Kapitulo 4

Ang Korum sa Unang Kapangulohan

Pasiuna

Niadtong Marso 18, 1833, ang Unang Kapangulohan pormal nga naorganisar nga si Propeta Joseph Smith ang Presidente ug si Sidney Rigdon ug Frederick G. Williams ang mga magtatambag (tan-awa sa History of the Church, 1:334; tan-awa usab sa D&P 81; 90, lakip ang mga ulohan sa seksyon). Ang nagsunod nga mga pagpadayag naghatag og dugang pang mga impormasyon mahitungod sa Unang Kapangulohan, nga naglihok karon isip ang pinakataas nga korum sa priesthood sa Simbahan nga adunay “katungod sa pagdumala sa tanan nga mga buhatan sa simbahan” (D&P 107:9; tan-awa usab sa D&P 124:126).

Ang Korum sa Unang Kapangulohan naglangkob sa Presidente ug sa kasagaran, apan dili sa kanunay, duha ka magtatambag. Ang mga magtatambag sa kasagaran, apan dili kanunay, pilion gikan sa Korum sa Napulog Duha ka mga Apostoles. Kining “tulo ka Tigdumala nga Halangdon nga mga Pari … nahimo nga usa ka korum sa Kapangulohan sa Simbahan” (D&P 107:22). Diha kanila anaa ang responsibilidad sa pagdumala sa gingharian sa Dios dinhi sa yuta (tan-awa sa D&P 90:12–16). Gihatagan og gibug-aton sa Ginoo ang kaimportante sa Unang Kapangulohan dihang mipahayag siya, “Bisan kinsa ang modawat sa akong pulong modawat kanako, ug bisan kinsa ang modawat kanako, modawat kanila, ang Unang Kapangulohan, kinsa Ako mipadala, kinsa Ako mihimo nga mga magtatambag alang ug tungod sa akong ngalan nganha kanimo” (D&P112:20).

Kini nga kapitulo makatabang sa pagpalambo sa imong kahibalo kon sa unsang paagi ang Unang Kapangulohan modumala ug modirekta sa buhat sa Ginoo dinhi sa kalibutan.

Komentaryo

4.1

Ang Kagikan sa Unang Kapangulohan sa Bag-ong Tugon nga Simbahan

Naestablisar niadtong Marso 1833, ang orihinal nga Unang Kapangulohan sa Ang Simbahan ni Jesukristo sa mga Santos sa Ulahing mga Adlaw naglakip ni Joseph Smith, Presidente (sa tunga); Sidney Rigdon, Unang Magtatambag (sa wala); ug Frederick G. Williams, Ikaduhang Magtatambag (sa tuo).

Gitudlo ni Presidente Joseph Fielding Smith (1876–1972) nga ang kagikan sa atong Korum sa Unang Kapangulohan sa ulahing adlaw makita sa organisasyon sa Simbahan ni Jesukristo sa Bag-ong Tugon:

“Ang kamatuoran nga si Pedro, Santiago, ug Juan gibulag gikan sa ubang mga apostoles ug gihatagan og espesyal nga awtoridad, mao ang kagikan sa korum sa Unang Kapangulohan sa atong panahon. Klaro gayud kaayo gikan sa nasulat nga kining tulo ka apostoles miporma sa ingon nga kapangulohan. … Klaro kaayo para sa mga Santos sa Ulahing mga Adlaw nga kining tulo usa ka Kapangulohan tungod sa katinuod nga ang tanang tulo miadto kang Propeta Joseph Smith ug ni Oliver Cowdery ug gitugyan kanila ang Melchizedek Priesthood” (Seek Ye Earnestly [1970], 207–8; emphasis gidugang).

4.2

Pag-establisar sa Unang Kapangulohan

Ang mosunod nga tsart nag-ila sa pipila ka mga hitabo sa pag-establisar sa Unang Kapangulohan:

Petsa	Panghitabo
Abril 6, 1830	Na-organisar ang Simbahan nga si Joseph Smith “tinawag sa Dios, ug giorden nga usa ka apostol ni Jesukristo, nga mahimong unang anciano niini nga simbahan”; si Oliver Cowdery “kinsa usab gitawag sa Dios, nga usa ka apostol ni Jesukristo, nga mahimong ikaduhang elder niini nga simbahan” (D&P 20:2–3).
Nobyembre 11, 1831	Nadawat ni Propeta Joseph Smith ang pagpadayag nga narekord sa Doktrina ug mga Pakigsaad 107:59–100; ang mga bersikulo 64–66 naghisgot sa “Presidente sa Halangdon nga Pagkapari sa Simbahan” (tan-awa sa Robin Scott Jensen, Robert J. Woodford, ug Steven C. Harper, eds., Revelations and Translations: Manuscript Revelation Books, facsimile ed., vol. 1 sa mga Pagpadayag ug mga Hinubad nga mga serye sa The Joseph Smith Papers, nga gi-edit ni Dean C. Jessee, Ronald K. Esplin, ug Richard Lyman Bushman [2009], 216–19).
Enero 25, 1832	“Si Joseph Smith gibuligan ug gi-orden nga usa ka Presidente sa Halangdon nga Pagkapari” sa usa ka komperensya sa mga elder, mga high priest, ug sa mga miyembro sa Simbahan sa Amherst, Ohio (D&P 75 ulohan sa seksyon; tan-awa usab sa D&P 82 ulohan sa seksyon; History of the Church, 1:243, footnote).
Marso 1832	Nadawat ni Propeta Joseph Smith ang pagpadayag mahitungod sa umaabut nga tahas sa Unang Kapangulohan (tan-awa sa D&P 81:1–2). “Ang pagpadayag … kinahanglan pagailhon nga usa ka lakang paingon sa tukma nga katukuran sa Unang Kapangulohan, nagtuyo sa pagtawag alang sa buhatan sa magtatambag diha niana nga pundok ug nagpasabut sa kaligdong sa pagkatudlo” (D&P 81 ulohan sa seksyon).
Abril 26, 1832	Atol sa “tibuok nga katiguman sa Simbahan” sa lalawigan sa Jackson, Missouri, “si Joseph Smith nga Propeta gibuligan ingon nga usa ka Presidente sa Halangdon nga Pagkapari [High Priesthood], diin nga buhatan siya kaniadto gi-orden” (D&P 82 ulohan sa seksyon).
Marso 8, 1833	Nadawat ni Propeta Joseph Smith ang pagpadayag nga makita sa Doktrina ug mga Pakigsaad 90, “usa ka nagpadayon nga lakang sa katukuran sa Unang Kapangulohan” (ulohan sa seksyon). Niini nga pagpadayag gipasabut sa Ginoo nga si Sidney Rigdon ug Frederick G. Williams magserbisyo nga mga magtatambag sa Unang Kapangulohan (tan-awa sa bersikulo 6).
Marso 18, 1833	Si Sidney Rigdon ug Frederick G. Williams gi-set apart isip mga magtatambag sa Unang Kapangulohan. Mirekord si Propeta Joseph Smith: “Mipadayag si Elder Rigdon og tinguha nga siya ug si Brother Frederick G. Williams kinahanglang i-orden sa mga office diin sila gitawag, … sigun sa pagpadayag nga gihatag pagka 8 sa Marso,1833. Busa gipandong nako ang akong mga kamot kang Brother Sidney ug Frederick, ug gi-orden sila aron makasalmot uban kanako sa paghupot sa mga yawe niining katapusang gingharian, ug pagtabang sa Kapangulohan sa High Priesthood, isip akong mga Magtatambag” (sa History of the Church, 1:334).
Marso 28, 1835	Nadawat ni Propeta Prophet Joseph Smith ang pagpadayag nga makita sa Doktrina ug mga Pakigsaad 107:1–58, nga dugang nagpasabut sa Unang Kapangulohan isip presiding nga korum sa Simbahan: “Sa Melchizedek nga Pagkapari, tulo ka Tigdumala nga Halangdon nga mga Pari, nga gipili sa simbahan, gitudlo ug gi-orden niana nga buhatan, ug gituboy pinaagi sa pagsalig, hugot nga pagtuo, ug pag-ampo sa simbahan, nahimo nga usa ka korum sa Kapangulohan sa Simbahan” (D&P 107:22).

4.3

Ang Awtoridad sa Unang Kapangulohan

Ang mga sakop sa Unang Kapangulohan mao ang mga Presiding High Priest sa tibuok Simbahan. Sa ingon niana, ang Unang Kapangulohan mao ang katapusang mortal nga awtoridad sa tanang butang. Gipasabut sa Ginoo ang gidak-on sa ilang awtoridad dihang mipahayag Siya nga:

“Usab, sa pagkatinuod, Ako moingon nganha kaninyo, ang labing mahinungdanon nga butang sa simbahan, ug ang labing lisud nga mga kaso sa simbahan, kon adunay wala matagbaw diha sa mga hukom sa obispo o mga maghuhukom, kini isang-at ngadto ug pagadad-on ngadto sa konseho sa simbahan, diha sa atubangan sa Kapangulohan sa Halangdon nga Pagkapari.

“Ug ang Kapangulohan sa konseho sa Halangdon nga Pagkapari adunay gahum sa pagtawag og uban pa nga halangdon nga mga pari, gani ang Napulog Duha, aron sa pagtabang ingon nga mga magtatambag; ug busa ang Kapangulohan sa Halangdon nga Pagkapari ug ang ilang mga magtatambag adunay gahum sa paghukom diha sa pagpamatuod sumala sa mga balaod sa simbahan.

“Ug human niini nga paghukom kini dili na hinumduman sa atubangan sa Ginoo; kay kini mao ang labing taas nga konseho sa simbahan sa Dios, ug katapusan nga paghukom diha sa mga panagsumpaki sa espirituhanon nga mga butang” (D&P 107:78–80; emphasis gidugang).

Si Presidente Stephen L Richards (1879–1959) sa Unang Kapangulohan mipasabut nga ang Unang Kapangulohan dunay awtoridad sa paghubad sa doktrina:

“Kinsa ang may katungod sa paghubad sa doktrina sa Simbahan … ? Sigurado ko nga pinaagi sa tinuoray nga pagpamalandong wala gayuy opinyon nga magkalahi mahitungod niini nga pangutana tali sa mga miyembro. Naestablisar kini og tarung pinaagi sa mga pagpadayag nga atong nadawat ug ang gibuhat sa Simbahan nga ang Presidente ug ang iyang mga Magtatambag gitugyanan niini nga awtoridad nga ako dili motuo nga dunay miyembro ang tinuorayng molalis pa niini. Sa pinulongan sa pagpadayag sila, ang Kapangulohan, naglangkob og ‘usa ka korum … aron modawat sa mga orakulo alang sa tibuok Simbahan’ [D&P 124:126]. Sila ang korte suprema dinhi sa kalibutan kon hubaron ang balaod sa Dios.

“Sa pagbuhat sa ilang mga katungdanan ug sa gidelegar nga mga gahum kontrolado sila sa usa ka konstitusyon, ang ubang bahin niini nakasulat ug ang uban wala. Ang nasulat nga bahin anaa sa gipamatud-ang tinuod nga kasulatan, karaan ug bag-o, ug sa narekord nga mga pulong sa atong mga propeta sa ulahing mga adlaw. Ang wala masulat nga bahin mao ang espiritu sa pagpadayag ug balaang inspirasyon nga may kalabutan sa ilang calling” (sa Conference Report, Okt. 1938, 115–16; emphasis gidugang).

4.4

Ang Pagkalabaw sa Presidente sa Simbahan

Presidente Joseph F. Smith (sa tunga) ug ang iyang mga magtatambag, John R. Winder (sa wala) ug si Anthon H. Lund (sa tuo)

Niadtong Marso 8, 1833, gisultihan sa Ginoo si Propeta Joseph Smith nga ang mga magtambag sa Unang Kapangulohan “sama [sa Presidente] sa paghupot sa mga yawe niining katapusang gingharian” (D&P 90:6). Hinoon, ang Presidente sa Simbahan mag-preside niini nga korum sa priesthood ug modumala sa buluhaton sa iyang mga magtatambag.

Si Elder John A. Widtsoe (1872–1952) sa Korum sa Napulog Duha ka mga Apostoles mipasabut nga ang Presidente sa Simbahan modumala sa buluhaton sa Unang Kapangulohan:

“Si Joseph Smith gihatagan og duha ka magtatambag, ang tulo nagporma sa Unang Kapangulohan sa Simbahan. (Marso 18, 1833.) Giunhan kini pagka-Marso 8, 1833 sa usa ka pagpadayag nga nagpahayag nga ‘Pinaagi kanimo [Joseph Smith] ang mga orakulo mahatag ngadto sa uban, oo, gani ngadto sa Simbahan’ [D&P 90:4]. Ang pagkalabaw sa Presidente sa Simbahan napadayon. Ang pangutana kon ang mga Magtatambag naghupot ba og samang gahum sa Presidente sa wala madugay gidebatihan sa mga tawo. Unsay mahimo sa mga Magtatambag kon walay direktang sugo gikan sa Presidente? Kining mga pangutanaha natubag sa usa ka miting niadtong Enero 16, 1836. Didto ang propeta miingon, ‘Ang Napulog Duha dili ubos ni bisan kinsa gawas sa Unang Kapangulohan … ug kon wala ako, walay Unang Kapangulohan nga labaw sa Napulog Duha’ [sa History of the Church, 2:374; mga italic gidugang]. Sa laing pagkasulti kon tangtangon ang Presidente, wala nay awtoridad ang mga Magtatambag. Ang mga Magtatambag walay gibatunang gahum sa Presidente ug dili makalihok sa mga buluhaton sa Simbahan kon walay direksyon ug pagtugot sa Presidente” (Joseph Smith: Seeker after Truth, Prophet of God [1951], 303; emphasis gidugang).

4.5

Ang Unang Kapangulohan Mangulo sa Simbahan

President Thomas S. Monson (naglingkod) ug ang iyang mga magtatambag, Henry B. Eyring (sa wala) ug Dieter F. Uchtdorf (sa tuo), 2008

Gihisgutan ni Presidente Joseph Fielding Smith (1876–1972) ang pagdumala nga katungdanan sa Unang Kapangulohan:

“Sa Simbahan ni Jesukristo karon duna kitay korum sa Unang Kapangulohan, nga bulag sa Konseho sa mga Apostoles. Ubos sa pagdumala sa Unang Kapangulohan nga ang mga apostoles molihok sa tanang butang sa priesthood ug sa Simbahan” (Doctrines of Salvation, comp. Bruce R. McConkie [1956], 3:152; emphasis gidugang).

Isip “labing taas nga konseho sa simbahan sa Dios” (D&C 107:80), ang Unang Kapangulohan mangulo sa Simbahan gamit ang mga paghukom nga dinasig bahin sa tanang butang, sa espiritwal ug temporal. Si Presidente Joseph Fielding Smith (1876–1972) mitudlo:

“Pinaagi sa pagpadayag ang Presidente sa Simbahan gihatagan og mga magtatambag [tan-awa sa D&P 107:78–80]. …

“Ang labing taas nga gahum sa pagdumala sa Simbahan anaa sa Presidente uban sa iyang mga magtatambag. Ang Unang Kapangulohan ang mo-preside sa tanang council, tanang korum, ug tanang organisasyon sa Simbahan, uban sa labing taas nga gahum sa pag-appoint ug gahum sa pag-nominar [tan-awa sa D&P 107:9]. Kining mga gahum sa pag-appoint, pag-nominar, ug pag-preside mahimong idelegar sa Unang Kapangulohan ngadto sa uban kinsa ilang pilion ug i-sustain sa mga tawo nga morepresentar sa kapangulohan sa pagdumala sa Simbahan.

“Ang Unang Kapangulohan mao ang buhing mga orakulo sa Dios ug labing taas nga tigdesisyon ug tighubad sa balaod sa Simbahan. Modumala sila sa buluhaton sa tibuok Simbahan sa tanang butang mahitungod sa polisiya, organisasyon, ug administrasyon. Walay bahin sa buluhaton sa Simbahan nga dili apil sa ilang awtoridad” (“The First Presidency and the Council of the Twelve,” Improvement Era, Nob. 1966, 978).

Si Presidente James E. Faust (1920–2007) sa Unang Kapangulohan miingon:

“Ang Unang Kapangulohan dunay pinakataas nga responsibilidad sa mga kalihokan sa gingharian sa Dios dinhi sa kalibutan. Ang Ginoo namulong bahin nila:

“Sa Melchizedek nga Pakapari, tulo ka Tigdumala nga Halangdong mga Pari, nga gipili sa simbahan, gitudlo ug gi-orden niana nga buhatan, ug gituboy pinaagi sa pagsalig, hugot nga pagtuo, ug pag-ampo sa simbahan, nahimo nga usa ka korum sa Kapangulohan sa Simbahan. …

“Ug ang Kapangulohan sa konseho sa Halangdon nga Pagkapari adunay gahum sa pagtawag og uban pa nga halangdon nga mga pari, gani ang Napulog Duha, aron sa pagtabang ingon nga mga magtatambag; ug busa ang Kapangulohan sa Halangdon nga Pagkapari ug ang ilang mga magtatambag adunay gahum sa paghukom diha sa pagpamatuod sumala sa mga balaod sa simbahan.’ [D&P 107:22, 79]” (“Responsibilities of Shepherds,” Ensign, Mayo 1995, 47).

4.6

Ang Kaimportante sa mga Magtatambag sa Unang Kapangulohan

Presidente Gordon B. Hinckley (sa tunga) ug ang iyang mga magtatambag, Thomas S. Monson (sa wala) ug James E. Faust (sa tuo), 2005

Si Elder William R. Walker sa Seventy mitudlo nga ang Unang Kapangulohan mao ang modelo nga angayang sundon sa ubang mga kapangulohan sa Simbahan:

“ Ang matag usa kanato nga nagserbisyo sa mga presidency bisan asa sa Simbahan kinahanglang motan-aw sa Unang Kapangulohan isip atong sundanan ug ehemplo nga paningkamutan natong masunod samtang mobuhat kita sa atong mga katungdanan. Kinahanglang maningkamot kitang mahisama kanila ug magtinabangay uban sa gugma ug panaghiusa sama sa ilang gihimo.

“Si Presidente Hinckley kanunay nga mamulong kabahin sa importansya sa mga magtatambag. Miingon siya, ‘Ang Ginoo mibutang og [mga magtatambag] diha alang sa usa ka katuyoan’ (Teachings of Gordon B. Hinckley [1997], 94).

“Mitudlo pa og dugang si Presidente Hinckley kanamo: ‘Kada buntag gawas sa Lunes, ang Unang Kapangulohan mag-abut, kon naa mi sa lungsod. Tawagon nako si Presidente [James E.] Faust aron mopresentar sa iyang plano ug among hisgutan ug desisyunan kini. Dayon tawagon nako si Presidente [Thomas S.] Monson nga mopresentar sa iyang plano ug among hisgutan ug desisyunan kini. Dayon ipresentar nako ang mga butang nga gusto nakong ipresentar ug among hisgutan ug desisyunan kini. Nagtinabangay kami. … Dili mahimong maglihok ka nga mag-inusara sa kapangulohan. Mga magtatambag—pagkatalagsaon niining mga magtatambag. Mopugong sila nimo sa paghimo sa sayop nga mga butang, motabang sila nimo sa paghimo sa saktong mga butang’ (Teachings of Gordon B. Hinckley, 95; tan-awa usab sa “In … Counsellors There Is Safety,” Ensign, Nob. 1990, 48–51).

“Ang magtatambag ni Presidente Joseph F. Smith kausa mihulagway kon giunsa sa Unang Kapangulohan paghisgut o pagtuki: ‘Kon adunay kaso nga moabut [sa Presidente sa Simbahan] alang sa paghukom, siya ug ang iyang mga magtatambag maghisgot bahin niini ug mohatag sa ilang mainampingon nga hunahuna hangtud nga magkapareha ang ilang konklusyon’ (Anthon H. Lund, sa Conference Report, Hunyo 1919, 19; mga italic gidugang).

“Mao gayud kana ang pamaagi sa mga kapangulohan.

“Ang mga pagpadayag nagtudlo kanato sa paghimo sa atong mga desisyon diha sa mga korum ug mga kapangulohan sa ‘tanang pagkamatarung, sa pagkabalaan, ug pagkamapainubsanon sa kasingkasing, pagkamaaghup ug pagkamainantuson, ug diha sa hugot nga pagtuo, ug hiyas, ug kahibalo, pagkamapugnganon, pailub, pagkadiosnon, inigsoon nga pagkamabination ug gugma nga putli’ (D&P 107:30).

“Ang Ginoo mihatag kanato sa pamaagi” (“Tulo ka Nangulo nga mga High Priests,” Ensign o Liahona, Mayo 2008, 39; emphasis gidugang).

4.7

Ipadayon sa mga Magtatambag ang Buluhaton sa Unang Kapangulohan kon Magkasakit ang Presidente

Tungod sa sakit ni Presidente Spencer W. Kimball ug ni Presidente Marion G. Romney, usahay si Presidente Gordon B. Hinckley mag-inusarang maglingkod sa kinatibuk-ang komperensya.

Gipasabut ni Presidente Gordon B. Hinckley (1910–2008) sa unsang paagi ang buluhaton sa Unang Kapangulohan magpadayon bisan ang Presidente sa Simbahan may sakit o dili na makahimo sa iyang mga katungdanan:

“Kon ang Presidente sa Simbahan masakit o dili makahimo sa pagbuhat sa hingpit sa tanan nga katungdanan sa iyang office, ang iyang duha ka Magtatambag maglangkob sa Korum sa Unang Kapangulohan. Ipadayon nila ang inadlaw-adlaw nga trabaho sa Kapangulohan. Sa mga kahimtang nga eksepsyunal, kon usa ra ang maka-function, mahimo siyang molihok pinaagi sa awtoridad sa office sa Kapangulohan sigun sa nakasulat sa Doktrina ug mga Pakigsaad, seksyon 102, mga bersikulo 10–11” (“God Is at the Helm,” Ensign, Mayo 1994, 54; emphasis gidugang).

Tulo ug tunga ka tuig sa sayo pa, si Presidente Gordon B. Hinckley mipaambit sa iyang personal nga kasinatian isip magtatambag sa duha ka Presidente nga nagkasakit sulod sa dugay nga panahon:

“Nianang panahona nga si Presidente Kimball nagluya, nagkasakit si Presidente Tanner ug namatay. Gitawag si Presidente Romney nga Unang Magtatambag, ug ako isip Ikaduhang Magtatambag ni Presidente Kimball. Dayon nagkasakit si Presidente Romney, nga ako ang nabinlan sa hapit tanang bug-at nga pas-anunon nga responsibilidad. Nakigtambag ko kanunay sa akong Kaigsoonan sa Napulog Duha, ug dili igo ang akong pasalamat nila sa ilang pagsabut ug sa kaalam sa ilang panghukom. Sa mga butang diin na-establisar na og maayo ang polisiya, nagpadayon kami. Apan walay bag-ong polisiya ang gipahibalo o giimplementar, ug walay makahuluganong buluhaton ang giusab nga walay pag-adto kang Presidente Kimball ug iladlad ang mga butang sa iyang atubangan ug pagdawat sa bug-os niyang pagtugot ug bug-os nga pag-aprubar.

“Nianang mga kahimtanga kon ako mogbisita kaniya, kanunay kong magdala og secretary nga mohimo og detalyadong rekord sa maong pagsultihanay. Makapaniguro ko kaninyo, minahal kong mga igsoon, nga wala gayud ako mag-una og lihok kay sa akong direkta nga lider, wala gayud ako magtinguha nga molihok nga mag-una kaniya sa polisiya sa Simbahan o instruksyon. Nasayud ko nga siya ang gipili nga Propeta sa Ginoo nianang panahuna. Bisan og ako, usab, gi-sustain nga propeta, manalagna ug tigpadayag, kauban sa akong mga Kaigsoonan sa Napulog Duha, nasayud ko nga walay usa kanamo ang Presidente sa Simbahan. Nasayud ko nga gilugwayan sa Ginoo ang kinabuhi ni Presidente Kimball para sa mga katuyoan nga nahibaloan sa Ginoo, ug ako dunay bug-os nga pagtuo nga kini nga paglugway sa kinabuhi gihimo para sa usa ka rason ubos sa kaalam Kaniya nga may labaw nga kaalam kay sa tawo.

“Niadtong Nobyembre 1985, namatay si Presidente Kimball, ug si Presidente Ezra Taft Benson, kanhi Presidente sa Korum sa Napulog Duha ka mga Apostoles, hiniusang gi-sustain isip Presidente sa Simbahan ug propeta, manalagna, ug tigpadayag. Mipili siya og iyang mga magtatambag, ug hatagan ko kamo sa kasiguroan nga nagtambayong kami ug nagkahiusa gayud, ug usa kadto ka talagsaon ug maanindot nga magantihong kasinatian.

“Si Presidente Benson karon nubenta y uno na ang edad ug wala nay kalig-on o kusog sama sa iyang gibatunan kaniadto. Si Brother Monson ug ako, isip iyang mga magtatambag, mihimo sama sa gihimo kaniadto, ug mao kana ang pagpadayon sa buhat sa Simbahan, samtang mainampingon kaayo nga dili mag-una sa Presidente ug dili mohimo og bisan unsang buluhaton nga dili siya mahibalo ug bug-os nga mo-aprubar pinasubay sa dugay nang naestablisar nga polisiya” (“In … Counsellors There Is Safety,” Ensign, Nob. 1990, 50).

4.8

Usa ka Ehemplo sa Inadlaw-Adlawng mga Kalihokan sa Unang Kapangulohan.

Ang mga opisina sa mga sakop sa Unang Kapangulohan anaa sa Church Administration Building sa Salt Lake City, Utah.

Niadtong 1979, si Presidente N. Eldon Tanner (1898–1982), nga nagserbisyo isip magtatambag sa upat na ka Presidente sa Simbahan, detalyadong mihulagway sa inadlaw-adlawng mga buluhaton sa Unang Kapangulohan nianang higayuna. Bisan og ang iskedyul magkalahi sa matag administrasyon, ug ang ubang mga detalye nausab na, ang iyang paghulagway naghatag og maayong panabut sa daghang responsibilidad sa Unang Kapangulohan:

“Ang tanang butang kabahin sa pagdumala sa Simbahan maggikan sa direksyon sa Unang Kapangulohan, ug ang mga kalihokan gibahin sa kinatibuk-an ngadto sa tulo ka kategoriya:

“Una, kadtong direkta nga dumalahon sa Unang Kapangulohan; ikaduha, mga butang nga eklesyastikal nga idumala sa Napulog Duha ubos sa direksyon sa Unang Kapangulohan; ug ikatulo, mga kalihokang temporal nga idumala sa Presiding Bishopric, sigun sa gi-assign kanila sa Unang Kapangulohan.

“Tuguti kong molista sa mga butang nga direktang idumala sa Unang Kapangulohan: mga area conference, mga maligdong nga katiguman, pag-budget, edukasyon, historikal, ug personnel nga mga department; mga templo, pag-audit; ang Coordinating Council; ug ang welfare sevices. …

“… Sa mga miting nga regular ang iskedyul, ang Unang Kapangulohan mag-abut matag Martes, Miyerkules, Huwebes, ug Biyernes alas 8 sa buntag uban sa secretary nga mohimo og kompletong rekord sa tanang gihisgutan. Kini nga mga diskusyon maglakip sa mga sulat nga para sa Unang Kapangulohan—nga naglangkob sa hapit tanan gikan sa mga pangutana mahitungod sa gitusukan nga dalunggan hangtud sa mga pag-apilar sa pagdesisyon sa pagka-excommunicate gikan sa stake presidency ug high council. Dunay mga pangutana mahitungod sa sininaan ug mga sumbanan sa pamustura, hipnotismo, pagbalaan sa Adlawng Igpapahulay, interpretasyon sa kasulatan, training sa pagkasensitibo, mga pag-seal, mga reklamo batok sa mga lokal nga opisyales, sa reinkarnasyon, pag-donate og mga parte sa lawas ngadto sa science o sa uban, pag-cremate, mga pag-transplant, mga butang sa pamalaod, ug uban pa.

“Ang ilang mga desisyon maglakip usab sa pagpili og bag-ong presidency sa temple, kanus-a ug asa ang bag-ong mga templo tukuron, ug ubang mga butang nga hisgutan kon magmiting kauban sa Konseho sa Napulog Duha ka mga Apostoles ug sa Presiding Bishopric. Planuhon usab nila ang para sa maligdong nga katiguman ug mga area conference nga ipahigayon sa tibuok kalibutan.

“Martes alas 10 sa buntag makigmiting sila sa Expenditures Committee. … Dinhi ang mga kadagkoan sa lain-laing mga departamento mopresentar sa ilang mga gikinahanglang gastuhon para sa pag-aprubar, ug buhaton ang alokasyon. Ang mga example maglakip sa mga request sa Departamento sa Physical Facilities para pagpamalit og yuta ug mga building sama sa mga balay sa stake o sa ward, mga mission home, mga visitors center, ug uban pa, ug mga diskusyon sa mga gasto ug maintenance. Ang Presiding Bishopric usab mopresentar sa mga request para sa mga gasto nga maglakip sa mga welfare projects.

“Ang Miyerkules nga miting sa Unang Kapangulohan gamiton sa pagpaminaw sa mga report gikan sa mga kadagkoan sa lainlaing mga departamento nga direktang idumala sa Unang Kapangulohan, sama sa mga departamento sa Historikal, Personnel, ug Public Communications. Ang mga appointment para sa importanting mga bisita i-iskedyul usab sa mga Miyerkules sa buntag kon mahimo. …

“Kausa sa usa ka bulan matag Miyerkules magmiting ang Unang Kapangulohan kauban sa Combined Church Board of Education ug Board of Trustees aron hisgutan ang tanang butang nga may kalabutan sa mga unibersidad ug mga kolehiyo, mga institute ug seminary, ug uban pang mga eskwelahan sa Simbahan. Usab, sa usa ka Miyerkules matag bulan magmiting sila kauban sa Coordinating Council. … Dinhi hisgutan nila ug hukman ang mga polisya, pamaagi, ug mga pangutana sa administrasyon sa pagsuta nga ang tanang dibisyon sa responsibilidad mahatagan sa katin-awan ug makoordinar sa tukmang paagi. Human niini, makigmiting sila sa Welfare Services Committee. …

“Sa matag Huwebes sa alas 10 sa buntag moapil sila sa miting sa Konseho sa Napulog Duha sa kwarto sa taas sa [Salt Lake Temple], nga gisugdan og alas 8 sa buntag Dinhi niining kwartoha nga ang pagpangulo sa Simbahan gitudloan sa Ginoo sukad makompleto ang templo. Dinhi ang tawo makasinati og espesyal nga espiritwal nga pagbati, ug usahay ang pagbati sa presensya sa pipila sa bantugang mga lider nga wala na. Mga litrato sa dose ka Presidente sa Simbahan, ug ni Hyrum usab, nga Patriarch, gipilit sa mga bongbong. May mga painting usab sa Manluluwas sa Dagat sa Galilea diin iyang gitawag ang pipila sa iyang mga apostoles, ug uban pa nga naghulagway sa iyang pagkalansang sa krus ug sa iyang pagkayab. Dinhi mapahinumduman kami sa daghang bantugang lider nga nakalingkod niining council room, ug ubos sa direksyon sa Ginoo ang talagsaong mga desisyon nahimo.

“Sa pagsulod sa Unang Kapangulohan niining kwartoha sa alas diyes matag Huwebes sa buntag, molamano kami sa tanang sakop sa Napulog Duha, dayon mag-ilis sa among mga sinina sa templo. Manganta kami, mangluhod sa pag-ampo, ug dayon moapil sa prayer circle sa altar, pagkahuman mag-ilis kami sa panggawas namong mga sinina.

Dihang nangutana si Jesus kang Pedro, “Gihigugma mo ba ako labaw pa niini?” (Juan 21:15), naghulagway kini sa sakripisyo nga gihimo sa mga Apostoles para ug alang sa Simbahan.

“Human mahisgutan ang mga minutes [rekord sa miting] sa miaging miting, among ikonsiderar ang mga butang sama sa mosunod: pag-aprubar sa mga kausaban sa mga bishopric nga girekomendar sa mga stake president—nga nahisgutan na sa miting sa Napulog Duha … ; kausaban sa mga organisasyon sa stake, ward, mission, ug templo sa tibuok Simbahan, lakip ang mga boundary ug mga opisyales; mga opisyal ug mga organisasyon sa auxiliary; mga butang nga dala sa mga kadagkoan sa lain-laing mga departamento; ug ang among mga report sa mga stake conference ug ubang mga kalihokan atol sa semana, sama sa mga lubong, assigment sa pakigpulong, ug uban pa. Dinhi niini nga pundok nga ang bisan unsang kausaban sa pagdumala o polisiya ikonsiderar ug aprubahan, ug mahimo dayon kining opisyal nga polisiya sa Simbahan. …

“Sa unang Huwebes sa matag bulan ang Unang Kapangulohan magmiting kauban sa tanang General Authority—sa mga sakop sa Napulog Duha, sa Seventy, ug sa Presiding Bishopric. Niini nga miting ang tanan sultihan sa tanang kausaban sa mga programa o mga pamaagi ug tudloan sa ilang mga katungdanan o responsibilidad. Ang Presidente motawag sa mga sakop sa paghatag sa ilang mga pagpamatuod, pagkahuman isul-ob dayon namo ang among mga sinina sa templo, moambit sa sakrament, ug mohimo sa prayer circle diin moapil ang tanang sakop nga anaa. Sa pagtapos sa pag-ampo ang tanan, gawas sa Unang Kapangulohan ug Korum sa Napulog Duha, pagawason, ug ang mga nagpabilin mag-ilis sa ilang panggawas nga sinina ug padayon sa regular nilang hisgutan para sa matag Huwebes nga miting. Usa ka tigrekord nga secretary mohimo og report sa tanang gipanulti ug gipanghimo.

“… Biyernes alas 9 sa buntag ang Presiding Bishopric makigmiting sa Unang Kapangulohan sa paghatag og mga report ug paghisgot sa mga butang nga may kalabutan sa administrasyon” (“The Administration of the Church,” Ensign, Nob. 1979, 45–48; emphasis gidugang).

4.9

Ang Doktrinal nga Interpretasyon Katungod ug Responsibilidad sa Unang Kapangulohan

Presidente George Albert Smith (tunga) ug ang iyang mga magtatambag, J. Reuben Clark Jr. (sa wala) ug David O. McKay (sa tuo)

Ang Unang Kapangulohan maoy final nga awtoridad para sa doktrinal nga interpretasyon sa Simbahan. Mipasabut si Presidente Ezra Taft Benson (1899–1994):

“Ang doktrinal nga interpretasyon katungdanan sa Unang Kapangulohan. Ang Ginoo mihatag niana nga responsibilidad kanila pinaagi sa pagpadayag. Walay magtutudlo nga dunay katungod sa pag-interpret sa doktrina para sa mga miyembro sa Simbahan” (“The Gospel Teacher and His Message,” sa Charge to Religious Educators, 2nd ed. [1982], 51–52; emphasis gidugang).

Si Elder L. Tom Perry (1922–2015) sa Korum sa Napulong Duha ka mga Apostoles mipasabut nga ang ubang mga General Authority moadto usab sa Unang Kapangulohan para sa doktrinal nga interpretasyon:

“Sigurado nga ang Ginoo nakasabut sa panginahanglan sa pag-amping nga ang Iyang doktrina lunsay ug isalig ang ilang interpretasyon sa usa lamang ka tinubdan. Siyempre, tanan kita giawhag sa pagtuon ug pag-angkon og kahibalo nga daghan kutob sa mahimo niining kinabuhia. Giawhag kita nga maghisgot ug magbinayloay og mga ideya sa usag usa aron madugangan ang atong panabut. Hinoon, ang Ginoo may usa lamang ka tinubdan sa pagpahayag sa Iyang nag-unang sukaranan nga mga doktrina. Gani sa among tahas isip mga General Authority sa Simbahan, gitudloan kami, ‘Aron mapreserbar ang pagkaparehas sa doktrinal nga interpretasyon ug polisiya, gihangyo kamo sa pag-refer ngadto sa Opisina sa Unang Kapangulohan para sa pagkonsiderar [sa] bisan unsang pangutanang doktrinal o polisya nga dili klaro ang pagpasabut diha sa mga kasulatan o sa General Handbook of Instructions.’

“Niining paagiha, ang panaglalis ug kalibug ug panaglahi sa opinyon mawala” (“Heed the Prophet’s Voice,” Ensign, Nob. 1994, 19).

Si Presidente James E. Faust (1920–2007) sa Unang Kapangulohan namahayag:

“Kinsa man ang mopahayag sa doktrina sa Simbahan? Naestablisar kinig maayo pinaagi sa pagpadayag ug kasinatian nga ang kasamtangang Presidente sa Simbahan ug ang Iyang mga magtatambag dunay mga yawe sa pagpahayag sa doktrina sa Simbahan. Ang pagtugyan niini nga awtoridad naggikan sa pagpadayag. Ang Kapangulohan naglangkob sa ‘usa ka korum … aron modawat sa mga orakulo alang sa tibuok simbahan’ (D&P 124:126)” (“The Abundant Life,” Ensign, Nob. 1985, 9).

4.10

Unsay Isulti sa Unang Kapangulohan kini Kasulatan

Si Presidente Joseph Fielding Smith (naglingkod) kauban sa iyang mga magtatambag, N. Eldon Tanner (sa wala) ug Harold B. Lee (sa tuo), 1970

Si Presidente Marion G. Romney (1897–1988) sa Unang Kapangulohan mitudlo nga ang Unang Kapangulohan mamulong sa mga pulong nga ipamulong ni Jesukristo kon personal Siyang ania:

“Karon nagpadayag ang Ginoo sa iyang kabubut-on ngadto sa tanang lumulupyo sa yuta, ug sa mga miyembro sa Simbahan sa partikular, mahitungod sa mga isyu niining atong mga adlaw pinaagi sa buhing mga propeta, nga gipangulohan sa Unang Kapangulohan. Ang ilang isulti isip kapangulohan mao ang isulti sa Ginoo kon nia pa siya sa personal. Mao kini ang lig-ong pundasyon sa Mormonism. … Dihang si Propeta Joseph Smith gipangutana unsay kalainan tali sa Simbahan sa Ulahing mga Adlaw ug sa mga simbahan nga sektaryan sa kalibutan, miingon siya, ‘Kami dunay Espiritu Santo,’ buot niyang ipasabut nga pinaagi sa gahum sa Espiritu Santo ang kabubut-on sa Amahan gipadayag ngadto sa mga hunahuna sa mga lider sa Simbahan. Mao nga akong sublion, unsay isulti sa kapangulohan isip kapangulohan maoy isulti unta sa Ginoo kon nia pa siya dinhi, ug kini kasulatan. Kinahanglan nga tun-an kini, sabton, ug sundon, gani sama sa mga pagpadayag diha sa Doktrina ug mga Pakigsaad ug sa ubang kasulatan. Kadtong mosunod niining paagiha dili mohubad sa unsay ilang gisulti nga dinasig sa politikal nga pagpihig o kahakog; dili usab sila moingon nga ang kaigsoonan wala mahibalo sa mga kahimtang niadtong mga naapektuhan sa ilang tambag; o nga ang ilang mga tambag dili dawaton tungod kay wala kini unhi sa kutlo nga ‘Kini ang giingon sa Ginoo.’

“Kadtong … mohimo niini pinaagi sa hugot nga pag-ampo ug tinuorayng pagtuon mahibalo sa ilang kaugalingon unsay gisulti niining mga buhi nga propeta, ug buhaton kini, bisitahan sa espiritu sa Ginoo ug masayud pinaagi sa espiritu sa pagpadayag nga gipamulong nila ang hunahuna ug kabubut-on sa Amahan” (in Conference Report, Abr. 1945, 90; emphasis gidugang).

4.11

Ang mga Miyembro sa Simbahan Kinahanglang Mo-sustain sa Unang Kapangulohan

Ang mga kasulatan nagtudlo nga ang “pagsalig, hugot nga pagtuo, ug pag-ampo sa simbahan” magsuporta sa Unang Kapangulohan (D&P 107:22). Kita adunay sagradong obligasyon sa pag-sustain sa Unang Kapangulohan sa Simbahan.

Samtang nagserbisyo nga magtatambag ni Presidente Joseph Fielding Smith, si Presidente Harold B. Lee (1899–1973) namulong kon sa unsang paagi ang mga magtatambag sa Unang Kapangulohan ug tanang miyembro sa Simbahan mo-sustain sa Presidente sa Simbahan:

“Sa akong paghunahuna sa tahas ni Presidente Tanner ug sa akong kaugalingon isip iyang mga magtatambag, naghunahuna ko og usa ka kahimtang sa kinabuhi ni Moises, dihang ang mga kaaway sa simbahan nianang panahona sama ra usab kanila niining panahona. Nanghulga sila sa pagbuntog ug paglaglag ug pagpahunong sa buhat sa simbahan. Samtang naglingkod si Moises didto sa bungtod ug giisa ang sungkod sa iyang awtoridad, o ang mga yawe sa iyang priesthood, ang Israel nagmadaugon batok sa ilang mga kaaway; apan dihang nagkapupos na ang adlaw, namuypoy na ang iyang mga kamot ug nagsugod sa pagkaubos sa iyang kilid. Mao nga gikuptan nila ang iyang mga kamot aron dili kini maluya ug ang sungkod dili moubos. Gi-sustain siya aron ang mga kaaway sa simbahan dili magmadaugon batok sa mga Santos sa Labing Halangdong Dios. (Tan-awa sa Exod. 17:8–12.)

“Tingali mao kana ang tahas nga angay tumanon nako ug ni Presidente Tanner. Ang mga kamot ni Presidente Smith mahimong mamuypoy. May kalagmitan kining mopaubos sa kilid tungod sa bug-at niyang mga responsibilidad; apan kon atong suportahan ang iyang mga kamot, ug mangulo kita ubos sa iyang direksyon, diha sa iyang kiliran, ang mga ganghaan sa impyerno dili makabuntog kaninyo ug batok sa Israel. Ang inyo ug atong kasiguroan mag-agad kon kita mosunod ba o dili sa tawo nga gibutang sa Ginoo aron mangulo sa iyang simbahan. …

“Saligan nato ang Presidente sa Simbahan ug suportahan ang iyang mga kamot sama sa padayon nakong buhaton ug ni Presidente Tanner” (in Conference Report, Okt. 1970, 153; o Improvement Era, Dis. 1970, 126–27).

Si Presidente George Albert Smith (1870–1951), samtang nagserbisyo nga sakop sa Korum sa Napulog Duha ka mga Apostoles, mipasabut sa atong obligasyon samtang kita mopaluyo sa Unang Kapangulohan:

“Nalipay ko karon nga natugutang makahimamat kamo niining kinatibuk-ang komperensya ug gitugutan nga makaisa sa akong kamot sa pag-sustain niadtong gitawag sa langitnong Amahan nga mangulo kanato. Siguradong usa kini ka tinubdan sa kalig-on sa Presidente niini nga Simbahan nga magtan-aw sa mga nawong sa liboan ka matinuorong mga lalaki ug babaye ug makakita kanilang miisa sa ilang mga kamot sa pakigsaad sa atong Amahan sa langit, ug pag-sustain kaniya sa office diin siya gitawag nga presidente niining bantugang Simbahan. Ang obligasyon nga atong gihimo dihang miisa kita sa atong mga kamot sa ingon nga mga kahimtang, butang nga sagrado. Wala kini magpasabut nga maghilum lang kita sa pagsubay sa atong adtoan ug magtinguha nga ang propeta sa Ginoo mogiya niini nga buhat, apan nagpasabut kini nga,—kon akong nasabtan ang obligasyon nga akong gihunahuna dihang miisa ko sa akong kamot—nga mopaluyo kita kaniya; mag-ampo alang kaniya; panalipdan ang maayo niyang pangalan, ug maningkamot kita nga mosunod sa iyang mga instruksyon samtang tudloan siya sa Ginoo sa pagtanyag niini ngari kanato samtang pabilin pa siya niana nga katungdanan. Busa gahum kini sa kalig-on nga giatiman karon sa atong pinalanggang presidente … ug sa iyang mga magtatambag, samtang miboto kita kanila niining sagradong panagtigom” (sa Conference Report, Hunyo 1919, 40).

Sama niining mga tumoy sa bungtod sa ibabaw sa Williard Utah, ang Unang Kapangulohan sama sa “lig-ong mga piramide nga bato .”

Si Presidente Boyd K. Packer (1924–2015) sa Korum sa Napulog Duha ka mga Apostoles mikumpara sa mga sakop sa Unang Kapangulohan sa lapad kaayong mga tumoy sa bungtod ug miawhag sa mga miyembro sa Simbahan nga paluyohan ang Unang Kapangulohan:

“Sa Norte sa [Salt Lake City] sa Wasatch Range nagbarug ang tulo ka tumoy sa bungtod. Ihulagway kini sa magbabalak nga lig-ong mga piramide nga bato. Ang sentro, pinakataas sa tulo, sumala sa giingon sa mapa nga mao kini ang Willard Peak. Apan ang mga pioneer motawag kanila og ‘Unang Kapangulohan.’ Kon moadto gyud mo sa Willard, tan-awa ang sidlakan, ug sa ibabaw, sa ibabaw niana, nagbarug ang ‘Unang Kapangulohan.’

“Salamat sa Dios tungod sa kapangulohan. Sama niadtong mga tumoy sa bungtod, nagbarug sila nga walay lain sa ilang ibabaw gawas sa kalangitan. Nagkinahanglan sila sa atong pagpaluyo nga boto. Usahay makamingaw ang naa sa taas nga calling sa pagkalider—tungod kay ang ilang calling dili pagpahimuot sa tawo, apan sa pagpahimuot sa Ginoo. Panalanginanan sa Dios kining tulo ka bantugan ug maayong mga tawo” (“The Spirit Beareth Record,” Ensign, Hunyo 1971, 87).

4.12

Ang mga Miyembro sa Simbahan Kinahanglang Motan-aw sa Unang Kapangulohan para sa Instruksyon

Si Presidente Thomas S. Monson ug ang mga sakop sa Unang Kapangulohan ug ang Korum sa Napulog Duha ka mga Apostoles nga mibiya sa stand sa konklusyon sa usa ka sesyon sa kinatibuk-ang komperensya

Si Propeta Joseph Smith (1805–44) mitudlo nga “ang mga Presidente o ang Kapangulohan anaa ibabaw sa Simbahan; ug ang mga pagpadayag sa hunahuna ug kabubut-on sa Dios para sa Simbahan, moabut pinaagi sa Kapangulohan. Mao kini ang han-ay sa langit, ug ang gahum ug pribilehiyo niini nga Priesthood” (sa History of the Church, 2:477; emphasis gidugang). Giawhag usab niya ang mga miyembro sa Simbahan nga “paningkamuti ninyong mailhan kadtong mga tawhana. … Ta-awa ang Kapangulohan ug dawata ang mga instruksyon” (sa History of the Church, 3:391).

Ang mga pagtulun-an sa Unang Kapangulohan andam kanunay para sa mga miyembro sa Simbahan. Ang binulan nga mga magasin sa Simbahan naglangkob sa regular nga mga mensahe gikan sa mga sakop sa Unang Kapangulohan. Sa samang paagi, ang mga mensahe gikan sa ubang mga General Authority sa Simbahan makita pinaagi sa website sa Simbahan LDS.org.

4.13

Kadtong Mosunod sa Unang Kapangulohan Dili Gayud Mahisalaag ug Makasulod sa Mahangturong Himaya

Si Presidente Joseph Fielding Smith (1876–1972) mihimo sa mosunod nga saad ngadto sa mga indibidwal nga mosunod sa tambag sa Unang Kapangulohan:

“Mopamatuod ko nga kon motan-aw kita sa Unang Kapangulohan ug sundon ang ilang tambag ug direksyon, walay gahum sa yuta ang magpabilin o mopasimang kanato sa atong dalan isip tibuok simbahan, ug isip mga indibidwal maangkon nato ang kalinaw niining kinabuhia ug mahimo kitang mga manununod sa mahangturong himaya sa kalibutang moabut” (“Eternal Keys and the Right to Preside,” Ensign, Hulyo 1972, 88).

Si Elder Mark E. Petersen (1900–84) sa Korum sa Napulog Duha ka mga Apostoles, human mikutlo niini nga pamahayag ni Presidente Joseph Fielding Smith, mipasabut nga “ang ubang presidente nga nag-una kaniya miingon usab nga kon sundon nato ang giya sa Unang Kapangulohan dili gayud kita mahisalaag ug dili moapostasiya gikan sa kamatuoran” (The Salt and the Savor [1976], 29).

Mga Punto nga Pamalandungan

• Unsa ang mga panalangin sa Simbahan nga giorganisar nga may Unang Kapangulohan kay sa Presidente ra ang nagserbisyo?

• Unsay ipasabut sa pagdawat sa Unang Kapangulohan (tan-awa sa D&P 112:20)? Isip miyembro sa Simbahan, unsay imong mahimo aron mas makasuporta sa Unang Kapangulohan pinaagi sa “pagsalig, hugot nga pagtuo, ug pag-ampo” (D&P 107:22)?

Gisugyot nga mga Assignment

• Ilista ang mga responsibilidad sa Unang Kapangulohan sigun sa gitudlo sa mga kasulatan ug sa komentaryo nga naa niini nga kapitulo.

• Ilista ang mga panalangin nga gisaad para niadtong mosunod sa Unang Kapangulohan. Pagsulat og plano nga makatabang nimo nga makatuon sa mga pulong sa Unang Kapangulohan nga mas kanunay.

• Gikan sa kinabag-uhang kinatibuk-ang komperensya nga isyu sa Ensign o Liahona, basaha ang mga pakigpulong sa mga sakop sa Unang Kapangulohan. I-highlight unsay ilang gisulti nga piho nimong magamit sa imong kinabuhi.