Bilang mga manunudlo sang ebanghelyo ni Jesucristo, ginabuligan naton ang iban nga maintiendihan kag magsalig sa Iya mga pinanudlo, gahum, kag pagpalangga.

Buligi ang mga Nagatuon nga Maglapit kay Jesucristo

Wala ka sang himuon bilang manunudlo nga mas magabugay sa mga nagatuon sangsa pagbulig sa ila nga makilala ang Amay nga Langitnon kag si Jesucristo kag mabatyagan ang Ila pagpalangga (tan-awa sa Juan 17:3). Pamensara ang mga eksperiyensya nga nagbulig sa imo nga makilala kag palanggaon ang Amay nga Langitnon kag si Jesucristo. Ano ang imo ginhimo para matun-an ang Ila mga kinaiya, gahum, kag pagpalangga? Paano ang imo pagpalangga sa Amay nga Langitnon kag kay Jesucristo nagdala sa imo sang kalipay? Dayon hunahunaa kon ano ang mahimo sang Ila pagpalangga kag gahum sa kada tawo nga imo gintudloan. (Tan-awa sa Alma 26:16; Moises 5:11.)

Ang aton pinakamataas nga tuyo sa sining kinabuhi amo ang mangin mas pareho sa aton Amay nga Langitnon kag magbalik sa Iya. Ang paagi nga malab-ot naton ina nga tinutuyo amo ang pagpalapit kay Jesucristo (tan-awa sa Juan 14:6). Amo ini kon ngaa, sa gintudlo sang propeta nga si Nefi, “nagahambal kita nahanungod kay Cristo, nagakasadya kita kay Cristo” (2 Nefi 25:26).

Ang tagsa ka anak sang Dios nagakinahanglan sang kasanag kag kamatuoran nga nagahalin sa Manluluwas kag sarang magpili nga aksyunan ini. Ang mangin manunudlo sang ebanghelyo ni Jesucristo nagakahulugan nga buligan naton ang iban nga maintiendihan kag magsalig sa Iya mga pinanudlo, nagatubos nga gahum, kag perpekto nga pagpalangga. Pamensara kon paano makabulig sa imo ang masunod nga mga ideya nga papagsikon ang iban nga mas kilalahon pa gid si Jesucristo kag sundon Sia.

Buligi ang mga Nagatuon nga Makilala ang Pagpalangga, Gahum, kag Kaluoy sang Ginuo sa Ila mga Kabuhi

Manami nga hibaluon ang parte sa pagpalangga, gahum, kag kaluoy sang Manluluwas, pero kinahanglan man naton ini maeksperiyensyahan. Ang makita kon paano Niya ginbugayan kag ginpaayo ang mga tawo sa balaan nga mga kasulatan nagabulig sa aton nga magpatubo sang mas dako nga pagtuo nga sarang Niya kita bugayan kag paayuhon. Halimbawa, ang pagtuon parte sa mga eksperiyensya ni Daniel indi kumpleto kon wala ini nagainspirar sa aton nga magsalig sa Ginuo kon ginaatubang naton ang aton kaanggid nga lungib sang mga leon.

Samtang imo ginabuligan ang mga manugtuon nga kilalahon ang “mahinuklugon nga mga kaluoy” sang Ginuo (1 Nefi 1:20), sa pareho nga balaan nga mga kasulatan kag sa ila kaugalingon nga mga eksperiyensya, mabatyagan nila kag mahibal-an nga ang Ginuo kaupod nila kag mapinalanggaon nga magapabilin sa tupad nila (tan-awa sa Doktrina kag mga Kasugtanan 68:6). Makita nila kag mabatyagan ang pagkamatuod sang gugma kag kaluoy sang Ginuo sa ila personal nga mga panginahanglan kag kahimtangan.

Ang mga manunudlo makabulig sa mga nagatuon nga maeksperiyensyahan ang pagpalangga, gahum, kag kaluoy sang Manluluwas.

Buligi ang mga Nagatuon nga Pabakuron ang Ila mga Kaangtanan sa Amay nga Langitnon kag kay Jesucristo

Ang katuyuan sang pagtudlo kag pagtuon parte kay Jesucristo amo nga buligan ang tagsa ka tawo nga magpalapit sa Iya kag sa aton Amay nga Langitnon. Buligi ang mga tawo nga imo ginatudloan nga indi malipat sinang katuyuan. Paisoga sila nga pabakuron ang ila relasyon sa Amay nga Langitnon kag kay Jesucristo paagi sa pagtuon sang balaan nga mga kasulatan, sige-sige nga paghinulsol, pagpakighambal sa Amay sa pangamuyo, kag pagpamatuod parte sa Amay kag Anak. Tudloi ang mga nagatuon paagi sa pulong kag buhat kon paano ang paghimo kag pagtuman sang mga kasugtanan nagabugkos sa aton sa Ila. Buligi sila nga mahibal-an kon daw ano kita ka malahalon kag ka pinalangga para sa Ila. Pabaskuga ang ila pagtuo nga si Jesucristo, sa gahum sang Iya perpekto nga Pagbayad-Sala, amo ang solo nga paagi pabalik sa aton Amay. Hatagi sang mga oportunidad ang mga nagatuon nga makabaton sang saksi halin sa Balaan nga Espiritu, “nga nagapamatuod sa Amay kag sa Anak” (Moises 5:9).

Buligi ang mga Nagatuon nga Hungdon sa Pagtinguha nga Mangin Mas pareho kay Jesucristo

Sa katapusan, ang pagtuon parte kay Jesucristo nagainspirar sa aton nga mangin pareho sa Iya. Pero ang mangin pareho sa Iya matabo lamang kon maggiho kita nga may pagtuo, pareho sa sulod kag sa gwa sang klase, nga nagahimo sang hungod nga mga pagpili nga sundon ang Iya ehemplo kag batunon ang Iya grasya. Agdaha ang mga nagatuon nga pangayuon ang bulig sang Balaan nga Espiritu sa pagpangita sang mga paagi nga sarang sila mangin mas pareho sa Manluluwas. Magtanyag sang giya kag suporta samtang ang mga nagatuon nagatinguha nga himuon ang mangin pareho sa Iya nga lalab-uton sang ila kabuhi.

Si Jacob nagtudlo nga “ang tanan nga mga butang nga ginhatag sang Dios gikan pa sa ginsuguran sang kalibutan” mahimo nga magtudlo sa aton parte kay Jesucristo (2 Nefi 11:4). Ang imo pagpanudlo mahimo nga mangin isa sinang mga butang. Ibutang si Jesucristo sa sentro sang tagsa ka eksperiyensya sang pagtudlo kag pagtuon. Kon ikaw kag ang mga nagatuon “nagahambal nahanungod kay Cristo, … nagakasadya kay Cristo, … nagawali nahanungod kay Cristo” (2 Nefi 25:26), ang Balaan nga Espiritu mahimo nga magtanom sang saksi parte sa Manluluwas sa sulod sang tagsa ka kaisipan kag tagipusuon sang tawo. Kon imo ginabuligan ang imo mga ginatudloan nga kilalahon ang Amay nga Langitnon kag si Jesucristo sing personal, laban-laban nga magadangop sila sa Ila para sa bulig, paglaum, kag pag-ayo sa bilog nila nga kabuhi.