Sa Unsang Paagi ang mga Hamtong Makapakigbahin sa Ebanghelyo

Ang pagdapit sa uban sa pagduol ngadto ni Kristo mao “ang labing importante nga pagdapit nga inyo gayong matanyag sa laing tawo,” tungod kay ang ebanghelyo ni Jesukristo naghatag sa katawhan og kalinaw, giya, ug kusog (Henry B. Eyring, “Duol Ngadto ni Kristo,” Liahona, Mar. 2008, 49).

Mga Pamaagi nga Ikapakigbahin sa mga Hamtong ang Ebanghelyo

Sultihi ang usa ka tawo nga ang Dios nahigugma kaniya ug kamo usab.
Paminaw sa usa ka higala nga walay paghukom, ug ipakigbahin ang inyong pagsalig nga ang Dios motabang kaniya.
Paghupay sa usa ka higala nga nakasinati og usa ka hagit—ug pag-ampo uban ug alang kaniya.
Pag-text sa usa ka higala nga dugay na ninyong wala makasulti, ug pahibaloa siya nga kamo nagpakabana.
Hisgoti kon unsay inyong nakat-onan sa simbahan sa kataposan sa semana.
Pagpakigbahin og kalihokan sa ward pinaagi sa post sa social media o personal nga pagdapit.
Pagpakigbahin og kasulatan sa usa ka higala nga nag-atubang og hagit.
Pagpaila sa inyong kaugalingon ngadto sa usa ka bisita sa simbahan, o lingkod tapad sa usa ka tawo nga bag-o.
Pagdapit og usa ka higala sa pag-apil sa klase sa pagbarog pinaagi sa kinaugalingong paningkamot o sa EnglishConnect nga klase uban kaninyo.

Mga Kapanguhaan nga Ikapakigbahin sa mga Hamtong ngadto sa mga Higala

Propetikanhong Tambag

Aduna kamoy kahigayonan, matag adlaw, sa pagpakigbahin sa ebanghelyo ngadto sa mga tawo sa inyong palibot ug tabangi sila sa pag-anam-anam nga mas mapaduol ngadto ni Jesukristo. Si Presidente Russell M. Nelson nagmatuod pag-usab: “Ang tanan angayan nga hatagan og kahigayonan nga mahibalo mahitungod sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga ‘[dili] matugkad sa tawo’ [Mga Taga-Filipos 4:7]” (“Pagsangyaw sa Ebanghelyo sa Kalinaw,” Liahona, Mayo 2022, 7).

Ilakip ang Langitnong Amahan sa inyong mga paningkamot, ug pangayo og tabang Kaniya samtang kamo molihok ubos sa mga baroganan sa “paghigugma, pagpakigbahin, ug pagdapit.” Siya mogiya kaninyo ngadto sa piho nga mga gusto ug mga panginahanglan sa mga tawo sa inyong palibot. Siya magauban kaninyo samtang kamo mopakigbahin sa mga pagdapit nga makatubag sa ilang mga panginahanglan.

Samtang mag-ampo kamo alang sa mga oportunidad ug molihok niini, makakita kamo og mga tawo nga andam sa paghimo ug sa pagtuman sa mga pakigsaad. Inyong masabtan sa mas lawom nga paagi unsa ang gipasabot sa pagkahimong instrumento sa pagtabang sa uban nga makasulod sa dalan sa pakigsaad. Ang Langitnong Amahan mopuno sa inyong kinabuhi og kalipay samtang inyong tabangan ang mga higala nga mobati sa Espiritu ug mopaduol kang Jesukristo.

Hunahunaa ang pagserbisyo og usa ka full-time o pangserbisyo nga misyon isip usa ka magtiayon o indibidwal kutob sa itugot sa inyong kahimtang. “Adunay daghan kaayo nga mga paagi nga ang senior nga mga misyonaryo makabuhat sa unsay dili mabuhat ni bisan kinsa. Kamo usa ka talagsaon nga puwersa alang sa kaayohan, adunay daghang kasinatian sa Simbahan, ug anaa sa nindot kaayo nga posisyon sa pag-awhag ug pagluwas sa mga anak sa Dios. … Samtang kamo moserbisyo, inyong mabati ang gugma sa Ginoo diha sa inyong kinabuhi, kamo makaila Kaniya, Siya makaila kaninyo, ug ‘unsa ka dako ang [inyong] hingpit nga kalipay’ [Doktrina ug mga Pakigsaad 18:15]” (Ronald A. Rasband, “Unsa kaha Kadako ang Imong Hingpit nga Kalipay,” Liahona, Nob. 2023, 53, 54).