Sa Unsang Paagi Ipakigbahin sa mga Bata ang Ebanghelyo

Si Jesukristo nahigugma ug miserbisyo sa uban. Mipakigbahin Siya sa ebanghelyo kanila ug midapit kanila sa pagsunod Kaniya. Makatabang kamo sa inyong mga higala nga makat-on mahitungod ni Jesus ug mobati usab sa Iyang gugma. Makapakita kamo og gugma kanila, makapakigbahin kamo sa unsay inyong gituohan, ug makadapit kanila sa pagkat-on og dugang mahitungod ni Jesukristo ug sa Iyang Simbahan.

Mga Paagi nga Ipakigbahin sa mga Bata ang Ebanghelyo

Pag-ampo sa Langitnong Amahan alang sa tabang.
Pahinumdomi ang usa ka tawo nga gihigugma siya sa Dios—ug ingon man usab kamo!
Magbaton og bag-ong higala.
Hangyoa ang inyong mga ginikanan sa pagtabang kaninyo sa pagserbisyo sa silingan.
Pagpakigbahin og istorya kon giunsa pagtubag sa Dios ang inyong mga pag-ampo.
Magmahimong maayo nga ehemplo sa uban.
Dapita ang usa ka higala sa pag-adto sa simbahan o sa usa ka kalihokan sa Primary uban kaninyo.

Mga Kapanguhaan nga Mahimong Ipakigbahin sa mga Bata sa mga Higala

Propetikanhong Tambag

Si Presidente Russell M. Nelson nagsulti kanato nga matag usa kanato adunay “sagrado nga responsibilidad sa pagpakigbahin sa kalinaw ni Jesukristo ngadto sa tanan kinsa maminaw”—bisan ang mga bata. Mahimo kamong mopakigbahin sa ebanghelyo karon ug mag-andam nga mahimong usa ka full-time nga misyonaryo pinaagi sa “pagkahimong maayo nga ehemplo” ug “pagsunod ni Jesukristo aron nga ang Iyang kahayag mosanag sa inyong mga mata” (“Unsaon Nimo nga Mahimong usa ka Misyonaryo,” Higala, Hulyo 2023, 2).

Pag-ampo ug hangyoa ang Langitnong Amahan sa pagtabang kaninyo sa paghunahuna og mga paagi sa pagpakigbahin sa ebanghelyo. Makatabang Siya kaninyo nga makahibalo kon kinsa ang andam na sa pagkat-on og dugang pa mahitungod kang Jesukristo. Makatabang Siya kaninyo nga mahimong maisogon ug mahibalo unsay isulti. Makatabang Siya kaninyo sa pagpakigbahin sa gugma ni Jesukristo ngadto sa uban. Ug Siya makatabang kaninyo nga mobati nga malipayon ug malinawon sa pagbuhat ninyo niini!