10. Kanana tamin’ny Andron’ny Testamenta Taloha

Dana (Laisy) Nanao ombikely volamena i Jeroboama hotompoin’ny Fanjakana Avaratra (1 Mpan. 12:26–33). I Dana no farany avaratra indrindra amin’ny Isiraely fahizay.

Tendrombohitra Karmela Nifanamby tamin’ireo mpamin’nynin’i Bala i Elia ary nanokatra ny lanitra hisian’ny orana (1 Mpan. 18:17–46).

Megido Toeran’ny ady maro (Mpits. 4:13–16; 5:19; 2 Mpan. 23:29; 2 Tan. 35:20–23). Nampanao fanompoana i Solomona hanorenana an’i Megido (1 Mpan. 9:15). Maty noho ny ratrany i Josia mpanjakan’i Joda tamin’ny ady nifanaovana tamin’i Farao Nekao tao Egypta (2 Mpan. 23:29–30). Amin’ny fiavian’ny Tompo fanindroany, ny ady lehibe farany dia hitranga ao amin’ny Lohasahan’i Jezrela, ho isan’ny adin’i Hara-magedona (Joela 3:14; Apôk. 16:16; 19:11–21). Ny anarana Hara-magedôna dia fandikana malalaka amin’ny teny Grika ny teny Hebreo Har Megiddon, na Tendrombohitr’i Megido.

Jezrela Anaran’ny tanàna ao amin’ny lohasaha lehibe sady lonaka indrindra ao Isiraely, izay mitondra io anarana io koa. Nanorina lapa tao ireo mpanjakan’ny Fanjakana Avaratra (2 Sam. 2:8–9; 1 Mpan. 21:1–2). Nonina sy maty tao i Jezebela mpanjakavavy ratsy fanahy (1 Mpan. 21; 2 Mpan. 9:30).

Beti-sana Nifanatrika tamin’ny Kananita tao ny Isiraely (Jos. 17:12–16). Nohomboana teo amin’ny rindrin’io manda io ny fatin’i Saoly (1 Sam. 31:10–13).

Dotana Namidin’ireo rahalahiny ho andevo i Josefa (Gen. 37:17, 28; 45:4). Nahita fahitana ny amin’ny tendrombohitra feno soavaly sy kalesy i Elisa (2 Mpan. 6:12–17).

Samaria Ny renivohitry ny Fanjakana Avaratra (1 Mpan. 16:24–29). Nanorina tempoly ho an’i Bala i Ahaba Mpanjaka (1 Mpan. 16:32–33). Nanompo tao i Elia sy i Elisa (1 Mpan. 18:2; 2 Mpan. 6:19–20). Azon’ny Asyriana izy tamin’ny 721 taona talohan’i Kristy, ka tanteraka tamin’izay ny famaboana ny foko folo (2 Mpan. 18:9–10).

Sekema Nanorina alitara i Abrahama (Gen. 12:6–7). Nonina tsy lavitra tao i Jakoba. Novonoin’i Simeona sy i Levy ny lehilahy rehetra tao amin’io tanàna io (Gen. 34:25). Avy tao Sekema ny fankaherezan’i Josoa “hifidy … anio” hanompo an’ Andriamanitra (Jos. 24:15). Naorin’i Jeroboama tao ny renivohitra voalohan’ny Fanjakana Avaratra (1 Mpan. 12).

Tendrombohitra Ebala sy ny Tendrombohitra Gerizima Nizara an’i Isiraely teo amin’ireo tendrombohitra roa ireo i Josoa—Nambara avy eo amin’ny Tendrombohitra Gerizima ny fitahian’ny lalàna, raha teo amin’ny Tendrombohitra Ebala kosa ny ozona (Jos. 8:33). Nanorina tempoly teo ambonin’i Gerizima ny Samaritana taty aoriana (2 Mpan. 17:32–33).

Penoela (Peniela) Tao i Jakoba no nifampitolona indray alina manontolo tamin’ny iraky ny Tompo (Gen. 32:24–32). Nandrava ny mandan’ny Midianita i Gideona (Mpits. 8:5, 8–9).

Jopa Niantsambo avy eo i Jona hankany Tarsisy mba handositra ny asa nanirahana azy ho any Ninive (Jon. 1:1–3).

Silo Tao no toeran’ny renivohitr’i Isiraely sy ny tabernakely tamin’ny andron’ny Mpitsara (1 Sam. 4:3–4).

Betela (Loza) Teo no nisarahan’i Abrahama tamin’i Lota (Gen. 13:1–11) sy nahazoany fahitana (Gen. 13; Abr. 2:19–20). Nahita fahitana ny amin’ny tohatra nanakatra ny lanitra i Jakoba (Gen. 28:10–22). Nipetraka tao nandritra ny fotoana iray ny tabernakely (Mpits. 20:26–28). Nanao ombikely volamena i Jeroboama hotompoin’ny Fanjakana Avaratra (1 Mpan. 12:26–33).

Gibeona Avy ao ny mponina Hivita no namela-pandrika tamin’i Josoa hanao fifanekena (Jos. 9). Nijanona tsy nihetsika ny masoandro raha nandresy tamin’ny ady i Josoa (Jos. 10:2–13). Toerana vonjy maika ho an’ny tabernakely koa izany (1 Tan. 16:39).

Gaza, Asdoda, Askelona, Ekrona, Gata (ireo tanàna dimin’ny Filistina) Namaky ady matetika tamin’i Isiraely avy teo amin’ireo tanàna ireo ny Filistina.

Betlehema Nalevina tsy lavitra teo i Rahely (Gen. 35:19). Nonina tao i Rota sy i Boaza (Rota 1:1–2; 2:1, 4). Nantsoina hoe ny tanànan’i Davida io tanàna io (Lio. 2:4).

Hebrona Nonina tao i Abrahama (Gen. 13:18), i Isaka, i Jakoba (Gen. 35:27), i Davida (2 Sam. 2:1–4), ary i Absaloma (2 Sam. 15:10). Io no renivohitr’i Joda voalohany teo ambany fanapahan’i Davida Mpanjaka (2 Sam. 2:11). Heverina fa milevina ao Hebrona ao amin’ny lava-baton’i Makpela i Abrahama, i Saraha, i Isaka, i Rebeka, i Jakoba, ary i Lea (Gen. 23:17–20; 49:31, 33).

En-gedia Niafina an’i Saoly i Davida ary nitsimbina ny ain’i Saoly (1 Sam. 23:29–24:22).

Gerara Nisy fotoana nonina tao i Abrahama sy i Isaka (Gen. 20–22; 26).

Beri-seba Nandavaka fantsakana tao i Abrahama ary nanao fanekena tamin’i Abimeleka (Gen. 21:31). Nahita ny Tompo i Isaka (Gen. 26:17, 23–24), ary nonina tao i Jakoba (Gen. 35:10; 46:1).

Sodoma sy Gomora Nifidy ny honina tao Sodoma i Lota (Gen. 13:11–12; 14:12). Noravan’ Andriamanitra noho ny faharatsiana i Sodoma sy i Gomora (Gen. 19:24–26). Nampiasain’i Jesoa ho ohatra amin’ny faharatsiana ireo tanàna roa ireo (Mat. 10:15).