Si Jesus nga ginaalsa si Pedro halin sa nagaibwal nga tubig

Finisher of Faith [Manughimpit sang Pagtuo], ni J. Alan Barrett

Ipatigayon ang Matutom nga Pagtuon

Makatalandog naton nga makita ang Manluluwas nga nagalakat sa tubig. Pero kulang pa ini kay Pedro. Gusto niya himuon ang ginahimo sang Manluluwas, magkadto sa kon diin Sia, kag maeksperiyensyahan ang amo man para sa iya kaugalingon. “Sugoa ako sa pagkara sa imo sa ibabaw sang tubig,” siling niya. Ang Manluluwas nagsabat sa simple nga imbistasyon: “Kari.” Sa sina, naglukso si Pedro halin sa kaluwasan sang sakayan kag ginpakita sa aton nga ang pagkadisipulo indi nagahulat lang nga eksperiyensya (tan-awa sa Mateo 14:24–33). Nagakinahanglan ini sang pagtuo kay Cristo kag matutom nga pagtinguha. Pero nagadala man ini sang manami nga regalo sang paglakat upod sa Manluluwas.

“Kari.” “Kari kag tan-awa.” “Kari, magsunod sa akon.” “Lakat kag himoa ang subong” (Mateo 14:29; Juan 1:39; Lucas 18:22; 10:37). Halin sa pagsugod sang Iya pag-alagad, ang Manluluwas nag-agda sang Iya mga sumulunod sa pag-eksperiyensya sa ila kaugalingon sang mga kamatuoran, gahum, kag pagpalangga nga Iya ginatanyag. Ginhimo Niya ini tungod amo gid ini ang pagtuon. Indi lang ini pagpamati ukon pagbasa; ini man ang pagbag-o, paghinulsol kag pag-uswag. Sa mga pulong sang Manluluwas, ang pagtuon nagaabot “paagi sa pagtuon kag amo man paagi sa pagtuo” (Doktrina kag mga Kasugtanan 88:118; pagpatalupangod gindugang). Kag ang pagtuo nagalakip sang paggiho para sa aton kaugalingon, indi lang maghulat nga aktuhan (tan-awa sa 2 Nefi 2:26).

Kon sundon naton ang ehemplo sang Manluluwas, ginaagda naton ang aton mga ginatudloan nga magpangayo, magpangita, kag magpanuktok—kag makakita (tan-awa sa Mateo 7:7–8). Kag ginabaton naton mismo ang ina nga imbitasyon. Ululupod, paagi sa aton kaugalingon nga pagtuo kay Cristo kag sa matutom nga pagpaninguha, mahibal-an naton para sa aton kaugalingon kon ano ang kahulugan sang maglakat upod sa Iya.

Para Ipatigayon ang Matutom nga Pagtuon

• Buligi ang mga nagatuon nga mangin responsable para sa ila pagtuon.

• Paisoga ang mga nagatuon nga kilalahon ang Manluluwas paagi sa pagtuon sang ebanghelyo adlaw-adlaw.

• Hagara ang mga nagatuon nga maghanda sa pagtuon.

• Ang Manluluwas nagapaisog sa mga nagatuon nga ipaambit ang mga kamatuoran nga ila ginatun-an.

• Agdaha ang mga nagatuon nga ipangabuhi ang ila ginatun-an.

Ang Manluluwas Nagbulig sa Iban nga Mangin Responsable para sa Ila Pagtuon

Ang paghimo sang mga barkasa (barge) nga magatabok sa kadagatan mabudlay nga buluhaton para sa bisan sin-o. Pero ang utod ni Jared “dalayon nga ginatuytuyan sang kamot sang Ginuo” (Eter 2:6), nagabaton sang instruksyon parte sa porma sang mga barkasa kag kon paano ini mahanginan sa sulod. Pero ano ang imo natalupangdan sa paagi nga nagsabat ang Ginuo sang namangkot ang utod ni Jared parte sa suga sa sulod sang mga barkasa? (tan-awa sa Eter 2:22–25). Paano ginbugayan ang utod ni Jared paagi sa imbitasyon nga gamiton ang iya pagtuo sa sini nga paagi? (tan-awa sa Eter 3:1–16).

Mahimo nga mas mahapos nga ihambal na lang sa mga nagatuon ang tanan nga bagay nga sa banta mo kinahanglan nila mahibal-an. Ugaling, laygay ni Elder David A. Bednar: “Ang aton tuyo indi dapat ‘Ano ang ihambal ko sa ila?’ Kundi, ang mga pamangkot nga dapat naton ipamangkot sa aton kaugalingon amo nga ‘Ano ang sarang ko i-agda sa ila nga ila himuon? Ano nga inspirado nga mga pamangkot ang pwede ko ipamangkot nga, kon handa sila sa pagsabat, magasugod sa pag-imbitar sang Balaan nga Espiritu sa ila mga kabuhi?’” (evening with a General Authority, Peb. 7, 2020, broadcasts.ChurchofJesusChrist.org).

Pamensara kon paano mo imbitahon ang mga nagatuon nga mangin responsable para sa ila pagtuon. Halimbawa, pwede mo sila hagaron sa pagpamangkot sang ila kaugalingon nga mga pamangkot, sa pagpangita sang mga sabat, pagbinagbinag, ukon pag-istorya ukon pagsulat sang ila mga panghunahuna kag mga balatyagon. Samtang ila ini ginahimo, mapabakod nila ang ila pagtuo, madiskubrehan ang mga kamatuoran sa pulong sang Dios, kag makaangkon sang ila kaugalingon nga mga eksperiyensya sa sining mga kamatuoran. Kon mangin responsable kita sa aton kaugalingon nga pagtuon, mahambal naton, pareho kay Joseph Smith, ““Nahibal-an ko sa akon kaugalingon” (Joseph Smith—Kasaysayan 1:20).

Mga Pamangkot nga Dapat Binagbinagon: Ngaa importante sa mga nagatuon nga mangin aktibo imbes nga nagahulat lang sa ila pagtuon? Paano mo sila buligan nga mangin responsable para sa ila pagtuon? Paano ka ginbuligan sang mga manunudlo nga himuon ini? Ano nga mga halimbawa sa balaan nga mga kasulatan ang imo madumduman sa diin ang mga tawo gin-agda sa pagtuon para sa ila mga kaugalingon? Paano makaapekto ining mga halimbawa sa paagi sang imo pagtudlo?

Halin sa Balaan nga mga Kasulatan: 1 Nefi 11; Doktrina kag mga Kasugtanan 9:7–8; 58:26–28; 88:118–125; Joseph Smith—Kasaysayan 1:11–20

Ang Manluluwas Nagpaisog sa Iban nga Kilalahon Sia Paagi sa Pagtuon sang Iya Pulong

Sang mag-abot ang tion para pormal nga organisahon sang Manluluwas ang Iya Simbahan sa ulihing mga adlaw, siling Niya sa Iya mga alagad, “Magsalig ka sa mga butang nga nasulat” (Doktrina kag mga Kasugtanan 18:3). Matuod gid, ang Libro ni Mormon, nga malapit na lang nila matapos sa paglubad, nagaunod sang makabulig nga instruksyon para sa buluhaton, lakip na ang kon paano magbunyag, paano magdumala sang sakramento, kag iban pa nga malahalon nga mga detalye. Pero gusto man sang Manluluwas nga makita sang Iya mga alagad ang Iya mga rebelasyon bilang oportunidad para pamatian Sia kag mas makilala pa gid Sia sing lubos. Sa pareho man nga rebelasyon, ginsiling Niya sa ila, “Kay akon tingug ang nagahambal [sining mga pulong] sa inyo; … gani, makapamatuod kamo nga nabatian ninyo ang akon tingug, kag nakahibalo sang akon mga pulong” (Doktrina kag mga Kasugtanan 18:35–36).

Panumduma ang mga tawo nga imo ginatudloan. Ano ang pagkabig nila sa pagtuon sang balaan nga kasulatan? Bangod sina, ano ang pagkabig mo sini? Mas labaw pa bala ini sa adlaw-adlaw nga obligasyon? Kon magtuon ka sang balaan nga mga kasulatan, mabatyagan mo bala ang Manluluwas nga nahambal sing direkta sa imo? Si Pangulong Russell M. Nelson nagtudlo: “Sa diin kita mahimo magkadto agud magpamati sa Iya? Makakadto kita sa balaan nga mga kasulatan. … Ang adlaw-adlaw nga pagpaayaw sa pulong sang Dios importante para sa espirituhanon nga pagkabuhi, ilabi na sa sining panahon sang nagadako nga kabudlayan. Samtang nagapaayaw kita sa mga pulong ni Cristo adlaw-adlaw, ang mga pulong ni Cristo magahambal sa aton kon paano aktuhan ang mga kabudlayan nga wala naton ginahunahuna nga atubangon” (“Hear Him,” Liahona, Mayo 2020, 89). Sa imo pagtudlo, paisoga ang mga nagatuon nga tun-an ang balaan nga mga kasulatan nga may katuyuan sa pagpangita sang Manluluwas—indi lamang sa pagpangita sang mga bersikulo ukon mga kamatuoran parte sa Iya kundi sa pagpangita sa Iya. Ang pagpamati sang tingug sang Ginuo adlaw-adlaw sa balaan nga mga kasulatan ang pundasyon sang bilog-kabuhi nga matutom, kinaugalingon nga pagtuon sang ebanghelyo.

Mga Pamangkot nga Dapat Binagbinagon: Pamensara ang imo kaugalingon nga gawi sa pagtuon sang balaan nga kasulatan. Paano ang pagtuon sang pulong sang Dios nagpabakod sang imo relasyon sa Iya? Ano ang sarang mo himuon para mas mapauswag ang imo pagtuon? Paano mo papagsikon ang iban nga tun-an ang pulong sang Dios sing matutom kag regular? Ano nga mga bugay ang ila mabaton kon himuon nila ini?

Halin sa Balaan nga mga Kasulatan: Josue 1:8; 2 Timoteo 3:15–17; 2 Nefi 32:3; Jacob 2:8; 4:6; Doktrina kag mga Kasugtanan 33:16

Ang Manluluwas Naghagad sa Iban nga Maghanda sa Pagtuon

Bisan ang pinakanami nga mga binhi indi magtubo sa matig-a, batuhon, ukon tunukon nga duta. Sa amo man, bisan ang pinakamalahalon kag makapatubo-pagtuo nga doktrina indi makabag-o sang tagipusuon nga indi handa sa pagbaton sini. Bahin ina sa mensahe sang paanggid sang Manluluwas parte sa manugsab-og [sower], mga binhi, kag duta sa lainlain nga kondisyon. Sa “maayo nga duta”—ang tagipusuon ginpahumok na kag limpyo sa espirituhanon nga mga bato kag tunok—ang pulong sang Dios nagapatubas sang bunga nga nagahatag-sing-kabuhi (tan-awa sa Mateo 13:1–9, 18–23).

Ang espirituhanon nga preparasyon importante— para sa imo kag sa mga tawo nga imo ginatudloan. Gani paano naton buligan nga ihanda ang aton mga tagipusuon para mangin “maayo nga duta” ini para sa pulong sang Dios? Pamensara ang masunod nga mga prinsipyo sang pagpanghanda, nga pwede mo gamiton sa imo kabuhi kag pabakuron sa mga kabuhi sang imo mga ginatudloan. Magpangamuyo para mahibal-an kon ano ang gusto sang Ginuo nga imo matun-an. Magkabuhi sa paagi nga nagaimbitar sang Iya presensya sa imo kabuhi. Maghinulsol adlaw-adlaw. Patuboa ang imo kaluyag sa pagtuon paagi sa pagpamangkot sang sinsero nga mga pamangkot. Tun-i ang pulong sang Dios nga nagatuo nga giyahan ka Niya sa mga sabat. Buksi ang imo tagipusuon sa kon ano nga Iya itudlo sa imo.

Kon ang mga nagatuon maghanda sa pagtuon sa sini nga paagi, makaangkon sila sang espirituhanon nga mga mata para makakita kag mga dulunggan para mabatian ang kon ano nga gusto sang Ginuo nga ila mahibal-an (tan-awa sa Mateo 13:16).

Mga Pamangkot nga Dapat Binagbinagon: Ano ang imo ginahimo para maghanda sa pagtuon? Paano nagaapekto ang imo preparasyon sa paagi nga imo makita, mabatian, kag maintiendihan ang pulong sang Dios? Paano mo papagsikon ang iban nga maghanda sa pagtuon? Ano nga kinalain ang mahimo sina sa kon paano nila batunon ang mga kamatuoran sang ebanghelyo?

Halin sa Balaan nga mga Kasulatan: Enos 1:1–8; Alma 16:16–17; 32:6, 27–43; 3 Nefi 17:3

bata nga nagabasa sang balaan nga mga kasulatan sa klase

Ang mga nagatuon nagabenepisyo sa mga oportunidad sa pag-istorya sa kada isa sang ila mga ginatun-an.

Ang Manluluwas Nagpaisog sa Iban nga Ipaambit ang mga Kamatuoran nga Ila Ginatun-an

“Indi ako maayo maghambal,” panalambiton ni Enoc sang gintawag sia sang Ginuo nga magwali sang ebanghelyo. Pero ang katahum maghambal indi rekisitos halin pa sadto sa isa ka alagad sang Ginuo. Sa baylo, ang Ginuo nagpromisa kay Enoc nga kon hustuhan ang iya pagtuo agud buksan ang iya baba, maggwa ang mga tinaga. “Hatagan ko ikaw sang inughambal,” siling Niya (Moises 6:31–32). Gingamit ni Enoc ang iya pagtuo, kag ang Ginuo matuod gid nga naghambal paagi sa iya, gamit ang mga tinaga nga grabe kabaskog nga ginpakurog sini ang mga tawo (tan-awa sa Moises 6:47). Sa pagkamatuod, gintay-og sang mga ini ang duta mismo. Nadula ang mga bukid, ang mga suba nagliso sang alagyan, kag ang mga nasyon ginhadlukan sa katawhan sang Dios, “gamhanan katama ang mga pulong ni Enoc kag dako katama ang gahum sang mga pulong nga ginhatag sang Dios sa iya” (Moises 7:13).

Gusto sang Ginuo nga tanan kita—indi lang ang Iya mga propeta—mag-angkon sang gahum sa paghambal sang Iya pulong. Gusto Niya ina para sa aton tanan, lakip na sa mga tawo nga imo ginatudloan (tan-awa sa Doktrina kag mga Kasugtanan 1:20–21). Mahimo nga ang aton mga tinaga indi makaidog sang mga bukid ukon makaliso sang mga suba, pero makabulig ini sa pagbag-o sang mga tagipusuon. Amo ina kon ngaa importante kaayo nga hatagan ang mga nagatuon sang mga oportunidad sa pag-istorya sa isa kag isa sang ila ginatun-an parte sa Manluluwas kag sa Iya ebanghelyo. Ang paghimo sini nagbulig sa ila nga binagbinagon ang mga kamatuoran nga ginatudlo sa ila kag ipahayag ang mga ini. Makabulig man ini sa ila nga makaangkon sang kompiyansa sa ila ikasarang sa pagpaambit sang mga kamatuoran sa lain nga sitwasyon.

Mga Pamangkot nga Dapat Binagbinagon: Hunahunaa ang tion nga naghambal ka parte sa kamatuoran sang ebanghelyo sa isa ka tawo. Ano ang imo natun-an sa sina nga eksperiyensya? Sang san-o ka nangin mapinasalamaton sa tawo nga nangin maisog sa pag-istorya sang ila mga panghunahuna kag ginapatihan? Paano makabenepisyo ang mga tawo nga imo ginatudloan sa mga oportunidad nga maghambal parte sa mga butang nga ila ginatun-an? Ano nga mga oportunidad ang sarang mo himuon para sa ila?

Halin sa Balaan nga mga Kasulatan: Alma 17:2–3; Moroni 6:4–6; Doktrina kag mga Kasugtanan 84:85; 88:122; 100:5–8

Ang Manluluwas Nag-agda sa Iban nga Ipangabuhi ang Iya Gintudlo

“[I-iwag] ninyo ang inyo [kasanag] sa atubangan sang mga tawo.” “Higugmaa ang inyo mga kaaway.” “Pangayo, kag kamo hatagan.” “Sulod kamo sa gawang nga makitid.” (Mateo 5:16, 44; 7:7, 13.) Pila sa pinakaklaro, indi malimtan nga mga imbitasyon sa bilog nga dutan-on nga pag-alagad sang Manluluwas ginhambal samtang Iya gintudloan ang Iya mga disipulo sa tiilan sang bukid nga nagatamwa sa Dagat sang Galilea. Ang tuyo sang Manluluwas amo ang pagbag-o sang mga kabuhi, nga gin-athag sang Iya panghingapos nga pangagda: “Busa ang tagsatagsa nga nagapamati sining mga polong ko, kag nagatuman sa ila, ipaangay sa tawong mainandamon nga nagtukod sang iya balay sa ibabaw sang [bato]” (Mateo 7:24; pagpatalupangod gindugang).

Nagabundak ang ulan kag nagaabot ang mga baha kag ang hangin nagawaswas sa kabuhi sang kada isa. Ang pagtuon parte sa ebanghelyo indi bastante agud ang mga nagatuon makalampuwas sang tanan nga mga pagtilaw nga ila atubangon. Amo ini kon ngaa indi kita dapat magpangduhaduha sa pag-imbitar sa mga nagatuon nga pamensaron kon paano nila ipangabuhi ang ila ginatun-an. Bilang respeto sa kahilwayan sang iban nga magpili, madamo sa aton mga imbitasyon ang pangkabilogan: “Ano ang nabatyagan mo nga dapat mo himuon?” Kon kaisa ang aton mga imbitasyon mahimo nga kinahanglan ihinambit gid: “Pilion mo bala ang isa ka kinaiya sang Manluluwas nga gusto mo sundon?” Kon hatagan mo sang mga oportunidad ang mga nagatuon nga mabatian, makilala, kag ipaambit ang mga pagpabatyag sang Balaan nga Espiritu, tudloan Niya sila kon ano nga personal nga mga aksyon ang kinahanglan nila himuon. Buligi ang mga nagatuon nga binagbinagon ang mga bugay nga magasunod kon aktohan nila ang ila gintun-an, kag paisugon sila nga magpadayon bisan pa nga mangin mabudlay ini. Ang pagpangabuhi sang kamatuoran amo ang pinakamadasig nga dalan padulong sa mas dako nga pagtuo, testimonya, kag pagbag-o. Sa ginsiling sang Manluluwas, ang pagpangabuhi sang doktrina sang Amay amo ang paagi nga mahibal-an gid naton kon ang doktrina matuod (tan-awa sa Juan 7:17).

Mga Pamangkot nga Dapat Binagbinagon: Sang san-o ka nainspirar nga mag-akto tungod sa imbitasyon sang isa ka tawo.? Paano nagliwat ang imo kabuhi bilang resulta sini? Tandai ang mga imbitasyon nga ginhatag sa balaan nga mga kasulatan kag sang mga lider sang Simbahan. Ano ang imo natun-an nga makabulig sa imo nga mangin mas maluluy-on sa iban? Sa ano nga mga paagi ka mahimo nga magpamangkot parte sa imo mga imbitasyon?

Halin sa Balaan nga mga Kasulatan: Lucas 10:36–37; Juan 7:17; Santiago1:22; Mosias 4:9–10; Doktrina kag mga Kasugtanan 43:8–10; 82:10

Pila ka Pamaagi sa Paggamit sang Imo Natun-an

• Pangabaya ang iban nga magkadto nga preparado sa pag-istorya sang butang nga gintudlo sang Balaan nga Espiritu sa ila, pareho sang isa ka paghangop halin sa makahulugan nga dinalan sa balaan nga kasulatan.

• Hatagi ang mga nagatuon sang mga oportunidad sa pagtudlo sang isa ka bahin sang leksyon.

• Paisoga ang mga nagatuon sa pagrebyu sang isa ka video, balaan nga kasulatan, ukon mensahe antes kamo magtipon.

• Likawi ang tentasyon nga sabton ang tagsa ka pamangkot. Ilakip ang iban sa pagpangita sang mga sabat.

• Antes magpaambit sang imo mga ideya parte sa balaan nga kasulatan, pangabaya ang mga nagatuon nga iistorya man ang ila mga ideya.

• Magpamangkot sinang nagapaisog sa mga nagatuon nga magpangita sang mga sabat sa pulong sang Dios.

• Agdaha ang mga nagatuon nga magpamangkot parte sa ila mismo ginatun-an

• Hatagi sang oras ang tanan nga nagatuon nga binagbinagon ang isa ka pamangkot antes sila pangabayon sa pagpaambit sang mga sabat.

• Pamensara nga tungaon ang mga nagatuon sa magagmay nga mga grupo sa paghinambalanay, kon nagakabagay.

• Magpahamtang sang maathag nga lalab-uton para buligan ang mga nagatuon nga magtubo.

• Maghatag sang mga imbitasyon nga nagainspirar sa mga nagatuon nga mas mag-uswag pero indi tama kabudlay. Magpamangkot kag agdaha ang mga nagatuon nga iistorya ang ila mga eksperiyensya.

• Buligi ang mga nagatuon nga makatuon halin sa balaan nga mga kasulatan paagi sa:

  • Pagmarka sang makahulugan nga mga dinalan, kon gusto ninyo.

  • Pag-agda sang rebelasyon paagi sa pagbinagbinag kag pangamuyo

  • Pagsulat sang espirituhanon nga mga pagpabatyag.

  • Pagtipig sang sululatan sang mga tinun-an.

  • Pagpahamtang sang mga lalab-uton para aktuhan ang ila ginatun-an.