1 Ndien idahaemi ami nyom mbufo efiɔk, ete ke ini ete mi, Lehi, ama eketre nditiŋ nte prophet ke abaŋa ubon esie, edikem ete Jehovah afiak etiŋ ɔnɔ enye, ete ke ifɔnke ete enye, Lehi, ete ataŋ ikɔt ufɔk esie ikpɔŋ aka ke wilderness; edi ete yak nditɔ iren esie eda nditɔ iban nte nwan, man mmɔ esiak ubon enɔ Jehovah ke isɔŋ enwɔŋɔ.

2 Ndien edikem ete Jehovah ɔnɔ enye uyo ete ami, Nephi, ye nditɔ eka mi iren, yak ifiak ika ke isɔŋ Jerusalem, inyuŋ ida Ishmael ye ikɔt ufɔk esie isuhɔre idi ke wilderness.

3 Ndien edikem ete ami, Nephi, mfiak, ye nditɔ eka mi iren, ika ke wilderness ndidɔk nka Jerusalem.

4 Ndien edikem ete nnyin idɔk ika ufɔk Ishmael, ndien nnyin inyene edidiɔŋ ke iso Ishmael, tutu nnyin itiŋ inɔ enye mme ikɔ Jehovah.

5 Ndien edikem ete Jehovah anam esit Ishmael emem, ndien nko mbon ufɔk esie, tutu mmɔ emen isaŋ mmɔ ye nnyin esuhɔre eka ke wilderness eka tent ete nnyin.

6 Ndien edikem ete nte nnyin isaŋade ke wilderness, sese Laman ye Lemuel, ye nditɔ iban Ishmael iba, ye nditɔ iren Ishmael iba oro ye ikɔt ufɔk mmɔ, esɔŋ ibuot ye nnyin; iŋ, ye ami, Nephi, ye Sam, ye ete mmɔ, Ishmael, ye nwan esie, ye nditɔ iban esie ita.

7 Ndien edikem ke nsɔŋ ibuot oro, mmɔ eke enyene udɔŋ ndifiak nyɔŋ isɔŋ Jerusalem.

8 Ndien idahaemi ami, Nehpi, sia nke ɔfuhɔde ke ntak isɔŋ esit mmɔ, ke ntak oro ami ntiŋ ikɔ ye mmɔ, nte, iŋ, kpa ye Laman ye Lemuel: Sese mbufo edi nditɔ eka mi iren emi ekponde ekan mi, ndien ntak emi mbufo esɔŋde ntem ke esit mbufo, ndien edi nnan ke ekikere mbufo, tutu mbufo eyom ete ami, ekpri eyen eka eren mbufo, ete etiŋ ikɔ nnɔ mbufo, iŋ, ndien ndi uwut ŋkpɔ nnɔ mbufo?

9 Ntak emi mbufo mikpaŋke utɔŋ inɔ ikɔ Jehovah?

10 Ntak emi mbufo efrede ete ke mbufo ema ekut angel Jehovah?

11 Iŋ, ndien ntak emi mbufo efrede mme ikpɔ ŋkpɔ emi Jehovah eke anamde ɔnɔ nnyin, ke ndinyaŋa nnyin nsio ke mme ubɔk Laban, ndien nko ete yak nnyin ibɔ ŋwed oro?

12 Iŋ, ndien ntak emi mbufo efrede ete ke Jehovah ekeme ndinam kpukpru ŋkpɔ nte uduak esie edide, nnɔ nditɔ owo, edieke edide ete ke mmɔ enyene mbuɔtidem ke enye? Ke ntre, yak nnyin ibuɔtidem ke enye.

13 Ndien edieke edide ete ke nnyin ime ibuɔtidem ke enye, nnyin iye ibɔ isɔŋ eŋwɔŋɔ; ndien mbufo eye efiɔk ke ini ke iso ete ke ikɔ Jehovah eye osu ke abaŋa nsobo Jerusalem; koro kpukpru ŋkpɔ emi Jehovah eke etiŋde ke abaŋa nsobo Jerusalem ana osu.

14 Koro sese, Spirit Jehovah eye ɔsɔp etre ndiŋwana ye mmɔ; koro sese, mmɔ esin mme prophet mmɔ, ndien Jeremiah ke mmɔ esin ke ufɔk ŋkpɔkɔbi. Ndien mmɔ eyom ndimen uwem ete mi mfep, tutu ete ke mmɔ ebin enye esio ke isɔŋ oro.

15 Idahaemi sese, ami ndɔhɔ mbufo nte ke edieke mbufo edi ifiakde ika Jerusalem mbufo nko eye etak ye mmɔ. Ndien idaha emi, edieke mbufo enyenede ndumek, edɔk eka isɔŋ oro, ndien eti mme ikɔ emi ami ntiŋde nnɔ mbufo, nte ke edieke mbufo ekade mbufo nko eye etak; koro ntre ke Spirit Jehovah eke enyik mi ete yak ami ntiŋ.

16 Ndien edikem ete ke ini ami, Nephi, mma nketiŋ mme ikɔ emi ye nditɔ eka mi iren, mmɔ ema eyat esit ye ami. Ndien edikem ete mmɔ ema emia mi, koro sese, mmɔ ema eyat esit ata eti eti, ndien mmɔ ema ebɔp mi ye mme uruk, koro mmɔ eke eyomde ndimen uwem mi mfep, man mmɔ ekpɔŋ mi ke wilderness enɔ unam ikɔt ata.

17 Edi edikem ete ami mbɔŋ akam nnɔ Jehovah, nte: O Jehovah, nte mbuɔtidem mi emi odude ke afo edide, afo eye anyaŋa mi osio ke mme ubɔk nditɔ eka mi iren; iŋ, tutu ɔnɔ mi odudu man ami ntat mme uruk emi emi ebɔpde mi.

18 Ndien edikem ete ke ini mma nketiŋ mme ikɔ emi, mme uruk atara ke mme ubɔk ye ikpat mi, ndien ami ami nda ke iso nditɔ eka mi iren, ndien ami mfiak ntiŋ nnɔ mmɔ.

19 Ndien edikem ete mmɔ efiak eyat esit ye ami, ndien eyom ndi mia mi; edi sese, eyen anwan Ishmael kiet, iŋ, ndien nko eka esie, ye eyen eren Ishmael kiet, ema ekpe nditɔ eka mi iren ubɔk, tutu mmɔ emem esit mmɔ, ndien mmɔ etre ndinwana ndi men uwem mi mfep.

20 Ndien edikem ete mmɔ efuhɔ, ke ntak ibak mmɔ, tutu mmɔ ema esuk ibuot ke iso mi, ndien ema ekpe mi ubɔk ete yak ami nfen nnɔ mmɔ ke abaŋa ŋkpɔ emi mmɔ enamde ye ami.

21 Ndien edikem ete ami mma nfen nnɔ mmɔ iŋwaŋ iŋwaŋ kpukpru se mmɔ eke enamde, ndien ami mma nteme mmɔ nte yak mmɔ ebɔŋ akam enɔ Abasi mmɔ eyom erifen. Ndien edikem ete mmɔ enam ntre. Ndien ke ini mmɔ ema eke ebɔŋ akam enɔ Jehovah ema nnyin ifiak isaŋa ke isaŋ nnyin ika tent ete nnyin.

22 Ndien edikem ete nnyin ima isuhɔre ika tent ete nnyin. Ndien ke ini ami ye nditɔ eka mi iren ye kpukpru ufɔk Ishmael ima ike isuhɔre ika tent ete mi, mmɔ ema enɔ Jehovah Abasi mmɔ ekɔm; ndien mmɔ ema ewa uwa ye mme edifɔp uwa enɔ enye.