Ang Katuyuan sang Pagtudlo sa Paagi sang Manluluwas

Ang mga prinsipyo nga ginalaragway sa sining manwal sarang makabulig sa tagsa ka manunudlo sang ebanghelyo nga magtudlo sa paagi sang Manluluwas. Upod diri ang mga ginikanan, mga ministering brother kag sister, mga manunudlo sa seminary kag institute, kag bisan sin-o nga ang calling sa Simbahan nagahatag sa ila sang mga oportunidad sa pagtudlo.

Mahimo ninyo nga tun-an ining manwal nga kamo lang ukon gamiton ini para giyahan ang mga diskusyon upod sa iban kon paano mangin mas maayo nga manunudlo. Halimbawa, ining manwal pwede gamiton sa mga home evening, mga miting sang pangulohan, mga miting sang konseho sa ward ukon stake, mga in-service nga miting sang seminary kag institute, kag mga miting sang konseho sang mga manunudlo (tan-awa sa “Para sa Mga Lider—Pagbulig sa Mga Manunudlo nga Magmadinalag-on”).

Paano Gin-organisar Ining Manwal

Ang Bahin 1 nagapatalupangod sang importansya sang pagtutok kay Jesucristo tagsa nga magtudlo kita sang mga prinsipyo sang Iya ebanghelyo. Ini nga seksyon nagalaragway sang kon ano ang aton itudlo.

Ang Bahin 2 nagapatalupangod sang mga prinsipyo sa pagtudlo pareho kay Cristo. Ini nga seksyon nagalaragway kon paano kita magtudlo.

Ang Bahin 3 nagahatag sang praktikal nga mga panugyan para buligan ang mga manunudlo nga gamiton ang mga prinsipyo sang pagtudlo pareho kay Cristo.