1 Koro edikem ete ke ini ami mma nkenyene udɔŋ ndifiɔk mme ŋkpɔ emi ete mi eke okutde, ndien mbuɔtidem nte ke Jehovah ama ekeme ndinam mi mfiɔk mmɔ, nte ami ntiede ŋkere ke esit mi Spirit Jehovah emen mi ɔwɔrɔ, iŋ, aka ke ata ŋkoŋkoŋ obot, emi akanam ami mme ŋkwe akpa, ndien emi ami eke anam mme ndorike ikpat akpa.

2 Ndien Spirit ɔdɔhɔ mi ete: Sese, nso idi udɔŋ fo?

3 Ndien ami ndɔhɔ nte: Ami nyene udɔŋ ndikut mme ŋkpɔ emi ete mi ekekutde.

4 Ndien Spirit ɔdɔhɔ mi ete: Ndi afo emenim ke ete fo ama okut eto ro emi enye eketiŋde abaŋa?

5 Ndien ami ndɔhɔ nte: Iŋ, afo ɔmɔfiɔk ete ke ami mmenim kpukpru mme ikɔ ete mi.

6 Ndien ke ini ami mma nketiŋ mme ikɔ emi, Spirit atua ke ɔkpɔsɔŋ uyo, ete: Hosanna enyene Jehovah, Abasi andikoŋ nkan; koro enye edide Abasi ke ofuri ererimbot, iŋ, tutu akan kpukpru. Ndien ɔfɔfɔn ɔnɔ fi, Nephi, koro afo ɔbuɔtde idem ke Eyen Abasi andikoŋ nkan; ke ntre, afo eye okut mme ŋkpɔ emi afo enyenede udɔŋ abaŋa.

7 Ndien sese mme ŋkpɔ emi ke edinɔ fi nte idiɔŋɔ, ete ke afo ama okut eto emi emi eyirede mfri emi ete fo akatabide, afo nko eyekut owo nte ɔsuhɔrede ɔwɔrɔ ke enyɔŋ, ndien enye ke afo editie ntiense; ndien ke ini afo ama etie ntiense ɔnɔ enye afo eyetie ntiense abaŋa ete ke edi Eyen Abasi.

8 Ndien edikem ete Spirit ɔdɔhɔ mi ete: Sese! Ndien ami nse nyuŋ nkut eto; ndien enye ebiet eto emi ete mi ekekutde; ndien uyai esie ama etim okpon, iŋ, akan kpukpru uyai; ndien afia esie ama akan afia snow emi esuande.

9 Ndien edikem ke ini mma nkekut eto oro, ami ndɔhɔ Spirit nte: Ami mokut nte ke afo omowut mi eto oro emi edide ŋkpɔ uto akan kpukpru.

10 Ndien enye ɔdɔhɔ mi ete: Nso idi udɔŋ fo?

11 Ndien ami ndɔhɔ enye nte: Ndifiɔk se enye ɔwɔrɔde—koro ami ŋketiŋ ye enye nte owo etiŋ; koro ami nkekut nte ke enye edi ke mbiet owo; edi okposuk edi, ami mma mfiɔk nte ke eke edi Spirit Jehovah; ndien enye etiŋ ye ami nte owo etiŋ ye owo efen.

12 Ndien edikem ete enye ɔdɔhɔ mi ete: Sese! Ndien ami nse nte mkpesede enye, ndien ami nkutke enye; koro enye ama adaha mi ke iso.

13 Ndien edikem ete ami nse nyuŋ nkut akwa obio Jerusalem, ndien nko mme obio efen. Ndien ami nkut obio Nazareth; ndien ke obio Nazareth ami nkut eyenɔwɔŋ aŋwan, ndien enye asana ata eti eti onyuŋ afia.

14 Ndien edikem ete ami nkut nte mme enyɔŋ ekubɔre; ndien angel kiet ɔsuhɔre edi onyuŋ ada mi ke iso; ndien enye ɔdɔhɔ mi ete: Nephi, nso ke afo okut?

15 Ndien ami ndɔhɔ enye nte: Eyenɔwɔŋ aŋwan, eyede akan onyuŋ asanade akan kpukpru nditɔ ɔwɔŋ iban eken.

16 Ndien enye ɔdɔhɔ mi ete: Ndi afo emefiɔk usuhɔre Abasi?

17 Ndien ami ndɔhɔ enye nte: Ami mefiɔk nte ke enye ama nditɔ esie; edi, ami mfiɔkke se kpukpru ŋkpɔ ɔwɔrɔde.

18 Ndien enye ɔdɔhɔ mi ete: Sese, eyenɔwɔŋ aŋwan emi afo okutde edi eka Eyen Abasi, ke mbiet obukidem.

19 Ndien edikem ete ami nkut nte ke ema emen enye ewɔrɔ ke Spirit; ndien ke ema ekemen enye ewɔrɔ ke Spirit ke ufaŋ ini angel oro ɔdɔhɔ mi, ete: Sese!

20 Ndien ami nse ndien mfiak nkut eyenɔwɔŋ aŋwan, nte akamade eyen ke mme ubɔk esie.

21 Ndien angel ɔdɔhɔ mi ete: Sese Eyen-erɔŋ Abasi, iŋ, kpa Eyen Nsinsi Ete! Ndi afo emefiɔk se eto emi ete fo eke okutde ɔwɔrɔde?

22 Ndien ami mbɔrɔ enye, nte: Iŋ, enye edi ima Abasi, emi atarade idem esie aŋwa aŋwa ke mme esit nditɔ owo; ke ntre, enye etim ɔfɔn akan kpukpru ŋkpɔ.

23 Ndien enye etiŋ ye ami, ete: Iŋ, ndien etim ɔnɔ ukpɔŋ idara.

24 Ndien ke ini enye ama eke etiŋ mme ikɔ emi, enye ɔdɔhɔ mi ete: Sese! Ndien ami nse, nyuŋ nkut Eyen Abasi nte akade ke ufɔt nditɔ owo; ndien ami mma nkut nte ediwak eduɔde ke ukot esie enyuŋ ekpono enye.

25 Ndien edikem ete ami nkut nte ke esaŋ ukwak oro, emi ete mi ekekutde, ekedi ikɔ Abasi, emi eke adade aka ntɔŋɔ idim mme mmɔŋ uwem, mme aka eto uwem oro; mme mmɔŋ emi eda enɔ ima Abasi; ndien ami nko nkut nte ke eto uwem oro akada ɔnɔ ima Abasi.

26 Ndien angel afiak ɔdɔhɔ mi ete: Se nyuŋ kut usuhɔre Abasi!

27 Ndien ami nse nyuŋ nkut Andifak ererimbot, emi ete mi eketiŋde abaŋa; ndien ami nko nkut prophet emi anade ebem enye iso etim usuŋ. Ndien Eyen-erɔŋ Abasi ebe aka ndien enye enim enye baptism, ndien ke ini ema ekenim enye baptism, ami nkut nte mme enyɔŋ ekubɔre, ndien Edisana Spirit ɔsuhɔre edi ɔwɔrɔ ke enyɔŋ ndien odoro enye ke idem ke mbiet ibiom.

28 Ndien ami nkut nte enye akade ekenam utom ɔnɔ mme owo, ke odudu ye akwa ubɔŋ; ndien otu owo eboho kiet ndikop enye; ndien ami nkut nte ebinde enye esio ke ufɔt mmɔ.

29 Ndien ami nko nkut duopeba efen nte etienede enye. Ndien edikem ete etaŋ mmɔ ewɔrɔ ke Spirit ekpɔŋ iso mi, ndien ami nkwe mmɔ.

30 Ndien edikem ete angel afiak etiŋ ɔnɔ mi, ete: Se! Ndien ami nse, ndien ami nkut nte enyɔŋ afiakde ɔkubɔre, ndien ami nkut nte mme angel esuhɔre edoro ke nditɔ owo; ndien mmɔ enam utom enɔ mmɔ.

31 Ndien enye afiak etiŋ ɔnɔ mi, ete: Sese! Ndien ami nse, ndien ami nkut Eyen-erɔŋ Abasi nte akade ke ufɔt nditɔ owo. Ndien ami nkut mme otu owo emi ekedɔŋɔde, ye emi kpukpru utɔ ukut mme udɔŋɔ eke esimde, ye mme demon ye mme ndedehe spirit; ndien angel etiŋ onyuŋ owut mi kpukpru mme ŋkpɔ emi. Ndien ema ekɔk mmɔ ke odudu Eyen-erɔŋ Abasi; ndien ema ebin mme demon ye mme ndedehe spirit esio.

32 Ndien edikem ete angel afiak etiŋ ɔnɔ mi, ete: Sese! Ndien ami nse nyuŋ nkut Eyen-erɔŋ Abasi, nte mme owo emende enye; iŋ, ererimbot ebiere ikpe enɔ Eyen nsinsi Abasi; ndien ami nkut nyuŋ ntie ntiense.

33 Ndien ami, Nephi, mma nkut nte ke ema emenere enye ke cross enyuŋ ewot enye ke ntak mme idiɔk ŋkpɔ ererimbot.

34 Ndien ke ini ema ekewot enye ami nkut mme otu ererimbot, nte mmɔ ebohode kiet ndinwana ye mme apostle Eyen-erɔŋ; koro angel Jehovah okokot duopeba oro ntre.

35 Ndien otu owo ke ererimbot ema eboho kiet, ndien ami nkut nte ke mmɔ eke edu ke akamba ye ufɔk emi okponde, ukem ukem nte ufɔk emi ete mi ekekutde. Ndien angel Jehovah afiak ɔdɔhɔ mi, ete: Sese ererimbot ye ifiɔk esie; iŋ, sese ufɔk Israel eboho kiet ndinwana ye mme apostle duopeba Eyen-erɔŋ.

36 Ndien edikem ete ami nkut nyuŋ ntie ntiense, nte ke akamba ye ufɔk emi okponde ekedi ntaŋidem ererimbot; ndien enye ɔduɔ, ndien iduɔ esie okpon eti eti. Ndien angel Jehovah afiak ɔdɔhɔ mi, ete: Ntem edidi nsobo eke kpukpru mme idut, mme iman, mme usem, ye mme owo, emi edinwanade ye mme apostle duopeba eke Eyen-erɔŋ.