13. Ny Dia Fitoriana nataon’ny Apôstôly Paoly

Gaza Nitory ny amin’i Kristy i Filipo ary nanao batisa tandapa Etiopiana iray raha teo an-dalana ho any Gaza (Asa 8:26–39).

Jerosalema Jereo sarintany 12 momba ny zava-nitranga tao Jerosalema.

Jopa Azon’i Petera ny fahitana manambara fa manolotra ny fanomezan’ny fibebahana amin’ny Jentilisa Andriamanitra (Asa 10; 11:5–18). Nanangana an’i Tabita tamin’ny maty i Petera (Asa 9:36–42).

Samaria Nanompo tao Samaria i Filipo (Asa 8:5–13), ary nampianatra tao i Petera sy i Jaona taty aoriana (Asa 8:14–25). Taorian’ny nanoloran’izy ireo ny fanomezana ny Fanahy Masina, dia nitady ny hividy io fanomezana io tamin’izy ireo i Simona mpanao ody (Asa 8:9–24).

Kaisaria Rehefa avy nitory tamin’ny Kapiteny antsoina hoe Kornelio ny anjely tao, dia namela azy hatao batisa i Petera (Asa 10). Tao no niaro tena nanoloana an’i Agripa i Paoly (Asa 25–26; jereo koa JS—T 1:24–25).

Damaskosy Niseho tamin’i Saoly i Jesoa (Asa 9:1–7). Taorian’ny namerenan’i Ananiasy ny fahitan’i Saoly, dia natao batisa i Saoly ary nanomboka ny asa fanompoany (Asa 9:10–27).

Antiokia (ao Syria) Tao no niantsoana voalohany ny mpianatra ho Kristiana (Asa 11:26). Naminany mosary i Agabo (Asa 11:27–28). Nisy fifanoherana lehibe nitranga tao Antiokia mikasika ny famorana (Asa 14:26–28; 15:1–9). Tao Antiokia no nanombohan’i Paoly ny asa fitoriany faharoa, miaraka amin’i Silasy sy i Barnabasy ary i Jodasy Barsabasy (Asa 15:22, 30, 35).

Tarsa Tanàna niavian’i Paoly; nalefan’ireo rahalahy nankao i Paoly mba hiarovana ny ainy (Asa 9:29–30).

Kiprosy Nandositra nankao ireo olomasina sasany taorian’ny fanenjehana azy (Asa 11:19). Nandalo namakivaky an’i Kiprosy i Paoly tamin’ny dia fitoriana nataony voalohany (Asa 13:4–5), tahaka izany koa i Barnabasy sy i Marka taty aoriana (Asa 15:39).

Pafo Nanozona mpanao ody i Paoly tao (Asa 13:6–11).

Derbe Nitory ny filazantsara tao amin’io tanàna io i Paoly sy i Barnabasy (Asa 14:6–7, 20–21).

Listra Nohobiana toy ny Andriamanitra i Paoly sy i Barnabasy raha nanasitrana kilemaina iray i Paoly. Notoraham-bato sy noheverina fa maty i Paoly saingy mbola velona sy nanohy ny fitoriana (Asa 14:6–21). Fonenan’i Timoty (Asa 16:1–3).

Ikonioma Nitory tao i Paoly sy i Barnabasy tamin’ny asa fitoriana voalohany nataony ary norahonana ny hotoraham-bato (Asa 13:51–14:7).

Laodikia sy Kolosy Laodikia no iray amin’ireo sampan’ny Fiangonana izay novangian’i Paoly sy nandray taratasy avy aminy (Kol. 4:16). Io koa no iray amin’ireo tanàna fito voatanisa ao amin’ny bokin’ny Apôkalipsy (ireo hafa dia i Efeso, i Smirna, i Pergamosy, i Tyatira, i Sardisy, ary i Filadelfia; jereo Apôk. 1:11). 18 kilaometatra atsinanan’i Laodikia i Kolosy. Nanoratra tamin’ireo Olomasina izay nonina tao i Paoly.

Antiokia (ao Pisidia) Nampianatra ny Jiosy i Paoly sy i Barnabasy tamin’ny asa fitoriana nataony voalohany fa avy amin’ny taranak’i Davida i Kristy. Nanolotra ny filazantsara tamin’i Isiraely, ary avy eo tamin’ny Jentilisa i Paoly. Nenjehina sy noroahina i Paoly sy i Barnabasy (Asa 13:14–50).

Mileto Nanditra ny asa fitoriana fahatelo nataony, dia nampitandrina an’ireo loholon’ny Fiangonana i Paoly fa hisy “amboadia masiak” hiditra eo amin’ny ondry (Asa 20:29–31).

Patmo Gadra tao amin’io nosy io i Jaona raha nandray ny fahitana izay hita ankehitriny ao amin’ny bokin’ny Apôkalipsy (Apôk. 1:9).

Efeso Nitory tamin-kery tao i Apolosy (Asa 18:24–28). I Paoly, tamin’ny asa fitoriana fahatelo nataony, dia nampianatra tao Efeso nandritra ny roa taona ka nampiova fo olona maro (Asa 19:10, 18). Nanolotra ny fanomezana ny Fanahy Masina tamin’ny fametrahan-tanana izy tao (Asa 19:1–7) ary nanao fahagagana maro, ka isan’izany ny fandroahana fanahy ratsy (Asa 19:8–21). Tao no nitarihan’ireo mpivavaka amin’i Diana sahotaka hanoherana an’i Paoly (Asa 19:22–41). Mivantana amin’ny Fiangonana ao Efeso ny ampahany amin’ny bokin’ny Apôkalipsy (Apôk. 1:11).

Troasy Raha mbola tao i Paoly nandritra ny dia fitoriana faharoa nataony, dia nahita tamin’ny fahitana lehilahy iray any Masedonia izay nangataka fanampiana (Asa 16:9–12). Nanangana an’i Eotyka tamin’ny maty i Paoly nandritra ny dia fahatelo nataony (Asa 20:6–12).

Filipo Nampiova fo ny vehivavy iray antsoina hoe Lidia, nandroaka fanahy ratsy, ary nokapohina i Paoly, i Silasy ary i Timoty (Asa 16:11–23). Nahazo fanampiana avy any an-danitra nanafaka tao an-tranomaizina izy ireo (Asa 16:23–26).

Atena Nitory teny teo amin’ny Havoanan’i Martsa (Areopago) momba ny “andriamanitra tsy fantatr” i Paoly nandritra ny asa fitoriana faharoa nataony tao Atena (Asa 17:22–34).

Korinto Nankao Korinto i Paoly tamin’ny dia fitoriana faharoa nataony, ary nipetraka niaraka tamin’i Akoila sy i Prisila. Nitory teny sy nanao batisa olona maro tao izy (Asa 18:1–18). Avy ao Korinto no nanoratan’i Paoly ny epistiliny ho an’ny Romana.

Tesalonika Nitory teny tao i Paoly nandritra ny dia fitoriana faharoa nataony. Niainga avy ao Berea ny andiana mpitory niaraka taminy taorian’ny nifofoan’ny Jiosy ny ainy (Asa 17:1–10).

Berea Nahita olona tsara toe-panahy hampianarina i Paoly sy i Silasy ary i Timoty nandritra ny dia fitoriana faharoa nataony. Nanaraka sy nanenjika azy ireo ny Jiosy (Asa 17:10–13).

Masedonia Nampianatra tao i Paoly nandritra ny diany faharoa sy fahatelo (Asa 16:9–40; 19:21). Noderain’i Paoly ny fahalalahan-tanan’ireo Olomasin’i Masedonia, izay nanome azy sy ireo Olomasina mahantra tao Jerosalema (Roma. 15:26; 2 Kor. 8:1–5; 11:9).

Malta Vaky sambo tao amin’io nosy io i Paoly raha an-dalana ho any Roma (Asa 26:32; 27:1, 41–44). Tsy naninona tamin’ny kaikitry ny menarana izy ary nanasitrana olona narary maro tao Malta (Asa 28:1–9).

Roma Nitory teny nandritra ny roa taona tao i Paoly raha izy tao an-tranomaizina (Asa 28:16–31). Nanoratra epistily na taratasy ho an’ny Efesiana sy ny Filipiana sy ny Kolosiana ary tamin’i Timoty sy i Filemona koa izy raha izy nigadra tao Roma. Nanoratra ny epistiliny voalohany avy any “Babylona,” izay azo inoana fa i Roma, i Petera, tsy ela taorian’ny nanenjehan’i Nerao ny Kristiana tamin’ny 64 taona taorian’i Kristy. Inoan’ny maro fa tao no namonoana maritiora an’i Petera sy i Paoly.