Magtudlo parte kay Jesucristo sa Bisan Ano nga Imo Ginatudlo

Kadamo sang dapat itudlo parte sa ginpanumbalik nga ebanghelyo ni Jesucristo—mga prinsipyo, mga kasuguan, mga propesiya, kag mga istorya sa balaan nga mga kasulatan. Pero ini tanan mga sanga sang isa lang ka kahoy, kay ini tanan isa lang ang katuyuan: agud buligan ang tanan nga tawo nga magpalapit kay Cristo kag maperpekto sa Iya (tan-awa sa Jarom 1:11; Moroni 10:32). Gani bisan ano ang imo ginatudlo, tandai nga nagatudlo ka parte kay Jesucristo kag kon paano mangin pareho sa Iya. Ang Balaan nga Espiritu makabulig sa imo nga tun-an ang pagkilala sang mga kamatuoran parte sa Manluluwas kag sa Iya nagatubos nga gahum sa tagsa ka prinsipyo sang ebanghelyo, kasuguan, kag pinanudlo sang propeta (tan-awa sa Jacob 7:10–11).

Nagatudlo ka bala parte sa pagsakripisyo? Pamensara nga hambalan upod sa mga manugtuon kon paano ang mga sakripisyo nga aton ginahimo nagatudlo sa aton mga kalag sa “dako kag katapusan nga halad” sang Manluluwas (Alma 34:10). Nagatudlo ka bala parte sa paghiliusa? Pamensara nga hambalan ang paghiusa nga nalab-ot ni Jesucristo upod sa Iya Amay kag ang Iya imbitasyon sa aton nga mangin isa upod sa Ila (tan-awa sa Juan 17). Kabiga ang tagsa ka topiko sang ebanghelyo bilang oportunidad sa pagtudlo kag pagtuon parte kay Jesucristo.

Ang tagsa ka kasuguan nagahatag man sini nga oportunidad. Indi lang magtutok sa mga layi sang ebanghelyo—tun-i man ang parte sa Manughatag sang Layi. Kon inyo hambalan ang parte sa Pulong sang Kaalam kag mag-untat asta lang sa mga dapat kag indi dapat sa pagpangabuhi nga may ikaayong-lawas, madula sa inyo ang oportunidad sa pagbinagbinag kon daw ano kadako sang pag-ulikid ni Jesucristo para sa aton—sa pareho espiritwal kag pisikal naton nga ikaayo—para hatagan kita sining layi. Tutoki kon daw ano ang kahanda kag kaluyag sang Manluluwas nga bugayan kita sang Iya gahum para buligan kita nga mapangabuhi ang Iya mga layi. Ang tagsa ka kasuguan nga Iya ginahatag nagapahayag sang Iya panghunahuna kag pagbuot kag tagipusuon—pangitaa ang kalipay sa pagdiskubre sini sing ululupod!

Ipatalupangod ang Ehemplo ni Jesucristo

Sarang naton ibutang si Jesucristo sa sentro sang pagtudlo kag pagtuon paagi sa pagkilala kag pagtalupangod nga Sia amo ang perpekto nga ehemplo sang tanan nga mga prinsipyo sang ebanghelyo. Bilang mga disipulo, wala lamang kita nagasunod sang mga prinsipyo—ginasunod naton si Jesucristo. Kon aton tutokan ang perpekto nga ehemplo sang Manluluwas, ang Balaan nga Espiritu magapamatuod parte sa Iya kag magainspirar sa aton nga sundon Sia.

Hunahunaa sing makadali nga nagatudlo ka sang prinsipyo sang pagpadayon tubtob sa katapusan. Ang diskusyon kon paano nangin ehemplo ang Manluluwas sang pagpadayon tubtob sa katapusan mahimo nga magdala sang balatyagon sang matam-is nga pagtahod sa Iya. Ano ayhan ang matun-an kag mabatyagan sang imo mga ginatudloan sa Iya ehemplo?

Ang Manluluwas nagpahamtang sang perpekto nga halimbawa para sa aton tanan. He Healed Them All [Ginpaayo Niya Sila Tanan], ni Michael Malm

Magtudlo parte sa mga Titulo, mga Papel, kag mga Kinaiya ni Jesucristo

Si Jesucristo may madamo nga mga titulo sa balaan nga mga kasulatan. Ang kada isa nagapakita sang isa sang Iya mga papel sa plano sang Dios kag nagatudlo sa aton parte sa Iya diosnon nga mga kinaiya. Basi pwede mo pamensaron ang pagtalakay upod sa mga manugtuon kon ano ang ginatudlo sang mga titulo pareho sang Cordero sang Dios, Mananabang, Manughimpit sang Aton Pagtuo, kag Kasanag sang Kalibutan parte kay Jesucristo. Dugang diri, samtang imo ginabuligan ang mga manugtuon nga mas makilala pa gid ang Manluluwas, magluwas sa Iya ginpanghambal kag ginhimo, tun-i man kon sin-o Sia kag ano nga mga papel ang gusto Niya tungdan sa aton mga kabuhi. Samtang inyo ginatun-an sing ululupod ang karakter kag mga kinaiya sang Manluluwas, ang Balaan nga Espiritu magapasangkad sang inyo pag-intiendi kag pagpalangga sa Iya.

Magpangita sang mga Simbolo nga Nagapamatuod kay Jesucristo

“Ang tanan nga butang,” siling sang Ginuo, “gintuga kag ginhimo agud magsaksi sa akon” (Moises 6:63; tan-awa man sa 2 Nefi 11:4). Nga ginatandaan ina nga kamatuoran, matun-an naton nga tukibon ang kadamuon sang mga simbolo sa balaan nga mga kasulatan nga nagapamatuod parte sa Manluluwas. Ining mga simbolo nagalakip sang mga bagay pareho sang tinapay, tubig, kag suga. Sa tion nga maintiendihan naton kon paano ginapaanggid ining mga bagay sa Manluluwas, matudloan kita sang mga ini parte sa Iya gahum kag mga kinaiya. Makakita ka man gani sang mga pagpulopalareho sa kabuhi sang Manluluwas sa mga kabuhi sang mga propeta kag iban pa nga matinuohon nga mga lalaki kag babayi sa balaan nga mga kasulatan. Ang pagpangita sang mga simbolo nagapahayag sang mga kamatuoran parte sa Manluluwas sa mga lugar nga mahimo indi mo mapensaran.