Ko e fē ʻa e Siasi ʻoku Moʻoní?

Naʻe fanauʻi ʻa Siosefa Sāmita ʻi he 1805 ʻi Seiloni ʻi Veamoniti. Naʻe taʻu 14 pē ʻi he taimi ʻoku kamata ai ʻa e fakamatalá ni, pea ne kei nofo pē mo hono fāmilí ʻi Niu ʻIoake, mo fakakaukauʻi lahi pe ko e fē ʻa e siasi ʻe kau ki aí. Ko e fakamatala ʻeni ʻo e meʻa ne hoko kia Siosefá, ʻi heʻene lea pē ʻaʻaná.

ʻIhe taimi ko ʻeni ʻo e fuʻu ngaue ʻo e lotó, ne ueʻi hake ʻeku fakakaukaú ke fifili fakamātoato pea mo hohaʻa lahi. … Ne u faʻa pehē ai kiate au pē: Ko e hā ʻa e meʻa te u faí? Ko e fē ʻi he ngaahi tui fakalotú ni ʻoku moʻoní, pe ʻoku nau hala kotoa? Kapau ʻoku moʻoni ha taha ʻia kinautolu, ko feʻia ia, pea ʻe anga fēfē haʻaku ʻiloʻi?

Lolotonga ʻa e fakakaukau ʻa Siosefa pe ko e få ʻa e siasi ʻe kau ki aí, naʻá ne tafoki ki he Tohi Tapú ke maʻu mei ai ha fakahinohino. Naʻá ne lau ai ʻo pehå, “Kole ki he ʻOtuá.”

ʻI he lolotonga ʻo ʻeku fekuki mo e ngaahi faingataʻa lahi ko ʻeni ne fakatupu ʻe he fakafekiki ʻa e ngaahi kautaha lotú, ne u lau ai ʻi ha ʻaho ʻe taha ʻi he Tohi ʻa Sēmisí, ʻi he ʻuluaki vahé pea ʻi he veesi hono nimá, ʻa ia ʻoku pehē: “Ka ai hamou taha ʻoku masiva ʻi he potó, ke kole ʻe ia ki he ʻOtuá, ʻa ia ʻokú ne foaki lahi ki he kakai kotoa pē, pea ʻoku ʻikai valokiʻi; pea ʻe foaki ia kiate ia.”

Naʻe teʻeki ke hū mamafa ha potu folofolo ki ha loto ʻo ha tangata ʻo laka ange ʻi he mālohi naʻe hū ʻaki ʻe he meʻa ko ʻení ki hoku lotó, ʻi he taimi ko iá. Naʻe hangē naʻá ne hū ʻaki ʻe ia ha fuʻu mālohi lahi ki he tapa kotoa hoku lotó. Ne u toutou fakakaukau ki ai, ʻou ʻiloʻi, kapau naʻe ʻi ai ha taha ʻe ʻaonga ke ne maʻu ha poto mei he ʻOtuá, ko au ia; he naʻe ʻikai ke u ʻiloʻi pe ʻe founga fēfē, pea kapau he ʻikai te u lava ʻo maʻu ha poto lahi ange ʻi he poto ne u lolotonga maʻú, pea ta he ʻikai ke u toe ʻilo ia ʻe au ʻi ha taimi, koeʻuhí he naʻe pehē fau hono kehekehe ʻo e mahino ne maʻu ʻe he kau faiako fakalotu ʻi he ngaahi siasí, ʻo e ngaahi potu folofola tatau peé, ne iku ʻo mole ai ha toe falala ke tali ha fehuʻi ʻaki ha fekumi ki he Tohi Tapú.

Fāifai, peá u fakakaukau kuo pau ke u kei nofo ai pē ʻi he fakapoʻulí mo e puputuʻú, pe te u fakahoko ʻa e fakahinohino ne fai ʻe Sēmisí, ʻa ia ko e kole ki he ʻOtuá. Naʻe fāifai peá u fakapapau ʻi hoku lotó ke u “fehuʻi ki he ʻOtuá,” he neu tui kapau te ne foaki ʻa e potó kia kinautolu ʻoku masiva ʻi he potó, mo Ne foaki ʻo lahi, ʻo ʻikai valokiʻi, pea ta ʻoku lelei ke u ʻahiʻahi.