Si Jesus nga nagaistorya sa babayi sa bubon

Tungod ang Manluluwasang aton ehemplo, gugma ang mangin kawsa sang aton pagtudlo.

Palanggaa ang Imo Mga Ginatudloan

Ang tanan nga ginhimo sang Manluluwas sa bilog Niya nga pag-alagad sa duta ginatulod sang gugma. Samtang nagatinguha kita nga mangin matuod nga mga sumulunod ni Cristo, mahimo kita nga mapuno sining pareho man nga pagpalangga (tan-awa sa Juan 13:34–35; Moroni 7:47–48; 8:26). Kon ara sa aton tagipusuon ang gugma sang Manluluwas, nagapangita kita sang tanan nga posible nga paagi para buligan ang iban nga magtuon parte kay Cristo kag magpalapit sa Iya. Gugma ang mangin kawsa sang aton pagtudlo.

Palanggaa ang Imo Mga Ginatudloan

• Kabiga ang mga nagatuon sa paagi sang pagkabig sang Dios sa ila.

• Tinguhai nga kilalahon sila—intiendiha ang ila mga sirkumstansya, mga panginahanglan, kag mga kusog.

• Magpangamuyo para sa ila nga ginasambit ang ila ngalan.

• Maghimo sang hilway nga kapalibotan kon sa diin ang tanan ginarespeto kag nakahibalo nga ang ila mga kontribusyon ginahatagan sang bili.

• Magpangita sang nagakabagay nga pamaagi sa pagpahayag sang imo pagpalangga.

Ang Manluluwas Nakakita sang Diosnon nga Potensyal sa Kada Isa nga Iya Gintudloan

Abi sang kalabanan sang mga taga-Jerico nga nahibal-an na nila ang tanan nga dapat nila mahibal-an parte kay Zaqueo. Isa sia ka publikano kag manugsukot sang buhis—puno nga publikano, sa pagkamatuod—kag manggaranon. Maathag gid, sa ila pagdumdom, nga indi sia tampad kag dayaon nga tawo. Pero nagtulok si Jesus sa tagipusuon ni Zaqueo kag nakita ang isa ka dalayawon nga “anak ni Abraham” (tan-awa sa Lucas 19:1–10). Ginatulok sang Manluluwas ang mga tawo indi sa ila hitsura kundi sa kon sin-o gid sila—kag sa kon ano sila posible nga mangin. Sa indi sopistikado nga mga mangingisda pareho nanday Simon, Andres, Santiago, kag Juan, nakita Niya ang palaabuton nga mga lider sang Iya Simbahan. Sa ginakahadlukan nga manugpigos nga si Saul, Iya nakita ang “galamiton nga pinili,” nga magawali sang Iya ebanghelyo sa atubang sang mga hari kag mga nasyon (tan-awa sa Mga Binuhatan 9:10–15). Kag sa imo kag sa tagsa ka tawo nga imo tudloan, nakita sang Manluluwas ang anak nga lalaki ukon anak nga babayi sang Dios nga wala sing limitasyon ang potensyal.

Sa mga tawo nga imo ginatudloan, makasugata ka sang mga daw matinuohon kag nabag-o na kag iban nga daw indi interesado ukon bisan gani daw nagarebelde. Halungi nga indi ka maghaumhaom base lamang sa imo nakita. Ang Balaan nga Espiritu makabulig sa imo nga makita sa tagsa ka tawo ang pila sa makita sang Manluluwas—kag buligan ka nga palanggaon sila pareho sang Iya pagpalangga.

Mga Pamangkot nga Dapat Binagbinagon: Hunahunaa ang tagsa ka tawo nga imo ginatudloan, kag binagbinaga kon ano ang nabatyagan sang Amay nga Langitnon kag ni Jesus para sa kada isa. Ano ayhan ang Ila nakita sa iya? Paano makaapekto ining mga panghunahuna sa paagi sang imo pagtudlo sina nga tawo?

Halin sa Balaan nga mga Kasulatan: 1 Samuel 16:7; Salmo 8:4–5; Mga Taga-Roma 8:16–17; Doktrina kag mga Kasugtanan 18:10–14

Ang Manluluwas Nakakilala sa Aton kag Nakaintiendi sang Aton mga Sirkumstansya, Mga Panginahanglan, kag Mga Kusog

Ang babaying Samariahanon wala nagkadto sa bubon para mamati sang mensahe sang ebanghelyo. Nagkadto sia didto para manag-ob. Pero nakita sang Manluluwas nga ang iya kauhaw labaw pa sa pisikal nga kauhaw. Nahibal-an Niya nga magamo ang iya nagliligad bangod sa indi istable nga mga relasyon. Gani gingamit ni Jesus ang pisikal nga panginahanglan nga amo ang iya ginatutokan sadto nga tion—tubig nga nagahatag sing kabuhi—kag gin-angot ini sa iya mas madalom nga espirituhanon nga panginahanglan sang “tubig nga buhi” kag “kabuhi nga walay katapusan.” Sang matapos ang ila paghambalanay, ang babayi nakaangkon sang personal nga saksi nga si Jesus amo ang Cristo, nga natandog tungod sang Iya pagkakilala sa iya. “[Sia] nagsugid sa akon sang tanan nga butang nga nahimo ko,” siling niya. “Amo ayhan ini ang Cristo?” (tan-awa sa Juan 4:6–29).

Ang mangin Cristohanon nga manunudlo nagalakip sang pagkilala sang imo mga ginatudloan kag pagtinguha nga maintiendihan ang ara sa ila mga tagipusuon. Mahimo ka nga magpakita sang interes sa ila mga kabuhi kag magpakita sang kaluoy. Mahimo ka nga magpangita sang paagi para maintiendihan ang ila mga ginhalinan, mga talento, mga interes, kag mga panginahanglan. Mahimo mo nga tukibon kon ano ang pinakamaayo para makatuon sila. Mahimo ka magpamangkot, mamati sang maayo, kag magpanilag. Labi sa tanan, mahimo ka magpangamuyo sang paghangop nga ang Espiritu lamang ang makahatag. Kon mas kilala mo ang tawo, mas mabuligan mo sia nga magpangita sang personal nga kahulugan kag gahum sa ebanghelyo ni Jesucristo. Sa tion nga maintiendihan mo ang kauhaw sang tawo, sarang ka matudloan sang Espiritu kon paano ina bulngon paagi sa buhi nga tubig sang Manluluwas.

Mga Pamangkot nga Dapat Binagbinagon Ano na ang imo nahibal-an parte sa imo mga ginatudloan? Ano ang importante para sa ila? Ano ang ila mga kusog? Sa ano sila ginabudlayan? Ano ang sarang mo himuon para mas makilala sila?

Halin sa Balaan nga mga Kasulatan: Salmo 139:1–5; Mateo 6:25–32; Marcos 10:17–21; Juan 10:14; 3 Nefi 17:1–9

Ang Manluluwas Nagpangamuyo para sa Iya mga Ginatudloan

Pamensara kon ano ayhan ang nabatyagan ni Simon Pedro sang mabatian niya ang Manluluwas nga nagsiling sa iya, “Simon, Simon, yari karon, si Satanas nagpangayo sa [imo] … apang nagpangamuyo ako tungod sa imo agud nga indi mag-untat ang imo pagtuo” (Lucas 22:31–32). Paano ayhan makapaapekto sa imo ang ihibalo nga nagpangamuyo si Jesucristo sa Amay para sa imo? Ang katawhan sang dumaan nga Amerika nakaeksperiyensya sang pareho sini, kag ila ini ginlaragway sa sini nga paagi: “Wala sing isa nga makatungkad sang kalipay nga nagpuno sang amon mga kalag sa tion nga nabatian namon [si Jesus] nga nagapangamuyo sa Amay para sa amon” (3 Nefi 17:17).

Pwede mo man pamensaron kon ano ang nagakatabo sa sulod nimo kon ikaw nagapangamuyo para sa isa ka tawo—pirme, nga ginasambit ang ngalan. Paano nagaapekto ang imo mga pangamuyo sa imo nabatyagan para sa sina nga tawo? Paano ini nagaapekto sa imo pangginawi? Sigurado nga ang aton Amay sa Langit nagapamati kag nagasabat sang sinsero nga mga pangamuyo sang titser nga nagahandum sa pagbulig sang nagatuon. Kag sa madamo na nga mga hitabo, isa ka paagi nga ginasabat Niya inang mga pangamuyo amo ang pagtandog sang tagipusuon sang titser kag pag-inspirar sa iya nga maghimo ukon maghambal sang isa ka butang nga makabulig sa nagatuon nga mabatyagan ang Iya pagpalangga.

Mga Pamangkot nga Dapat Binagbinagon: Samtang ginapamensar mo ang mga tawo nga imo ginatudloan, may ara bala nga sa pamatyag mo labi nga nagakinahangalan sang imo mga pangamuyo? Ano ang ginapabatyag sa imo nga dapat mo ipangamuyo para sa iya? Ano ayhan nga mga bugay ang mag-abot kon imo agdahon ang mga nagatuon nga ipangamuyo ang kada isa?

Halin sa Balaan nga mga Kasulatan: Juan 17; Alma 31:24–36; 3 Nefi 18:15–24; 19:19–23, 27–34

Ang Manluluwas Nagseguro nga Ang Tanan Nakabatyag nga Ginarespeto kag Ginahatagan sing Bili

Ang kabilogan nga panimuot sang mga lider sang relihiyon sang tiyempo ni Jesus amo nga ang mga makasasala dapat likawan. Bangud sini, sang makita sining mga lider si Jesus nga nagapakigsimpon sa mga makasasala, nakibot gid sila. Paano nangin espirituhanon nga manunudlo ang tawo nga nagapakigsimpon sa amo sadto nga mga tawo?

Si Jesus, siyempre, may lain nga pamaagi. Naghandum sia nga bulngon ang mga masakiton sa espirituhanon (tan-awa sa Marcos 2:15–17; Lucas 4:17–18). Padayon Sia nga nagalab-ot sa mga tawo nga lain sangsa ara sa ila palibot ukon sa may mga magamo nga nagliligad, kag nagpakig-upod Sia sa mga nakasala. Gindayaw Niya ang pagtuo sang isa ka Romano nga soldado (tan-awa sa Mateo 8:5–13). Gintawag Niya ang wala ginasaligi nga manugsukot sang buhis agud mangin isa sang Iya sinaligan nga mga disipulo (tan-awa sa Marcos 2:14). Sang ang isa ka babayi gin-akusar sang pagpanglalaki, ginpabatyag Niya sa iya nga hilway sia sa katalagman kag gin-inspirar sia nga maghinulsol kag kaayuhon ang iya pangabuhi (tan-awa sa Juan 8:1–11).

Pero mas labaw pa dira ang ginhimo ni Jesus. Ginapatubo man Niya ang amo sini nga panimuot sang pagbaton kag pagpalangga sa Iya mga sumulunod. Ang Iya ehemplo sigurado nga tudok sa tagipusuon sang Iya mga Apostoles sang nag-abot na ang ila tiyempo nga dalhon ang ebanghelyo sa tanan nga katawhan. Ginasalaming sini ang mga pulong ni Pedro: “Matuod gid ginahantop ko nga ang Dios walay ginapasulabi sa mga tawo” (Mga Binuhatan 10:34).

Dako kaayo ang tsansa nga ang halos tanan nimo nga tuludloan nagapanikasog nga makabatyag nga ginarespeto kag ginahatagan sang bili. Sa paagi nga ginapalangga kag ginarespeto mo sila, mapaalinton mo nga wala lang sila ginaabiabi kundi ginakinahanglan. Pwede ka makig-angot sa mga wala nagatambong, mga ginabudlayan, ukon daw indi interesado, nga pasensyoso bisan pa nga daw mahinay ang pag-uswag. Sarang mo buligan ang tanan nga makabatyag nga hilway sila kag komportable sa pag-istorya sang ila mga ginakabalak-an upod sa isigka-tumuluo. Kag madamo ka pa sang mahimo. Mahimo mo papagsikon ang tanan nga nagatuon nga buligan ka sa paghimo sang kapalibotan kon sa diin ang doktrina ginatudlo sa espiritu sang pagtahod, pagkalakip, kag pagpalangga.

Mga Pamangkot nga Dapat Binagbinagon: Ano ang nagabulig sa tawo nga makabatyag nga ginarespeto kag ginahatagan sia sang bili? Ano ang nagainspirar sa tawo nga respetuhon kag hatagan sang balor ang iban? Samtang mainampuon mo nga ginahunahuna ang mga tawo nga imo ginatudloan, ano ang ginapabatyag sa imo nga himuon para ila tanan mabatyagan nga ginaabiabi sila kag kinahanglanon?

Halin sa Balaan nga mga Kasulatan: Juan 4; 2 Nefi 26:27–28, 33; Alma 1:26; 3 Nefi 18:22–25

tatay nga nagatudlo sang kabataan

Ang mga manunudlo makabulig sa ila mga ginatudloan nga mabatyagan nga ginapalangga sila.

Ang Manluluwas Nagpahayag sang Iya Pagpalangga sa Iya mga Ginatudloan

Sa katapusan sang isa ka manami, makapabaskog nga adlaw sang pagtudlo kag pag-alagad sa tunga sang mga Nefinhon, natalupangdan ni Jesus nga oras na nga malakat na Sia. May iban pa sia nga katawhan nga dapat bisitanon. “Magpalauli kamo sa inyo mga puluy-an,” siling Niya, “kag ihanda ang inyo mga kaisipan para sa buas.” Pero ang katawhan nagapungko lamang “nga may mga luha,” kag nagatulok sa iya “sing tadlong nga daw buot nila nga pangayuon sa iya nga magpabilin sing diutay pa gid upod sa ila.” Nga nahantop ang indi nila mahambal nga pangihanglan kag “napuno sang kaluoy,” nagpabilin matuod si Jesus sing makadali (3 Nefi 17:3, 5–6). Ginbendisyunan Niya ang ila mga masakiton kag ginalisdan. Nagluhod Sia kag nagpangamuyo upod sa ila. Naghibi Sia upod sa ila, kag nagkalipay Sia upod nila.

Pamensara nga tun-an ang mga pulong kag aksyon sang Manluluwas sa 3 Nefi 17. Binagbinaga ang pagpalangga nga Iya ginpahayag para sa Iya mga ginatudloan. Magpangita sang pagpahayag sang Iya pagpalangga sa iban nga mga parte sang balaan nga mga kasulatan. Dayon panumduma ang mga tawo nga imo ginatudloan. Paano naton mapatubo ang aton pagpalangga sa ila? Tugoti ang Espiritu nga maggiya sa imo. Kon ginabudlayan ka nga magpahayag sang imo pagpalangga sa imo mga ginatudloan, magsugod paagi sa pagpamatuod sa gugma sang Dios. Gani, “pinalangga kong mga kauturan, magpangamuyo sa Amay sa bug-os nga ikasarang sang tagipusuon, agud mapuno kamo [sang putli nga gugma ni Cristo], nga iya ginhatag sa tanan nga matuod nga mga sumulunod sang iya Anak nga si Jesucristo” (Moroni 7:48). Kag tandai nga ang imo kabalaka para magtudlo sang leksyon indi dapat maglikaw sa imo sa pagpahayag sang pagpalangga paagi sa imo mga pulong kag mga pangginawi. Masami ang pamaagi sang pagkabig mo sa iban amo man kaimportante sa akon ano ang ginatudlo mo sa ila.

Mga Pamangkot nga Dapat Binagbinagon: Paano ka ginbuligan sang Manluluwas nga mahibal-an ang Iya pagpalangga sa imo? Paano ka ginbuligan sang isa ka ginikanan ukon isa pa ka maestro ni Jesucristo nga mabatyagan ang pagpalangga sang Dios? Ang mga tawo bala nga imo ginatudloan nakahibalo nga palangga mo sila? Nakahibalo bala sila nga palangga sila sang Manluluwas?

Halin sa Balaan nga mga Kasulatan: Marcos 6:31–42; Juan 13:3–16, 34–35; 15:12–13; 1 Mga Taga-Corinto 13:1–7; 1 Juan 4:7–11

Pila ka Pamaagi sa Paggamit sang Imo Natun-an

• Kon nagatudlo ka sa klase, sauloha ang ngalan sang mga nagatuon kag gamita ang mga ini kon magtudlo ka.

• Magpahayag sang imo pagpasalamat kon magpartisipar ang mga nagatuon.

• Makig-upod sa mga nagatuon antes kag pagkatapos mo nga magtudlo.

• Buligi ang mga nagatuon nga magpatubo sang kapalibotan sang pagpalangga kag respeto sa isa kag isa.

• Magpamati sing maayo—kon nagatudlo ka kag sa iban pa nga tinion.

• Maghikot sang mga buhat sang pag-alagad sa imo mga ginatudloan.

• Mangin handa sa pagliwat sang imo mga plano sa pagtudlo para hatagan sang oras ang mga prinsipyo nga makahulugan sa ila nga imo ginatudoan.