Fakatangá
Ka naʻe vave ʻeku ʻiloʻi … kuo langaki ʻe heʻeku fai ʻa e talanoá ni ha fuʻu tāufehiʻa noaʻia mai pē kiate au ʻi he fuʻu kakai ko ia ne nau ului ki he lotú, pea ne tupu ai ha fakatanga lahi moʻoni, ʻa ia ne fakautuutu ʻene ʻāsilí; pea neongo ko ha tamasiʻi au naʻe ʻikai ʻiloa, kuo hoko hoku taʻu hongofulu mā faá ka ʻoku teʻeki ke u taʻu hongofulu mā nima, pea ko hoku tuʻunga ʻi he moʻuí naʻe ʻikai feʻunga ia ke ne ʻai ha tamasiʻi ke mahuʻinga ʻi he māmaní, ka naʻe feʻunga ʻa e faʻa tokanga mai ʻa ha kau tangata māʻolunga ʻo hohaʻa ai ʻa e loto ʻo e kakaí fekauʻaki mo au, pea langaki ai ha fuʻu fakatanga fakamamahi; pea naʻe hoko tatau ʻeni mei he ngaahi siasí kotoa—he naʻa nau kau fakataha kotoa ke fakatangaʻi au.
Ne tupunga heni haʻaku fakakaukau fakamātoato ʻi he taimi ko iá, pea tupu ai haʻaku fifili ʻo pehē, hono ʻikai ngali kehe moʻoni ke lau ha kiʻi tamasiʻi taʻe ʻiloa ʻoku taʻu hongofulu mā fā pē, mo haʻisia ke maʻu ʻene moʻui fakaʻaho māʻulaló ʻaki haʻane ngāueʻi, ko ha taha kuo feʻunga hono ongoongó ke tokanga mai ai ki ai ʻa e kau tuʻukimuʻa ʻo e ngaahi siasi ʻiloa ʻo e ʻaho ko iá, pea ʻi ha founga kuó ne langaki ai ʻiate kinautolu ha lotoʻi fie fakatanga mo lauʻikovi fakamamahi pehē. Tatau ai pē pe naʻe ngali kehe pe ʻikai, ka ko e meʻa ia ne hokó, peá ne faʻa hoko ai ia ko ha tupuʻanga ʻo ha mamahi lahi ʻiate au.
Neongo ia, ka ko e moʻoni naʻá ku mamata ki ha meʻa-hā-mai. Talu mei ai mo ʻeku fakakaukau, ʻoku ou ongoʻi meimei tatau mo Paula ʻi heʻene tali ki hono tukuakiʻi ia ʻi he ʻao ʻo e Tuʻi ko ʻAkilipá, ʻo ne fakamatala ai ha meʻa-hā-mai naʻá ne maʻu ʻi haʻane mamata ki ha maama, mo fanongo ki ha leʻo; ka naʻe kei tokosiʻi pē ha kakai ne tui kiate ia; naʻe pehē ʻe ha niʻihi ʻoku kākā, pea pehē ʻe ha niʻihi ʻoku faha; pea naʻe manukiʻi mo lauʻi koviʻi ai ia. Ka naʻe ʻikai maumauʻi ʻehe ngaahi meʻá ni kotoa hono moʻoni ʻo ʻene mata-meʻa-hā-maí. Naʻe mamata ki ha meʻa-hā-mai, ʻo ne ʻilo ne mamata ki ai, pea naʻe ʻikai ai ke lava ʻe he ngaahi fakatanga kotoa ʻi he lalo langí ke liliu ia ke kehe mei ai; pea neongo te nau fakatangaʻi ia ʻo aʻu ki he maté, ka kuó ne ʻiloʻi, pea te ne ʻiloʻi ai pē ʻo aʻu ki heʻene mānava fakaʻosí, naʻá ne fakatou mamata ki ha maama mo ongona ha leʻo ne folofola mai kiate ia, pea he ʻikai lava ʻe māmani kotoa ʻo ngaohi pe ʻai ia ke kehe ʻene tuí mo ʻene fakakaukaú mei ai.
Naʻá ku pehē pē mo au. Kuó u mamata moʻoni ki ha maama, pea naʻá ku mamata ʻi he lotolotonga ʻo e maama ko iá ki ha Ongo Tangata, pea naʻá na folofola moʻoni mai kiate au; pea neongo naʻe fehiʻanekinaʻi mo fakatangaʻi au koeʻuhí ko ʻeku taukaveʻi ne u mamata ki ha meʻa-hā-maí, ka ʻoku kei moʻoni pē ia; pea ʻi he lolotonga ʻo ʻenau fakatangaʻi mo lauʻikoviʻi, pea mo lohiakiʻi fakakākā ʻi he ngaahi founga kovi kotoa pē ʻi heʻeku lea ʻaki iá, naʻe ueʻi ai au ke u pehē ʻi hoku lotó: Ko e hā ʻoku fakatangaʻi ai au ʻi heʻeku tala ʻa e moʻoní? Ne u mamata moʻoni ki ha meʻa-hā-mai; pea ko hai au ke u fakafepaki ki he ʻOtuá, pe ko e hā ʻoku fakakaukau ai ʻa māmani ke nau ʻai au ke u fakaʻikaiʻi ʻa e meʻa ne u mamata moʻoni ki aí? He naʻá ku mamata ki ha meʻa-hā-mai; ʻoku ou ʻiloʻi ia, pea ʻoku ou ʻiloʻi naʻe ʻafioʻi ia ʻe he ʻOtuá, pea he ʻikai ke u lava ʻo fakaʻikaiʻi ia , pe te u loto lahi ke fai pehē; he ʻoku ou ʻiloʻi kapau te u fai pehē te u fakatupu houhau ai ki he ʻOtuá, pea tō ai ki he malaʻiá.
Kuó u fakafiemālieʻi heni hoku lotó fekauʻaki mo haʻa lotu—ʻoku ʻikai ko haku fatongia ke kau ki ha taha ʻo kinautolu, ka ke u hokohoko pehē atu ai pē kae ʻoua kuo toe fakahinohinoʻi au. Kuó u ʻilo heni ʻoku moʻoni ʻa e fakamoʻoni ʻa Sēmisí—ʻe lava ke kole ki he ʻOtuá ha tangata ʻoku masiva ʻi he potó, peá ne maʻu, ka he ʻikai valokiʻi ia.
Ne hoko atu pē ʻeku ngaahi ngāue anga maheni ʻi heʻeku moʻuí ʻo aʻu ki he ʻaho uofulu mā taha ʻo Sepitema ʻo e taʻu tahaafe valungeau uofulu mā tolú, ʻo u tofanga maʻu ai pē ʻi he ngaahi fakatanga ne fai ʻe he nima ʻo ha kakai kehekehe, ʻo fakatouʻosi pē ʻa e kau lotú mo e kau taʻe lotú, koeʻuhí he naʻá ku kei hoko atu pē ʻi hono fakamoʻoniʻi ʻa ʻeku mamata ki ha meʻa-hā-maí.
ʻI he vahaʻa taimi mei heʻeku mamata ki he meʻa-hā-maí pea mo hono tahaafe valungeau mā uofulu mā tolu ʻo e taʻú—pea tuʻunga ʻi hono fekau ke ʻoua naʻá ku kau ki ha taha ʻo e ngaahi faʻahi fakalotu ʻo e taimi ko iá, pea mo ʻeku kei siʻi mo fakatangaʻi au ʻe kinautolu ne totonu ke nau hoko ko hoku ngaahi kaungāmeʻa mo ngaohi leleiʻi aú, ʻa ia naʻe totonu ke nau feinga ʻi ha founga totonu mo ngali angaʻofa ke nau fakatafoki au ʻo kapau ne nau pehē kuo kākaaʻi au—ka ne tuku au ki he ngaahi faʻahinga kehekehe ʻo e ʻahiʻahí; pea ʻi heʻeku feohi mo e faʻahinga kehekehe ʻo e kakaí, ne u faʻa tō ai ki ha ngaahi fehālaaki taʻe fakapotopoto, mo hāsino ai ʻa e vaivai ʻo e kei tupu haké, mo e ngaahi tō-nounou ʻa e faʻahinga ʻo e tangatá; ʻa ia, ʻoku ou fakameʻapangoʻia ai ke u pehē, ne takiekina ai au ki ha ngaahi ʻahiʻahi kehekehe naʻe ʻikai fakahōifua ʻi he ʻao ʻo e ʻOtuá. ʻI heʻeku fakahā ʻení, ʻoku ʻikai totonu ke fakakaukau ai ha taha ʻo pehē ne u ʻefihia ʻi ha ngaahi angahala lalahi pe kovi ʻaupito. He naʻe ʻikai ke tetei ʻi hoku natulá ke u fai ha faʻahinga anga pehē.