Itudlo ang Doktrina

Bisan pa nga si Jesus nagdako sa kaalam kag ihibalo sa bilog Niya nga kabuhi, wala Sia sing pormal nga edukasyon pareho sang iban nga mga lider sang relihiyon sang Iya panahon. Pero kon magtudlo Sia, nagakatingala ang mga tawo, nga nagasiling, “Paano bala nga nakahibalo ining tawo sang kaalam, nga wala gid sia makatuon?” Ngaa kabaskog kaayo sang Iya mga pinanudlo? “Ang akon pagtulon-an indi akon,” paathag sang Manluluwas, “kundi iya sang nagpadala sa akon” (Juan 7:15–16). Ang doktrina wala katapusan nga kamatuoran— sa balaan nga mga kasulatan kag sa mga pulong sang mga propeta sa ulihing mga adlaw—nga nagapakita sa aton sang paagi nga mangin pareho sa aton Amay sa Langit kag magbalik sa Iya. Bisan ano ang imo eksperiyensya bilang manunudlo, mahimo ka magtudlo nga may gahum, pareho sa ginhimo sang Manluluwas, paagi sa pagtudlo sang doktrina sang Amay. Ikaw kag ang imo mga ginatudloan makadayaw sa mga bugay nga ginapadala sang Dios kon ang imo pagpanudlo kag pagtuon napasad sa Iya pulong.

Sa Pagtudlo sang Doktrina

• Tun-i mismo ang doktrina ni Jesucristo.

• Magtudlo halin sa balaan nga mga kasulatan kag sa mga pulong sang mga propeta sa ulihing mga adlaw.

• Buligi ang mga nagatuon nga maghandum, makakilala, kag maintiendihan ang mga kamatuoran sa balaan nga mga kasulatan.

• Tutoki ang mga kamatuoran nga nagadala sang pagbag-o kag nagapatubo sang pagtuo kay Jesucristo.

• Buligi ang mga nagatuon nga makita ang personal nga kapuslanan sang doktrina ni Jesucristo.

Ang Manluluwas Nagtuon sang Doktrina

Daw maathag nga ang Manluluwas nakatuon halin sa balaan nga mga kasulatan sa Iya pagkalamharon samtang nagdugang Sia “sa kaalam … kag nahamut-an sang Dios” (Lucas 2:52). Ang Iya madalom nga pag-intiendi sang doktrina sang Amay nangin maathag sang makita Sia sang Iya mga gininakan sa templo sang bata pa, nga nagatudlo sa Judio nga mga manunudlo kag nagasabat sang ila mga pamangkot (tan-awa sa Joseph Smith Translation, Luke 2:46 ). Sang ulihi, sang nagpresentar si Satanas sa iya sang mabudlay nga tentasyon sa kamingawan, ang ihibalo ni Jesus parte sa doktrina sa balaan nga mga kasulatan nakabulig sa Iya nga mapakigbatuan ang tentasyon (tan-awa sa Lucas 4:3–12).

Mahimo mo man matun-an ang matuod nga doktrina sing mas madalom antes mo ini itudlo. Samtang nagahanda ka sa pagtudlo kag sa pagtuon upod sa iban, tan-awa sing maid-id kon ano ang ginsiling sang Ginuo parte sa mga kamatuoran nga imo ginatudlo. Usisaa ang balaan nga mga kasulatan kag ang mga pulong sang buhi nga mga propeta para sa paathag kag laygay. Ang pagpangabuhi kag pagdapat sang mga kamatuoran nga imo ginatun-an makaimbitar sang Espiritu sa pagtudlo sa imo sang doktrina sa mas madalom nga paagi kag sa pagkumpirma sang kamatuoran sang doktrina sa mga tagipusuon sang imo mga ginatudloan.

Mga Pamangkot nga Dapat Binagbinagon: Ngaa importante nga maintiendihan mo mismo ang mga kamatuoran sang ebanghelyo? Paano ka nakaangkon sang mas madalom nga pag-intiendi sang mga kamatuoran sang ebanghelyo? Ano ang nabatyagan mo nga dapat himuon para mapauswag ang imo pagtuon sang balaan nga mga kasulatan kag sang mga pulong sang buhi nga mga propeta?

Halin sa Balaan nga mga Kasulatan: Mga Hulubaton 7:1–3; 2 Nefi 4:15–16; Doktrina kag mga Kasugtanan 11:21; 88:118

Ang Manluluwas Nagtudlo halin sa Balaan nga mga Kasulatan

Pagkatapos sang kamatayon sang Manluluwas, duha sa Iya mga disipulo ang nagalakat kag nagaistoryahanay nga nagasakot ang kasubo kag katingala sa ila mga tagipusuon. Paano nila intiendihon ang bag-o lang natabo? Si Jesus sang Nazaret, ang tawo nga ila ginsaligan nga mangin ila Manunubos, tatlo ka adlaw na karon nga patay. Kag dayon may mga ginbalita nga ang Iya lulubngan wala sing unod, nga may mga anghel nga nagadeklarar nga Sia buhi! Sa sining importante nga punto sang pagtuo sining mga disipulo, isa ka estranghero ang nagdungan sa ila pagpanglakaton. Ginpaumpawan Niya sila paagi sa “[pagtalastas] sa ila sa bug-os nga mga kasulatan sang mga butang nahanungod [sa Manluluwas].” Sang ulihi, narealisar sang mga nagapanglakaton nga ang ila manunudlo amo si Jesucristo Mismo kag matuod gid Sia nga nabanhaw. Paano nila Sia nakilala? “Wala bala nagdabdab ang aton mga tagipusuon sa sulod naton,” ginpanumdom nila sang ulihi, “sang nagpamulong sia sa aton sa dalan, sang nagtalastas sia sa aton sang mga kasulatan?” (Lucas 24:27, 32).

Si Elder D. Todd Christofferson nagtudlo, “Ang mayor nga katuyuan sang tanan nga balaan nga kasulatan amo nga pun-on ang aton mga kalag sang pagtuo sa Dios nga Amay kag sa Iya Anak, nga si Jesucristo” (“The Blessing of Scripture,” Liahona, Mayo 2010, 34). Sa bilog Niya nga pag-alagad, gingamit ni Jesus ang balaan nga mga kasulatan sa pagtudlo, pagtadlong, kag pag-inspirar sa iban. Siguroha nga ang imo pagpanudlo wala nagapalayo sa balaan nga mga kasulatan kag sa mga pulong sang mga propeta. Samtang matinuohon ka nga nagasalig sa pulong sang Dios sa imo pagpanudlo, mahimo mo para sa iban ang ginhimo sang Manluluwas. Mabuligan mo sila nga makilala Sia, kay tanan kita nagakinahanglan sang regular nga pagpabakod sang aton pagtuo sa Manluluwas. Ang imo pagpalangga sa balaan nga mga kasulatan mangin maathag sa imo mga ginatudloan, kag ang imo pagpanudlo magaimbitar sang Espiritu kag magpadabdab sang ila tagipusuon nga may testimonya parte sa Amay kag sa Anak.

Mga Pamangkot nga Dapat Binagbinagon: Paano ka naimpluwensyahan sang manunudlo nga naggamit sang balaan nga mga kasulatan para buligan ka nga mas makilala ang Manluluwas? Ano ang pwede mo himuon para mas magsalig sa balaan nga mga kasulatan kag sa mga pulong sang mga propeta sa imo pagtudlo? Paano mo buligan ang imo mga ginatudloan nga hibaluon kag palanggaon ang pulong sang Dios?

Halin sa Balaan nga mga Kasulatan: Lucas 4:14–21; Alma 31:5; Helaman 3:29–30; 3 Nefi 23

Ang Manluluwas Nagbulig sa Mga Tawo nga Magpangita, Makilala, kag Maintiendihan ang Kamatuoran

Isa ka abogado sadto ang namangkot kay Jesus, “Manunudlo, ano bala ang himuon ko sa pagpanubli sang kabuhi nga walay katapusan?” Bilang sabat, gintudlo sang Manluluwas ang nagapamangkot sa balaan nga mga kasulatan: “Ano bala ang nasulat sa kasugoan? Paano bala ang pagbasa mo?” Gingiyahan sini ang tawo indi lang padulong sa iya sabat nga—“Higugmaa ang Ginuo nga imo Dios … kag ang imo isigkatawo”—kundi sa masunod nga pamangkot: “Kag sin-o bala ang akon isigkatawo?” Ginsabat sang Manluluwas ining pamangkot paagi sa isa ka paanggid parte sa tatlo ka lalaki nga nakakita sang isigkabiyahero nga nagakinahanglan sang bulig. Isa lang sa tatlo, ang Samariahanon, nga ginakaugtan sang mga Judio tungod lamang sa iya ginhalinan, ang nagpundo para magbulig. Dayon ginhagad ni Jesus ini nga abogado nga sabton ang iya mismo pamangkot: “Sin-o bala sining tatlo, sa hunahuna mo, ang nangin-isigkatawo sa [iya]?” (tan-awa sa Lucas 10:25–37).

Ngaa sa banta mo nga nagtudlo ang Manluluwas sa sini nga paagi—nga ginasabat ang mga pamangkot paagi sa pag-imbitar nga magpangita, magbinagbinag, kag magdiskubre? Kabahin sang sabat amo nga ang Ginuo nagahatag-bili sa pagpaninguha nga magpangita sang kamatuoran. “Pangita, kag kamo makakita,” ang Iya sulit-sulit nga imbitasyon (tan-awa halimbawa, sa Mateo 7:7; Lucas 11:9; Doktrina kag mga Kasugtanan 4:7). Ginapadyaan Niya ang mga buhat sang pagtuo kag pasensya sang nagapangita.

Pareho sa Manluluwas, mahimo mo buligan ang imo mga ginatudloan nga makilala kag maintiendihan ang kamatuoran. Ang balaan nga mga kasulatan, halimbawa, puno sang mga kamatuoran sang ebanghelyo, pero kon kaisa kinahanglan sang hungod nga pagpaninguha nga pangitaon ang mga ini. Samtang kamo nagatuon sing ululupod sang balaan nga mga kasulatan, magdulog kag pamangkuta ang imo mga ginatudloan kon ano nga mga kamatuoran sang ebanghelyo ang ila natalupangdan. Buligi sila nga makita kon paano maangot ining mga kamatuoran sa plano sang kaluwasan sang Amay nga Langitnon. Kon kaisa ang wala katapusan nga mga kamatuoran ginamitlang sa balaan nga mga kasulatan, kag kon kaisa ginapakita ang mga ini sa mga istorya kag kabuhi sang mga tawo sa aton ginabasa. Mahimo nga makabulig nga tun-an sing ululupod ang kasaysayan sang mga bersikulo nga inyo ginabasa, amo man ang kahulugan sang mga bersikulo kag kon paano naton ini magamit sa karon nga panahon.

Mga Pamangkot nga Dapat Binagbinagon Paano mo makilala ang wala katapusan nga mga kamatuoran sa balaan nga mga kasulatan ukon sa mga pulong sang mga propeta.? Paano ginabugayan sining mga kamatuoran ang imo kabuhi? Ano ang pila sa mga paagi nga mabuligan mo ang mga nagatuon nga makilala kag maintiendihan ang mga kamatuoran nga mangin makahulugan para sa ila kag mas magalapit sa ila sa Dios?

Halin sa Balaan nga mga Kasulatan: Juan 5:39; 1 Nefi 15:14; Doktrina kag mga Kasugtanan 42:12

Sarang naton mabuligan ang aton mga ginatudloan nga makita kag makilala ang kamatuoran para sa ila kaugalingon.

Ang Manluluwas Nagtudlo sang mga Kamatuoran nga Nagadala sang Pagbag-o kag Nagapatubo sang Pagtuo

Isa ka Adlaw nga Inugpahuway, ang Manluluwas kag ang Iya mga disipulo, nga ginagutom, naglabay sa isa ka talamnan kag nagsugod sa pagkaon sang uyas (grain). Ang mga Fariseo, nga gusto gid pirme ipatalupangod ang magagmay nga mga punto sang layi ni Moises, nag-insister nga ang pagpanipon sang uyas kon tuod-tuoron isa ka sahi sang trabaho, nga ginadilian kon Adlaw nga Inugpahuway (tan-awa sa Marcos 2:23–24). Kon gamiton ang tinaga sang propeta sa Libro ni Mormon nga si Jacob, ang mga Fariseo “[nagatulok] sa unhan sang tanda” (Jacob 4:14). Sa iban nga pulong, natam-an sila sa pagtutok sa tradisyunal nga interpretasyon sang mga kasuguan nga nalimtan na nila ang diosnon nga katuyuan sadtong mga kasuguan—nga amo ang ilapit kita sa Dios. Ang matuod, wala gani marealisar sang mga Fariseo nga ang Isa nga naghatag sang kasuguan nga tahuron ang Adlaw nga Inugpahuway nagatindog mismo sa ila atubang.

Gingamit sang Manluluwas ining oportunidad nga magpamatuod sang Iya diosnon nga pagkatawo kag sa pagtudlo kon ngaa importante ang Adlaw nga Inugpahuway. Ginhimo ini para sa aton bilang adlaw sa pagsimba sa Ginuo sang Adlaw nga Inugpahuway, nga amo si Jesucristo Mismo (tan-awa sa Marcos 2:27–28). Ining mga kamatuoran nagabulig sa aton nga maintiendihan nga ang mga kasuguan sang Dios masobra pa sangsa panggwa naton nga pangginawi. Gintuyo ang mga ini para buligan kita nga bag-uhon ang aton mga tagipusuon kag mangin mas lubos ang pagbag-o.

Pamensara sing mahinalungon ang doktrina kag mga prinsipyo nga ginpili mo nga tutokan. Bisan madamo ang mga kamatuoran sa balaan nga mga kasulatan nga pwede hambalan, pinakamaayo gid kon tutokan ang mga kamatuoran sang ebanghelyo nga nagadala sang pagbag-o kag nagapatubo sang pagtuo kay Jesucristo. Ang simple, tig-una nga mga kamatuoran nga gintudlo kag ginpakita sang Manluluwas bilang ehemplo may pinakadako nga gahum sa pagbag-o sang aton mga kabuhi—kamatuoran parte sa Iya Pagbayad-Sala, ang plano sang kaluwasan, ang mga kasuguan nga palanggaon ang Dios kag palanggaon ang aton isigkatawo, kag madamo pa. Agdaha ang Espiritu sa pagpamatuod parte sining mga kamatuoran, nga ginabuligan nga magpanggamot ang mga ini sa mga tagipusuon sang imo mga ginatudloan.

Mga Pamangkot nga Dapat Binagbinagon: Ano ang pila sa mga kamatuoran sang ebangelyo nga nakabulig sa imo nga mas mahaylo kay Jesucristo kag magpatubo sang mas dako nga pagtuo sa Iya? Paano nakabulig sa imo ang isa ka titser nga magtutok sa pinakakinahanglanon nga mga kamatuoran sang ebanghelyo? Ano ang pwede mo itudlo nga makabulig sa iban nga mas lubos nga mahaylo kay Jesucristo?

Halin sa Balaan nga mga Kasulatan: 2 Nefi 25:26; 3 Nefi 11:34–41; Doktrina kag mga Kasugtanan 19:31–32; 68:25–28; 133:57; Moises 6:57–62

Ang Manluluwas Nagbulig sa mga Tawo nga Makakita sang Personal nga Koneksyon sa Iya Doktrina

“Ining tawo nagabaton sang mga makasasala kag nagakaon upod sa ila,” reklamo sang mga Fariseo parte kay Jesus—nga nagapahangop nga indi ini nagakabagay nga pangginawi sa isa ka espirituhanon nga manunudlo (Lucas 15:2). Ginkabig ini ni Jesus nga isa ka oportunidad sa pagtudlo sa ila sang dalagko nga espirituhanon nga mga kamatuoran. Paano Niya ini himuon? Paano Niya buligan ang mga Fariseo nga makita nga ang ila mga tagipusuon—indi ang Iya—indi matinlo kag nagakinahanglan sang pag-ayo? Paano Niya gamiton ang Iya doktrina para ipakita sa ila nga ang ila panghunahuna kag pamatasan kinahanglan nga magbag-o?

Ginhimo Niya ini paagi sa pag-istorya sa ila parte sa karnero nga naggwa sa panong kag parte sa sinsilyo nga nadula. Nag-istorya Sia parte sa salawayon nga anak nga lalaki nga nagpangayo sang kapatawaran kag sang magulang nga namalibad sa pagbaton ukon pagkaon upod sa iya. Ang tagsa sining mga paanggid nagaunod sang mga kamatuoran nga magamit sa kon paano ginakabig sang mga Fariseo ang iban, nga nagatudlo sa ila nga ang tagsa ka kalag may dako nga bili (tan-awa sa Lucas 15). Wala naghambal ang Manluluwas sa mga Fariseo—ukon sa bisan kay sin-o sa aton—kon sin-o ang kapareho sa Iya mga paanggid. Kon kaisa kita ang nagakabalaka nga amay. Kon kaisa kita ang mahisa nga utod nga lalaki. Masami kita ang nadula nga karnero ukon ang buang-buang nga anak. Pero bisan ano ang aton mga sirkumstansya, paagi sa Iya mga paanggid, ginahagad kita sang Manluluwas nga pangitaon ang kahulugan sa Iya mga pinanudlo—nga diskubrehon kon ano ang gusto Niya nga aton tun-an kag kon ano ang mahimo naton bag-uhon sa aton mga pamensaron kag pangginawi.

Mahimo nga natalupangdan mo nga may pila ka mga manugtuon nga wala makakita kon ngaa ang pila ka kamatuoran may kahulugan para sa ila. Samtang imo ginapamensar ang mga panginahanglan sang imo mga ginatudloan, hunahunaa kon paano ang mga kamatuoran mangin makahulugan kag mapuslanon sa ila mga sirkumstansya. Isa ka paagi nga mabuligan mo ang mga nagatuon nga makita ang koneksyon sang mga kamatuoran nga ila madiskubrehan amo ang pagpamangkot pareho sang “Paano ini makabulig sa imo sa butang nga imo ginaeksperiyensyahan karon?” “Ngaa importante sa imo nga mahibal-an ini?” “Ano ang kinalain nga mahimo sini sa imo kabuhi?” Pamatii ang imo mga ginatudloan. Tugti sila sa pagpamangkot. Paisoga sila nga maghimo sang mga koneksyon sa tunga sang mga pinanudlo sang Manluluwas kag sa ila kaugalingon nga mga kabuhi. Mahimo mo man iistorya kon paano mo nakita ang koneksyon sang imo ginatudlo sa imo kaugalingon nga kabuhi. Ang paghimo sini mahimo nga makaimbitar sang Espiritu sa pagtudlo sa mga nagatuon sing tag-isaisa kon paano ang doktrina makahimo sang kinalain sa ila mga kabuhi.

Mga Pamangkot nga Dapat Binagbinagon: Ano ang nagahimo sa mga kamatuoran sang ebanghelyo nga makahulugan kag mapuslanon sa imo? Ano ang nagabulig sa imo nga makakita sang personal nga kapuslanan samtang imo ginatun-an ang ebanghelyo? Ano ang imo ginahimo para tutokan ang mga kamatuoran nga mapuslanon sa imo mga ginatudloan?

Halin sa Balaan nga mga Kasulatan: 1 Nefi 19:23; 2 Nefi 32:3; Doktrina kag mga Kasugtanan 43:7–9

Pila ka Pamaagi sa Paggamit sang Imo Natun-an

• Usisaa ang imo ginatudlo para siguruhon nga nagatudlo ka sang matuod nga doktrina. Ining mga pamangkot makabulig:

  • Ang ginaplano ko bala nga itudlo nabase sa balaan nga mga kasulatan kag sa mga pulong sang buhi nga mga propeta?

  • Gintudlo bala ini sang madamo nga mga propeta? Ano ang ginatudlo sang mga lider sang Simbahan sa karon parte sini?

  • Paano sini buligan ang iban nga magpatubo sang pagtuo kay Jesucristo, maghinulsol, kag magpadayon sa dalan sang kasugtanan?

  • Nagasanto bala ini sa mga pagpabatyag sang Balaan nga Espiritu, ukon daw ginatublag ako sini sa espirituhanon?

• Tun-i adlaw-adlaw ang pulong sang Dios para magtuon sang matuodtuod nga doktrina para sa imo kaugalingon.

• Pangabaya ang mga nagatuon nga magbasa sang balaan nga mga kasulatan kag sang mga pulong sang moderno nga mga propeta samtang nagatudlo ka.

• Tudloi ang mga nagatuon kon paano gamiton ang mga footnotes, ang Guide to the Scriptures, kag iban pa nga mga manwal samtang nagatuon sila sang balaan nga mga kasulatan.

• Agdaha ang mga nagatuon nga pangitaon ang mga kamatuoran sa isa ka dinalan sa balaan nga kasulatan ukon istorya.

• Magpanaksihon kon paano mo nahibal-an ang isa ka doktrina nga matuod.

• Maggamit sang mga istorya ukon paangid para buligan ang mga nagatuon nga makaangkon sang mas madalom nga pag-intiendi sang ebanghelyo.