Pagkaadik
Baruganan 5

“Tagda ang imong Kaugalingon,” Suporta nga Giya: Tabang alang sa mga Kapikas ug Pamilya sa mga Nagpaayo (2014).

“Tagda ang Imong Kaugalingon,” Suporta nga Giya: Tabang alang sa mga Kapikas ug Pamilya sa mga Nagpaayo.

babaye nga nagtuon sa mga kasulatan

Baruganan 5

Tagda ang Imong Kaugalingon

“Tagda ang imong kaugalingon, ug ang imong pagpanudlo; magpadayon ikaw niini: kay sa pagbuhat mo sa ingon pagaluwason mo ang imong kaugalingon, ug ang mga magapatalinghug kanimo” (1 Timoteo 4:16).

Ang Pagdawat nga Dili Kita Makakontrolar o Makaayo sa Atong mga Minahal

Ang mga nalit-ag natong mga minahal sa kasagaran makahimo og dili maayong mga pagpili ug posibling magsagubang og dagkong mga sangputanan. Lisud tan-awon nga mahitabo kini ug mobati nga walay ikatabang aron mapugngan kini. Posibling magtuo kita nga ang mga butang dili moarang-arang hangtud manginlabut kita ug motul-id niini. Posibling mosulay kita sa pag-awhag, pagpangatarungan, paghangyo, pagsilot, pagbuot, o pagpakaulaw sa atong mga minahal ngadto sa pagpaayo. Kini nga mga pagpaningkamot makita nga daw epektibo sa mubo lang nga panahon, apan sa katapusan dili diay kini igo. Nakakat-on kita gikan sa kasinatian nga ang paningkamot sa pagkontrolar makamugna lamang og pagbati sa kabalaka, kahadlok, ug kaligutgot. Mitambag si Elder Richard G. Scott, “Ayaw sulayi sa pagyatak ang kabubut-on. Mismo ang Ginoo dili gani mohimo niana. Ang pinugos nga pagsunod walay panalangin” (“To Help a Loved One in Need Ensign, Mayo 1988, 60).

Natural lamang nga gusto natong makasinati ang atong mga minahal sa makaayo nga gahum ni Jesukristo, ug maningkamot kita sa pagtabang nila kutob sa atong mahimo. Apan, importanting masabtan nga dili ta makaluwas kanila. Kon maningkamot kita sa pagluwas nila gikan sa mga sangputanan sa dili maayo nilang mga pagpili, nasayop kita sa atong pagsulay sa pag-ilog sa tahas sa atong Manluluwas ug Manunubos. Ang pipila sa atong mga paningkamot ug mga intensyon para nila posibling maoy makalangay sa ilang pagpaduol sa Manluluwas. Aron ang Ginoo makaayo nila, kinahanglan silang mogamit og pagtuo ug magmasulundon sa Iyang mga sugo. Dili nato kana mahimong buhaton alang kanila. Nangutana ang Manlulwas, “Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?” (3 Nephi 9:13). Ang tanang tawo kinahanglang mopili alang sa ilang kaugalingon sa pagduol sa Manluluwas. Sa sitwasyon sa usa ka tawo nga nakigbisog, siya lamang ang makapili unsay angay buhaton aron makakaplag og pagkaayo.

  • Sa unsang paagi nga atong malikayan nga ang usa ka tinguha sa pagsuporta sa usa ka minahal mahimong usa ka pagyatak sa kabubut-on?

Mag-focus sa Atong Pagkaayo

Usa ka pinakaunang motibo sa pagpangita og tabang tingali mao ang mas maayong pagsabut kon unsaon pagtabang sa atong mga minahal. Posibling magtuo o magdahum kita nga ang mga pagkaayo sa atong mga minahal mosangput usab sa kaugalingon natong pagkaayo. Mosangko kita sa mahinungdanon kaayong punto kon maamguhan nato nga kinahanglan kitang mag-focus hinoon sa kaugalingon natong pagkaayo. Wala kini magpasabut nga mohunong kita sa pagsuporta sa atong mga minahal o sa pagtinguha sa ilang pagkaayo. Hinoon, makaamgo kita nga ang kaugalingon natong kalinaw ug pagkaayo mao ang atong unang prayoridad. Ang mga pagpili sa atong mga minahal dili angay nga mobabag sa atong pagpaduol sa Manluluwas. Gidapit kita sa Ginoo sa pagduol Kaniya bisan pa sa atong mga kahimtang: “Umari kamo kanako, kamong tanan nga nabudlay ug nabug-atan, ug papahulayon ko kamo. Isangon ninyo ang akong yugo diha kaninyo, ug pagtuon kamo gikan kanako, kay ako maaghop ug mapaubsanon sa kasingkasing: ug makakaplag kamog pahulay alang sa inyong mga kalag. Kay masayon ang akong yugo, ug magaan ang akong luwan” (Mateo 11:28–30).

  • Unsaon nimo pag-focus sa kaugalingon nimong kalinaw ug pagkaayo?

Pag-atiman sa Atong Kaugalingon

Usa ka importanting aspeto sa atong pagkaayo mao ang paggahin og panahon nga makakita og balanse ug ang pag-atiman sa atong mga kaugalingon. Kon dili kita magmatngon, posibling matugutan nato ang mga pagpili sa atong mga minahal ug ang may kalabutang mga problema nga modaot kanato o mahimong hinungdan nga atong mataligam-an ang kaugalingon natong kaayohan. Gihangyo kita sa Ginoo nga “[mag]mapugnganon sa tanan nga mga butang” (Alma 7:23) ug dili “modagan nga labaw pa kay sa [atong] kusog” (Mosiah 4:27). Importante ang pagsiguro nga makab-ot ang kaugalingon natong panginahanglan. Motugot kini nga mas masuportahan nato ang atong mga minahal ug ang uban sa atong palibut. Si Sister Neill F. Marriott mitudlo: “Nagtukod kita sa gingharian kon kita nag-alima sa uban. Hinoon, ang unang anak sa Dios nga kinahanglan natong tukuron sa gipahiuling ebanghelyo mao ang atong mga kaugalingon” (“Unsay Atong Buhaton?” Liahona, Mayo 2016, 10).

  • Unsa nga pihong mga aksyon ang angay nimong atimanon sa imong kaugalingon sa pisikal, emosyonal, ug espritwal nga paagi?

  • Sa unsang paagi nga ang pag-atiman sa imong kaugalingon mas makahatag nimo og gahum sa pagtabang sa imong minahal?

Pagsabut sa Dili Mapugngan nga mga Kinaiya

Ang pagkat-on mahitungod sa dili kapugngan nga mga kinaiya makatabang aron mas masabtan nato ang mga pagpili sa atong mga minahal. Mitambag ang Ginoo, “Pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (D&P 88:118). Dunay daghang maayo nga impormasyon mahitungod sa unsay atong mahimo sa pagtabang sa atong kaugalingon ug sa atong mga minahal. Usa ka paagi aron makakita og mga tubag mao ang pagpaminaw sa mga kasinatian sa uban, nga makatabang nato nga mobati nga tinuod ang atong kasinatian ug wala kaayo mag-inusara. Dunay daghan kaayong may kalabutan sa ebanghelyo nga mga kapanguhaan nga makatabang, naglakip sa mga kasulatan, mga pulong sa mga propeta ug ubang mga lider sa Simbahan, ang Addiction Recovery Program (addictionrecovery.lds.org), ang Overcoming Pornography nga website (overcomingpornography.org), mga artikulo diha sa LDS.org, BYU Campus Education Week lectures, ug daghan pang ubang mga materyal. Ang pagkahibalo unsay malauman sa usa ka sitwasyon nga naglakip sa dili kapugngan nga mga kinaiya makahatag kanato og dugang gahum aron mas matabangan ang atong kaugalingon ug ang atong mga minahal.

  • Sa unsang paagi nga ang pagpangita og mas maayong panabut nakatabang kanimo?

babaye nga naggitara

Usa ka importanting aspeto sa atong pagkaayo mao ang paggahin og panahon nga makakita og balanse ug ang pag-atiman sa atong mga kaugalingon. Kon dili kita magmatngon, posibling matugutan nato ang mga pagpili sa atong mga minahal ug ang may kalabutang mga problema nga modaot kanato o mahimong hinungdan nga atong mataligam-an ang kaugalingon natong kaayohan.