

Pipila ka semana human sa akong tunga sa gabii nga pagkamata, nakadungog ko og mga tawo nga naghisgot mahitungod sa linog sa sayo nianang buntaga. Nahibulong ko kon unsay nahitabo kanila, kay wala akoy nadunggan o nabatyagan. Naglibug, sa katapusan nangutana ko kon kanus-a ang “linog” nahitabo. Nahibalo nga nag-ehersisyo o naligo ko sa oras nga giingon, dili ko makatuo nga nahitabo gayud kadto. Ang unang linog mipamata kanako, kon duna may lain samtang nagmata ko, mamatikdan unta to nako.

Apan mao lamang kini ang nag-una sa daghan pang giingon nga mga linog. Wala ko makamatngon niini, mao nga naghunahuna ko kon ang mga tawo naglibug ba kon unsa ang linog.

Paglabay sa walo ka bulan human sa gituohan nakong sa hunahuna ra nga mga linog, ang akong magtutudlo sa Sunday School mihunong sa pagsulti aron moingon, “Nabatyagan ninyo? Dunay linog.” Ang tanan miyango sa pag-uyon—gawas nako. Wala ko makasabut. Walay pagdahunog. Wala mauyog ang akong gilingkuran. Ang mga bongbong wala molihok. Sa unsang paagi nga dunay linog?

Dayon gisulayan nako sa paghinumdom kon unsay akong gibati dihang misulti ang matutudlo nga may linog. Gamay ra gayud kaayo kadto nga pagkalipong—mora lang ko og miliso og gamay. Kadto nga gamay kaayo nga pagbati usa ba ka linog?

Tungod sa akong magtutudlo, nagsugod ako sa pagkamatngon ug pagkahibalo nga ang giingon nga mga linog tinuod diay. Akong naamguhan nga wala nako kini mabatyagi dihang nag-ehersisyo ko o naligo o natulog tungod kay hinay ra kaayo kini nga pagkauyog. Apan sa kadugayan makamatngon na ko sa gamay nga pagkalipong o gamay nga pagkiling, sa pag-ila nga usa kini ka linog.

Sa kaulahian sa akong misyon, duna koy bag-ong misyonaryo nga kompanyon. Usa ka adlaw dihang nagtudlo mi, usa ka babaye miingon, “Oy, linog,” ug miuyon ko. Mitan-aw ang akong kompanyon kanamo sama nga kami mga yabag. Apan akong gitudlo ang hinay nga pagtabyog sa nagbitay nga suga ug mipaniguro kaniya nga sa ngadto-ngadto mabatyagan ra niya ang hinay nga pag-uyog sa yuta.

Mapasalamaton kaayo ko sa unsay natudlo sa mga linog ngari kanako mahitungod sa pag-ila sa Espiritu. Dunay mga panahon diin ang Espiritu dili ikalimod, usa ka tingog sa dugdog nga modulot sa atong mga kalag. Apan mas kasagaran, ang Espiritu usa ka hilum nga hunghong, usa ka bag-ong panghunahuna, usa ka impresyon, usa ka lumo nga pagbati nga adunay buhaton o isulti (tan-awa sa Helaman 5:30). Kon ang kusog nga pagtay-og sa kalag mao lamang ang atong mamatikdan, dili kita makamatikod sa daghang matam-is nga mga impresyon sa Espiritu. Usahay atong gikinahanglan ang uban nga mopahibalo sa mga pagbati sa Espiritu aron atong mapunting ang atong atensyon ug maangay og husto ang atong mga panglantaw. Kon atong buhaton, makaplagan nato ang usa ka hingpit nga bag-ong matang sa pagkahibalo ug katingala.

Gilitratohan ni David Stoker