1 Na afei, emi Nephi, mahyɛ ase rekyerɛw mprɛtse yinom no do ndzɛmba a osii wɔ m’ahendzi na me ɔsomdwuma; dɛm ntsi ansaana mebɛkyerɛw me nsɛm no, ɔsɛ dɛ mekã biribi a ɔfa m’egya na mo nuanom so ho.

2 Na hwɛ ɔbaa dɛ aber a m’egya wiee ne kasaa a ɔfa n’adaaso ho, na afotu pa a ɔdze maa hɔn no, ɔkãa Jewfo hɔn ho nsɛm kyerɛɛ hɔn.

3 Dɛ sɛ wɔsɛɛ hɔn nye Jerusalem kuropɔn no wie a wɔbɔsoa hɔn mu dodowara akɔ ndɔmmum mu wɔ Babylon; dɛ mbrɛ Ewuradze noara ne mber a ɔahyɛ no tse no, wɔbɛsan aba bio, nyew, wobeyi hɔn efi ndɔmmum mu aba; na sɛ wonya dze hɔn fi ndɔmmum mu ba a hɔn nsa bɛkã hɔn egyapadze asaase no bio.

4 Nyew, ofitsi mfe ahaesia ekyir a m’egya fii Jerusalem no mpo; Ewuradze Nyankopɔn beyi nkɔnhyɛnyi efi Jewfo mu—Messiah mpo a, anaa dɛ, wiadze Agyenkwa.

5 Na ɔkasaa so faa nkɔnhyɛfo no ho, mbrɛ hɔn mu dodowara agye dase wɔ ndzɛmba a ɔfa dɛm Messiah yi ho, ɔno a ɔakã no ho nsɛm, anaadɛ dɛm wiadze Pomfo yi.

6 Dɛm ntsi adasamba nyinara ayew na wɔahwehwe ase, na sɛ wobenya nkwagye a ɔno ɔsɛ dɛ wɔtwer dɛm Ɔpomfo yi.

7 Na ɔkasaa so faa nkɔnhyɛnyi bi a obedzi Messiah no enyim ebesiesie Ewuradze n’akwan mu.

8 Nyew, koraa mpo dɛ ɔbɔkɔ sar no do akɛtseatsea mu dɛ: Hom nsiesie Ewuradze n’akwan, na wɔmma n’atsempɔn ntsentsen osiandɛ obi gyina hom finimfin ha a hom nnyim no; na ɔwɔ tum sen me, na no nsokota ho ahoma mennsɛ dɛ mesan mpo. Na pii na m’egya kãe a ɔfa iyinom ho.

9 Na m’egya see dɛ wobonuma wɔ Bethabara, wɔ Jordan egya, na ɔkãa bio dɛ wɔdze nsu bonuma no; na koraa mpo dɛ wɔdze nsu bonuma Messiah no.

10 Na wɔdze nsu enuma Messiah no ekyir no, obohu na ɔagye dase dɛ woeenuma Nyame Eguambaa no; nyia obeyi wiadze bɔn akɔ no.

11 Na ɔbaa dɛ m’egya kãa dɛm nsɛm yi wiei no, ɔkasaa kyerɛɛ mo nuanom no wɔ dza ɔfa Asɛmpa no a wɔbɔkɔ akɛkã akyerɛ Jewfo no, na afei so dza ɔfa no Jewfo no wodow a wɔbɔwodow wɔ hɔn gyedzi mu. Na ekyir woeku Messiah no a ɔbɛba no na no wu ekyir no ɔbɔsoɛr efi ewufo mu, na ɔnam Sunsum Krɔnkrɔn no do bɛda noho edzi akyerɛ Amanamamfo.

12 Nyew, m’egya kãa nsɛm pii mpo a ɔfa Amanamamfo ho, na dza ɔfa Israel fifo so ho, dɛ wɔdze hɔn bɔto ngodua ho, dɛ n’abaw bɛpan na wɔapetse asaase nyinara enyi.

13 Dɛm ntsi, ɔkãa dɛ obehia dɛ yɛyɛ kor na wɔgye hɛn kɔ anohoba asaase no do, ama Ewuradze n’asɛm aahyɛ mã, dɛ yɛbɛpetse asaase nyinara enyi.

14 Na Israel fifo no apetse ekyir no, wɔbɛsan aboaboa hɔn ano bio; anaa no korakora, dɛ Amanamamfo nsa akã Asɛmpa n’amahyɛ ekyir no, ngodua n’abaw pa no, anaa dɛ Israel fifo hɔn ahyɛ mu nkaasefo no wɔbɛgye hɔn ahyɛ mu, anaaso wobohu nokwar Messiah, hɔn Ewuradze na hɔn Pomfo no.

15 Na dɛm nsɛm yi na m’egya dze hyɛɛ nkɔm na ɔkasaa kyerɛɛ mo nuanom no, na nsɛm pii so a mannkyerɛw wɔ nwoma yi mu; na makyerɛw no mu dodowara a mohwɛ a oye ma me wɔ mo nwoma kor no mu.

16 Na dza makã ho nsɛm yi nyinara, sii ber a m’egya tse ne ntamadan mu wɔ Lemuel bɔnsa no mu no.

17 Na ɔbaa dɛ emi, Nephi, metsee nsɛm a m’egya kãe a ɔfa ndzɛmba a ohun wɔ enyido-adzehu mu nye nsɛm so a ɔnam Sunsum Krɔnkrɔn no tum do kãe; tum a ɔnam gyedzi a onyae wɔ Nyankopɔn ne Ba no mu—na Nyankopɔn ne Ba no nye Messiah no a ɔbɛba no—Emi, Nephi, so mepɛɛ dɛ mubohu na matse na menam Sunsum Krɔnkrɔn no tum do ehu ndzɛmba yi a ɔyɛ Nyame n’akyɛdze dze ma hɔn a wɔhwehwɛ no enyiberdo, wɔ tsetseberdo na mber so a obeyi noho akyerɛ adasamba.

18 Na ɔtse dɛm ndeda, ndɛ na afebɔɔ, na woesiesie kwan no ato hɔ ama adasa fitsi wiadze ne fapem, sɛ ɔba no dɛ wonu hɔnho na wɔba ne nkyɛn a.

19 Na hɔn a wɔhwehwɛ enyiberdo no wobohu; na Sunsum Krɔnkrɔn no tum no bɛda Nyame n’esumasɛm edzi akyerɛ hɔn wɔ mber yi mu dɛ mbrɛ ɔyɛɛ no tsetseberdo no; na dɛ mbrɛ ɔyɛɛ no tsetseberdo no dɛmara so na ɔbɛyɛ wɔ mber a ɔreba no mu, dɛm ntsi Ewuradze n’akwan yɛ kor na ɔkɔ aprɔw onnyiewiei.

20 Dɛm ntsi kaa, O ɔdasanyi, dɛ wo ndwuma nyina mu no wɔdze wo bɛba ebobu wo atsɛn.

21 Dɛm ntsi, sɛ epɛɛ dɛ ebɛyɛ emumuyɛdze wɔ wo nsɔhwɛber yi mu a, nna woho renntsew wɔ Nyankopɔn n’atsɛmbu egua no enyim; na adze a no ho nntsew biara runntum nye Nyankopɔn nntsena; dɛm ntsi, otwar dɛ wotwa wo kyen afebɔɔ.

22 Na Sunsum Krɔnkrɔn no ma me tum dɛ menkã dɛm nsɛm yi na mma minnsiw do.