Դաս 23․ Ուսուցչի նյութ

Հնազանդություն Աստծո պատվիրաններին

Այս բաժինը ուսանողներին հնարավորություն կտա քննարկել, թե իրենք ինչ կարող են անել, որպեսզի ավելի մեծ վստահություն ունենան Տիրոջ հանդեպ, երբ բախվեն կյանքի մարտահրավերներին: Այս դասին ուսանողները կկարողանան բացատրել, թե Հիսուս Քրիստոսն ինչպես կատարյալ վստահություն դրսևորեց Երկնային Հոր հանդեպ` պահելով Նրա բոլոր պատվիրանները: Ուսանողները նաև կնշեն հնազանդության օրհնությունները և կքննարկեն, թե ինչպես լիովին նմանվեն Հիսուս Քրիստոսի հնազանդության օրինակին:

Ուսուցման առաջարկներ

Հիսուս Քրիստոսը հնազանդվում է Հոր կամքին բոլոր բաներում

Ցուցադրեք Հիսուս Քրիստոսի կից պատկերները կամ ցույց տվեք «Special Witness—Elder Hales» տեսաֆիլմը (2:49): Տեսաֆիլմում Տասներկու Առաքյալների Քվորումից երեց Ռոբերտ Դ. Հեյլսը քննարկում է Փրկիչի կատարյալ հնազանդությունը Երկնային Հորը: Ապա հրավիրեք ուսանողներին վերանայել 2 Նեփի 31.6–7, 10, 3 Նեփի 11.11, 27.13 հատվածները և փնտրեք, թե ինչ կարող ենք սովորել Փրկիչի հնազանդության օրինակից:

• Ի՞նչ կարող ենք սովորել հնազանդության մասին Հիսուս Քրիստոսի օրինակից։ (Ուսանողները գուցե բացահայտեն մի շարք նմանատիպ ճշմարտություններ. Խոնարհաբար ենթարկվելով Երկնային Հոր կամքին բոլոր բաներում՝ Հիսուս Քրիստոսը մեզ համար սահմանեց հնազանդության կատարյալ օրինակ:)

• Ինչո՞ւ եք կարծում, որ Հորը հնազանդվելու Հիսուս Քրիստոսի հոժարակամությունը էական էր Նրա երկրային առաքելության հաջողության համար: Ինչպե՞ս է հնազանդությունը էական այս և հաջորդ կյանքում ձեր հաջողության համար:

• Ինչպե՞ս կարող է Փրկիչի հնազանդության օրինակը ոգեշնչել ձեզ` ավելի ենթարկվող լինել Երկնային Հոր կամքին:

Որպեսզի օգնեք ուսանողներին ավելի լավ հասկանալ, թե ինչ կարող են իրականացնել իրենց սեփական հնազանդությամբ, գուցե կամենաք կիսվել Յոթանասունից երեց Վոն Գ. Քիչի հետևյալ խոսքերով.

Իսկական հնազանդությունը … մեզ ամբողջովին [Երկնային Հորը] հանձնելն է, որ Նա գծի մեր ուղին թե՛ խաղաղ, թե՛ խռովահույզ ջրերում` հասկանալով, որ Նա մեզանից կարող է ավելին կերտել, քան ինքներս երբևէ կկարողանայինք դա անել մեզ համար: …

… [Պատվիրաններն] ընդգծում են այն ուղին, որը մենք պետք է անցնենք, և որ ամենակարևորն է, դրանք պարզաբանում են մեզ, թե ով պետք է դառնանք։ («(Օրհնված ու երջանիկ են նրանք, ովքեր պահում են Աստծո պատվիրանները», Լիահոնա, նոյեմբեր 2015, 117)

• Ի՞նչ կարող եք անել դուք` Տիրոջ հնազանդության օրինակը լիովին ընդօրինակելու համար: (Օգտակար կլինի ուսանողներին ժամանակ տրամադրել՝ իրենց մտքերն ու զգացումները գրի առնելու համար:)

Հրավիրեք ուսանողներին կարդալ 1 Նեփի 2.20-21-ը և կիսվեք հետևյալ սցենարով.

Մարսելը շփոթված է Մորմոնի Գրքի խոստումից, որ նրանք, ովքեր պահում են Աստծո պատվիրանները կբարգավաճեն: Նա ջանասիրաբար պահում է պատվիրանները, բայց շատ քիչ փող ունի և ամեն ամիս դժվարությամբ է վճարում իր հաշիվները: Նա իրեն շատ բարեկեցիկ չի համարում։

Հրավիրեք ուսանողներին վերանայել իրենց սովորածը բաժին 2-ի նախապատրաստական նյութում, որը կարող է օգնել Մարսելին ընդլայնել իր հասկացողությունը այն տարբեր ուղիների վերաբերյալ, որոնցով Տերը կարող է բարգավաճեցնել և օրհնել նրանց, ովքեր պահում են Իր պատվիրանները:

• Ինչո՞վ կարող եք կիսվել Մարսելի հետ, որպեսզի օգնեք նրան ընդլայնել իր ըմբռնումը այն տարբեր ուղիների վերաբերյալ, որոնցով մենք կարող ենք բարգավաճել և օրհնվել, երբ պահում ենք Աստծո պատվիրանները:

Քննարկումը խորացնելու համար կարող եք ցուցադրել հետևյալ հատվածները և հրավիրել ուսանողներին ուսումնասիրել մեկը կամ երկուսը. 1 Նեփի 3.7, 1 Նեփի 17.3, 1 Նեփի 20.18, 1 Նեփի 22.31, Մոսիա 2.41, Ալմա 12.9–10, Ալմա 50.22–23, 3 Նեփի 14.24–25:

Երբ ուսանողներն ավարտեն իրենց ընտրած հատվածների ուսումնասիրությունը, ցուցադրեք հետևյալ անավարտ դրույթը և խնդրեք ուսանողներին կիսվել, թե ինչպես կավարտեին այն. Երբ պահեմ Աստծո պատվիրանները, …

Բարելավել մեր ուսուցումը և ուսումնասիրությունը

Բերեք վկայություն: Դիտեք «Բերել վկայություն» տեսաֆիլմը (1:57) և մտածեք, թե ինչ դեր ունի վկայությունը ձեր դասարանում: Արդյո՞ք ձեր ուսանողները կանոնավորապես ունենում են հնարավորություն վկայելու, թե ինչպես են Հիսուս Քրիստոսի ավետարանի ճշմարտություններն ազդում իրենց կյանքի վրա: Արդյո՞ք նրանք լսել և զգացել են ձեր վկայությունը Տիրոջ ավետարանի վերաբերյալ: Ուրիշ ինչպե՞ս կարող եք ստեղծել մի միջավայր, որտեղ վկայությամբ կիսվելը ուսումնառության սովորական և բնական մասն է հանդիսանում:

• Ե՞րբ եք դուք կամ ձեր ծանոթը վայելել այս հատվածներում նշված օրհնություններից որևէ մեկը՝ պահելով Աստծո պատվիրանները: (Գուցե խրախուսեք ուսանողներին կիսվել իրենց սովորածով, երբ նրանք քննարկեն այս հարցը որևէ ընկերոջ կամ ընտանիքի անդամի հետ՝ դասին նախապատարաստվելիս:)

Պատանի մարտիկները ճշգրտորեն հնազանդվում են

Ցուցադրեք կից պատկերը և հրավիրեք ուսանողներին պատմել պատանի մարտիկների պատմությունը (տես նախապատրաստական նյութի բաժին 3-ը):

Հանձնարարեք ուսանողներին վերանայել Ալմա 57.21, 27, 58.40 հատվածները և փնտրել, թե այդ հատվածներն ինչ են ուսուցանում հնազանդության մասին: Մտածեք՝ հետևյալ հարցերից որը կկամենայիք տալ, որպեսզի լավագույնս օգնեիք ձեր ուսանողներին հասկանալ, թե ինչ պետք է սովորեն պատանի մարտիկների օրինակից:

• Ի՞նչ կարող ենք սովորել հնազանդության մասին` պատանի մարտիկների փորձառությունից: (Ուսանողները կարող են նշել մի ճշմարտություն, որը նման է հետևյալին. Երբ մենք ձգտենք ճշգրտորեն հնազանդվել Աստծո պատվիրաններին և միշտ վստահենք Նրան, Նա կօրհնի մեզ:)

• Ձեր կարծիքով, ի՞նչ է նշանակում ձգտել ճշգրիտ հնազանդության: Ինչո՞վ է ճշգրիտ հնազանդությունը տարբերվում անփույթ հնազանդությունից: (Կարող եք կրկնել Նախագահ Ռասսել Մ. Նելսոնի խոսքերը նախապատրաստական նյութի բաժին 3-ում: Հիմնվելով ձեր քննարկման վրա՝ կարող եք նաև կիսվել նախագահ Նելսոնի հետևյալ խոսքերով. «Հնազանդությունը բերում է հաջողություն, ճշգրիտ հնազանդությունը բերում է հրաշքներ» [in R. Scott Lloyd, “Elder Nelson Delivers Spiritual Thanksgiving Feast to MTCs,” Church News, Dec. 4, 2013, ChurchofJesusChrist.org].)

• Ո՞ր ուսմունքին կամ պատվիրանին պետք է ճշգրտորեն հնազանդվեք: (Հրավիրեք ուսանողներին լուռ խորհել այս հարցի շուրջ և գրել ծրագիր, թե ինչ կարող են անել՝ այս փոփոխությանը հասնելու համար:)

• Ինչո՞ւ է կարևոր ապավինել Փրկիչի Քավության արտոնող զորությանը, երբ մենք ձգտում ենք ճշգրտորեն հնազանդվել Աստծո պատվիրաններին: (Կարող է օգտակար լինել կրկնել երեց Դեյվիդ Ա. Բեդնարի հայտարարությունը նախապատրաստական նյութի բաժին 3-ում։) Ե՞րբ եք զգացել, որ Փրկիչի արտոնող զորությունն օգնում է ձեզ, որպեսզի ավելի հնազանդ լինեք Աստծո պատվիրաններին:

Որպեսզի օգնեք ուսանողներին գնահատել հնազանդության մասին իրենց սովորածը, կիսվեք հետևյալ սցենարով.

Մարիան և Ֆրանչեսկոն վերջերս են նշանվել և նշանակել են ամուսնության օրը: Այժմ, երբ նրանք պարտավորվել են ամուսնանալ, նրանք ավելի անփույթ են դարձել մաքրաբարոյության օրենքը պահելիս: Նրանք արդարացված են համարում «կանոնների խախտումը», քանի որ սիրում են միմյանց և ամուսնանալու որոշում են ընդունել:

• Ելնելով Աստծո պատվիրաններին հնազանդության մասին ձեր սովորածից, ի՞նչ խորհուրդ կտայիք Մարիային ու Ֆրանչեսկոյին:

• Ինչպե՞ս կարող է ճշգրիտ հնազանդությունն օրհնել, առաջնորդել և պաշտպանել Մարիային և Ֆրանչեսկոյին, երբ նրանք պատրաստվում են իրենց մոտակա ամուսնությանը:

Հաջորդ անգամ

Նշեք, որ հաջորդ դասի ընթացքում մենք կսովորենք Լիմքիի ժողովրդի և Ալմայի ժողովրդի գերության մասին: Խրախուսեք ուսանողներին լրացնել հաջորդ դասի նախապատրաստական նյութը և փնտրել, թե այդ ժողովրդի ազատումն ինչպես հնարավոր դարձվեց միայն այն ժամանակ, երբ նրանք լիովին վստահեցին Տիրոջը: