Magtudlo paagi sa Espiritu

Sang ginsugo sang Manluluwas si Joseph Smith kag Sidney Rigdon nga iwali ang Iya ebanghelyo, Iya ginpromisa sa ila, “Igapadala ang Balaan nga Espiritu sa pagpamatuod sang tanan nga butang nga inyo ihambal” (Doktrina kag mga Kasugtanan 100:8; tan-awa man sa Doktrina kag mga Kasugtanan 42:15–17; 50:17–22). Ang pareho man nga promisa magamit sa tanan nga nagatudlo sang ebanghelyo, lakip na sa imo. Samtang nagatudlo ka sang ebanghelyo ni Jesucristo, sarang mo nga mangin kaupod ang Balaan nga Espiritu sa paggiya sa imo kag sa pagpamatuod sang kamatuoran sa mga hunahuna kag tagipusuon sang imo mga ginatudloan (tan-awa sa Doktrina kag mga Kasugtanan 8:2). Wala ka nagaisahanon kon ikaw nagatudlo, “kay ang mga pulong nga [imo] igahambal indi [imo], kundi magahalin sa Espiritu Santo” (Marcos 13:11).

Ang Balaan nga Espiritu amo ang matuod nga manunudlo. Wala sang mortal nga manunudlo, bisan ano pa kasagad ukon kaeksperiyensyado, nga makabulos sa Iya papel sang pagsaksi sa kamatuoran, pagpamatuod parte kay Cristo, kag pagbag-o sang mga tagipusuon. Pero ang tanan nga manunudlo mahimo nga mangin mga instrumento sa pagbulig sa mga anak sang Dios nga magtuon paagi sa Espiritu.

Para Magtudlo paagi sa Espiritu

• Ihanda ang imo kaugalingon sa espirituhanon.

• Mangin handa pirme sa pag-akto sa espirituhanon nga mga pagpabatyag parte sa mga panginahanglan sang mga nagatuon.

• Maghimo sang kapalibotan kag mga oportunidad para sa mga nagatuon nga matudloan sang Balaan nga Espiritu.

• Buligi ang mga nagatuon nga maghandum, makakilala, kag mag-akto sa personal nga rebelasyon.

• Masami nga magpaambit sang testimonya, kag agdaha ang mga nagatuon nga iistorya ang ila mga nabatyagan, mga eksperiyensya, kag mga testimonya.

Ang Manluluwas Naghanda sang Iya Kaugalingon sa Espirituhanon para Magtudlo

Para maghanda sa Iya misyon, ang Manluluwas nagtiner sang 40 ka adlaw sa kamingawan “agud makaupod ang Dios” (Joseph Smith Translation, Matthew 4:1). Pero ang Iya espirituhanon nga preparasyon madugay na nga nagsugod. Sang gintentar Sia ni Satanas, nagkuha Sia sang kusog halin sa “mga pulong sang kabuhi” nga Iya gin-amligan tubtob sa “husto nga tion” nga kinahanglanon Niya ini (Doktrina kag mga Kasugtanan 84:85). Hunahunaa ang imo kaugalingon nga mga pagpaninguha nga ihanda ang imo kaugalingon sa espirituhanon para magtudlo. Ano ang imo matun-an sa Mateo 4:1–11 parte sa kon paano mo mahimo sundon ang ehemplo sang Manluluwas sa imo espirituhanon nga preparasyon?

Ang Espiritu amo ang matuod nga manunudlo kag ang matuod nga ginhalinan sang pagbag-o. Ang mabaskog nga pagpanudlo sang ebanghelyo wala lamang nagapangayo sang paghanda sang leksyon kundi sang paghanda man sang imo kaugalingon sa espirituhanon antes ka pa magsugod sa pagtudlo. Kon handa ka sa espirituhanon, mas mabatian mo kag masunod ang giya sang Espiritu samtang nagatudlo ka. Ang paagi sa pag-agda sang Balaan nga Espiritu sa imo pagpanudlo amo ang pag-agda sa Iya sa imo kabuhi. Nagalakip ini sang matutom nga pagtinguha nga sundon ang ehemplo sang Manluluwas kag pagpangabuhi sang Iya ebanghelyo sa bug-os mo nga tagipusuon. Kag tungod wala sa aton sang nakaperpekto sini, nagakahulugan man ini sang paghinulsol kada adlaw.

Mga Pamangkot nga Dapat Binagbinagon: Ano ang kahulugan para sa imo sang maghanda sang kaugalingon para magtudlo? Ano ang nabatyagan mo nga dapat himuon para mapauswag ang imo pamaagi sa paghanda sang imo kaugalingon sa espirituhanon? Paano ayhan makaimpluwensya ang espirituhanon nga preparasyon sa imo pagtudlo?

Halin sa Balaan nga mga Kasulatan: Esdras 7:10; Lucas 6:12; Alma 17:2–3, 9; Doktrina kag mga Kasugtanan 11:21; 42:13–14

Ang Manluluwas Pirme Handa sa Pagsabat sang mga Panginahanglan sang Iban

Si Jairo, isa ka lider sang sinagoga, nagluhod sa tiilan ni Jesus, nga nagapakitluoy sa Iya nga buligan ang iya tagumatayon nga bata nga babayi. Si Jesus kag ang Iya mga disipulo nagapanagil-ot sa tunga sang magutok nga kadalanan padulong sa balay ni Jairo sang gulpi lang nagpundo si Jesus. “Sin-o ang nagtandog sa akon?” Pamangkot Niya. Daw katingalahan nga pamangkot—sa kagutok sang tawo, sin-o ang wala nagatandog sa Iya? Pero nabatyagan sang Manluluwas nga sa sina nga kadam-an, may nagpalapit sa Iya nga may partikular nga panginahanglan kag may pagtuo nga mabaton ang pagpang-ayo nga Iya ginatanyag. May tiyempo pa para magbisita sa bata nga babayi ni Jairo. Pero ginsiling Niya anay sa babayi nga nagtandog sa Iya bayo, “Anak, ang imo pagtuo nag-ayo sa imo; lakat sa paghidaet” (tan-awa sa Lucas 8:41–48).

Bilang titser, mahimo nga kon kaisa matalupangdan mo ang imo kaugalingon nga nagadali-dali para masakop ang butang nga ginhandaan mo nga itudlo. Mahimo nga importante ina, pero siguroha nga sa imo pagdali, indi mo paglabyan lang ang mas importante nga panginahanglan sang tawo nga imo ginatudloan. Dugang pa sa espirituhanon nga giya nga imo ginpangayo samtang ikaw nagahanda sa pagtudlo, pangayua man ang giya sang Espiritu samtang nagatudlo ka. Tinguhai nga hibaluon ang mga panginahanglan, mga pamangkot, kag interes sang mga nagatuon. Ang Balaan nga Espiritu makabulig sa imo nga mabatyagan kon ang nagatuon nagabaton ukon nakaintiendi sang imo ginatudlo. Ipabatyag Niya sa imo, kon kaisa, nga islan ang imo mga plano. Halimbawa, mahimo nga mabatyagan mo nga hatagan sang dugang nga tiyempo ang isa ka topiko sangsa imo ginplano ukon ipaiway ang pila ka talakayon pabor sa butang nga mas importante para sa mga nagatuon subong.

Mga Pamangkot nga Dapat Binagbinagon: Sang san-o ka nakabatyag nga ang isa ka ginikanan ukon iban nga titser nakahibalo sang imo mga panginahanglan bilang manugtuon? Nakahibalo bala ang imo mga ginatudloan nga mas interesado ka sa ila pagtuon sangsa tapuson ang leksyon? Paano mo mas mapahayag ang imo interes?

Halin sa Balaan nga mga Kasulatan: 1 Pedro 3:15; Alma 32:1–9; 40:1; 41:1; 42:1

Ang Manluluwas Naghatag sang Mga Oportunidad sa mga Tawo Para Matudloan sang Balaan nga Espiritu

Mabudlay para sa madamo nga tawo sang tiyempo ni Jesus nga maintiendihan kon sin-o gid Sia, pero kadamo sang mga opinyon. “Ang iban nagasiling si Juan Bautista,” siling sang Iya mga disipulo, “ang iban nagasiling si Elias, kag ang iban si Jeremias ukon isa sang mga [propeta].” Pero may ginpamangkot si Jesus nga nag-agda sa Iya mga disipulo nga ipahigad ang mga opinyon sang iban kag binagbinagon sa ila kaugalingon nga mga tagipusuon: “[Pero] sin-o bala ako sa inyo?” Gusto Niya nga pangitaon nila ang ila sabat indi halin sa “unod kag dugo” kundi direkta halin sa “akon Amay nga yara sa langit.” Amo ini ang klase sang pamatuod—personal nga rebelasyon halin sa Balaan nga Espiritu—nga nagbulig kay Pedro nga magsiling, “Ikaw ang Cristo, ang Anak sang Dios nga buhi” (tan-awa sa Mateo 16:13–17).

Para makalampuwas sa espirituhanon sa ulihing mga adlaw, ang mga tawo nga imo ginatudloan nagakinahanglan sang espirituhanon nga saksi sang kamatuoran. Indi mo ini mahatag sa ila, pero mahimo mo sila nga agdahon, papagsikon, padasigon, kag tudloan nga pangitaon ini. Mahimo mo mapaathag—paagi sa imo mga pulong kag aksyon—kon daw ano kaimportante ang Balaan nga Espiritu sa pagtuon sang ebanghelyo. Pamensara, halimbawa, ang kahimtangan sa pagtuon nga imo ginapahamtang kag ginapatigayon. Ang simple nga pagplastar sang mga pulungkuan sa kuwarto ukon ang imo pagbugno kag pagpakigsimpon sa mga nagatuon nagapahamtang sang espirituhanon nga kapalibotan para sa mangin eksperiyensya sang mga nagatuon. Pwede mo man agdahon ang mga nagatuon nga ihanda ang ila mga kaugalingon sa espirituhanon para magtuon, pareho nga nagapreparar ka sa espirituhanon para magtudlo. Pangabaya sila nga mangin responsable para sa panimuot nga ila dalhon. Kag pwede ka man maghatag sang mga oportunidad para ila mabatyagan ang Espiritu nga nagasaksi parte kay Jesucristo kag sa Iya ebanghelyo. Ina nga saksi mangin “bato” para sa ila, “kag ang mga gahum sang kamatayon indi [makadaog] sa [ila]” (Mateo 16:18).

Mga Pamangkot nga Dapat Binagbinagon: Ano ang naobserbahan mo nga nagabulig sa pagpahamtang sang espirituhanon nga kapalibotan para sa pagtuon sang ebanghelyo? Ano ang nagapugong sini? Ano ang nagabulig sa mga tawo nga imo ginatudloan nga magtuon halin sa Espiritu? Hunahunaa ang palibot kon diin ka masami nagatudlo. Ano ang imo mabatyagan kon ato ka didto? Paano mo mas maagda ang Espiritu nga magtiner didto?

Halin sa Balaan nga mga Kasulatan: Lucas 24:31–32; Juan 14:26; 16:13–15; Moroni 10:4–5; Doktrina kag mga Kasugtanan 42:16–17; 50:13–24

Sa aton pagtudlo, sarang naton agdahon ang mga nagatuon nga pangitaon ang ila kaugalingon nga espirituhanon nga saksi parte sa kamatuoran.

Ang Manluluwas Nagbulig sa Iban nga Maghandum, Makakilala, kag Mag-akto sa Personal nga Rebelasyon

Ang Ginuo gusto nga makig-angot sa aton—kag gusto Niya nga mahibal-an naton nga nagapakig-angot Sia sa aton. Sang 1829, ang 22-anyos nga maestro nga ang ngalan Oliver Cowdery nagatuon parte sa maisog, makakulunyag nga doktrina nga ang bisan sin-o sarang makabaton sang personal nga rebelasyon. Pero may mga pamangkot sia nga pareho sa ginpamangkot sang madamo sa aton: “Matuod bala nga nagatinguha ang Ginuo nga makighambal sa akon? Kag paano ko mahibal-an kon ano ang Iya ginahambal?” Para masabat ining mga pamangkot, gin-agda ni Jesucristo si Oliver nga panumdumon ang isa ka pribado nga tion sang espirituhanon nga pag-usisa. “Wala bala ako naghambal sang paghidaet sa imo panghunahuna?” Pamangkot Niya (tan-awa sa Doktrina kag mga Kasugtanan 6:21–24). Sang ulihi, gintudloan Niya si Oliver parte sa iban nga mga paagi kon paano ang Espiritu maghambal sa iya (tan-awa sa Doktrina kag mga Kasugtanan 8:2–3; 9:7–9; tan-awa man sa Doktrina kag mga Kasugtanan 11:12–14).

Kay nagapuyo sa kalibutan nga masami wala nagasapak sang espirituhanon nga mga butang, kita tanan nagakinahanglan sang bulig para makilala ang tingug sang Espiritu. Mahimo nga nabatyagan na naton ang Espiritu nga wala naton natalupangdi. Kag tanan kita makatuon pa gid kon paano pangitaon ang Espiritu, kilalahon ang Iya impluwensya, kag aktuhan ang mga pagpabatyag nga Iya ginahatag sa aton. Samtang nagatudlo ka, buligi ang mga nagatuon nga diskubrehon ang mga paagi nga nagapakig-angot ang Espiritu—kag kon paano Sia nagapakig-angot sa ila. Isa sa pinakadako nga regalo nga mahatag mo bilang titser amo ang buligan ang imo mga ginatudloan nga magprogreso sa sining bilog-kabuhi nga pagpangita sang personal nga rebelasyon.

Mga Pamangkot nga Dapat Binagbinagon: Ngaa importante nga tun-an kon paano magbaton sang personal nga rebelasyon? May nagbulig na bala sa imo nga maintiendihan kon paano magpangita kag makilala ang rebelasyon? Paano mo paisugon ang imo mga ginatudloan nga maghandum, kilalahon, kag aktuhan ang rebelasyon halin sa Balaan nga Espiritu?

Halin sa Balaan nga mga Kasulatan: Mga Taga-Galacia 5:22–23; Alma 5:45–47; Doktrina kag mga Kasugtanan 42:61; 121:33; Joseph Smith—Kasaysayan 1:8–20

Ang Manluluwas Nagpamatuod sa Iya Mga Ginatudloan

Sa isa ka makatalandog nga tion sang pagtudlo kag pag-alagad, gintinguhaan ni Jesus nga lugpayan ang Iya abyan nga si Marta, nga ang utod napatay. Ginpaambit Niya sa iya ang simple nga testimonya sang wala katapusan nga kamatuoran: “Ang imo utod mabanhaw” (Juan 11:23). Ang iya panaksihon nagtulod kay Marta nga maghambal sang iya kaugalingon nga testimonya: “Nakahibalo ako nga mabanhaw sia sa pagkabanhaw sa katapusan nga adlaw” (Juan 11:24). Tandai kon paano nasulit ining gawi sa Juan 11:25–27. Ano ang nanamian mo sa ehemplo sang Manluluwas? Ngaa ang pagpaambit sang testimonya parte sa mga kamatuoran sang ebanghelyo importante nga bahin sang pagpanudlo?

Ang imo testimonya mahimo nga may mabaskog nga impluwensya sa imo mga ginatudloan. Indi ini kinahanglan nga matahum ukon malaba. Kag indi sini kinahanglan nga magsugod sa “Gusto ko nga magpaambit sang akon testimonya.” Ihambal lang ang nahibal-an mo paagi sa gahum sang Balaan nga Espiritu. Ang testimonya sang kamatuoran pinakamabaskog kon direkta ini kag hugot sa balatyagon. Magpaambit pirme sang testimonya parte sa Manluluwas, sa Iya ebanghelyo, kag sa Iya gahum sa imo kabuhi, kag paisoga ang imo mga ginatudloan nga himuon man ini. Kag tandai nga kon kaisa ang pinakamabaskog nga saksi ginapaambit indi sang manunudlo kundi sang kapareho nga nagatuon.

Mga Pamangkot nga Dapat Binagbinagon: Magpangita sang mga halimbawa sa balaan nga mga kasulatan nga nagapakita sang gamhanan nga impluwensya sang isa ka tawo nga nagapaambit sang testimonya. Ano ang imo natun-an sa sining mga halimbawa? Sang san-o ka nabugayan tungod sang testimonya sang isa ka tawo? Paano ang pagpaambit sang imo testimonya nakaimpluwensya sa imo mga ginatudloan? Paano ini nakaimpluwensya sa imo?

Halin sa Balaan nga mga Kasulatan: Mga Binuhatan 2:32–38; Mosias 5:1–3; Alma 5:45–48; 18:24–42; 22:12–18; Doktrina kag mga Kasugtanan 46:13–14; 62:3

Pila ka Pamaagi sa Paggamit sang Imo Natun-an

• Pangabaya ang mga nagatuon nga iistorya kon ano ang gintudlo sang Balaan nga Espiritu sa ila samtang ila ginatun-an ang pulong sang Dios.

• Maghanda antes pa ngadaan sa pagbaton sang espirituhanon nga mga pagpabatyag samtang nagatudlo.

• Isulat ang espirituhanon nga mga paghangop nga nagaabot samtang nagapreparar ka.

• Maghatag sang panalagsa nga oportunidad para malinong nga mabinagbinag sang mga miyembro sang klase kon ano ang ginatudlo sang Espiritu sa ila.

• Maggamit sang sagrado nga musika kag mga litrato para agdahon ang impluwensya sang Espiritu.

• Magpamati sa mga pagpabatyag samtang nagaplano ka kag nagatudlo, kag mangin handa sa pagbagay sang imo mga plano.

• Hatagi sang mga oportunidad ang tanan nga mga nagatuon nga magpaambit sang testimonya sang kon ano nga ila ginatun-an.

• Buligi ang iban nga mahibal-an kon ara ang Espiritu.

• Ipangabuhi ang mga kamatuoran nga imo ginatudlo para makapamatuod ka parte sa mga ini.

• Sunda ang mga pagpabatyag nga magtudlo sa wala ginplano, indi pormal nga mga tinion.