Sa Unsang Paagi ang mga Pamilya Makapakigbahin sa Ebanghelyo

“Si Jesukristo miestablisar sa Iyang Simbahan aron ang mga indibidwal ug mga pamilya [makabuhat] sa Iyang buhat sa kaluwasan ug kahimayaan” (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.3, Librarya sa Ebanghelyo). Ang pagpaambit sa ebanghelyo usa ka importante nga bahin niana nga dakong buluhaton. “Kadaghanan niining mga tawhana nagpangita og unsay katuyoan sa kinabuhi. Sila may kabalaka alang sa ilang kaugmaon ug sa ilang mga pamilya” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 1).

Mga Paagi nga ang mga Pamilya Makapakigbahin sa Ebanghelyo

Magdapit og pamilya nga mag-family home evening, panihapon, o gabii sa pagdula uban kaninyo.
Magdapit og pamilya nga mokuyog ninyo sa simbahan.
Magpraktis sa pagpaambit sa ebanghelyo isip pamilya sa drama-drama nga paagi.
Magtuon og dungan sa Isangyaw ang Akong Ebanghelyo isip pamilya, ug buhata ang mga pagtulon-an nga anaa niini.
Magserbisyo og pamilya nga nanginahanglan, o magdapit og pamilya aron moapil sa usa ka giorganisar nga service project uban kaninyo.
Magtabang og pamilya nga mokonektar sa ilang mga katigulangan.
Magdapit og pamilya nga motambong og kalihokan sa Simbahan o party uban kaninyo.
Magdapit og pamilya nga motambong og open house sa templo, ug ipasabot kon sa unsang paagi ang mga templo maghiusa sa mga pamilya sa kahangtoran pinaagi ni Jesukristo.
Magdapit og mga miyembro sa pamilya nga motambong og klase sa pagbarog pinaagi sa kinaugalingong paningkamot o klase sa EnglishConnect.

Mga Kapanguhaan nga Ikapakigbahin sa mga Pamilya ngadto sa mga Higala

Propetikanhong Tambag

Mag-ampo isip pamilya aron tabangan sa Langitnong Amahan nga mapaambit ang ebanghelyo ngadto sa mga tawo nga anaa sa inyong palibot. Ipakigbahin ang inyong mga hunahuna ug mga ideya sa usag usa mahitungod kon unsaon ninyo nga makapaambit sa ebanghelyo isip pamilya pinaagi sa pagbuhat sa mga baroganan sa “paghigugma, pagpakigbahin, ug pagdapit.” Sama sa mga anak sa Dios diha sa Alma 6:6, kamo mahimong “makighiusa diha sa pagpuasa ug sa hugot nga pag-ampo alang sa kaayohan sa mga kalag kinsa wala makaila sa Dios.”

Magsunod sa mga pag-aghat sa Espiritu Santo ug pagsinuportahay sa usag usa sa inyong mga paningkamot. Samtang ang inyong pamilya mopaambit sa ebanghelyo, kamo makadawat sa mga panalangin sa Langitnong Amahan ug mobati sa kabuhong sa hingpit nga kalipay. “Kon kita tinud-anay nga nagdayeg kang Jesukristo ug sa Iyang ebanghelyo, mas malipayon kita, mas aduna kitay kadasig sa buhat sa Dios” (Ulisses Soares, “Nagdayeg kang Kristo ug sa Iyang Ebanghelyo,” Liahona, Mayo 2022, 115).