11. IZwe eliNgcwele ngeziKhathi zeTestamente eliSha

Tire kanye neSidoni UJesu waqhathanisa iKorazini kanye neBetsayida neTire kanye neSidoni (Math. 11:20–22). Welapha indodakazi yowesifazane wabeZizwe (Math. 15:21–28).

INtaba yokuGuqulwa UJesu waguqulwa phambi kukaPetru, uJakobe, kanye noJohane, futhi bathola izikhiye zombuso (Math. 17:1–13). (Abanye bakholwa wukuthi iNtaba yokuGuqulwa yiNtaba iHermoni; abanye bakholwa wukuthi yiNtaba iThabori.)

Kesariya Filipi UPetru wafakaza ukuthi uJesu unguKristu futhi wathenjiswa izikhiye zombuso (Math. 16:13–20). UJesu wabikezela ngokufa kanye nangoVuko Lwakhe uqobo (Math. 16:21–28).

IsiFunda saseGalile UJesu wachitha isikhathi esiningi sempilo kanye nobufundisi Bakhe eGalile (Math. 4:23–25). Lapha wanika iNtshumayelo yaseNtabeni (Math. 5–7); welapha onochoko (Math. 8:1–4); futhi wakhetha, wagcoba, futhi wathumela abaPhostoli abayiShumi namBili, kubo uJuda Iskariyothe okusengathi nguye kuphela owayengeyena umGalile (Marku 3:13–19). EGalile uKristu ovukileyo wavela kubaPhostoli (Math. 28:16–20).

ULwandle lwaseGalile, kamuva olwabizwa ngoLwandle lwaseTiberiya UJesu wafundisa esemkhunjini kaPetru (Luka 5:1–3) futhi wabiza uPetru, u-Andreya, uJakobe, kanye noJohane ukuba babe ngabadobi babantu (Math. 4:18–22; Luka 5:1–11). Futhi wathulisa isivunguvungu (Luka 8:22–25), wafundisa imifanekiso esemkhunjini (Math. 13), wahamba olwandle (Math. 14:22–32), futhi wavela kubafundi Bakhe emva koVuko Lwakhe (Joh. 21).

Betsayida UPetru, u-Andreya, kanye noFiliphu bazalelwa eBetsayida (Joh. 1:44). UJesu wahamba waya ngasese nabaPhostoli maduze neBetsayida. Izixuku zamlandela, futhi wapha ukudla izinkulungwane ezinhlanu (Luka 9:10–17; Joh. 6:1–14). Lapha uJesu welapha umuntu oyimpumputhe (Marku 8:22–26).

Kapernawume Lapha kwakuyikhaya likaPetru (Math. 8:5, 14). EKapernawume, uMathewu ayibiza ngokuthi “ngumuzi wakubo” kaJesu, uJesu welapha umuntu ofe uhlangothi (Math. 9:1–7; Marku 2:1–12), welapha isisebenzi senduna yekhulu, welapha unina womfazi kaPetru (Math. 8:5–15), wabiza uMathewu ukuba abe ngomunye wabaPhostoli Bakhe (Math. 9:9), wavula amehlo avalekile, wakhipha udeveli (Math. 9:27–33), welapha isandla somuntu esishwabeneyo ngeSabatha (Math. 12:9–13), wanika intshumayelo yesinkwa sokuphila (Joh. 6:22–65), futhi wavuma ukukhokha izintela, etshela uPetru ukuba athole imali emlonyeni wenhlanzi (Math. 17:24–27).

Magadana Lendawo kwakuyikhaya likaMariya Magdalena (Marku 16:9). UJesu weza lapha emuva kokupha ukudla izinkulungwane ezine (Math. 15:32–39), futhi abaFarisi kanye nabaSadusi bamcela ukuba ababonise isibonakaliso esivela ezulwini (Math. 16:1–4).

Khana UJesu waguqula amanzi aba yiwayini (Joh. 2:1–11) futhi welapha indodana yesikhulu eyayiseKapernawume (Joh. 4:46–54). IKhana futhi kwakuyikhaya likaNathanayeli (Joh. 21:2).

Nazaretha Ukubikwa kuMariya kanye noJosefa kwenzeka eNazaretha (Math. 1:18–25; Luka 1:26–38; 2:4–5). Emuva kokubuya eGibithe, uJesu wachitha isikhathi sobungane kanye nobusha Bakhe lapha (Math. 2:19–23; Luka 2:51–52), wamemezela ukuthi wayenguMesiya, futhi wenqatshwa ngaBakhe (Luka 4:14–32).

Jeriko UJesu wapha indoda engaboni ukuba ibone (Luka 18:35–43). Futhi wadla idina kanye noZakewu, “umthelisi omkhulu” (Luka 19:1–10).

Bethabara UJohane umBhabhadisi wafakaza ukuthi waye “yizwi lomemeza ehlane” (Joh. 1:19–28). UJohane wabhabhadisa uJesu eMfuleni iJordani futhi wafaza ukuthi uJesu uyiWundlu likaNkulunkulu (Joh. 1:28–34).

IHlane laseJudiya UJohane umBhabhadisi wayeshumayela kulelihlane (Math. 3:1–4), lapho uJesu wazila ukudla khona izinsuku ezingamashumi amane futhi walingwa khona (Math. 4:1–11).

Emawuse UKristu ovukileyo wahamba emgwaqweni oya e-Emawuse kanye nabafundi Bakhe ababili (Luka 24:13–32).

Betfage Abafundi ababili balethela uJesu imbongolo aqala ukungena ngayo ngokwesasa eJerusalema (Math. 21:1–11).

Bethaniya Lendawo kwakuyikhaya likaMariya, uMarta, kanye noLazaru (Joh. 11:1). UMariya wezwa amazwi kaJesu, futhi uJesu wakhuluma kuMarta ngokukhetha “isabelo esihle” (Luka 10:38–42); uJesu wavusa uLazaru kwabafileyo (Joh. 11:1–44); futhi uMariya wagcoba izinyawo zikaJesu (Math. 26:6–13; Joh. 12:1–8).

Betlehema UJesu wazalwa futhi wabekwa emkhombeni (Luka 2:1–7); izingelosi zamemezela kubelusi ukuzalwa kukaJesu (Luka 2:8–20); izazi zaholwa yinkanyezi ukuba ziye kuJesu (Math. 2:1–12); futhi uHerode wabulala abantwana (Math. 2:16–18).