1 Kag karon ako, si Nefi, magapadayon sa paghatag sing isa ka kasaysayan sa sining mga lamina parte sang akon mga kahimoan, kag sang akon pagginahum kag pag-alagad; gani, sa pagpadayon sang akon kasaysayan, kinahanglan gid nga maghambal ako sing diutay parte sa akon amay, kag amo man parte sa akon mga kauturan.

2 Kay tan-awa, natabo ini nga pagkatapos nga ang akon amay nakahambal sang mga pulong parte sa iya damgo, kag sa paglaygay man sa ila nga mangin tuman katutum, naghambal sia sa ila parte sa mga Judio—

3 Nga pagkatapos nga malaglag sila, bisan inang dako nga siyudad nga Jerusalem, kag madamo ang pagadal-on nga bihag sa Babilonia, suno sa kaugalingon nga natalana nga tion sang Ginuo, magabalik sila liwat, huo, bisan pagadal-on pabalik halin sa pagkabihag; kag pagkatapos nga madala sila pabalik halin sa pagkabihag pagapanag-iyahan nila liwat ang duta nga ila palanublion.

4 Huo, bisan pag-abot sang anum ka gatos ka tuig halin sa tion nga nagbiya ang akon amay sa Jerusalem, isa ka propeta ang pagabangonon sang Ginuong Dios sa tunga sang mga Judio—nga amo ang Mesias, ukon, sa iban nga pulong, isa ka Manluluwas sang kalibutan.

5 Kag naghambal man sia parte sa mga propeta, nga tuman gid kadamo ang nagsaksi sining mga butang, parte sining Mesias, nga iya ginhambal, ukon ining Manunubos sang kalibutan.

6 Gani, tanan nga tawo yara sa nagtalang kag nalaglag nga kahimtangan, kag dalayon nga mangin amo sini luwas lang kon magasandig sila sa sining Manunubos.

7 Kag naghambal man sia parte sa isa ka propeta nga magaabot antes sa Mesias, agud ihanda ang alagyan sang Ginuo—

8 Huo, bisan sia magakadto kag magasinggit sa kamingawan: Ihanda ninyo ang alagyan sang Ginuo, kag tadlonga ang iya mga banas; kay sa tunga ninyo nagatindog ang isa nga wala ninyo makilala; kag labaw sia nga gamhanan sangsa akon, nga ang higot sang iya sandalyas indi ako nagakaangay sa paghubad. Kag madamo pa ang ginhambal sang akon amay parte sini nga butang.

9 Kag ang akon amay nagsiling nga magapangbunyag sia sa Betabara, sa pihak sang Jordan; kag nagasiling man sia nga magapangbunyag sia paagi sa tubig; bisan pa nga ang Mesias pagabunyagan niya sa tubig.

10 Kag pagkatapos nga mabunyagan niya sa tubig ang Mesias, pagakilalahon niya kag pamatud-an nga nabunyagan niya ang Kordero sang Dios, nga magakuha sang mga sala sang kalibutan.

11 Kag natabo ini nga pagkatapos nga makahambal ang akon amay sang sini nga mga pulong naghambal sia sa akon mga kauturan parte sa ebanghelyo nga igawali sa tunga sang mga Judio, kag amo man parte sa pag-usmod sang mga Judio sa pagkawala’y pagtuo. Kag pagkatapos nga ila mapatay ang Mesias, nga magakari, kag pagkatapos nga sia mapatay na magabangon sia halin sa mga minatay, kag magapakita sang iya kaugalingon, paagi sa Balaan nga Espiritu, sa mga Gentil.

12 Huo, bisan ang akon amay madamo sing ginhambal parte sa mga Gentil, kag amo man parte sa panimalay ni Israel, sa bagay nga mapaanggid sila sa isa ka kahoy nga olivo, nga ang mga sanga sini pagabanggion kag pagalaptahon sa bug-os nga ibabaw sang duta.

13 Gani, nagsiling sia nga kinahanglan gid nga matuytuyan kita sing ulolupod sa duta sang panaad, tuhoy sa katumanan sang pulong sang Ginuo, nga pagalaptahon kita sa bug-os nga ibabaw sang duta.

14 Kag pagkatapos nga pagalaptahon ang panimalay ni Israel pagatiponon sila liwat; ukon, sa malip-ot nga pulong, pagkatapos nga mabaton sang mga Gentil ang kabug-osan sang Ebanghelyo, ang kinaugali nga mga sanga sang kahoy nga olivo, ukon ang mga nagkalabilin sang panimalay ni Israel, igasugpon, ukon makahibalo parte sa matuod nga Mesias, ang ila Ginuo kag ang ila Manunubos.

15 Kag sa amo sini nga sari sang paghambal ang akon amay nagpropesiya kag naghambal sa akon mga kauturan, kag madamo nga iban pa gid nga mga butang nga wala ko pag-isulat sa sini nga libro; kay nasulat ko na ang madamo sang mga ini nga sa banta ko kinahanglanon gid sa isa ko pa ka libro.

16 Kag ining tanan nga butang nga akon ginhambal, ginhimo samtang ang akon amay nagapuyo sa isa ka tolda, sa patag sang Lemuel.

17 Kag natabo ini nga ako, si Nefi, pagkatapos nga mabatian ang tanan nga pulong sang akon amay, parte sa mga butang nga iya nakita sa isa ka panan-awon, kag ang mga butang man nga iya ginhambal paagi sa gahum sang Balaan nga Espiritu, nga ang amo nga gahum iya nabaton paagi sa pagtuo sa Anak sang Dios—kag ang Anak sang Dios amo ang Mesias nga magakari—ako, si Nefi, naghandum man nga makakita ako, kag makabati, kag makahibalo parte sining mga butang, paagi sa gahum sang Balaan nga Espiritu, nga amo ang dulot sang Dios sa tanan nga matutum nga nagapangita sa iya, kag amo man sa dumaan nga panahon kag sa panahon nga igapakita niya ang iya kaugalingon sa mga anak sang katawhan.

18 Kay sia amo man gihapon kahapon, subong, kag tubtob sa wala’y katapusan; kag ang dalan ginhanda para sa tanan nga tawo halin pa sa pagtuga sang kalibutan, kon lamang nga sila maghinulsol kag magpalapit sa iya.

19 Kay sia nga matutum nga nagapangita makakita; kag ang mga misteryo sang Dios igapahayag sa ila, paagi sa gahum sang Balaan nga Espiritu, sa sining panahon kag sa dumaan nga panahon, kag amo man sa dumaan nga panahon kag sa panahon nga palaabuton; gani, ang alagyan sang Ginuo isa ka wala’y katapusan nga nagalibot nga alagyan.

20 Gani, dumduma, O tawo, kay tungod sang tanan nga inyo ginahimo pagadal-on kamo sa paghukom.

21 Gani, kon nagpangita kamo sa paghimo sang malain sa mga adlaw sang inyo pagtilaw, makit-an kamo nga di-matinlo sa atubang sang hukom-lingkuranan sang Dios; kag wala sing di-matinlo nga butang nga makapuyo upod sa Dios; gani, pat-od gid nga isikway kamo sa wala’y katapusan.

22 Kag ang Balaan nga Espiritu nagahatag sing awtoridad nga ihambal ko ining mga butang, kag indi pag-ipanghiwala ang mga ini.