Siosefa Sāmita: Ko ha Palōfita ʻa e ʻOtuá

ʻI he taʻu 14 ʻo Siosefa Sāmitá, ne ne loto ai ke ne ʻiloʻi pe ko e feʻia ʻa e Siasi ʻoku totonu ke kau ki aí, ko ia naʻá ne kole ai ki he ʻOtuá ʻi he lotu fakamātoato moʻoni. Ko e tali ki heʻene lotú, ne hā mai ʻa e ʻOtua ko e Tamaí mo Hono ʻAlo ko Sīsū Kalaisí kia Siosefa ʻo fakahā ange ko e Siasi moʻoni ʻo Sīsū Kalaisí naʻe ʻikai ke ʻi he māmaní ia pea kuó na fili ai ʻa Siosefa ke ne toe fokotuʻu ia.

Talu mei he ʻaho ko iá, mo e ngāue ʻa Siosefa ki he ʻOtuá, ʻo ngāue ke fokotuʻu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo langa hake ʻa e puleʻanga ʻo e ʻOtuá ʻi māmani ʻi he ngaahi ʻaho ki mui ní. ʻOku fakamoʻoniʻi ʻe he kāingalotu Faivelenga ʻo e Siasí ko Sīsū Kalaisí ko e Fakamoʻui mo e Huhuʻi ia ʻo māmaní. ʻOku tataki ʻe Sīsū Hono Siasí he ʻahó ni ʻo fakafou ʻi ha palōfita ʻi he māmaní. Ko Siosefa Sāmitá ko ha palōfita pehē ia. Neongo ne fakahoko ʻe Siosefa ha ngaahi meʻa lahi ʻi he lolotonga ʻo ʻene moʻuí, ko e meʻa mahuʻinga tahá ʻa ʻene tukupā ke hoko ko ha ākonga mo ha fakamoʻoni ʻo Sīsū Kalaisí. Naʻá ne tohi ai, “Pea ko ʻeni, hili ʻa e ngaahi fakamoʻoni lahi ʻo kau kiate iá, ko e fakamoʻoni fakamuimui tahá ʻeni, ʻokú ma fai atu ʻo kau kiate iá: ʻOkú ne moʻui!“ (Tokāteline mo e Ngaahi Fuakava 76:22).

Ko kinautolu ko ia te nau maʻu e fakamoʻoni ʻa e Palōfitá ʻi he mālohi ʻo e Laumālie Māʻoniʻoní te nau ʻiloʻi hono moʻoni ʻo e ngāue ne ui ia ke ne fakahokó. ʻE toe lava foki ke nau maʻu ai mo e nonga pea mo e fiefia ko ē ʻoku fou mai ʻi he Fakamoʻui ko Sīsū Kalaisí, ʻa ia ne tauhi mo ngāue ki ai ʻa Siosefa Sāmitá.