Ko Hono Fakafoki mai ʻo e Lakanga Fakataulaʻeikí

Naʻá ma kei fai atu pē ʻa e ngāue ki hono liliú, pea ʻi he māhina hono hokó (Mē, 1829), naʻá ma ō ai ʻi ha ʻaho ʻe taha ki ha vao ʻakau ke lotu mo fehuʻi ki he ʻEikí fekauʻaki mo e papitaiso ki he fakamolemole ʻo e ngaahi angahalá, ʻa ia ne ma ʻilo ʻi haʻama lau ai ʻi he ngaahi meʻa kuo liliu mei he ū lauʻi tohi koulá. Pea ʻi he lolotonga ʻo ʻema fai pehē, ʻo lotu ki he ʻEikí, ʻiloange naʻe ʻalu hifo ha talafekau mei he langí ʻi ha konga ʻao ngingila, pea naʻá ne hilifaki hono ongo nimá kiate kimaua, ʻo ne fakanofo kimaua ʻo pehē:

Joseph Smith, Jr. and Oliver Cowdery kneeling before John the Baptist. John the Baptist has his hands placed on the head of Joseph Smith, Jr. as he restores the Aaronic Priesthood. John is depicted wearing white. There are trees and a river in the background.

“ʻI he huafa ʻo e Mīsaiá, ʻoku ou foaki kiate kimoua, ʻa ʻeku ongo kaungā tamaioʻeiki, ʻa e Lakanga Taulaʻeiki Faka-ʻĒloné, ʻa ia ʻoku kau ai ʻa e ngaahi kī ʻo e tauhi mai ʻa e kau ʻāngeló, mo e ongoongolelei ʻo e fakatomalá pea mo e papitaiso ʻi he fakauku ke fakamolemole ai ʻa e angahalá; pea ʻe ʻikai pē ke toe ʻave ia mei māmani ʻo aʻu ki hono toe fai ʻe he ngaahi foha ʻo Līvaí ha feilaulau ki he ʻEikí ʻi he māʻoniʻoni.”

Naʻá ne pehē ko e Lakanga Taulaʻeiki Faka-ʻĒloné ni ʻoku ʻikai ke ʻi ai ʻa e mālohi ke hilifaki nima ʻo foaki ʻa e Laumālie Māʻoniʻoní, ka ʻe toki foaki ia kiate kimaua ʻamui ange; peá ne fekau leva ke ma ō ʻo papitaiso mo ne fakahinohino ke u tomuʻa papitaiso ʻe au ʻa ʻŌliva Kautele, pea hili ia peá ne toki papitaiso ʻe ia au.

Ne ma fakahoko ʻo fakatatau mo ia peá ma papitaiso. Ne u ʻuluaki papitaiso ʻe au ia, pea hili iá naʻá ne toki papitaiso ʻe ia ʻa au—ʻi he hili ʻení, ne u hilifaki hoku ongo nimá ki hono ʻulú ʻo fakanofo ia ki he Lakanga Taulaʻeiki Faka-ʻĒloné, pea ʻi he ʻosi iá ne ne toki hilifaki hono ongo nimá kiate au ʻo fakanofo au ki he Lakanga Fakataulaʻeiki tataunaʻe pehē hono fekauʻi kimauá.

Joseph standing and reading paper; Oliver Cowdery sits in prayerful attitude at his far side. Signed.

Naʻe fakahā mai ʻe he talafekau ko ia ne ʻaʻahi mai ʻi he meʻá ni ʻo ne foaki mai ʻa e Lakanga Fakataulaʻeiki ko ʻení, ko hono hingoá ko Sione, ko e tokotaha tatau pē ia naʻe ui ko Sione Papitaiso ʻi he Fuakava Foʻoú, pea ko ʻene fakahoko ʻeni ʻo fakatatau mo e tuʻutuʻuni ʻa Pita, Sēmisi, pea mo Sione, ʻa ia ʻoku nau maʻu ʻa e ngaahi kī ʻo e Lakanga Taulaʻeiki Faka-Melekisētekí, ʻa ia ko e Lakanga Fakataulaʻeiki ʻeni naʻá ne pehē, ʻe toki foaki ʻi hono taimi totonu kiate kimaua, pea ʻe ui au ai ko e fuofua Kaumātuʻa ʻo e Siasí, pea hoko ʻa (ʻŌliva Kautele) ko e kaumātua hono ua. Ko e ʻaho hongofulu mā nima ia ʻo Mē ʻo e 1829, ne fakanofo ai kimaua ʻi he nima ʻo e talafekaú ni, mo papitaisó.

Half-length frontal portrait of the Prophet Joseph Smith, Jr. Joseph's head is turned to the side in a three-quarter view, right hand on hip and his left hand holds sheets of papers. He is depicted wearing a dark brown suit and a white shirt and tie.

ʻI heʻema ʻalu hake pē mei he vaí hili homa papitaisó, ne hoko kiate kimaua ha ngaahi fuʻu tāpuaki lalahi mo nāunauʻia mei heʻetau Tamai Hēvaní. He naʻe ʻikai fuoloa mei heʻeku papitaiso ʻa ʻŌliva Kautelé, kuo tō kiate ia ʻa e Laumālie Māʻoniʻoní, pea tuʻu ia ʻo ne kikiteʻi ha ngaahi meʻa lahi ʻe vave haʻane hoko mai. Pea ʻikai ngata ai, ka ʻi he ʻosi pē ʻene papitaiso aú, naʻá ku toe maʻu ʻe au ʻa e laumālie ʻo e kikité, pea ʻi heʻeku tuʻu ki ʻolungá, naʻá ku kikite fekauʻaki mo tupu ʻa e Siasí, pea mo ha ngaahi meʻa lahi kehe ʻo fekauʻaki mo e Siasí, pea mo e toʻutangata ko ʻeni ʻo e fānau ʻa e tangatá. Naʻe fakafonu ʻaki kimaua ʻa e Laumālie Māʻoniʻoní, ʻo ma nēkeneka ai ʻi he ʻOtua ʻo homa fakamoʻuí.

Ko e fakamoʻoni mahino ngofua mo fakahangatonu ʻeni ʻa Siosefa Sāmita, ʻi heʻene fakamatalaʻi ha niʻihi ʻo e ngaahi meʻa ne hoko ʻo aʻu mai ki hono Fakafoki mai ʻo e ongoongoleleí pea mo hono fokotuʻu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Koeʻuhí ke ke maʻu ha fakamatala kakato lahi ange ki he talanoa ʻo Siosefa Sāmitá, vakai ki he Hisitōlia ʻo Siosefa Sāmitá ʻi he Mataʻi Tofe Mahuʻingá pe ko e [Hisitōlia ʻo e Siasí] History of the Church, 1:2–79.