Para sa Mga Lider—Pagbulig sa Mga Manunudlo nga Magmadinalag-on

Tag-isaisa nga Mga Inter-aksyon

Masami ang pinakamaayo nga paagi para masabat ang pinasahi nga mga panginahanglan sang mga titser amo ang paagi sa tag-isaisa nga mga inter-aksyon. Halimbawa, bilang lider, pwede ka maghiwat sang malip-ot nga diskusyon upod sa isa ka titser antes ukon pagkatapos sang klase para hambalan ang mga prinsipyo sang Teaching in the Savior’s Way. Pwede ka maghanda para sa sining diskusyon paagi sa pag-obserba sang titser nga nagatudlo. Tinguhai nga hibal-on sing mas maayo ang mga kusog sang titser kag diskubreha ang mga paagi nga makahatag ka sang suporta.

Ang pagtukod sa mga kusog sang isa ka titser pareho kaimportante sang pagkilala sang mga oportunidad sa pag-uswag. Makabulig nga sugdan ang mga diskusyon upod sa mga titser paagi sa pagpangabay sa ila nga binagbinagon sa ila mga kaugalingon kon ano ang maayo nga nagakatabo kag kon diin sa pamatyag nila ang pwede nga mas paayohon pa.

Sa imo pagpakigkita sa mga titser, magpamensar sang mga paagi nga pabakuron sila kag paisugon sila nga may kaayo kag pagpasalamat sa serbisyo nga ila ginahatag.

Mga Miting sang Konseho sang mga Manunudlo

Ang tagsa ka ward dapat maghiwat sang mga miting sang konseho sang mga manunudlo kada-tatlo-ka-bulan kon sa diin ang mga manunudlo makahambalanay sing ululupod parte sa mga prinsipyo sang pagtudlo pareho kay Cristo. Ang mga miting sang konseho sang mga manunudlo mahimo man hiwaton para sa mga ginikanan (tan-awa sa General Handbook: Serving in The Church of Jesus Christ of Latter-day Saints, 13.5, ChurchofJesusChrist.org).

San-o Dapat Hiwaton Ining Mga Miting?

Ang mga miting sang konseho sang mga manunudlo ginahiwat sa tion sang 50-minutos nga oras sang klase kon Domingo.

• Ang mga titser sang priesthood, Relief Society, kag Young Women magatambong bisan diin sa una ukon ikatatlo nga Domingo, suno sa mapili sang lokal nga mga lider.

• Ang mga titser sang Sunday School makatambong sa ikaduha ukon ikaapat nga Domingo, suno sa mapili sang lokal nga mga lider.

• Ang mga titser sang Primary mahimo magtambong sa bisan ano nga Domingo, suno sa mapili sang mga pangulohan sang Primary kag Sunday School. Kon gusto, ang mga titser sang Primary mahimo nga magtililipon nga separado sa iban nga mga titser para hambalan ang pinasahi nga aspeto sang pagtudlo sa kabataan. Pwede ini matabo sa tion sang 20-minuto nga oras sang pagkinanta, antes ukon pagkatapos sang regular nga mga miting kon Domingo, ukon sa bisan ano nga adlaw sang semana. Masobra sa isa ka miting sang konseho sang mga manunudlo ang mahimo hiwaton kada-tatlo ka bulan para sa mga titser sa Primary para indi sila dulungan nga madula sa mga klase sang Primary sa pareho nga semana. (Tanda: Kon kinahanglan, ang pangulohan sang Primary magabutang sang bulos nga mga titser, magatingob sang mga klase, ukon maghimo sang iban pa nga mga paagi para tugotan ang mga titser sang Primary nga makatambong sa mga miting sang konseho sang mga manunudlo.)

• Ang mga miting sang konseho sang mga manunudlo para sa mga ginikanan mahimo nga hiwaton sa bisan ano nga Domingo, suno sa napili sang konseho sang ward.

Sin-o ang Dapat Magtambong?

Ang tanan nga nagatudlo sang korum ukon klase sa ward dapat magtambong, upod ang bisan isa sa mga lider sang priesthood ukon organisasyon nga may responsibilidad sa sina nga mga korum ukon klase. Kon kinahanglan, ang mga partisipante mahimo nga tungaon sa mga grupo suno sa mga panginahanglan sang ila mga ginatudloan. Halimbawa, ang mga titser sang mga lamharon ukon kabataan mahimo nga makabenepisyo sa pagmiting nga separado kon kaisa para hambalan ang mga isyu nga para gid sa pagtudlo sang mga lamharon ukon kabataan.

Sa mga miting sang konseho sang mga manunudlo para sa mga ginikanan, ang konseho sang ward ang nagapili kon bala imbitaron ang partikular nga mga ginikanan ukon himuon ang pagtambong nga bukas sa tanan nga gusto magpartisipar.

Sin-o ang Nagapanguna sa Sining mga Miting?

Ang konseho sang ward, upod ang bulig sang pangulohan sang Sunday School, ang nagadumala sang mga miting sang konseho sang mga manunudlo. Nagahambalanay sila sing ululupod parte sa mga panginahanglan sang mga titser kag mga manugtuon base sa kon ano ang ila nakita sa mga klase kag mga miting. Nagabuligay sila sa paghibalo kon diin nga mga prinsipyo kag mga hilimuon sa Pagtudlo sa Paagi sang Manluluwas ang makasabat sing pinakamaayo sang mga panginahanglan nga ila nakita.

Masami, isa ka miyembro sang pangulohan sang Sunday School ang nagadumala sang mga miting sang konseho sang mga manunudlo. Ugaling, ang iban nga mga miyembro sang ward mahimo nga matokahan sa pagpanguna sa mga miting kon kaisa. Ang mga pangulohan sang korum kag organisasyon nagapabakod upod sang ila mga titser sang mga prinsipyo kag mga buhat nga ginhambalan sa miting.

Ano ang Dapat Matabo sa Miting sang Konseho sang mga Manunudlo?

Ang miting sang konseho sang mga manunudlo dapat magasunod sa sining format:

• Makigbahin kag maghinambalanay sing ululupod. Agdaha ang mga manunudlo sa pag-istorya sang nagligad lang nga mga eksperiyensya sa pagtudlo, magpamangkot sang mga mahiangot sa pagtudlo, kag magpaambit sang mga ideya sa paglampuwas sang mga kabudlayan. Ining bahin sang miting dapat magalakip sang pagrebyu sang mga prinsipyo nga ginhambalan sang nagliligad nga mga miting.

• Magtuon sing ululupod. Agdaha ang mga titser nga hambalan ang isa sa masunod nga mga prinsipyo nga ginpresentar sa sining manwal: magtutok kay Jesucristo, palanggaa ang imo ginatudloan, magtudlo paagi sa Espiritu, itudlo ang doktrina, kag ipatigayon ang matutom nga pagtuon. Ang mga prinsipyo mahimo nga talakayon sa bisan ano nga pasunod, kag magluwas kon ginapanugyan sang konseho sang ward, ang mga partisipante sa miting makapili sang madason nga prinsipyo nga pagahambalan. Pwede ka nga maghiwat sang masobra isa ka miting sa isa ka prinsipyo kon kinahanglanon.

• Magplano kag mag-agda. Buligi ang mga titser sa pagplano kon paano nila gamiton ang prinsipyo nga ila ginhambalan. Kon nagakabagay, pwede man ninyo praktisan sing ululupod ang isa ka ikasarang nga inyo ginhambalan. Hagara sila nga isulat kag aktuhan ang bisan ano nga pagpabatyag nga ila mabaton parte sa kon paano gamiton ang prinsipyo sa ila pagtudlo—lakip na sa ila mga pagpaninguha nga magtudlo sa ila mga puluy-an. Paisoga sila nga sugdan ang pagtuon sang madason nga prinsipyo nga pagahambalan.

Kutob sa mahimo, ang mga miting sang konseho sang mga manunudlo dapat mangin modelo sang mga prinsipyo nga ginahambalan.

Ang mga miting sang konseho sang mga manunudlo makabulig sa mga manunudlo nga mas maintiendihan kag ipangabuhi ang mga prinsipyo sang pagtudlo pareho kay Cristo.

Paghanda sang Bag-o Lang Gintawag nga mga Manunudlo

Bilang lider, may responsibilidad ka sa “pagtipon upod sa bag-o lang gintawag nga mga manunudlo” sa imo organisasyon kag “buligan sila sa paghanda para sa ila mga calling” (General Handbook, 17.3, ChurchofJesusChrist.org). Ining mga miting isa ka oportunidad para ipakilala ang bag-o nga mga titser sa ila sagrado nga mga calling kag papagsikon sila sa panan-awon kon ano ang buot silingon sang pagtudlo sa paagi sang Manluluwas. Bilang lider, sarang mo buligan ang bag-o nga mga titser nga maghanda sa pagserbisyo paagi sa paghimo sang masunod:

• Magpahayag sang pagsalig nga ang Manluluwas magabulig sa ila sa ila calling (tan-awa sa Doktrina kag mga Kasugtanan 88:78).

• Hatagan ang bag-o nga mga titser sang kopya sining manwal, kag paisugon sila nga magpangita sang mga paagi nga magamit ang mga prinsipyo sini sa ila pagtudlo.

• Ipaambit sa bag-o nga mga manunudlo ang bisan ano parte sa inyo organisasyon nga mahimo makabulig nga ila mahibal-an.

• Kon kinahanglan, sugiri ang bag-o nga mga titser kon diin nga kuwarto magtudlo kag kon ano ang sugdan nga leksyon. Maghatag sang bisan ano nga impormasyon nga ila kinahanglan parte sa ila klase kag mga miyembro sang klase.

• Ipaathag sa bag-o nga mga titser nga mabuligan mo sila sa ila bag-o nga calling. Magtanyag sang suporta sa klase kag pagtigayon sang mga manwal sa pagtudlo kon kinahanglanon.

• Magtanyag sa pag-obserba sa mga klase sang mga titser sing panalagsa, kag maghatag sang komento suno sa inspirasyon sang Espiritu.

• Hagara ang mga titser nga magpartisipar sa kada-tatlo-ka-bulan nga mga miting sang konseho sang mga manunudlo.