1 I te mea ē, i muri a’era, ’ua tupu ihora tō’u hina’aro ’ia ’ite i te mau mea tā tō’u metua tāne i hi’o na ; tē pārahi ra vau ma te feruri hōhonu i roto i tō’u ’ā’au ’e ma te ti’aturi ē e ti’a i te Fatu ’ia fa’a’ite mai i te reira iā’u, ’ua ’āfa’i-’ē-hia atu ra vau e te Vārua o te Fatu, ’oia ïa, i ni’a i te hō’ē mou’a teitei roa, ’e ’aita ā vau i ’ite i te reira, ’e ’aita ato’a tō’u ’āvae i ta’ahi i reira i te mātāmua.

2 ’E ’ua parau mai ra te Vārua iā’u : Inaha, e aha tā ’oe e hina’aro ?

3 ’E ’ua parau atu ra vau : ’Ua hina’aro vau ’ia ’ite i te mau mea tā tō’u metua tāne i ’ite na.

4 ’E ’ua parau mai ra te Vārua iā’u : ’Ua ti’aturi ānei ’oe ē, ’ua ’ite tō ’oe metua tāne i te tumu rā’au ’o tāna i parau na ?

5 ’E ’ua parau atu ra vau : ’Oia ïa, ’ua ’ite ’oe ē, ’ua ti’aturi au i te mau parau ato’a a tō’u ra metua tāne.

6 ’E i muri iho i tō’u fa’ahitira’a i teie mau parau, ’ua pi’i mai ra te Vārua ma te reo pūai, nā ’ō mai ra, Hosana i te Fatu, i te Atua teitei roa ; ’o ’oia te Atua i ni’a i te ao ato’a nei, ’oia ïa, i ni’a i te mau mea ato’a. E ao tō ’oe, e Nephi, nō te mea ’ua ti’aturi ’oe i te Tamaiti a te Atua teitei roa ; nō reira, e ’ite ’oe i te mau mea tā ’oe i hina’aro.

7 ’E inaha, e fa’a’itehia teie mea ia ’oe ’ei tāpa’o ; ’e i muri iho i tō ’oe hi’ora’a i te tumu rā’au ’o tei fa’ahotu mai i te hotu tā tō ’oe metua tāne i ’amu ra, e ’ite ato’a ’oe i te hō’ē ta’ata i te poura’a mai mai te ra’i mai, ’e e ’ite ho’i ’oe iāna ; ’e i muri iho i tō ’oe ’itera’a iāna, e fa’a’ite pāpū ’oe ē, e Tamaiti ’oia nā te Atua.

8 ’E i muri a’era, ’ua parau mai ra te Vārua iā’u : ’A hi’o na ! ’E ’ua hi’o atu ra vau ’e ’ua ’ite atu ra vau i te hō’ē tumu rā’au ; ’e ’ua au te reira i te tumu rā’au tā tō’u metua tāne i ’ite ; ’e ’ua hau roa tōna nehenehe, ’oia ïa, ’ua hau roa i tō te mau mea nehenehe ato’a ra ; ’e tōna teatea ’ua hau roa ïa i te teatea o te hiona puehu ra.

9 ’E i muri a’era, i muri iho i tō’u ’itera’a i taua tumu rā’au ra, ’ua parau atu ra vau i te Vārua : ’Ua ’ite au ē, ’ua fa’a’ite mai ’oe iā’u i te tumu rā’au maita’i roa a’e i te mau tumu rā’au ato’a.

10 ’E ’ua parau mai ra ’oia iā’u : E aha tā ’oe e hina’aro nei ?

11 ’E ’ua parau atu ra vau iāna : ’Ia ’ite i te aura’a nō te reira—e ’ua paraparau atu vau iāna mai tā te ta’ata e paraparau nei ; ’e ’ua ’ite atu vau ē mai tō te ta’ata nei tōna ra huru ; ’āre’a rā, ’ua ’ite au ē, ’o te Vārua te reira o te Fatu ; ’e ’ua paraparau mai ’oia iā’u mai tā te hō’ē ta’ata e paraparau i te tahi atu.

12 ’E i muri a’era, ’ua parau mai ra ’oia iā’u : ’A hi’o na ! ’E ’ua hi’o atu ra vau mai te mea ra ē tē hi’o atu ra vau iāna, ’e ’aita roa vau i ’ite atu iāna ; i reva atu ho’i ’oia mai mua atu i tō’u aro.

13 ’E i muri a’era, ’ua hi’o atu ra vau ’e ’ite atu ra i te ’oire rahi nō Ierusalema, ’e te tahi atu ho’i mau ’oire. ’E ’ua ’ite atu ho’i au i te ’oire nō Nazareta ; ’e i roto i te ’oire nō Nazareta, ’ua ’ite au i te hō’ē pāretenia, ’e e mea purotu roa ’e e mea ’uo’uo roa ’oia.

14 ’E i muri a’era, ’ua hi’o atu ra vau i te mau ra’i i te vēteara’a, ’e ’ua pou mai ra te hō’ē melahi ’e ’ua ti’a mai ra i mua iā’u ; ’e ’ua parau mai ra ’oia iā’u : E Nephi, e aha tā ’oe e hi’o na ?

15 ’E ’ua parau atu ra vau iāna : Te hō’ē pāretenia nehenehe ’e te purotu ho’i i te mau pāretenia ato’a ra.

16 ’E ’ua parau mai ra ’oia iā’u : ’Ua ’ite ānei ’oe i te fa’aha’eha’ara’a a te Atua iāna iho ?

17 ’E ’ua parau atu ra vau iāna : ’Ua ’ite au ē ’ua aroha ’oia i tāna mau tamari’i ; ’āre’a rā, ’aita vau i ’ite i te aura’a nō te mau mea ato’a.

18 ’E ’ua parau mai ra ’oia iā’u : Inaha, te pāretenia tā ’oe e ’ite nei, ’o te metua vahine ïa o te Tamaiti a te Atua, i te tino nei.

19 ’E i muri a’era, ’ua ’ite atu vau ē ’ua ’āfa’i-’ē-hia atu ’oia e te Vārua ; ’e i muri iho i tōna ’āfa’i-’ē-ra’a-hia atu e te Vārua nō te tahi ārea taime te maoro ’ua parau mai ra te melahi iā’u, nā ’ō mai ra : ’A hi’o na !

20 ’E ’ua hi’o atu ra vau ’e ’ua ’ite fa’ahou atu ra vau i taua pāretenia ra, i te amora’a i te hō’ē tamari’i i roto i tōna nā rima.

21 ’E ’ua parau mai ra te melahi iā’u : ’A hi’o na i te ’Ārenio a te Atua, ’oia ïa, te Tamaiti a te Metua mure ’ore ! ’Ua ’ite ānei ’oe i te aura’a nō te tumu rā’au tā tō ’oe metua tāne i ’ite ?

22 ’E ’ua pāhono atu ra vau iāna, i te nā-’ō-ra’a ē : ’Oia ïa, ’o te aroha ïa o te Atua, ’o tei nīni’ihia mai i te mau vāhi ato’a i roto i te ’ā’au o te mau tamari’i a te ta’ata nei ; nō reira, e mea hina’aro-roa-hia ïa i ni’a a’e i te mau mea ato’a ra.

23 ’E ’ua parau mai ra ’oia iā’u, i te nā-’ō-ra’a mai ē : ’Oia ïa, ’e te mea ’oa’oa roa a’e nō te vārua.

24 ’E i muri iho i tōna paraura’a mai i teie mau parau, ’ua nā ’ō mai ra ’oia iā’u : ’A hi’o na ! ’E ’ua hi’o atu ra vau, ’e ’ua ’ite atu ra vau i te Tamaiti a te Atua i te haerera’a atu i rotopū i te mau tamari’i a te ta’ata nei ; ’e ’ua ’ite atu vau i te mau ta’ata e rave rahi tei tīpapa i raro i tōna ’āvae ’e ’ua ha’amori atu iāna.

25 ’E i muri a’era, ’ua ’ite au ē, te ’āuri tāpe’ara’a tā tō’u metua tāne i ’ite ’o te parau ïa a te Atua, tei tae atu i te piha’a o te mau pape ora, ’oia ho’i, i te tumu rā’au nō te ora ; ’e teie nei mau pape, ’ua fa’aauhia i te aroha o te Atua ; ’e ’ua ’ite ato’a ho’i au ē, te tumu rā’au nō te ora, ’ua fa’aauhia i te aroha o te Atua.

26 ’E ’ua parau fa’ahou mai ra te melahi iā’u : ’A hi’o na, ’e ’a ’ite i te fa’aha’eha’ara’a a te Atua iāna iho !

27 ’E ’ua hi’o atu ra vau ’e ite atu ra i te Tāra’ehara o te ao nei, ’o tā tō’u metua tāne i parau na ; ’e ’ua ’ite ato’a atu ra ho’i au i te peropheta ’o tē fa’aineine i te ’ē’a nā mua iāna. ’E ’ua haere atu ra te ’Ārenio a te Atua ’e ’ua bāpetizohia e ana ; ’e i muri iho i tōna bāpetizora’ahia, ’ua ’ite atu ra vau i te mau ra’i i te vēteara’a, ’e ’ua pou mai ra te Vārua Maita’i mai te ra’i mai ’e tau mai ra i ni’a iho iāna, mai te ’ū’upa ra.

28 ’E ’ua ’ite atu vau ē ’ua haere atu ’oia ma te tāvini i te mau ta’ata, nā roto i te mana ’e te hanahana rahi ; ’e ’ua ha’aputuputu ’āmui mai te mau pupu ta’ata nō te fa’aro’o iāna ; ’e ’ua ’ite atu vau ē ’ua ti’avaru ’ē atu rātou iāna mai rotopū atu ia rātou.

29 ’E ’ua ’ite ato’a atu ho’i au i te mau ta’ata hō’ē ’ahuru ’e ma piti i te pe’era’a atu iāna. ’E i muri a’era, ’ua ’āfa’i-’ē-hia atu ra rātou e te Vārua mai mua atu i tō’u mata, ’e ’aita atu ra vau i ’ite fa’ahou ia rātou.

30 ’E i muri a’era, ’ua parau fa’ahou mai ra te melahi iā’u, nā ’ō mai ra : ’A hi’o na ! ’E ’ua hi’o atu ra vau ’e ’ua ’ite atu ra vau i te mau ra’i i te vetea-fa’ahou-ra’a, ’e ’ua ’ite atu vau i te mau melahi i te poura’a mai i ni’a i te mau tamari’i a te ta’ata ; ’e ’ua poihere atu ra ia rātou ra.

31 ’E ’ua parau fa’ahou mai ra ’oia iā’u, nā ’ō mai ra : ’A hi’o na ! ’E ’ua hi’o atu ra vau, ’e ’ua ’ite atu vau i te ’Ārenio a te Atua i te haerera’a atu i rotopū i te mau tamari’i a te ta’ata nei. ’E ’ua ’ite atu vau i te mau pupu ta’ata ’o tei tupuhia i te ma’i, ’e tei fāri’i i te mau huru ma’i ato’a, ’e tei uruhia i te mau diabolo ’e i te mau vārua vi’ivi’i ho’i ; ’e ’ua parau mai ra te melahi, ’e ’ua fa’a’ite mai i teie mau mea ato’a iā’u. ’E ’ua fa’aorahia rātou e te mana o te ’Ārenio a te Atua ; ’e ’ua ti’avaruhia atu ra te mau diabolo ’e te mau vārua vi’ivi’i ho’i i rāpae.

32 ’E i muri a’era, ’ua parau fa’ahou mai ra te melahi iā’u, nā ’ō mai ra : ’A hi’o na ! ’E ’ua hi’o atu ra vau ’e ’ua ’ite atu ra i te ’Ārenio a te Atua, ’e ’ua ravehia ’oia e te mau ta’ata, ’oia ïa, ’ua ha’avāhia te Tamaiti a te Atua mure ’ore ra e tō te ao nei ; ’e ’ua ’ite atu vau ’e tē fa’a’ite pāpū nei au i te reira.

33 ’E ’ua ’ite au, ’o Nephi ē, ’ua fa’ateiteihia ’oia i ni’a i te sātauro ’e ’ua taparahihia nō te mau hara a tō te ao nei.

34 ’E i muri iho i tōna taparahira’ahia, ’ua ’ite atu ra vau i te mau pupu ta’ata o te ao nei, ’e ’ua ha’aputuputu-’āmui-hia mai rātou nō te ’aro atu i te mau ’āpōsetolo a te ’Ārenio ; ’e ’o te reira ho’i te i’oa tā te melahi a te Fatu i ma’iri i ni’a i taua pupu tino ’ahuru ’e ma piti ra.

35 ’E ’ua ha’aputuputuhia mai te pupu ta’ata o te ao nei ; ’e ’ua ’ite atu vau ē tei roto rātou i te hō’ē fare rahi ’e te ’ā’ano, mai te fare tā tō’u metua tāne i ’ite. ’E ’ua parau fa’ahou mai ra te melahi a te Fatu iā’u, nā ’ō mai ra : Inaha, ’o te ao ïa ’e tōna pa’ari ho’i ; ’oia ïa, inaha, ’ua ha’aputuputu ’āmui mai te ’utuāfare o ’Īserā’ela nō te ’aro atu i te tino ’ahuru ’e ma piti ’āpōsetolo a te ’Ārenio.

36 ’E i muri a’era, ’ua hi’o atu ra vau ’e tē fa’a’ite pāpū nei au ē, taua fare rahi ’e te ’ā’ano ra, ’o te te’ote’o ïa o tō te ao nei ; ’e ’ua ma’iri ihora te reira ; ’e e mea rahi roa tōna ma’irira’a. ’E ’ua parau fa’ahou mai ra te melahi a te Fatu iā’u, nā ’ō mai ra : E mai te reira ïa te ha’amoura’a o te mau nūna’a ato’a, ’e te mau ’ōpū ato’a, ’e te mau reo ato’a, ’e te mau ta’ata ato’a ’o tē ’aro atu i te tino ’ahuru ’e ma piti ’āpōsetolo a te ’Ārenio.